འབྲུག་ཆུ་བོད་ཡུལ་ནས་ལོ་རེའི་ཧོར་ཟླ་ལྔ་པའི་ཚེས་ལྔ་ཉིན་རྡོག་ལྡིང་ཞབས་བྲོ་འཁྲབ་པའི་སྲོལ་ཡོད།
རྡོག་ལྡིང་ཞབས་བྲོ་ཡི་སྤྱིའི་ནང་དོན་ལ་ལྡེམ་བྲོ་དང་སྐྱ་རེངས།བསྟན་ལུང་བཅས་ཁག་གསུམ་ལས་གྲུབ་ཡོད་པར་བཤད།ལྡེམ་བྲོ་ནི་གཙོ་བོ་རང་བྱུང་ཁམས་ཀྱི་རི་ཆུ་ལུང་གསུམ་དང་སྐྱེ་དངོས་མཐའ་དག་ལ་བསྟོད་བསྔགས་མཛད་ནས།སྐྱེ་ཕོ་མོ་རྒན་གཞོན་ཀུན་གྱིས་འབྲུ་རིགས་སྣ་ལྔར་ལོ་ལེགས་འབྱུང་བའི་རྟེན་འབྲེལ་དུ་ཕན་ཚུན་གཅིག་གིས་གཅིག་ལ་ལག་པ་སྦྲེལ་བཞིན་གླུ་ལེན་པའི་ཞབས་བྲོའི་ནང་དོན་ཞིག་ལ་གོ་བ་ལེན་པ་ཡིན།སྐྱ་རེངས་ནི་ཞབས་བྲོའི་བརྗོད་བྱ་གཙོ་བོ་མོ་རྣམས་ཡིན་ཞིང་།ཕན་ཚུན་གཅིག་གིས་གཅིག་ལ་དྲི་བ་དྲིས་ལན་གྱི་ཚུལ་བཞིན་དུ་ལེན་པའི་འཁྲབ་སྟངས་ཁྲོད།ཞོགས་པའི་སྐྱ་རེངས་རི་རྩེ་ནས་ཤར་བ་དང་ཉིན་གཅིག་གིས་བྱ་བ་ལ་ཡིད་ཆེས་དང་རེ་སྨོན་གྱིས་ཁེངས་ནས་སྙིང་སྟོབས་དང་ངར་ཤུགས།གསོན་ཤུགས་རྒྱས་པའི་ཉམས་སྣང་གིས་ཕྱུག་ཅིང་།ག་ས་གང་དུ་གསར་སྐྱེས་ཀྱི་ལྗང་མྱུག་རྒྱས་པའི་འཛུམ་མདངས་ཀྱི་རྣམ་པར་དགོད་པའི་རིག་གནས་ཀྱི་བརྗོད་སྙིང་མང་པོ་ཞིག་འདུས།བསྟན་ལུང་ནི་ཆེས་མཐའ་མཇུག་གི་ཞབས་བྲོའི་ནང་དོན་ཞིག་ལ་ངོས་འཛིན།གཙོ་བོ་རང་བྱུང་ཁམས་ཀྱི་མཛེས་ལྗོངས་ལ་བསྟོད་བསྔགས་མཛད་པ་དང་འཚོ་བ་གསར་པར་བསྔགས་བརྗོད་བྱས་ཏེ།དགའ་སྟོན་གྱི་མཛད་སྒོ་དང་དགོན་སྡེ་རུ་བླ་སྤྲུལ་གདན་འདྲེན་ཞུས་ཏེ་ལྷ་དང་བླ་མའི་ལུང་བསྟན་ལ་ཡིད་ཆེས་དང་རེ་སྨོན་བྱེད་པའི་ནང་དོན་ཞིག་ལ་ངོས་འཛིན་པ་ཡིན།
འབྲུག་ཆུ་རིག་གནས་དུས་ཆེན་སྟེང་བུད་མེད་ཚོས་རྡོག་ལྡིང་ཞབས་བྲོ་འཁྲབ་པའི་ཚུལ།
རྡོག་ལྡིང་ཞབས་བྲོ་འཁྲབ་པའི་ཉིན་དེར་སྐྱེ་ཕོ་མོ་རྒན་གཞོན་ཀུན་གྱིས་གཟབ་མཆོར་ལེགས་པོར་སྤྲས་ཏེ་འཁྲབ་སྟོན་ལ་ཞུགས་པ་ཞིག་ཡིན།ཕོ་སྐྱེས་ཚོས་སྐྲ་རིང་པོར་བསྐྱུར་ཅིང་དཔྲལ་བར་རས་ལག་མཐིལ་ཙམ་ཞིག་སྐྲ་དཀྲི་བྱེད་དུ་འཇོག་པ།ལུས་ལ་བོད་ལྭ་གྱོན་པ་དང་།བུད་མིད་ཚོས་སྐྲ་ལན་བུ་བསླས་ཤིང་སྣེ་མོར་ཟི་ནག་མཐུད་དེ་རས་དམར་པོས་རྐེད་པར་གསབ།མགོར་ཟར་རས་ནག་པོ་དཀྲིས་ཏེ་རྒྱན་ཆ་མི་འདོགས།གོས་ནི་སྟོད་ཐུང་ལྟ་བུའི་རུམ་ཅན་འཕང་ལོ་མན་དུ་མི་དཔྱང་བ་ཞིག་གྱོན་ཞིང་རྐེད་པར་རང་བཏགས་ཟར་རས་ཁྲ་ཁྲའམ་སྔོན་པོ་འཆིང་བར་བྱ།ཁྱད་པར་དུ་བྲང་ཁུག་སྟེང་བྱུ་རུ་སོགས་རིན་ཆེན་སྣ་མང་གིས་སྤུད་དེ་དངུལ་གྱི་མི་ལོང་ཞིག་བཏགས།སྟོད་ཐུང་ལ་སྒྲོག་གུ་དང་འཆིང་ཐག་ཅི་ཡང་མིད་པར་ཕུར་ཁ་རུམ་ཁ་སོག་རྩེ་བཅས་པ་འཇའ་དྲུག་གིས་བཀླུབས།རྐང་སྣམ་རིང་ཞིང་ཡངས་པ་ཅན་ཞིག་གྱོན།ཡང་ཕོ་སྐྱེས་ཁག་ཅིག་གིས་མགོ་ལ་ལག་རས་དཀྲིས་ལ།ལུས་ལ་སྨད་གཡོག་ནག་པོ་རྒྱལ་མཚན་ལྟ་བུ་ཁ་དོག་སྣ་མང་ཅན་གྱོན་པའི་སྟེང་རྐེད་པར་གྲི་ཆུང་དང་དུ་ཁུག་ལ་སོགས་བཏགས་ཏེ་རྡོག་ལྡིང་ཞབས་བྲོའི་ཁྲོད་ཞུགས་པ་ཞིག་ཡིན།འཁྲབ་སྟངས་ཀྱི་ཆ་ནས་དེ་ནི་གླུ་དང་ངག ཞབས་བྲོ་བཅས་ལས་གྲུབ་པའི་རྩེད་མོ་ཞིག་ཡིན།མི་རྣམས་ཀྱི་ལག་པ་གཅིག་གིས་གཅིག་ལ་སྦྲེལ་ཞིང་དཔུང་པ་མཉམ་གཤིབ་སྒོས་གླུ་སྒོ་ཕྱེ་དུས་གཞི་ནས་སྟངས་སྟབས་མཉམ་གཅིག་ཏུ་སྤོ་དགོས། དེ་ལ་རང་གནས་སུ་སྤོ་བ་དང་རྐང་པ་མཉམ་གཅིག་ཏུ་སྤོ་བ།རང་དབང་གིས་སྤོ་བར་བྱེད་པ་བཅས་མི་འདྲ་བ་གསུམ་ལས་གྲུབ་ཡོད་པ་ཡིན།འཁྲབ་སྟོན་བྱེད་མཁན་གཙོ་བོ་ནི་བུད་མིད་ཚོ་ཡིན་ཞིང་། ཕོ་སྐྱེས་རྣམས་གླུ་ཚིག་གི་འགྱུར་བ་དང་བསྟུན་ནས་གཡུ་འབྲུག་སྔོན་མོ་ས་ལ་བབས་པ་ལྟ་བུའི་ཞབས་བྲོ་དེ་བུད་མིད་རྣམས་ཀྱི་རྒྱབ་ཏུ།སྐད་གདངས་མཐོ་ཞིང་དཔའ་ངར་གསོན་ཤུགས་ཡོད་པའི་སྒོ་ནས་མཚམས་མི་འཇོག་པར་འཁྲབ་སྟོན་བྱེད་པ་ཡིན།དེ་ལ་ཐོག་མར་འཁྲབ་མཁན་ཕྱོགས་གཉིས་ཀའི་མགོ་བོ་མར་ལ་ཐེངས་གསུམ་སྒུར་བ་དང་།རྗེས་སུ་རྐང་པ་ས་ལ་ཐེངས་གསུམ་བརྒྱབ་རྗེས་འཁྲབ་སྟོན་གྱི་མགོ་དངོས་སུ་རྩོམ་པ་ཞིག་ཡིན།།
《ཀྲུང་གོའི་བོད་ལྗོངས》ལྟར་བསྒྲིགས།