ཉི་མའི་ཁྱིམ་བཅུ་གཉིས་ལ་སྲོག་ཆགས་ཀྱི་མིང་འདོགས་དོན་ཅི་ཡིན།

     བོད་ཀྱི་སྐར་རྩིས་རིག་པའི་གཞུང་ལྟར་ན།ཉི་མས་སའི་གོ་ལར་སྐོར་བའི་ནམ་མཁའི་གོ་ལ་དེ་ཤར་གླིང་དུམ་བུ་གསུམ་དང་། ལྷོ་གླིང་དུམ་བུ་གསུམ། ནུབ་གླིང་དུམ་བུ་གསུམ། བྱང་གླིང་དུམ་བུ་གསུམ་བཅས་ཁྱིམ་བཅུ་གཉིས་ལ་བགོས་འདུག ཁྱིམ་དུམ་བུ་བཅུ་གཉིས་ཡོད་པའི་ནམ་མཁའི་གོ་ལ་གཡས་སུ་འཁོར་ཞིང་།ཉི་མ་རང་འགྲོས་ཀྱིས་གཡོན་དུ་འཁོར་བའི་དབང་གིས་ཉི་མ་ཤར་གླིང་གི་དུམ་བུ་དང་པོར་སླེབས་ དུས་ལུགས་ཪྙིང་གི་ཟླ་གསུམ་པ་ཡིན་ལ།དུས་དེར་ལུག་ལ་མངལ་མིམ་པ་ཡིན་པས་ལུག་གི་ཁྱིམ་ཞེས་བརྗོད་པ་དང་།ཉི་མ་ཤར་གླིང་གི་དུམ་བུ་གཉིས་པར་སླེབས་དུས་ཟླ་བ་བཞི་པ་སྟེ། གླང་རྣམས་ཞིང་མི་བའི་དུས་ཡིན་པས་གླང་གི་ཁྱིམ་ཞེས་བརྗོད། ཉི་མ་ཤར་གླིང་ གི་དུམ་བུ་གསུམ་པར་སླེབས་ཚེ་ཟླ་བ་ལྔ་པ་སྟེ། དུད་འགྲོ་ཕལ་ཆེར་འཁྲིག་པ་སྤྱོད་པའི་དུས་ཡིན་པས་འཁྲིག་པའི་ཁྱིམ་ཞེས་བརྗོད། ཉི་མ་ལྷོ་གླིང་གི་དུམ་བུ་དང་པོར་ སླེབས་ཚེ་ཟླ་བ་དྲུག་པ་སྟེ། སྦལ་བའི་སྐད་འབྱིན་པའི་དུས་ཡིན་པས་ཀརྐ་ཊའི་ཁྱིམ་ཞེས་བརྗོད། ཉི་མ་ལྷོ་གླིང་གི་དུམ་བུ་གཉིས་པར་སླེབས་དུས་ཟླ་བ་བདུན་པ་སྟེ། སེང་གེས་འཁྲིག་པ་སྤྱོད་པའི་དུས་ཡིན་པས་སེང་གེའི་ཁྱིམ་ཞེས་བརྗོད། ཉི་མ་ལྷོ་གླིང་གི་དུམ་བུ་གསུམ་པར་སླེབས་ཚེ་ཟླ་བ་བརྒྱད་པ་སྟེ་བུ་མོའི་ཁྱིམ་ཞེས་བརྗོད། ཉི་མ་ ནུབ་གླིང་གི་དུམ་བུ་དང་པོར་སླེབས་ཚེ་ཟླ་བ་དགུ་པ་སྟེ་མར་རྣམས་སྲང་ལ་འདོགས་པའི་དུས་ཡིན་པས་སྲང་གི་ཁྱིམ་ཞེས་བརྗོད། ཉི་མ་ནུབ་གླིང་གི་དུམ་བུ་གཉིས་པར་སླེབས་ཚེ་ཟླ་བ་བཅུ་པ་སྟེ་གནམ་གཤིས་གྲང་མགོ་ཚུགས་ནས་སྡིག་པ་རྭ་ཅན་རྣམས་ས་འོག་ཏུ་འཛུལ་བའི་དུས་ཡིན་པས་སྡིག་པའི་ཁྱིམ་ཞེས་བརྗོད། འདི་ལ་ཁ་ཅིག་གིས་གཅན་གཟན་རི་དྭགས་སོགས་སྤུའི་གྲ་ལེགས་ཤིང་རྔོན་པས་དེ་དག་བསད་ནས་སྡིག་པ་ཞེས་པའི་དུས་ཡིན་པའི་ཆ་ནས་དེ་སྐད་བརྗོད་པར་བཞེད་པའང་ཡོད།ཉི་མ་དུམ་བུ་གསུམ་པར་སླེབས་ཚེ་ཟླ་བ་བཅུ་གཅིག་པ་སྟེ།ནམ་ཟླ་ཧ་ཅང་གྲང་བས་མདའ་མཁན་གྱིས་གཞུ་འཐེན་དཀའ་བའི་ ཆ་ནས་གཞུའི་ཁྱིམ་ཞེས་བརྗོད། ཉི་མ་བྱང་གླིང་གི་དུམ་བུ་དང་པོར་སླེབས་ཚེ་ཟླ་བ་བཅུ་གཉིས་པ་སྟེ། རྒྱ་མཚོ་ཆེན་མོའི་ཆུ་ཡང་ཧ་ཅང་གྲང་བས་ཆུ་སྲིན་རྣམས་ཀྱི་ཁ་ཉི་ མར་འཁོར་ནས་ཉི་མར་བསྲོ་བས་ན་ཆུ་སྲིན་གྱི་ཁྱིམ་ཞེས་བརྗོད། ཉི་མ་བྱང་གླིང་གི་ དུམ་བུ་གཉིས་པར་སླེབས་ཚེ་ཟླ་བ་དང་པོ་སྟེ་བུམ་པའི་ནང་གི་ཆུ་དང་ས་གཞི་འཁྱགས་པར་འགྱུར་བའམ་བུམ་པའི་ནང་གི་ཆང་རོ་ནུས་དང་ལྡན་པའི་དུས་ཡིན་པས་བུམ་པའི་ཁྱིམ་ཞེས་བརྗོད་པ་དང་། ཉི་མ་དུམ་བུ་གསུམ་པར་སླེབས་ཚེ་ཟླ་བ་གཉིས་པ་སྟེ་ས་ལ་དྲོད་འཛུལ་བའི་ཆུ་ནང་ནས་ཉ་རྣམས་འཁྱུག་འགྲོས་བྱེད་པའི་མགོ་བརྩམས་པས་ན་ཉ་ཡི་ཁྱིམ་ཞེས་བརྗོད་པ་ཡིན།  །VNPཀྲུང་གོ་བོད་ཀྱི་དྲ་བ།

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།