ཤར་གངས་རི་མ།

3.jpg

༄༅། །ན་མོ་གུ་རུ།
ཤར་གངས་རི་དཀར་བོའི་རྩེ་མོ་ན། །
སྤྲིན་དཀར་བོ་གནམ་ལ་སྙེགས་འདྲ་བ། །
དེ་མཐོང་བའི་མོད་ལ་བླ་མ་དྲན།  །
དྲིན་བསམས་ཤིང་བསམས་ཤིང་དད་པ་སྐྱེས། །
སྤྲིན་དཀར་བོ་ལྡིང་བའི་ཤར་ཕྱོགས་ན། །
འབྲོག་དགེ་ལྡན་རྣམ་པར་རྒྱལ་བ་དེར། །
མཚན་བརྗོད་པར་དཀའ་བའི་རིན་པོ་ཆེ། །
ཕ་བློ་བཟང་གྲགས་པ་ཡབ་སྲས་བཞུགས། །
ལམ་རིམ་པ་གཉིས་ཀྱི་རྣལ་འབྱོར་སོགས། །
ཆོས་ཟབ་ལ་ཤིན་ཏུ་རྒྱས་པར་གསུངས། །
བོད་ཁ་བ་ཅན་གྱི་སྐལ་ལྡན་ལ། །
མགོན་ཁྱོད་ཀྱི་བཀའ་དྲིན་བསམ་མི་ཁྱབ། །
སྒོས་སྙོམས་ལས་འཛིན་པའི་དགེ་འདུན་གྲུབ། །
བློ་ཅུང་ཟད་ཆོས་ལ་ཕྱོགས་པ་འདི།  །
རྗེ་ཡབ་སྲས་རྣམས་ཀྱི་བཀའ་དྲིན་ཡིན། །
དྲིན་ཆེ་བར་ངེས་སོ་ཡབ་སྲས་རྣམས། །
དུས་འདི་ནས་བྱང་ཆུབ་སྙིང་བོའི་བར། །
རྗེ་ཡབ་སྲས་ཁྱེད་རྣམས་མ་གཏོགས་པར། །
སྐྱབས་རེ་ས་གཞན་དུ་མི་འཚོལ་བས། །
ཐུགས་བརྩེ་བའི་ལྕགས་ཀྱུས་དྲང་དུ་གསོལ། །
དྲིན་ཇི་བཞིན་འཁུར་བར་མ་ནུས་ཀྱང་། །
སེམས་ཆགས་སྡང་དབང་དུ་མ་སོང་བར། །
མགོན་ཁྱོད་ཀྱི་བསྟན་པ་འཛིན་པ་ལ། །
དུས་ནམ་ཡང་བརྩོན་པ་བགྱིད་པར་སྨོན། །
ལར་ད་ལྟ་གངས་རིའི་ཁྲོད་འདི་ན། །
རང་བསྟན་པ་འཛིན་པར་ཁས་ལེན་ཞིང་། །
གཞན་བསྟན་འཛིན་དགྲ་བོའི་དྭངས་མར་འཛིན། །
ཚུལ་འདི་ལ་སྐྱོ་བ་གཏིང་ནས་སྐྱེས། །
གཞན་འཕུང་བར་འདོད་པའི་ཀུན་སློང་དང་། །
རྒྱུད་མཚན་འཛིན་དམ་པོས་བཅིངས་ལགས་ཀྱང་། །
ལམ་མཐོན་པོར་གནས་པའི་ཁས་ལེན་བྱེད། །
འདི་བརྟགས་ན་ཀུན་གྱིས་ཁྲེལ་བའི་རྒྱུ། །
ལམ་གོལ་སར་རྒས་པའི་སྡུག་ཡུས་ཀྱིས། །
ཆོས་ཚུལ་བཞིན་བྱེད་པའི་གང་ཟག་ལ། །
རྒྱུད་ཁོང་ནས་འཁྲུགས་པའི་གདུག་སེམས་ཅན། །
གདོན་ཐུགས་ལ་ཞུགས་པ་མ་ལགས་སམ། །
དགྲ་ཉོན་མོངས་འདུལ་ཐབས་མི་བྱེད་པར།  །
གཤེགས་འགྱེད་པ་ཙམ་གྱི་བཤད་ཉན་ཡང་། །
འདྲེ་ཤར་སྒོའི་ཕྱོགས་སུ་གནས་པ་ལ། །
གླུད་ནུབ་སྒོར་གཏོང་བ་དོན་རེ་ཆུང་། །
དོན་དེ་ལྟར་གོ་བའི་བཤེས་གཉེན་ང་། །
སྤྱིར་ལུས་ཅན་ཀུན་ལ་བཀའ་དྲིན་བསམ། །
སྒོས་ཆོས་མཛད་ཡོངས་ལ་དག་སྣང་སྦྱོང་། །
དགྲ་ནང་ན་འདུག་པའི་ཉོན་མོངས་འདུལ། །
མི་ཁོ་བོའི་རྗེས་འཇུག་གྲོགས་པོ་རྣམས། །
ཡིད་ཕྱོགས་སུ་ལྷུང་བས་མ་འཆིང་བར། །
བློ་གཟུ་བོར་གནས་པའི་རྟོག་དཔྱོད་ཀྱིས། །
ལམ་དྲང་བོར་ཞུགས་པ་ཅིས་ཀྱང་ལེགས། །
གཏམ་འདི་ལ་བརྟེན་ནས་འགྲོ་བ་རྣམས། །
བྱམས་སྙིང་རྗེས་དྲངས་པའི་སེམས་བསྐྱེད་དང་། །
དབྱིངས་སྤྲོས་བྲལ་རྟོགས་པའི་ལྟ་བ་ཡིས། །
དཔལ་བླ་མེད་བྱང་ཆུབ་མྱུར་ཐོབ་ཤོག །
སྐུ་ལ་མཚན་དཔེའི་དཔལ་འབར་ཞིང་། །
གསུང་དབྱངས་ཡན་ལག་དྲུག་ཅུས་བརྒྱན། །
ཐུགས་ནི་ཟབ་ཡངས་མཁྱེན་བརྩེའི་གཏེར། །
དཔལ་ལྡན་བླ་མའི་བཀྲ་ཤིས་ཤོག །
ཅེས་པ་འདི་ནི་ཐམས་ཅད་མཁྱེན་པ་ཆེན་པོ་དགེ་འདུན་གྲུབ་པ་དཔལ་བཟང་བོས་གདུང་དབྱངས་སུ་མཛད་པའོ། །

རྩོམ་སྒྲིག་པ། རིག་འཛིན་ཚེ་རིང་།

དཔྱད་མཆན 0 ཡོད།