གྱོད་དཔེ།
མཚོ་མོ་དང་མོའི་ཁྱོ་ག་གཉིས་གཉེན་སྒྲིག་བྱས་ཏེ་ལོ་བཅུ་འགོར་མོད་བྱིས་པ་གཅིག་ཀྱང་མེད། གྱ་བདུན་ལོའི་ཟླ་བཅུ་བར། མཚོ་མོས་རང་གི་ལོ་གཅིག་ལ་སོན་མ་ཐག་པའི་ཚ་མོ་ཀླུ་ཐར་འཚོ་བུ་སྐལ་དུ་བླངས་ཏེ་དགའ་སྤྲོ་ཡི་འཚོ་བས་ཉི་མ་རེ་རེ་ཕར་ལ་བསྐྱལ། ཡིན་ཡང་།ཉིས་སྟོང་དྲུག་ལོའི་ཟླ་ལྔ་བར། མཚོ་མོ་དང་བུ་སྐལ་ཀླུ་ཐར་འཚོའི་བར་ལ་འཚོ་བའི་དོན་ཕྲན་ཞིག་གི་ཆེད་དུ་རྩོད་གླེང་བྱུང་བས། བཟའ་ཟླ་གཉིས་ཀྱིས་མི་དམངས་ཁྲིམས་ཁང་ལ་གཏུགས་ནས་ཁོ་གཉིས་དང་བུ་སྐལ་ཀླུ་ཐར་འཚོའི་བར་གྱི་འབྲེལ་བ་མེད་པར་བཟོ་བའི་རེ་བ་བཏོན། ཁྲིམས་ཁང་གིས་གྱོད་དོན་དེ་བདག་སྤྲོད་བྱས་རྗེས། འདུམ་སྒྲིག་བརྒྱུད་དེ་ཁོ་ཚོའི་བར་གྱི་བུ་སྐལ་གྱི་འབྲེལ་བ་མེད་པར་བཟོས། ད་ལྟ་ཀླུ་ཐར་འཚོ་ལོ་ཉེར་བདུན་ལ་སོན་ཡོད། མཚོ་མོ་དང་མོའི་ཁྱོ་ག་གཉིས་ལོ་ཧ་ཅང་བགྲེས་པའི་ངལ་རྩོལ་གྱི་ནུས་བ་མེད་པར་གྱུར་བ་མ་ཟད། དཔལ་འབྱོར་གྱི་ཡོང་སྒོའང་ཅི་ཡང་མེད། དེ་བས། མཚོ་མོ་དང་མོའི་ཁྱོ་ག་གཉིས་ཀྱིས་བུ་སྐལ་གྱི་འབྲེལ་བ་བཅད་ཟིན་པའི་ཚ་མོ་ཀླུ་ཐར་འཚོ་ལ་འཚོ་བའི་གྲོན་དངུལ་བསླང་ཆོག་གམ།
ཁྲིམས་བཤད།
མཚོ་མོ་དང་མོའི་ཁྱོ་ག་གཉིས་ཀྱིས་བུ་སྐལ་གྱི་འབྲེལ་བ་བཅད་ཟིན་པའི་ཚ་མོ་ཀླུ་ཐར་འཚོ་ལ་འཚོ་བའི་གྲོན་དངུལ་བསླང་ཆོག་སྟེ། ཅིའི་ཕྱིར་ཞེ་ན། སྙོར་སྐྱོང་བཅའ་ཁྲིམས་ཀྱི་དོན་ཚན་སུམ་བཅུ་བའི་གཏན་འཁེལ་ལྟར་ན། བུ་སྐལ་གྱི་འབྲེལ་བ་མེད་པར་བཟོས་རྗེས། ཕ་གཡར་མ་གཡར་གྱིས་གསོ་སྐྱོང་བྱས་ཏེ་དར་མའི་ལོ་ཚད་ལ་སླེབས་སུ་བཅུག་པའི་མི་དེས། ངལ་རྩོད་ནུས་བ་དང་འཚོ་བའི་ཡོང་སྒོ་མེད་པར་གྱུར་བའི་ཕ་གཡར་མ་གཡར་ལ་འཚོ་བའི་རོགས་དངུལ་སྟེར་འོས། བུ་སྐལ་གང་ཞིག་དར་མར་གྱུར་རྗེས་ཕ་གཡར་མ་གཡར་ལ་མནར་གཅོད་གཏོང་བའམ་གསོ་སྐྱོང་མི་བྱེད་པ་ནི་ཁྲིམས་དང་མི་མཐུན་པའི་ཁར་འཇིག་རྟེན་མི་ཆོས་ལའང་འགལ་ཡོད། གལ་ཏེ་ཁོ་ཚོའི་ཕ་བུའི་འབྲེལ་བ་བཅད་ཚར་ནའང་རྒན་རྒོན་དེ་གཉིས་ཀྱིས་བུ་སྐལ་ལ་གསོ་སྐྱོང་སྐབས་བཏང་བའི་འཚོ་བའི་རོགས་དངུལ་དང་སློབ་གསོའི་རོགས་དངུལ་གྱི་སྐྱིན་ཚབ་འཇལ་བའི་རེ་བ་བཏོན་ཆོག
ཀླུ་ཐར་འཚོ་ནི་མཚོ་མོ་བཟའ་ཟླ་གཉིས་ཀྱིས་རང་ཁྱིམ་དུ་བླངས་པའི་བུ་སྐལ་ཡིན་ལ། ཀླུ་ཐར་འཚོ་དར་མར་གྱུར་རྗེས་ཕྱོགས་གཉིས་ཀའི་བར་འགལ་བ་བྱུང་སྟེ་བུ་སྐལ་གྱི་འབྲེལ་བ་མེད་པར་བཟོས་པ་ཡིན་མོད། འོན་ཀྱང་འབྲེལ་བ་དེ་མ་བཅད་གོང་ཀླུ་ཐར་འཚོ་མི་ལོ་ཉེར་གཅིག་གི་རིང་ལ་མཚོ་མོ་བཟའ་ཟླ་གཉིས་དང་མཉམ་དུ་འཚོ་བ་རོལ་བ་མ་ཟད། མོ་རང་སྙོར་སྐྱོང་བྱས་ཏེ་དར་མའི་དུས་ལ་སླེབས། ད་ལྟ་མཚོ་མོ་བཟའ་ཟླ་གཉིས་ལོ་ཧ་ཅང་བགྲེས་པས་ངལ་རྩོལ་གྱི་ནུས་བ་མེད་ལ་དཔལ་འབྱོར་གྱི་ཡོང་སྒོའང་མེད་པ་མ་ཟད། གཞན་པའི་སྙོར་སྐྱོང་བྱེད་མཁན་ཡང་མེད་པའི་རྐྱེན་གྱིས། ཀླུ་ཐར་འཚོས་མཚོ་མོ་བཟའ་ཟླ་གཉིས་ལ་འཚོ་བའི་རོགས་དངུལ་སྟེར་འོས། །