འུ་ཅག་ཁ་བ་རི་བའི་ཡུལ་གྱི་སྔོན་བྱོན་མེས་པོ་དམ་པ་ཚོའི་རྣམ་དཔྱོད་རིག་སྟོབས་ཀྱིས་གནམ་སའི་དཀར་ངོགས་འདིར་ཕྱི་ནང་གི་བྱ་དངོས་མི་ཉུང་བ་ཞིག་གི་ཁྱད་ནུས་ཀྱི་རྣམ་པ་དང་། བྱེད་རྩོལ་མྱོང་བྱའི་རིགས་མང་བོ་ཞིག་ལ་རྒྱུས་ལོན་ཤེས་རྟོགས་ཀྱིས་གཏན་འབེབས་མཛད་དེ། དེང་གི་དུས་འདིར་ཚན་རྩལ་རིག་འཕྲུལ་གྱི་དཔྱད་མྱོང་ལས་ཀྱང་སྔོན་ཐོན་དུ་གྱུར་པའི་རྣམ་པ་མང་དུ་སྣང་། ཁྱད་པར་དུ་མདོ་དབུས་མཐོ་སྒང་གི་ཡུལ་དུ་ང་ཚོ་བོད་མི་རིགས་ཀྱིས་གནས་གཞི་བྱས་པ་ནས་གནའ་བོའི་ཞིང་འབྲོག་གི་ངལ་རྩོལ་ལས་རིགས་གཉེར་རིམ་ཁྲོད། མེས་པོ་གོང་མ་ཚོས་འཚོ་བའི་ཐོན་སྐྱེད་བྱ་གཞག་ལ་དམིགས་པའི་ཉམས་མྱོང་འོག རང་བྱུང་ཁམས་ཀྱི་ཡར་ནམ་མཁའི་ཉི་ཟླ་སྐར་གསུམ་འཆར་ནུབ་རྒྱུ་བགྲོད་དང་། འཇའ་སྤྲིན་རླུང་བུ་སོགས་ཀྱི་འབྱུང་འགྱུར། མར་དོག་མོ་ས་གཞིའི་ཆུ་རྒྱུན་སྐྱེ་དངོས་སྣ་ཚོགས་ཀྱི་འགྱུར་ལྡོག་དང་། སེམས་ལྡན་སྲོག་ཆགས་སོགས་ཀྱི་བྱེད་སྤྱོད་བཅས་ལ་བརྟག་ཅིང་དཔྱད་དེ། ལོ་ཟླའི་ལེགས་ཉེས་དང་ཁ་ཆར་བུ་ཡུག་སད་སེར་སོགས་འབྱུང་བཞིའི་གནོད་པ་ཅི་ཡོང་སྔོན་དཔག་ཚོད་འཛིན་དང་། ཐན་སྐྱོན་མུ་གེ་ནད་རིམས་སོགས་ཀྱི་འཇིཊ་ཉེན་ཇི་འདྲ་འབྱུང་མིན་བཅས་ལ་བརྟག་དཔྱད་ཡུན་རིང་བྱས་པ་ལས་མྱོང་བ་ཁྱད་པར་ཅན་ཐོན་པའི་ཞལ་གདམས་བརྗོད་ཀྱིས་མི་ལངས་པའི་ཚོད་དུ་ཡོད་ནའང་། སྐབས་དོན་གནའ་རབས་ནས་རིམ་བརྒྱུད་ཀྱི་ཉམས་མྱོང་དང་གདམས་ངག་དེ་དག་ཕྱི་རབས་པ་ང་ཚོས་ཀྱང་རྟོགས་ཤེས་ཀྱིས་མི་ཉམས་རྒྱུན་འཛིན་དགོས་པ་གལ་གནད་དུ་བཟུང་ནས་འདིར་དཔེར་མཚོན་ལྟ་བུ་ཞིག་གི་ཚུལ་དུ་ཉུང་བསྡུས་ཤིག་བརྗོད་པར་བྱ་བ་ལ།
དང་བོ། ཉི་མར་བརྟག་ཚུལ།
མེས་པོའི་ཁ་རྒྱུན་ལ། སྟོན་རབས་ཆད་ཉི་མས་ཕྱི་བལྟས་བལྟ།། ཁོང་སོ་ནམ་བགྲེས་པོས་ཟོར་བ་རྡོར།། སོས་རབས་ཆད་ཉི་མས་ཕྱི་བལྟས་བལྟ།། ཁོང་ལུག་རྫི་བགྲེས་པོས་གངས་ས་འཚོལ།། ཞེས་སྟོན་དུས་ཉི་མའི་ཕྱི་བལྟས་བྱུང་ན་ཐན་པ་འབྱུང་བ་དང་། དབྱར་དུས་ཉི་མས་ཕྱི་བལྟས་བྱུང་ན་གངས་ཉེན་འབྱུང་བའི་རྟགས་སུ་བཤད་པ་དང་། ཡང་ཉི་མས་གུར་ཕུབ་ན་ཟླ་བ་གཅིག་ལ་འབབ་རྟགས་དང་། ཉི་ཤར་གྱི་དུས་སུ་ཤར་ལྷོའི་མདངས་ནག་ན་ཉིན་གུང་སྔོན་ལ་ཆར་བ་འབབ་པ། ཉི་ནུབ་ཀྱི་དུས་ནུབ་བྱང་ཁུལ་གྱི་མདངས་ནག་ན་ནམ་ཕྱེད་ལ་ཆར་བ་འབབ་པ་དང་། ཕྱི་དྲོ(སྤྲེལ་དུས)ཉི་མ་མ་ནུབ་པའི་སྔ་རོལ་ཏུ་ཉི་མའི་དཀྱིལ་འཁོར་ལ་རྣ་ཆ་བྱུང་ན་ཕྱི་ཉིན་ཆར་བ་ངེས་པར་འབབ་པའི་རྟགས་སུ་ངོས་འཛིན་བྱེད།
གཉིས་པ། ཟླ་བར་བརྟག་ཚུལ།
ཟླ་བ་ཡར་ངོའི་ཚེས་གཅིག་དང་། གཉིས། གསུམ་བཅས་ཀྱི་ཚེས་རུའི་སྣེ་བྱང་ངོས་སུ་མཐོ་ན་ལོ་དེར་འབབ་ཞོད་ཞན་པ་དང་། ཚེས་རུའི་སྣེ་ངོས་གཉིས་མཉམ་ན་འབབ་ཞོད་ཆེ་ལ་དགུན་གངས་སྐྱོན་འབྱུང་བའི་རྟགས། ཟླ་བས་གུར་ཕུབ་ན་ཟླ་གཅིག་ལ་ཐན་པ་འབྱུང་བ་དང་། ཟླ་བར་འཇའ་ཟུག་ནའང་ཐན་པ་འབྱུང་རྟགས། སྨིན་ཟླ་བའི(ཟླ་བ་བཅུ་བ)ཚེས་བཅོ་ལྔར་སྐར་མ་སྨིན་དྲུག་ཟླ་བའི་སྔོན་དུ་བྱུང་ན་ལོ་ཕྱུགས་ལ་ཉེས་ཤིང་ནད་ཡམས་འབྱུང་བའི་རྟགས་དང་། ཟླ་བའི་རྗེས་ལ་བྱུང་ན་འཁྲུག་པ་དང་རླུང་བུ་འབྱུང་བའི་རྟགས། དཔྱིད་འབྲིང་གི་ཚེས་ཉེར་དགུའི་ནམ་ལངས་སམ་དཔྱིད་མཐའ་མའི་ཚེས་གཅིག་བཅས་ཀྱི་མུན་མཚམས་སུ་ཟླ་བའི་ཚེས་རུའི་སྣེ་གཉིས་ཤར་ནུབ་ཏུ་དྲང་ཐད་མཉམ་ན་དགེ་བ་དང་། བྱང་ངོས་སུ་མཐོ་ན་མུ་གེ་འབྱུང་ཉེན། ལྷོར་མཐོ་བར་སྣང་ན་བཀྲ་ཤིས་ཤིང་ཆར་ཆུ་དུས་སུ་འབབ་པའི་རྟགས་སུ་ངོས་འཛིན་བྱེད།
གསུམ་པ། སྐར་མར་བརྟག་ཚུལ།
སྐར་མ་ཐམས་ཅད་འཁྲུགས་པར་གྱུར་ན་ཐོག་སེར་དང་ནད་རིམས་འབྱུང་ཉེན་དང་། སྐར་མདའ་སྒྲ་དང་བཅས་ལྷུང་ན་ཐན་སྐྱོན་འབྱུང་རྟགས་དང་། སྐར་མ་སྨིན་དྲུག་ལྷོར་བྱུང་ན་ཐན་སྐྱོན་དང་མུ་གེ་འབྱུང་བ་དང་། བྱང་དུ་བྱུང་ན་ལོ་ལེགས་ཤིང་ཆར་ཆུ་མང་བའི་རྟགས་སུ་ངོས་འཛིན་བྱེད།
བཞི་བ། སྤྲིན་པར་བརྟག་ཚུལ།
ན་བུན་དཀར་པོ་རིམ་པ་གཉིས་གསུམ་གྱིས་རི་སྐེད་བཅིངས་ན་ཆར་ཆེན་འབབ་ངེས་དང་། ནམ་ལངས་དུས་ཤར་ཕྱོགས་ནས་སྤྲིན་དམར་པོ་ཐག་དམར་འཐེན་འདྲ་ནུབ་ཏུ་རྒྱུག་ན་དཀར་ཕྱོགས་ལྷ་ཡི་ཆར་ཞེས་མྱུར་དུ་འབབ་པ་དང་། ཤར་ལྷོའི་མཁའ་ལ་པད་འདབ་བརྩེགས་འདྲའི་སྤྲིན་པ་བར་གསེང་མེད་པར་འབྲེལ་ན་ཉིན་ཞག་གཅིག་ལ་འབབ་རྟགས། ཤར་ཕྱོགས་ཀྱི་མཁའ་ལ་ལུག་གི་ལྟོ་ཚིལ་འདྲ་བའི་སྤྲིན་དཀར་འདབ་ལེགས་བརྩེགས་པ་བྱུང་ན་ཉིན་དེ་ཡི་རྗེས་ཆར་འབབ་རྟགས། ཉི་ཤར་གྱི་མཚམས་ཕྱེ་ལེབ་ཀྱི་གཤོག་པ་བརྐྱངས་འདྲའི་འཇའ་སྤྲིན་སྙོམས་པོས་ཤར་ཕྱོགས་ཁེབས་ན་མི་འགྱངས་པར་ཆར་ཆེན་འབབ་པར་འགྱུར། གཞན་ཡང་སྤྲིན་ནག་གིས་བྱང་སྐར་སྤུན་བདུན་དང་དགུ་ཚིགས་སྐྱ་མོ་སྒྲིབ་ན་ཆར་བ་འབབ་རྟགས། སྤྲིན་ལྷོ་ནས་བྱང་དུ་མགྱོགས་པོར་བགྲོད་ན(བྱང་གཡག་གུའི་མགོ་འཕིག)ཅེས་གངས་ཆར་ཆེ་ཙམ་འབབ་ལྟས་དང་། ནུབ་ནས་བྱང་བགྲོད་བྱས་ན་འབྲིང་ཙམ་འབབ། བྱང་ངོས་ནས་ཤར་དུ་རྒྱུ་ན་ཉུང་ཙམ་དང་ཡང་ན་གཏན་ནས་མི་འབབ་པའི་རྟགས། ནུབ་ངོས་ནས་ཤར་ཕྱོགས་སུ་དལ་ཞིང་བརྟན་པོར་རྒྱུ་ན་དུས་ཡུན་རིང་ཙམ་ལ་མི་འབབ་པའི་རྟགས་དང་། བྱང་སྤྲིན་ལྷོ་རུ་རྒྱུ་ན(ལྷོའི་ཙན་དན་གྱི་མེ་འབར)ཞེས་ཐན་སྐྱོན་ཡོང་བའི་རྟགས་དང་། སྟོན་དུས་སྤྲིན་པ་ལྷོ་ནས་བྱང་ལ་མང་ཙམ་རྒྱུ་ན(ཤིང་ལོ་བྱང་འདྲེན)ཞེས་ཐན་པ་ཡུན་ཐུང་ཙམ་ལ་འབྱུང་བར་བཤད། གཞན(དགོང་དམར་དམར་པོ་མེ་རེད། ནག་པོར་གྱུར་ན་ཆུ་རེད)ཅེས་དགོང་མོའི་མཚམས་སྤྲིན་གྱི་མདངས་དམར་པོར་གྱུར་ན་ཕྱི་ཉིན་ཉི་མ་དྲོ་བའི་རྟགས་དང་། དེ་འཕྲལ་མདངས་ནག་པོར་གྱུར་ན་འབབ་པའི་རྟགས། ཉིན་ཕྱེད་དུས་སུ་སྤྲིན་གྱིས་ཉི་མ་སྒྲིབ་ན་མཚན་ལ་ཆར་བ་འབབ་རྟགས་དང་། ཉི་ཤར་གྱི་དུས་ཤར་ཕྱོགས་སུ་སྤྲིན་འཕགས་ན་རླུང་དང་བཅས་ཆར་མྱུར་དུ་འབབ། ནམ་ལངས་ཁར(ཡོས་ཀྱི་དུས)ཤར་ལྷོར་སྤྲིན་བྱུང་ན་ཉི་དྲོས་ཀྱི་སྐབས(སྦྲུལ་གྱི་དུས)སུ་ཆར་འབབ་པར་འགྱུར། ཉི་ནུབ་ཏུ་སྤྲིན་པ་ནག་པོ་བྱུང་ན་རླུང་ཆར་འབྱུང་ངེས(ཞོད་པོ་ཆེ་དགོང་དྭངས)ཞེས་ཉི་ནུབ་ཁ་ཆར་དྭངས་ན་ཞོད་ཆེན་འབྱུང་བའི་རྟགས་དང་། རི་བོ་སྤྲིན་གྱིས་སྒྲིབ་ན་མཚན་དང་མཚན་སྦྲེལ་ནས་ཆར་བ་འབབ་རྟགས། ཉི་ཤར(འབྲུག་གི་དུས)ལྷོ་ཕྱོགས་ནས་སྤྲིན་བྱུང་ན་རླུང་དང་བཅས་དྲག་ཆར་འབབ་རྟགས་དང་། ནུབ་བྱང་དུ་སྤྲིན་པ་ནག་པོ་བྱུང་ན་འབྲུག་སྒྲ་དང་བཅས་ཆར་འབབ་རྟགས། མཚན་མོར་སྤྲིན་པ་ནུབ་ཏུ་རྒྱུ་ན་ཆར་སྤྲིན་འཁྲུགས་ཤིང་ཆར་རླུང་འབྱུང་བ་དང་། དགུན་ཁར་ཤར་དུ་སྤྲིན་པ་ལྷོར་རྒྱུ་ན་གངས་སྐྱོན་དང་གྲང་ངར་ཆེ་རྟགས། དབྱར་དུས་ཤར་ནས་སྤྲིན་པ་ནུབ་ལ་རྒྱུ་ན་ཐན་པ་འབྱུང་བའི་རྟགས་སུ་ངོས་འཛིན་བྱེད།
ལྔ་བ། འཇའ་འོད་ལ་བརྟག་ཚུལ།
འཇའ་སྣེ་སྤང་ལ་ཟུག་ན་ཆར་བ་འབབ་པ་དང་ཆུ་ལ་ཟུག་ན་གནམ་ཡེར་འགྲོ་བའམ་ཆར་ཉུང་ཙམ་འབབ་རྟགས། ཉི་ཤར་དུ་འཇའ་ཟུག་ན་ཆར་ཉུང་ངུ་འབབ་པ་དང་། ཉི་ཤར་ལ་ཉི་མར་འཇའ་ཟུག་ན་ཆར་བ་འབབ་རྟགས། ཟླ་བར་འཇའ་ཟུག་ན་གངས་སྐྱོན་དང་གྲང་ངད་འབྱུང་རྟགས། འཇའ་ཁ་དོག་སྣ་ལྔ་རང་བཞིན་གྱིས་ཤར་དུ་ཟུག་ན་ཆར་བ་འབབ་རྟགས། དངུལ་ཆུའི་མདོག་ཅན་ནུབ་ཏུ་ཟུག་ཅིང་ཟླ་བའི་ཁྱིམ་དུ་གནས་ན་མི་འགྱངས་པར་ཆར་ཆེན་འབབ་པའི་རྟགས་བཅས་བཤད་པ་དང་། གཞན་ཡང་འཇའ་གཟུགས་ལ་བརྟག་ཅིང་དཔྱད་སྟོབས་ཀྱིས་ཀྱང་ལེགས་ཉེས་སྐོར་སོགས་མང་དུ་བཤད་ཀྱི་ཡོད་པས་འདིར་མ་བཀོད།
ཞར་བྱུང་ཐོ་རེངས་ཀྱི་སྐྱ་ངོགས་དྭངས་ན་ཆར་ཆུ་ལེགས་ཤིང་སྐྱ་ནམ་རྒྱས་པར་འགྱུར་བ་དང་། སྐྱ་ངོགས་མི་གསལ་ཞིང་རབ་རིབ་ཏུ་གྱུར་ན་ནད་རིམས་ལོ་ཉེས་འབྱུང་ལྟས། དབྱར་དུས་མཚན་ལ་ནམ་མཁའ་མདངས་གསལ་ན་ཉིན་མཚན་སྦྲེལ་ནས་ཆར་འབབ་རྟགས་དང་། ཉི་ཤར་གྱི་དུས་ཤར་ལྷོའི་མདངས་ནག་ན་ཉིན་གུང་སྔོན་དུ་ཆར་འབབ་རྟགས། ཉི་ནུབ་ཏུ་ནུབ་བྱང་མདངས་ནག་ན་མཚན་ཕྱེད་ལ་ཆར་འབབ་པའི་རྟགས།(དགུན་ཤར་ཆེན་ལ་གངས་ཆེན)ཞེས་དགུན་ཁ་སྔ་དྲོར་ཤར་དུ་ལྷགས་རླུང་ཤུགས་ཆེན་བརྒྱབ་ན་གངས་སྐྱོན་དང་གྲང་ངར་ཆེ་རྟགས།(དབྱར་ཤར་ཆེན་ལ་ཐན་ཆེ)ཞེས་དབྱར་དུས་སྔ་དྲོར་ལྷགས་རླུང་ཤུགས་ཆེན་བྱུང་ན་ཐན་པ་ཆེ་བའི་རྟགས། ནུབ་ཏུ་གློག་འོད་འཁྱུག་ན་ཆར་བ་རྒྱུན་རིང་འབབ་རྟགས་དང་། ཉི་ཤར(འབྲུག་དུས)གློག་འོད་དྲག་ཏུ་འཁྱུག་ན་རླུང་ཆེན་འབྱུང་རྟགས། ཞོགས་པར་འབྲུག་སྒྲ་སྒྲོག་པའམ་ཉིན་ཕྱེད་དུ་འབྲུག་སྒྲ་བྱུང་ན་ཐན་པ་འབྱུང་བའི་རྟགས།
གཞན་དགུན་ཁར་དགུ་དང་བོའི་དུས་གནམ་གཤིས་གྲང་མོ་བྱུང་ན་ཕྱི་ལོར་འབྲུ་རིགས་འོངས་ཆེ་བའི་རྟགས་དང་། དགུ་གཉིས་པའི་དུས་གནམ་གཤིས་གྲང་ཞིང་རླུང་བུ་བྱུང་ན་དཀར་ཆུ་དང་ལོ་འབྲས་ལེགས་པའི་རྟགས(དབྱར་གནམ་གྲང་དུས་འབབ། དགུན་གནམ་དྲོད་དུས་འབབ)ཅེས་དབྱར་ཁ་གནམ་གཤིས་གྲང་ན་འབབ་པ་དང་། དགུན་དུས་གནམ་གཤིས་དྲོད་ན་འབབ་པར་ངོས་འཛིན་བྱེད་པ་ཡིན།
དྲུག་པ། རང་བྱུང་ཁམས་ལ་བརྟག་ཚུལ།
སྟོན་གྱི་དུས་སུ་ཆུ་མདོག་གློ་བུར་དུ་འགྱུར་ན་ཁ་བ་ངེས་པར་དུ་འབབ་པའི་རྟགས་དང་། ཆུ་མིག་ཕྲ་མོ་གློ་བུར་དུ་སྐམ་པ་ཡིན་ན་གནམ་ཡེར་ཏེ་ཐང་བའི་རྟགས། བོད་ཟླ་བརྒྱད་དང་དགུ་བའི་ནང་སྐྱེ་དངོས་རྩི་ཤིང་ལ་མེ་ཏོག་བཞད་ན་ལོ་དེའི་དགུན་ཁར་ཁ་བ་ངེས་པར་འབབ་པའི་རྟགས། དགུན་དུས་ཉི་མ་སྤྲིན་གྱིས་སྒྲིབ་སྟེ་རབ་རིབ་ལས་མི་དྲོ་ན་ཡང་། འཁྱག་པ་དང་གངས་ལས་འཁྱག་ཆུ་བཞུར་ན་ཁ་བ་ངེས་པར་དུ་འབབ་རྟགས་ཡིན།
བདུན་པ། སྲོག་ཆགས་ལ་བརྟག་ཚུལ།
འདབ་ཆགས་བྱེའུ་ཁྱུ་འཕུར་སྐབས་གཤོག་པའི་ལྡེབ་ཤུགས་སྔར་ལས་ལྗི་བའི་ཚུལ་དུ་སྣང་ན་ཁ་བ་འབབ་རྟགས་དང་། རྫ་བྱེའུ་མགོ་དམར་དང་རི་བྱེའུ་མགོ་དཀར་གྲོང་བརྡལ་དུ་འཕུར་ཉུལ་བྱེད་ན་ཁ་བ་འབབ་པའི་རྟགས། བྱ་རོག་གི་ཚང་ལུང་བའི་མདོར་བཅས་ཡོད་ན་དབྱར་ཆར་ཞོད་ཆེ་བ་དང་། ལུང་བའི་ཕུར་བཅས་ཡོད་ན་ཆར་ཞོད་ཆུང་བའི་རྟགས། བྱ་རྒོད་ཀྱིས་ནམ་མཁར་ལྡིང་སྐོར་དལ་ལ་ལྗི་བའི་ཚུལ་གྱིས་བརྒྱབ་ན་ཁ་ཆར་འབྱུང་བའི་རྟགས། སྟོན་གྱི་དུས་སུ་ཁྲུང་ཁྲུང་ལྷོ་རུ་འཕུར་ཚེ་ཁ་བ་འབབ་རྟགས་དང་། ཡང་དཔྱིད་དུས་ཁྲུང་ཁྲུང་བྱང་ལ་འཕུར་ཚེ་ཁ་ཆར་འབབ་ངེས། དགུན་དུས་བྱ་སྐྱ་ཀས་ཀྲའེ་ཀྲའེ་ཞེས་ལོག་སྐད་མང་བོ་འབྱིན་ན་ཁ་བ་ཡུན་རིང་འབབ་རྟགས་དང་། སྐྱ་ཀས་ཚག་སྒྲ་སྒྲོགས་པ་དང་ཁོག་སྐད་འབྱིན་ན་རླུང་དམར་དང་རླུང་ཆེན་འབྱུང་རྟགས། སྟོན་དུས་དང་དགུན་དུས་བྱ་སྲེག་པས་སྐད་མང་འབྱིན་ཞིང་རི་ཐང་དུ་འཚོ་སྡོད་བྱེད་ན་ཁ་ཆར་མི་འབབ་པའམ། ཡང་ན་ཉུང་ངུ་ལས་མི་འབབ་པའི་རྟགས། དགུན་དུས་བྱ་སྲེག་པ་དང་འདབ་ཆགས་བྱ་རིགས་གཞན་མང་བོས་སྐད་མང་དུ་སྒྲོག་ན་ཁ་ཆར་ཉུང་ངུ་ལས་མི་འབབ་པའི་རྟགས། ནམ་རྒྱུན་བྱ་སྐྱུང་ཀའི་འདུག་གནས་སྤང་རི་དང་བྲག་རྫོང་ཡིན་ནའང་། སྟོན་དུས་རི་དང་སྤང་ཐང་དུ་བབས་ནས་སྐད་ངན་འབྱིན་ཞིང་འཚོ་སྡོད་བྱེད་ན་གངས་ཆར་ཆེན་པོ་འབབ་རྟགས། དཔྱིད་སྨད་དང་དབྱར་སྨད་དུ་ཁུ་བྱུག་གིས་བྲག་རྩེ་དང་ནགས་གསེབ་ཏུ་གནས་སྡོད་ཀྱིས་སྐད་མང་སྒྲོགས་ན་ཁ་བ་མང་དུ་འབབ་རྟགས་དང་། ཡང་རི་འདབས་དང་ཐང་གཞུང་དུ་གནས་སྡོད་ཀྱིས་སྐད་ཉུང་ཙམ་ལས་མི་སྒྲོགས་ན་ཁ་ཆར་ཉུང་ཞིང་ཐན་པ་འབྱུང་བའི་རྟགས། བྱ་གོང་མོའི་གཏན་སྡོད་འཚོ་གནས་ནི་རྫ་སྤང་མཚམས་དང་རི་སྐེད་ཡན་ཆད་ཡིན་ཡང་། དཔྱིད་དུས་རི་ཞོལ་དུ་བབས་ནས་ཅ་ཅོའི་སྐད་སྒྲོག་ན་ཁ་ཆར་འབབ་རྟགས་དང་། བྱ་པུ་ཤུད་སོགས་གཙུག་ལྡན་བྱ་རིགས་ཀྱིས་ཅ་ཅོ་མང་དུ་སྒྲོག་ན་ཞག་གསུམ་ནང་ཚུན་ཆར་བ་འབབ་རྟགས་ཡིན།
གཞན་འདབས་ཆགས་ཀྱི་སྤྱོད་ཚུལ་ལས་སོ་ནམ་པས་ཞིང་འདེབས་ཀྱི་དུས་ལ་བརྟག་ཚུལ་ནི། བྱེའུ་ཅོ་ཀས་སྐད་འབྱིན་པ་དང་བྱེའུ་པང་སྐྱུར་སླེབས་དུས་ཞིང་སྔ་འདེབས་སྔ་མ་རན་པ་དང་། བྱ་པུ་ཤུད་ཐོན་པ་དང་འཕྱི་བ་མལ་ལས་ལངས་དུས་ཞིང་སྔ་འདེབས་ཕྱི་མ་རན་པ་ཡིན། བྱ་པུ་ཤུད་སྐད་འབྱིན་དུས་ཞིང་བར་འདེབས་སྔ་མ་རན་པ་དང་། བྱ་ལུག་རྫི་མོ་སླེབས་དུས་ཞིང་བར་འདེབས་ཕྱི་མ་རན་པ་ཡིན། བྱེའུ་ཁུག་རྟ་འབྱོར་དུས་ཞིང་ཕྱི་འདེབས་སྔ་མ་རན་པ་དང་། བྱ་ཁུ་བྱུག་སླེབས་དུས་དབྱར་མགོ་ཚུགས་པས་ཞིང་འདེབས་ལས་ཚར་བར་བྱེད་པ་བཅས་ཀྱི་རྟགས་སྲོལ་ཡོད།
དེ་མིན་ཁྱུ་མང་བོས་རྐང་ལག་གིས་ས་དྲུས་ན་ཐན་པ་འབྱུང་རྟགས་དང་། ཨ་བྲས་བཟའ་རྩྭ་མང་བོ་གསོག་ཉར་བྱེད་པ་དང་། འཕྱི་བ་སོགས་སྲོག་ཆགས་དགུན་ཉལ་རླུང་སྒོམ་ཅན་རྣམས་ཉལ་སྔ་བ། ངང་བ་སོགས་ཆུ་བྱའི་རིགས་བོད་ཟླ་བདུན་པའི་ནང་ལྷོ་ཕྱོགས་སུ་འཕུར་འགྲོ་ཚེ་དགུན་དུས་གངས་སྐྱོན་འབྱུང་རྟགས། འདབ་ཆགས་བྱ་རིགས་དང་སྲོག་ཆགས་མང་བོ་གཞན་དུ་གནས་སྤོར་བ་དང་། བྲོས་བྱོལ་དུ་འགྲོ་བ་བྱུང་ན་ཞག་བདུན་ནང་ཚུན་དུ་ཆར་ཆེན་འབྱུང་ངེས་ཀྱི་རྟགས། འབུ་གྲོག་མ་གནས་སྤོར་བ་དང་། གློ་བུར་དུ་ཚ་དྲོད་ལངས་པ། དྲེག་གྲུམ་ཆུ་སེར་གྱི་ནད་གཞི་ཅན་ལ་གློ་བུར་དུ་ནད་བྱུང་བ། སྦལ་བས་རྐན་སྒྲ་འབྱིན་པ་བཅས་བྱུང་བ་ཡིན་ན་ཆར་བ་འབབ་རྟགས་དང་། མཚོ་ལ་དྲོད་རྒྱས་ཤིང་ཉ་ལྕིབས་དང་ཉ་སོགས་གནས་སྡོད་མི་བྱེད་པ་དང་། ཆུ་བོ་གྱེན་དུ་བཞུར་ན་ཉིན་ལྔའི་ནང་ཚུན་དུ་ཆར་བ་འབབ་རྟགས་ཡིན།
ཡང་རི་གཡག་ལུང་ཕུ་ནས་མདོར་ཐོན་པ་དང་། ཡང་ན་རི་རྩེ་ནས་རི་འདབས་སུ་བབས་ན་ཁ་བ་འབབ་རྟགས་དང་། སྟོན་དུས་འབྲི་གཡག་སོགས་ནོར་ནག་རྩྭ་ཆུ་འཛོམས་སར་དེད་ཀྱང་ངོམས་མེད་བཀྲེས་ལྟོགས་ཀྱི་ཚུལ་གྱིས་གནས་གཅིག་ཏུ་མི་སྡོད་པར་གང་སར་འགྲོ་ཞིང་། ཕུ་ནས་མདོར་ཤོར་ན་ཁ་བ་ངེས་པར་འབབ་རྟགས། ལུག་རྣམས་ཕན་ཚུན་བརྡུང་འཛིང་བྱེད་པར་དགའ་ན་ཁ་ཆར་མི་འབབ་པར་གནམ་ངོ་དྭངས་པའི་རྟགས་ཡིན་ཚུལ་སོགས་མེས་པོ་གོང་མ་ཚོས་དཔྱད་བརྟག་མྱོང་ཐོབ་ཀྱི་ཤེས་རིག་ཇི་སྙེད་ཅིག་ཡོད་པ་ལས་རྩྭ་རྩེའི་ཟིལ་ཐིགས་ཙམ་ཞིག་འདིར་མཚོན་དོན་གྱི་ཚུལ་དུ་བསྟན་པ་ཡིན་པས། འུ་ཅག་ཕྱི་རབས་པ་རྣམས་ཀྱིས་ཚུལ་འདི་རིགས་ལ་མནོ་བསམ་ཞིབ་ཏུ་བཏང་སྟེ། མེས་པོ་གོང་མ་ཚོས་བཞག་པའི་ཁྱད་འཕགས་ཀྱི་རིག་གནས་འདི་དག་མི་ཉམས་རྒྱུན་འཛིན་དང་ལག་ལེན་བཀོལ་སྤྱོད་ཀྱི་ལས་ལ་ཞུགས་ཤིང་། དེང་ཀུན་པོས་ཡང་དག་ཏུ་ལྟ་བའི་ཚན་རྩལ་རིག་གནས་ཀྱི་གདོང་དང་གཏད་ནས་དཔྱད་བསྡུར་གྱི་བགྱི་སྒོ་བརྩམས་ཏེ། འུ་ཅག་གི་མེས་པོ་དམ་པ་ཚོས་དེང་དུས་ལྟར་རྫས་དངོས་འཕྲུལ་སྦྱོར་སོགས་ལ་མ་བརྟེན་པར་རྣམ་དཔྱོད་དང་སྙིང་སྟོབས་ཁོ་ནས་འབད་འབུངས་ལག་ལེན་དུ་བསྟར་ཏེ་རྩལ་འདོན་དར་སྤེལ་བཏང་བའི་རིག་གནས་ཀྱི་ཁྱད་ཡོན་གཟེངས་སུ་འདེགས་པར་བརྩོན་པ་བསྐྱེད་རན་འདུག།