ཞིང་པ་ཞོར་ལས་པའི་གླ་ཕོགས་བསམ་བཞིན་དུ་འགོར་འགྱངས་བྱས་པའི་ཁེ་ལས42ལ་ཆད་པ་བཅད་པ།

2017ལོར། ཞིང་ཆེན་སྡོད་ཁང་དང་མཁར་གྲོང་འཛུགས་སྐྲུན་ཐིང་གིས་ཞིང་པ་ཞོར་ལས་པའི་གླ་ཕོགས་གཙང་སྤྲོད་བྱེད་པའི་བྱ་བ་སྲ་བརྟན་དུ་བཏང་། ལོ་གཅིག་གི་རིང་ལ།བསྡོམས་པས་གྱོད་དོན270བདག་སྤྲོད་བྱས་པ་དེ་མི་ཁྲི་གཅིག་དང་སྒོར་དུང་ཕྱུར་ལྔ་ལ་འབྲེལ་བ་ཡོད་ཅིང་།གཙང་སྤྲོད་བྱས་པའི་ཚད96%ལ་བསླེབ་ཏུ་བཅུག་སྟེ།ཞིང་པ་ཞོར་ལས་པའི་གླ་ཕོགས་བསམ་བཞིན་དུ་འགོར་འགྱངས་བྱས་པའི་ཁེ་ལས42ལ་ཁྲིམས་ལྟར་གཅིག་བསྡུས་སྒོས་ཆད་པ་བཅད།

ཡིད་རྟོན་ཤོར་བར་ཆད་པ་གཅོད་པའི་ལམ་ལུགས་བཙུགས་པ་དང་།《མཚོ་སྔོན་ཞིང་ཆེན་གྱི་ཨར་ལས་ཚོང་རར་ཡིད་རྟོན་དོ་དམ་བྱེད་པའི་ཐབས་ལམ》དཔར་འགྲེམ་བྱས་ཏེ། ཞིང་པ་ཞོར་ལས་པའི་གླ་ཕོགས་འགོར་འགྱངས་བྱས་པའི་བྱ་སྤྱོད་དེ་ཨར་ལས་ཁེ་ལས་ཀྱི་ཡིད་རྟོན་མི་རུང་བའི་བྱ་སྤྱོད་ནང་བཞག་པ་དང་།ཨར་ལས་ཁེ་ལས་ཀྱིས་ཞིང་པ་ཞོར་ལས་པའི་གླ་ཕོགས་བསམ་བཞིན་དུ་འགོར་འགྱངས་བྱས་པའམ་ཡང་ན་འཕྲི་འཐེན་བྱས་པ་དང་།ཚོགས་སྤྱི་རང་བཞིན་གྱི་དོན་རྐྱེན་བྱུང་བ།སྤྱི་ཚོགས་སྟེང་ཤུགས་རྐྱེན་ངན་པ་བཟོས་པ་བཅས་ཀྱི་ཡིད་རྟོན་རིམ་པ་ཇེ་དམའ་རུ་བཏང་།མིག་སྔའི་བར་དུ།བསྡོམས་པས་ཤུགས་རྐྱེན་ངན་པ་བཟོས་པའི་ཁེ་ལས21ཡིད་རྟོན་གདེང་འཇོག་རིམ་པDཡི་ནང་དུ་བཞག་པ་དང་།ཁེ་ལས17གྱི་ཡིད་རྟོན་སྐར་མ10རེ་ཉུང་འཕྲི་བྱས་ཤིང་།ཁེ་ལས5ཡི་ཡིད་རྟོན་སྐར་མ5རེ་ཉུང་འཕྲི་བྱས།《ཨར་ལས་ལས་རིགས་མུ་མཐུད་དུ་བདེ་འཇགས་དང་སྐྱོན་བྲལ་ངང་འཕེལ་རྒྱས་འབྱུང་བར་སྐུལ་འདེད་གཏོང་བའི་སྐོར་གྱི་ལག་བསྟར་བསམ་འཆར》དཔར་འགྲེམ་བྱས་ཏེ།འཛུགས་སྐྲུན་སྡེ་ཁག་གིས་རྩིས་བཤེར་བྱས་མ་ཚར་བ་དེ་བཟོ་འགོད་ཀྱི་སྒོར་མོ་རྩིས་རྒྱག་མི་ཐུབ་པ་དང་བཟོ་འགོད་མ་དངུལ་འགོར་འགྱངས་བྱེད་པའི་ཁ་གཡར་ས་བྱེད་མི་ཆོག་པའི་བླང་བྱ་བཏོན།བཟོ་འགོད་ལེགས་འགྲུབ་མ་བྱུང་བ་དང་བསྡོམས་རྩིས་མ་བརྒྱབ་པའི་ལས་གཞིའི་རྒྱུ་དབང་ཐོ་འགོད་མི་བྱེད་པ་དང་།བཟོ་འགོད་མ་དངུལ་ལོ་གཅིག་གི་ཡན་ལ་འགོར་འགྱངས་བྱས་པའི་འཛུགས་སྐྲུན་སྡེ་ཁག་ལ་ལས་གཞི་གསར་པ་མགོ་རྩོམ་དུ་མི་འཇུག་པ།ཞིང་པ་ཞོར་ལས་པའི་གླ་ཕོགས་འགོར་འགྱངས་བྱེད་པའི་འཛུགས་སྐྲུན་ཁེ་ལས་ལ་ལས་གཞི་གསར་པ་ལེན་དུ་མི་འཇུག་པ་བཅས་བྱས།དངོས་མིང་ལམ་ལུགས་ཀྱི་དོ་དམ་བྱེད་པར་སྐུལ་འདེད་བཏང་ནས།ཁེ་ལས་ཀྱིས་ལས་མི་བསྡུ་བའི་བྱ་སྤྱོད་ཚད་ལྡན་དུ་བཏང་ཞིང་།ལས་བཟོ་པའི་མིང་ཐོ་ལག་དེབ་དང་ལས་ཞུགས་ཞིབ་བཤེར།གླ་ཕོགས་བྱིན་པའི་རེའུ་མིག་སོགས་ཀྱི་དངོས་མིང་དོ་དམ་རྩིས་ཁྲ་བཟོས་ནས།སྲིད་འཛིན་ཁྱབ་ཁོངས་ནང་གི་སྡོད་ཁང་འཛུགས་སྐྲུན་དང་གྲོང་ཁྱེར་དོ་དམ་ལས་དོན་གྱི་རྨང་གཞིའི་སྒྲིག་བཀོད་བཟོ་འགོད་ཀྱི་འཛུགས་སྐྲུན་ལས་ཡུལ་གྱི་ངལ་རྩོལ་མི་སྣ་ཡོངས་ལ་དངོས་མིང་ལམ་ལུགས་ཀྱི་དོ་དམ་བྱས། ལོ་མཇུག་ཏུ་ཞིང་པ་ཞོར་ལས་པའི་གླ་ཕོགས་འདེད་ལེན་གྱི་ཞུ་གཏུག་དང་ཡིག་སྐུར་ངོ་གཏུག་མང་བའི་གནས་ཚུལ་ལ་ཁ་གཏད་དེ། 《འཛུགས་སྐྲུན་ཁྱབ་ཁོངས་ཀྱི་ཞིང་པ་ཞོར་ལས་པའི་གླ་ཕོགས་བྱིན་པའི་གནས་ཚུལ་ལ་ཆེད་དམིགས་ཞིབ་བཤེར་བྱེད་པའི་སྐོར་གྱི་བརྡ་སྦྱོར》དཔར་འགྲེམ་བྱས་ཤིང་།ས་ཆ་སོ་སོའི་སྡོད་ཁང་དང་མཁར་གྲོང་འཛུགས་སྐྲུན་གཙོ་གཉེར་སྡེ་ཁག་གིས་རང་བཤེར་བྱས་པ་དང་།མི་ཤུགས་ཐོན་ཁུངས་སྡེ་ཁག་དང་མཉམ་འབྲེལ་བྱས་ནས་རྩིས་ཁྲ་བཟོ་བ་དང་ལྟ་ཞིབ་བྱེད་དགོས་པའི་བླང་བྱ་བཏོན།ཞིང་ཆེན་ཕྱི་རོལ་ནས་མཚོ་སྔོན་དུ་ནང་འདྲེན་བྱས་པའི་ཁེ་ལས་ལ་གླ་ཕོགས་འགོར་འགྱངས་བྱས་ཡོད་པའི་གནས་ཚུལ་ལྡན་ན།ཁེ་ལས་ཐོ་འགོད་བྱས་པའི་ས་གནས་ཀྱི་ཞིང་ཆེན་རིམ་པའི་སྡོད་ཁང་དང་མཁར་གྲོང་འཛུགས་སྐྲུན་སྡེ་ཁག་ལ་ཧུར་བརྩོན་གྱིས་མཐུན་སྦྱོར་བྱས་ཏེ།གླ་ཕོགས་འགོར་འགྱངས་བྱས་པའི་གནད་དོན་ཐག་གཅོད་བྱས་པ་རེད། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།