མིག་ནད་བར་འགྲིབ་ནི་མཐོང་བྱེད་རྒྱལ་མོའི་དྭངས་གསལ་བདར་དབྱིབས་གཟུགས་རབ་རིབ་ཉོག་རྫོབ་ཏུ་གྱུར་པ་ལ་བརྟེན་ནས་འོད་ཚུར་བསྡུ་བའི་ནུས་པ་ཉམས་ཤིང་གཟུགས་འཛིན་ནུས་པའམ་མཐོང་ཤུགས་མར་འགྲིབ་པའི་ནད་ཅིག་སྟེ། འདི་ཉིད་རྒྱུད་འདེད་དང་སྨུག་ཕྱིའི་འོད་ཐིག་འཚོ་བཅུད་ལ་སོགས་པར་འབྲེལ་བ་ངེས་ཅན་ཞིག་ཡོད། ཐོག་མའི་རབ་རིབ་ཀྱིས་གཟུགས་འཛིན་ནུས་པར་ཤུགས་རྐྱེན་ཆེར་མེད་ནའང་ཡུན་གྱིས་ཇེ་སྡུག་ཇེ་ཐུར་སོང་སྟེ་ཐ་ན་མིག་ཞར་འགྲོ་བའི་གནས་ཚུལ་ཡང་འབྱུང་།
མིག་ནད་བར་འགྲིབ་ནི་མིག་སྔར་འཛམ་གླིང་ཧྲིལ་པོའི་ཁྱོན་ནས་བཤད་ནའང་རྨོངས་ལོང་སྐྱེད་བྱེད་གཙོ་བོ་ཞིག་སྟེ། ད་ལྟ་འཛམ་གླིང་ཡོངས་སུ་ཧ་ལམ་མི་བྱེ་བ་གཉིས་ལྷག་མིག་ནད་བར་འགྲིབ་ཀྱིས་རྐྱེན་པས་རྨོངས་ལོང་དུ་གྱུར་ཡོད་པར་མ་ཟད། བར་འགྲིབ་ཀྱི་ནད་པ་དུང་ཕྱུར་གཅིག་ཙམ་ནི་གཤག་བཅོས་ལ་བརྟེན་ནས་མཐོང་ཤུགས་སླར་གསོ་བྱེད་དགོས་པའི་གནས་སུ་གྱུར་ཡོད།
མིག་མཐིལ་ཁྲག་རྡོལ་བའི་ནད།
ལོ་ལོན་རྒས་ཚུལ་སྤྱི་ཚོགས་སུ་འགྱུར་བཞིན་པའི་དེང་གི་དུས་འདིར་རྒན་རྒོན་དག་ལ་རྒྱུན་དུ་མིག་མཐིལ་ནས་ཁྲག་རྡོལ་བ་མཐོང་།འདི་ནི་མིག་ནད་ཁོ་ན་མ་ཡིན་པར་ནད་གཞན་དག་ལའང་འབྱུང་ངེས་པའི་སྤྱིའི་ནད་རྟགས་ཙམ་རེད།ཁྲག་རྡོལ་བ་ཉུང་བའི་སྐབས་སུ་ནད་པར་འཕུར་ཙི་ནད་ཡོད་ཅིང་། ཁྲག་མ་རྡོལ་གོང་དུ་མཐོང་བྱེད་དྲ་སྐྱི་ལ་ཟུག་བསླངས་ཚེ་འོད་འཚེར་ཚོར་སྣང་འབྱུང་། དེ་བཞིན་དུ་ཁྲག་རྡོལ་བ་མང་ཚེ་ནག་ཐིག་འབྱུང་ཞིང་མིག་རབ་རིབ་ཏུ་གྱུར་ནས་མཐོང་ཤུགས་ཇེ་ཞན་དུ་འགྲོ་བའམ། ཡང་ན་འོད་ཚོར་མེད་པར་འགྱུར་བ་ཡིན།
ཉི་འོད་དྲག་པོའི་འོག་ཏུ་མིག་ལ་སྲུང་སྐྱོབ་ཇི་ལྟར་བྱ།
རྒྱུན་དུ་ཉི་འོད་དྲག་པོའི་འོག་སྡོད་ཡུན་རིང་ན་ངོ་གདོང་ལ་ཕོག་ཐུག་ཆེན་པོ་བཟོ་བ་ཕུད་མཐོང་ཚོར་དྲ་སྐྱིར་རྨས་སྐྱོན་བཟོ་བཞིན་ཡོད།དེས་མིག་རྩ་ནས་ཁྲག་ཐོན་པ་དང་མིག་གི་ནད་གཞི་གཞན་བསླངས་ནས་མཐར་མིག་ཤེད་རིམ་བཞིན་ཉམས་འགྲོ་བཞིན་ཡོད།དེར་བརྟེན་ལོ་ཆུང་དུས་ནས་བཟུང་འཚོ་བའི་གོམས་གཤིས་འགྱུར་ལྡོག་དང་རང་གིས་རང་ལ་གཅེས་སྐྱོང་བྱེད་ཤེས་པ་དང་བྱས་ན་ལོ་ན་མཐོ་རུ་འགྲོ་སྐབས་མིག་ཤེད་ཉམས་པའི་སྣང་ཚུལ་མི་འབྱུང་བ་དང་དེ་མིན་གྱི་ནད་གཞི་གཞན་སྔོན་འགོག་བྱེད་ཐུབ།གཞན་ཡང་དར་མ་དང་གཞོན་ནུའི་ཁྲོད་མིག་ཆུ་བར་མེད་བཞུར་མཁན་མི་ཉུང་བ་ཞིག་ཡོད་པ་དེ་དག་ལོ་ན་ཆུང་དུས་ནས་ཉི་འོད་དྲག་པོའི་འོག་རྒྱུན་རིང་བསྡད་པའི་རྐྱེན་གྱིས་ཡིན།ཉི་འོད་དྲག་པོའི་འོག་ལས་ཀ་དང་འགྲོ་སྐྱོད་སོགས་བྱེད་སྐབས་ངེས་པར་མིག་ཤེལ་ནག་པོ་གྱོན་དགོས་པ་དང་ཡང་ན་རྩྭ་ཞྭ་སོགས་གྱོན་ནས་མིག་ལ་ཉི་འོད་ཐད་ཀར་མི་ཕོག་པ་བྱེད་དགོས། །