ཀུན་རིག་མཚོ། ༢༠༠༤ལོར་མཚོ་སྔོན་མི་རིགས་སློབ་ཆེན་ནས་སློབ་མཐར་ཕྱིན་ཏེ། ལྷ་ས་ནག་ཆུ་མཐོ་འབྲིང་དུ་དགེ་རྒན་གྱི་ལས་ཀ་གཉེར། ༢༠༡༢ལོར་བོད་ལྗོངས་སློབ་ཆེན་དུ་རྩོམ་རིག་ཆེད་ལས་ཞིབ་འཇུག་གི་སློབ་མཐར་ཕྱིན་རྗེས་ནག་ཆུ་མཐོ་འབྲིང་དུ་མུ་མཐུད་དགེ་རྒན་གྱི་ལས་གནས་གཉེར་བཞིན་ཡོད།
བྱིས་པའི་རེ་འདུན།
སྟོང་སྐོར་ཀུན་རིག་མཚོ། (ལྷ་ས།)
ཕ་སྐད་གསེར་སྐུད་འདྲ་བོ་ཆད་མི་རུང་།།
བརྩེ་བ་འོ་མའི་མར་ལོ་བཞུ་མི་རུང་།།
ལག་ལེན་བདུད་རྩིའི་ཉིང་ཁུ་འཛད་མི་རུང་།།
དམ་ཚིག་རྡོ་རྗེ་བྲག་རི་བསྙིལ་མི་རུང་།།
ཨ་ཕའི་སྐད་ཆ་ང་ཡི་འཚོ་རྟེན་ཡིན།།
ཨ་མའི་བསླབ་བྱ་ང་ཡི་རྒྱགས་ཕྱེ་ཡིན།།
ཨ་མྱེས་གནའ་གཏམ་ང་ཡི་བདེ་སྐྱིད་ཡིན།།
ཨ་ཕྱིའི་མ་ཎི་ང་ཡི་སྙན་གཞས་ཡིན།།
གཅེས་པའི་ཕ་སྐད་ང་ཡི་བླ་སྲོག་ཡིན།།
རླབས་ཆེན་ཕུགས་བསམ་འགྲུབ་པའི་རྨང་རྡོ་ཡིན།།
ང་དང་བྱོལ་སོང་དབྱེ་བ་དགར་བྱེད་ཡིན།།
ང་ཡི་འཇོན་ཐང་མངོན་པའི་དཔང་རྟགས་ཡིན།།
རྒྱུ་དང་འབྱོར་བའི་ཟང་ཟིང་སྤྱི་ཚོགས་འདིར།།
ང་ཡི་སྐྱོ་ངལ་མཚོན་བྱའི་མིག་ཆུ་ཡིན།།
ང་ཡི་སེམས་ངལ་གསོ་སའི་ཁང་བཟང་ཡིན།།
ང་ཡིས་མེས་པོར་བལྟ་བའི་མེ་ལོང་ཡིན།།
སྟོང་སྐོར་ཀུན་རིག་མཚོ་ནས།
༢༠༡༦.༦.༢༠ཉིན་ཞོལ་གྲོང་གསར་དུ་བྲིས།
མཐོ་སྒང་གི་ཆིག་ལབ།
ང་ལ་ཡངས་པའི་མཁའ་ཞིག་ཡོད།།
གཙང་ཆབ་དྭངས་མོ་འཁྱིལ་འདྲ་ཡིན།།
སྤྲིན་དཀར་མ་མོ་བཞུར་ས་ཡིན།།
མཁའ་མཐའི་སྐར་མ་འོད་ཆེན་དེ།།
མཚན་མོར་རྨི་ལམ་སྨིས་རོགས་ཡིན།།
ཐོ་རེངས་བྱ་ཕོ་གྲགས་རོགས་ཡིན།།
ང་ལ་བརྗིད་པའི་རི་ཞིག་ཡོད།།
དར་དཀར་ཡུག་གཅིག་འཐེན་འདྲ་ཡིན།།
འཛམ་གླིང་རྩེ་མོའི་གསེར་ཏོག་ཡིན།།
བྲེ་སེར་འབྲོང་གི་དཔུང་རྡང་དེ།།
མཁའ་ལྡིང་ཁྱུང་གི་གཤོག་རྩལ་ཡིན།།
དམར་ཡག་སྟག་གི་ངར་ཤུགས་ཡིན།།
ང་ལ་མཛེས་པའི་ས་ཞིག་ཡོད།།
གཡུ་མདོག་གོས་གསར་བཏིང་འདྲ་ཡིན།།
ཆོལ་ཁ་གསུམ་གྱི་གཙུག་རྒྱན་ཡིན།།
ཕ་སྐད་དག་མའི་དངོས་གྲུབ་དེ།།
མེས་པོའི་ཤུལ་བཞག་ནོར་བུ་ཡིན།།
སྤུན་ཟླའི་བརྩེ་སེམས་གསེར་ཐག་ཡིན།།
ང་ལ་མཛངས་པའི་རིགས་ཤིག་ཡོད།།
བྱམས་བརྩེའི་ཉི་ཟེར་འཕྲོས་འདྲ་ཡིན།།
སྙིང་རྗེ་ཀུན་གྱི་བདག་པོ་ཡིན།།
གཞན་ཕན་ལྷག་བསམ་དཀར་བོ་དེ།།
ཕ་མའི་དྲིན་ལན་གཞལ་བྱེད་ཡིན།།
བུ་ཕྲུག་ལམ་ལ་འཇུག་བྱེད་ཡིན།།
༢༠༡༦.༧.༡ ཉིན་རང་ཁྱིམ་དུ་བྲིས།
ཟོ་དང་བཞོ་ཟེའུ།
འོ་ཟོ་འབྲུ་ཤུག་སྔོན་མོ་རེད།།
འོ་མའི་རྒྱ་མཚོ་ལྟེམས་སེ་ལྟེམ།།
འོ་འཁོར་ལྷ་ཤིང་ཙན་དན་རེད།།
མར་གསར་ནོར་བུ་མངོན་སེ་མངོན།།
འབྲོག་མོའི་ལག་གི་མ་རྒྱུ་རེད།།
བརྩེ་བའི་འཛུམ་ཆུང་ཤིགས་སེ་ཤིག།
འདོད་འཇོའི་ཟས་བཅུད་བསྐྱིལ་ས་རེད།།
དགའ་བའི་གཞས་ཆུང་སྙན་སེ་སྙན།།
བཞོ་ཟེའུ་པང་ཁའི་མེ་ཏོག་རེད།།
བཞོ་ལུང་རྩེ་ན་ལྷངས་སེ་ལྷང་།།
གཡང་འགུག་འབྲི་མོའི་ལྷུང་བཟེད་ཡིན།།
འཇོ་བའི་འོ་སྤྲི་ཤགས་སེ་ཤག།
རྨ་རྒྱལ་སྦོམ་རའི་ཡོན་ཆབ་ཡིན།།
གངས་ཅན་བོད་ཀྱི་ཟས་མཆོག་ཡིན།།
འཇོ་ས་ཙན་དན་བཞོ་ཟེའུ་ཡིན།།
དཀྲོག་ས་ལྷ་ཤིང་ཟོ་བ་ཡིན།།
མ་བཟང་ཡིད་ཀྱི་ནོར་བུ་ཡིན།།
བྱིས་པའི་སེམས་ཀྱི་རྨི་ལམ་ཡིན།།
སྦྲང་དཀར་རྩམ་པའི་བཅུད་འཛིན་ཡིན།།
ཡ་རབས་ཚང་གི་རྟེན་གཙོ་ཡིན།།
༢༠༡༦.༧.༧ཉིན་རང་ཁྱིམ་དུ་བྲིས།
རེ་བ།
མཚོ་མོའི་རླབས་རྒྱུན་འཇགས་རོགས།།
དོན་མཐུན་ལམ་ལ་ཆས་དགོས།།
གཡོ་གྲུའི་གྲུ་དར་མ་ལྷོད།།
ཚོང་འདུས་མགྲོན་པོོར་འཕྲད་དགོས།།
ཁ་བའི་འདབ་མ་བཞུ་རོགས།།
རྐང་རྗེས་ས་ལ་བཀོད་དགོས།།
གངས་ལྷའི་འཛུམ་མདངས་མ་ལྷོད།།
བྱམས་པའི་ཕྱག་ཟུང་རེག་དགོས།།
རི་གསུམ་རྩེ་མོ་མཐོ་རོགས།།
རླུང་རྟའི་དར་བོ་འཛུགས་དགོས།
དུང་བའི་དར་ལྕེ་མ་རལ།།
རླུང་བུའི་རྒྱུན་ལ་འགྲོག་དགོས།།
ཆུང་འདྲིས་སྙིང་མཐུན་སྐྱིད་རོགས།།
སྣང་བའི་དམུ་ཐག་འཐེན་དགོས།།
བརྩེ་བའི་འདུན་པ་མ་ལྷོད།།
མི་ཚེ་ཚད་ཀྱིས་གཞལ་དགོས།།
༢༠༡༦.༧.༦ ཉིན་དབུས་སུ་བྲིས།
ཁྱི་དང་མི།
རྔ་གཡུག་གནམ་ལ་གཟེངས་ནས།།
བདག་པོར་ངོ་དགའ་སྤྲེལ་ལད།།
ཟས་ཐུན་ཁམ་གང་དེ་ནི།།
རིན་ཐང་ལུས་ལ་གཞལ་དགོས།།
ཁག་མེད་ཤ་གཟན་དུད་འགྲོ།།
ལྟོ་ཐུན་མི་ལ་རེ་དགོས།།
ངག་གི་ཚིག་གསུམ་དབེན་ཡང་།།
མིག་མདངས་དྲིན་གྱིས་ཁེངས་ཡོད།།
ཅང་མེད་བུ་ལོ་ཟེར་ཞོར།།
རང་དོན་ཁོ་ན་གཉེར་མཁས།།
སྙིགས་མའི་མི་ཡི་རང་གཤིས།།
ཁྱོད་ཀྱི་དོ་ཡ་མ་རེད།།
མདུན་དུ་འཛུམ་པའི་འོད་མདངས།།
མིག་ལ་མཛེས་པ་སྤྲད་ཀྱང་།།
རྒྱབ་ཏུ་མཛུབ་མོ་ཀེར་ཀེར།།
སེམས་ལ་གཟན་པ་བྱུང་སོང་།།
དུས་ཀྱི་འགྱུར་བ་མ་ཡིན།།
མི་ཡི་རང་གཤིས་འགྱུར་སོང་།།
དངུལ་ལོར་སེམས་པ་ཤོར་སོང་།།
རྒྱུ་འབྲས་རྒྱ་མ་བོར་སོང་།།
ཁྱི་གུར་མཆིལ་ཞགས་འཕེན་དུས།།
རང་ཉིད་མི་ཡིན་བསམ་ཡང་།།
དོན་ལ་ཁྱི་ལས་སྡུག་སོང་།།
རྔ་མ་སྐུངས་ལས་མངོན་སོང་།།
དཔལ་དང་འབྱོར་བའི་དུས་ལ།།
ཁྱི་ལ་ཞེད་སྣང་མི་དགོས།།
མི་ལ་དོགས་ཟོན་བྱེད་དགོས།།
མི་ཁྱིའི་དབྱེ་བ་འཁྲུལ་ཚེ།།
བདེན་པ་རྫུན་ལ་བསམ་འགྲོ།
རྫུན་མ་བདེན་པར་རློམ་འགྲོ།
བདེན་རྫུན་དབྱེ་བ་ནོར་འགྲོ།
མཐའ་མར་རང་ཉིད་ཕམ་འགྲོ།
༢༠༡༦.༧.༢ཉིན་བར་སྐོར་དུ་བྲིས།
དམ་བཅའ།
མཚོ་མེ་ལོང་འདྲ་བོར་ཤོད་ལ།།
སྤང་གཡུ་ལོའི་དཀྱིལ་ནས་སྒུག་དང་།།
ང་ཐག་རིང་ངང་མོ་ཆ་འགྲིག།
སྟོད་བྲག་དམར་བསྐྱུར་ནས་འཕུར་ཡོང་།།
མཚོའི་དྭངས་ཤ་བསམ་ནས་སྡོད་ཡོང་།།
ཟླ་བཅུ་བའི་འབོད་པ་ཐོན་དུས།།
དར་མི་ཆགས་ཁས་ལེན་ཁྱོས་བྱོས།།
འཕུར་མི་འགྲོ་དམ་བཅའ་ངས་འཇོག།
གན་བྲེ་སེར་འབྲོང་ལོར་ཤོད་ལ།།
རྫ་རི་ཆེན་སྟེང་ནས་སྒུག་དང་།།
ང་ཐག་རིང་འབྲི་གཡག་ཆ་འགྲིག།
གངས་དཀར་བོ་བསྐྱུར་ནས་གཤར་ཡོང་།།
རྫའི་དྲོད་གཤེར་བསམ་ནས་སྡོད་ཡོང་།།
རྔོན་ར་མདའི་འབོད་པ་ཐོན་དུས།།
མདའ་མི་ཕོགས་ཁས་ལེན་ཁྱོས་བྱོས།།
སྲོག་མི་འདོར་དམ་བཅའ་ངས་བྱེད།།
སྡེ་ཕ་ས་སྨུག་པོར་ཤོད་ལ།།
མ་གཟིགས་ལྡན་མདུན་ནས་སྒུག་དང་།།
ང་ཐག་རིང་མགྲོན་པོ་ཆ་འགྲིག།
གནས་ལྷ་ལྡན་བསྐྱུར་ནས་སླེབས་ཡོང་།།
འདང་བརྩེ་བ་བསམ་ནས་སྡོད་ཡོང་།།
ལས་འདུ་བྱེད་འབོད་པ་ཐོན་དུས།།
འགྲོ་མི་དགོས་ཁས་ལེན་ཁྱོས་བྱོས།།
བྲལ་མི་ཡོང་དམ་བཅའ་ངས་བྱེད།།
༢༠༡༦.༦.༢༩ཉིན་རང་ཁྱིམ་དུ་བྲིས།
ཆར་སྡོད་བྱེའུ།
ཆར་སྡོད་བྱེའུ་ཆུང་འདི་ལ་སེམས་ཤིག་ཡོད།།
དམར་བོ་ཁྲག་ལས་གྲུབ་པའི་འདང་ཞིག་ཡོད།།
བདེན་རྫུན་དབྱེ་བ་འབྱེད་པའི་གཤིས་ཤིག་ཡོད།།
བུ་ཡུག་འུར་འུར་ཁྲོད་ན་ཉམས་ཤིག་ཡོད།།
རྒྱ་བྱ་ཁྱུང་ཆེན་ལྟ་བུའི་ལོ་རྒྱུས་མེད།།
རྫ་ཁའི་གོང་ཡག་ལྟ་བུའི་རིན་ཐང་མེད།།
རྨ་བྱ་སྔོན་མོ་ལྟ་བུའི་མཛེས་སྡུག་མེད།།
ཨ་ཕོ་ནེ་ཙོ་ལྟ་བུའི་ལད་ཟློས་མེད།།
ཆར་སྡོད་བྱེའུར་ཕུགས་འདུན་ཆུང་ཆུང་ཡོད།།
ཆར་ནང་གོམ་ཆུང་རེ་ཡི་རྗེས་ཤུལ་ཡོད།།
ཉི་ཟེར་དྲོད་མོའི་འོད་ཟེར་འགྱེད་ལ་ཡོད།།
མཇའ་ཚོན་སྣ་ལྔའི་གུར་ཁྱིམ་དབུབ་ལ་ཡོད།།
གཡུ་འབྲུག་ཟོལ་མའི་ངར་ལ་སྐྲག་མྱོང་མེད།།
གློག་དམར་ཆེམ་ཆེམ་འཁྱུག་པར་བྲོས་མྱོང་མེད།།
རྡོ་ཆར་ཤག་ཤག་འབབ་པར་སྐུངས་མྱོང་མེད།།
ཐོག་རྒོད་འཇིགས་སྣང་དེ་ལ་ཕམ་མྱོང་མེད།།
ཆར་སྡོད་བྱེའུར་རིན་ཐང་གཞལ་མེད་ཡོད།།
རང་སའི་ཁོར་ཡུག་དེ་རུ་རང་གཤིས་ཡོད།།
འདབ་ལྡན་བྱ་ཚོགས་ཁྲོད་ན་རང་ཚུགས་ཡོད།།
ཕམ་ཉེས་མོད་པོའི་ཁྲོད་ན་རང་གཅེས་ཡོད།།
མདོར་ན་ངའང་ཆར་སྡོད་བྱེའུར་དགའ།།
དཀའ་བ་དང་ལེན་བྱེད་པའི་གཤིས་ལ་དགའ།།
འགྱུར་མེད་དམ་ཚིག་བརྟན་པོའི་སྲོལ་ལ་དགའ།།
ཆར་ནང་སྤོབས་པར་སྡོད་པའི་ཉམས་ལ་དགའ།།
༢༠༡༦.༧.༣ཉིན་སྐྱིད་ཆུའི་འགྲམ་དུ་བྲིས།
གདན་ཞུའི་རྩོམ་སྒྲིག་པ་ས་དམར་གྲགས་པས་འོས་སྦྱོར་བྱས།