མི་རྣམས་ཀྱི་འཚོ་བའི་ཆ་རྐྱེན་ཇེ་ལེགས་སུ་སོང་བ་དང་བསྟུན་ནས་ཁྲག་ཤེད་མཐོ་བའི་ནད་པ་ཇེ་མང་དུ་འགྲོ་བཞིན་ཡོད་པ་དང་། དེ་དང་བསྡོངས་ནས་ཀླད་ཁྲག་ཤོར་བ་དང་། སྙིང་ནད་ཀྱི་རིགས། མཁལ་མའི་ནུས་པ་ཤོར་བ་སོགས་ནད་རིགས་མང་པོ་འབྱུང་བཞིན་ཡོད། དེ་བས་བསྡོངས་ཟླའི་ནད་རིགས་དེ་དག་སྔོན་འགོག་བྱ་རྒྱུ་ནི་ཤིན་ཏུ་གལ་ཆེ། ནད་གང་ཞིག་མི་འབྱུང་བར་བྱེད་པའི་རྒྱུ་གཙོ་བོ་ནི་སྔོན་འགོག་གི་ཐབས་ལམ་ཡིན། དེ་ལས་ཀྱང་སྔོན་འགོག་གི་ཐབས་ལམ་གཙོ་བོ་ནི་ཟས་སྤྱོད་གཉིས་ཡིན་པས་གཤམ་ནས་དེའི་སྐོར་ངོ་སྤྲོད་ཅིག་བྱེད།
གཅིག ཟས་ཀྱི་བསྟེན་ཚུལ་ལ་དོ་སྣང་བྱེད་པ།
1.ཚུལ་མིན་ཟས་ཀྱི་ཉེས་པ། ཟས་ཀྱིས་རྒྱག་དྲགས་པའམ་ལྟོགས་དྲགས་པར་མི་བྱེད་པར་ཟས་ཚོད་རན་པར་ཟ་བ་དང་། མི་འཕྲོད་པའི་ཟས་དང་དུས་མིན་ཟས་སོགས་མ་བསྟེན་ན་བཟང་སྟེ། དཔེར་ན་ཟས་རིགས་མི་འཕྲོད་པ་ཟོས་རྗེས་སྐྱུགས་པའམ་བཤལ་བས་ལུས་སྟེང་གི་རླུང་ཁམས་འཁྲུགས་ནས་ཁྲག་ཤེད་ལ་ཤུགས་རྐྱེན་ཐེབས་པའི་སྐབས་སུ་ཁྲག་ཤེད་ཇེ་མཐོར་སོང་ནས་ཀླད་ཁྲག་བརྡོལ་བའམ་ཁྲག་རྩ་འགགས་པ་སོགས་ཀྱི་སྣང་ཚུལ་འབྱུང་སླ་བས་དེ་ལ་མཉམ་འཇོག་གང་ལེགས་བྱ་དགོས།
2.དུ་ཆང་གི་ཉེས་པ། ཆང་དང་དུ་བ་མི་བསྟེན་པར་མ་ཟད་ཁ་ཚའི་ཟས་རིགས་ཀྱང་མི་བཟའ་བ། ཆང་མང་པོ་འཐུང་ན་ཁྲག་གི་དྭངས་སྙིགས་འབྱེད་མ་ཐུབ་པ་དང་། བད་ཁྲག་འཕེལ་བ་སོགས་ཀྱིས་རླུང་ཁྲག་གི་རྩ་འགགས་ནས་སྙིང་དང་ཀླད་པའི་ཁྲག་གི་འཁོར་སྐྱོད་ཇེ་ཞན་དུ་སོང་ནས། མཇུག་མཐར་སྙིང་དང་མཆིན་པ། མཁལ་མ་སོགས་ཀྱི་ནུས་པ་ཇེ་ཞན་དུ་འགྱུར་པ་དང་། དེ་ལས་ཀླད་ཁྲག་གི་རྒྱུ་བ་ཇེ་ཞན་དུ་གྱུར་ནས་ལུས་ཀྱི་གཞོགས་ཕྱེད་ཉམས་པ་དང་། ཁ་ངོ་ཡོ་བ་སོགས་ཀྱི་ནད་རིགས་འབྱུང་བ་དང་། ཆང་གི་ནུས་པ་ཚ་བའི་རང་བཞིན་ལས་ཁྲག་གི་འཁོར་སྐྱོད་ཇེ་མགྱོགས་སུ་སོང་ནས་སྙིང་རྩ་དང་། མཆིན་རྩ། ཀླད་རྩ་སོགས་ཀྱི་ཁུར་པོ་ཇེ་ལྗིད་དུ་བཏང་ནས་ཁྲག་ཤེད་མཐོ་བ་ནས་འབག་པ་དང་། ཀླད་ཁྲག་བརྡོལ་བ་སོགས་ཀྱང་འབྱུང་སྲིད་པས་མཉམ་འཇོག་བྱ་རྒྱུ་གལ་ཆེ། དུ་བ་ཡང་དེ་ལས་མ་འདས་པར་གློ་སྦུག་ངོས་སུ་དུ་དྲེག་ཆགས་པ་སོགས་ད་ལྟའི་སྐར་འཕྲིན་དང་དྲ་རྒྱའི་ངོས་སུ་བཏང་བའི་པར་རིས་སོགས་ལས་མིག་མཐོང་ལག་ཟིན་ཡིན་ལ། ཁྲག་རྩ་འགགས་པའི་ནད་རིགས་སྣ་ཚོགས་བསྐྱེད་སྲིད་པས། དུ་ཆང་བསྟེན་པར་གཟབ་གཟབ་བྱ་དགོས།
3.སྐོམ་ཆུ་བསྟེན་པའི་ནུས་པ། སྐོམ་ཆུ་ནི་མི་རྣམས་ལ་རྒྱུས་མངའ་ཆེ་ཡང་དེ་ལས་ལུས་ཕུང་ལ་གནོད་པ་མང་བ་ཚང་མས་ཤེས་ཀྱིན་མེད་པ་འདྲ། སྐོམ་ཆུ་ལ་སྣ་མང་བ་དང་། བཅུད་ལྡན་འོ་མ་ཅན་དང་། བཏུང་ཇ། འཚིག་ཇ་ལ་སོགས་ཡོད་པ་དང་། དེ་དག་གི་གྲུབ་ཆ་ཡང་ཚྭ་དང་། ཀ་ར། ཚིལ་ཞག་སོགས་རྫས་འགྱུར་སྣ་ཚོགས་ཀྱིས་གྲུབ་པས་དེར་ཁྲག་རྩ་འཁུམས་པའི་ནུས་པ་ཡོད་ལ། ཁྲག་རྩ་སྐེམ་པས་ངེས་པ་ཡང་ཡོད་པས་དེ་རིགས་བསྟེན་པར་གཟབ་གཟབ་བྱ་དགོས་པའང་ཤེས་དགོས།
གཉིས། སྤྱོད་ལམ་བསྟེན་ཚུལ་ལ་དོ་སྣང་བྱེད་པ།
1.རྒྱུན་སྤྱོད་ལ་དོ་སྣང་། མྱ་ངན་གྱིས་སེམས་སྡུག་དྲགས་པ་དང་སེམས་ཤུགས་མི་བརྟན་པ། བྱ་བའི་དབང་གིས་སེམས་ཁུར་ཆེ་བ་དང་། ཁོང་ཁྲོ་ལངས་པ་སོགས་ཀྱང་ཁྲག་ཤེད་ཇེ་མཐོར་འགྲོ་བའི་རྒྱུ་རྐྱེན་གཙོ་བོ་ཡིན་པས་དུས་ལྟར་མཚན་མོར་ངལ་གསོ་བ་དང་། མྱ་ངན་ཆེ་བ། སྨྲ་བ་མང་བ། འཇིགས་ཤིང་སྐྲག་པ། རྩོལ་བས་དུབ་པ་སོགས་ཀྱི་ལས་སྤང་དགོས་ལ། ལྷག་པར་སྤྲོ་སེམས་ལྡན་པར་བྱ་དགོས།
2.དུས་སྤྱོད་ལ་དོ་སྣང་། དུས་བཞི་ལས་དགུན་ཁ་ཁྲག་ཤེད་ཇེ་མཐོ་རུ་འགྲོ་བ་མངོན་གསལ་ཡིན་ལ། ཉིན་རེའི་ཞོགས་པའི་དུས་ཚོད་དྲུག་ནས་བརྒྱད་དང་ཕྱི་དྲོའི་ལྔ་ནས་བརྒྱད་བར་ཁྲག་ཤེད་ཆེས་མཐོ་བའི་དུས་ཡིན།
3.གནས་སྐབས་ཀྱི་སྤྱོད་ལམ་ལ་དོ་སྣང་། ལྟོགས་པའམ་སྐོམ་པའི་དབང་གིས་མགོ་ཡུ་འཁོར་བ་དང་། ཟས་ཟ་མར་ཡི་ག་མེད་པ་སོགས་ལ་ཐབས་དང་སྨན་གྱིས་བཤང་བ་སྐམ་དུ་མི་འཇུག་པར་བྱ་རྒྱུ་ནི་ཤིན་ཏུ་གལ་ཆེའོ།།