བོད་མོ་ཆོས་དབྱིངས་སྐྱིད་ལ་བྲིས་པ།
མདོ་སྨད་ཧེ་རུ་ཀ
དོ་ནུབ་བརྙན་འཕྲིན་ལས་ཁྱོད་ལ་བསྒུག་ཡོད།
གླིང་ཕྲན་དང་རྒྱ་མཚོ་ག་ཚོད་ཀྱིས་བར་ཐག་ཆོད་ཡོད་པ།
ང་ཡིས་བགྲང་གིས་མི་ལང་རུང་།
བརྩེ་གདུང་གི་ནམ་མཁའི་ངོས་སུ།
སྤྲིན་དཀར་གྱི་རི་མོ་གཏོར་སྟེ།
སྐར་ཕྲན་གྱི་ཁྱུ་ཚོགས་མེ་ཏོག་གི་ཚོམ་བུར་བསླེ་ནས།
རྒྱལ་ཕམ་ཁོ་ན་མ་ཡིན་པའི་བརྒྱུད་རིམ་དང་།
དཀའ་ཚེགས་ཀྱི་ལོག་ཕེབས་ལ་འབུལ་འདོད།
གངས་འདབས་ཀྱི་ནམ་ཟླ་ཇི་འདྲའི་བསིལ་རུང་།
ངའི་ནང་སེམས་ཀྱི་མེ་ལྕེ་རབ་ཏུ་འབར་ནས།
ཁྱོད་ཀྱི་དཀའ་སྡུག་གི་རྔུལ་ཆུ་བསལ་བར་བྱ།
ཁྱོད་ཀྱི་བདེ་སྐྱིད་ཀྱི་འཛུམ་མདངས་ནང་ལ།
སང་གི་ཉི་གཞོན་གསར་བ་འཕྲོས་པར་ཤོག
ང་ཡིས་དྲོད་སྐྱིད་ཀྱི་རྨི་ལམ་སིལ་བུར་གཏོར་ནས།
ཁྱོད་ཀྱི་མཛེས་སྡུག་གི་གོམ་སྒྲ་ལ་ཉན་ཡོད།
འདི་དག་ཡོད་ཚད་ཀྱང་།
ང་རང་ཁོམ་དྲགས་པས་མ་ཡིན་ཏེ།
ང་ཚོར་ཉུང་དྲགས་པའི་ལས་འཕྲོ་མཐུད་པ་ཙམ།
སྟོན་འགོའི་མཚན་ལྗོངས་འདིར།
གླིང་ཕྲན་དང་རྒྱ་མཚོ་ག་ཚོད་ཀྱི་ཕ་རོལ་ནས།
ཁྱོད་རང་བླ་རྟ་དཀར་བོ་ཞོན་པའི་བོད་མོ་དེ་ཡིན་པར་སྨོན།
༢༠༡༦／༨／༡༩མཚན་མོར།
ལྷམ་ཆུང་འཐབ་པའི་རེ་འབྲས།
སྟག་རིག་འབྲུག་ཐར།
བར་ཐག་རི་ཆུས་བཅད་ཀྱང་།
སེམས་པ་སྤྲིན་དཀར་ལ་བརྒྱུས་པའི་བརྩེ་བ་དག
འཛམ་གླིང་གི་མཐོངས་དབྱིངས་སུ་བཞད་པའི།
ཁྱེད་ཀྱི་ལྷད་མེད་པའི་འཛུམ་མདངས་ལ་བསྒྲེས་ཡོད།
ལེ་དབར་སྟོང་གིས་བསྐལ་ཡང་།
སྐྱབས་དང་སྨོན་ལམ་གྱི་བཀྲ་ཤིས་རེ་ཁཱ།
འཇམ་མཉེན་བསིལ་རླུང་གིས་དཀྲོལ་ནས།
ཁྱེད་ཀྱི་ལྷམ་ཆུང་འཐབ་པའི་རོགས་དན་མཛད་ཡོད།
མངོན་སུམ་ལྟ་སྐལ་མེད་ཀྱང་།
གོམ་སྒྲས་རི་ལུང་སྒུལ་བ་ཐོས་བྱུང་།
བརྩོན་ཤུགས་བྲག་ལ་བརྡར་བ་མཐོང་བྱུང་།
རེ་ལྟོས་སྙིང་ལ་སྒོམ་པའི།
གངས་འདབས་ཀྱི་སྤུན་ཟླའི་སྲོག་གི་ཀ་བ།
རྨི་ལམ་དྲོད་ཀྱིས་གཉོར་བའི།
དུངས་ཞེན་གྱི་བོད་པའི་ལ་རྒྱའི་མེ་དཔུང་།
དུས་ཚོད་ཀྱི་ཐག་སྒྲ་ལ་འཁྱུད་པའི་ངར་ཤུགས་དེ།
རྔུལ་ནག་གི་ཆུ་ཐིགས་ལ་གཞིབ་པའི་བརྟུན་པ་དེ།
ཅང་ཤེས་ལྷ་རྟ་ལས་ལྷག
བྱ་རྒྱལ་རྒོད་པོ་ལས་ལྷག
རྒྱལ་ཕམ་གྱི་མཇུག་འབྲས་བཤམས་རུང་།
ང་ཚོར། ཁྱོད་ཀྱི་གཟི་བརྗིད་ལས་སྒུལ་ཤུགས་འཁྲུངས་པས་ཆོག
ང་ཚོར། ཁྱོད་ཀྱི་གདོང་མཆོངས་ལས་བཤུལ་ལམ་བསྐྲུན་པས་ཆོག
འདུར་ཆོག་ཆོག་གི་སྟོབས་རྩལ་ང་ཚོར་མེད་པ་མིན།
རྒྱུག་ཆོག་ཆོག་གི་ཧམ་སེམས་ང་ཚོར་མེད་པ་མིན།
གང་ལྟར། ཁྱེད་དང་ང་ཚོའི་སང་ཉིན།
མཛེས་སྡུག་གི་རྨི་ལམ་ལྗང་ཁུ་ཞིག་ཡིན།
རབ་དཀར་གྱི་ཁ་བཏགས་དཀར་པོ་ཞིག་ཡིན།
སྐར་མ་འོད་ཆེན།
འགར་སྐལ་བཟང་།
1
ཕ་བཟང་གི་རེ་བའི་མིག་འབྲས་སུ་འོད་དུ་འཚེར་བའི་སྐར་མ་འོད་ཆེན།
མ་བཟང་གི་དྲན་པའི་གཏིང་རིམ་ན་བྲག་ཅར་འཁོར་བའི་གཞས་གདངས་སྙན་མོ།
སྟག་ཤར་ཚོའི་གསང་བའི་མིག་ཀོང་ན་ཀེམ་ཀེམ་གཡོ་བའི་ཟུར་མིག་འཁྱོག་པོ།
ཁྱེད་ཀྱི་འཛུམ་མདངས་ལས།
སྙིང་རྗེའི་འོད་དཀར་སྟོང་གསུམ་གྱི་ཁམས་ལ་སྤྲོས་པའི་སྐྱེས་ཆེན་ཞིག་གི་ཞབས་རྗེས་མངོན་ཞིང་།
ཁྱེད་ཀྱི་གོམ་འགྲོས་ལས།
ས་གསུམ་གྱི་ཕྱེད་ཀ་རྒོད་པོའི་སྨིག་འོག་ཏུ་བཅུག་པའི་མི་ཆེན་ཞིག་གི་རྒྱབ་གཟུགས་མཐོང་ཐུབ།
ཨ་ཨ། ངས་ཁྱེད་ཀྱི་འཛུམ་མདངས་ལས་རིགས་རྒྱུད་ཅིག་གི་མདུན་ལྗོངས་མཐོང་བྱུང་བ་འདྲ།
2
ཨོ་རྩལ་འགྲན་ཚོགས་སུ་ཡང་བའི་གོམ་ཁ་རླུང་ལ་སྤུར་པའི་འདུར་རྒྱུག་དེ་ནི།
བར་ཐག་དང་མཆོག་དམན་གྱི་སུམ་སྒྲོག་ཐག་གེར་གཏོར་བའི་ཅང་ཤེས་དེ་ལགས་སམ།
འཛུམ་དཀར་དང་དུངས་ཞེན་གྱིས་དྲག་ཏུ་དཀྲུགས་པའི་རྒྱལ་ཁའི་གཟེངས་རྟགས་དེ་ནི།
ས་མཚམས་དང་ཆུ་མཚམས་ཀྱི་རབ་ཁ་ཧྲག་གེར་གཏོར་བའི་དྲང་བདེན་གྱི་དཔང་བོ་དེ་ལགས་སམ།
ཨ་ཨ། ངས་ཁྱེད་ཀྱི་འདུར་རྒྱུག་ལས་དུས་ཚོད་དང་མྱུར་ཚད་གཞན་ཞིག་རྟོགས་བྱུང་བ་འདྲ།
3
བརྐྱངས་ཕྱག་འཚལ་བཞིན་ལྷ་སར་འགྲོ་བའི་དབུལ་ཕོངས་ཀྱི་མཇལ་པ་དེ་དག་ནི།
ཨ་མདོ་དང་ལྷ་སའི་བར་ནས་བྱུང་བའི་རྨོངས་དད་ཀྱི་གཏམ་རྒྱུད་ཅིག་ག་ལ་ཡིན།
དེ་ནི་སྙིང་སྟོབས་དང་དད་མོས་ཀྱིས་སྦར་བའི་ཚ་ལམ་ལམ་གྱི་དོན་དངོས་ཤིག་སྟེ།
ཁྱེད་ཀྱི་ཕ་མེས་ཡང་མེས་ཀྱིས་བོད་དུ་བཞེངས་པའི་ཨོ་རྩལ་སྙིང་སྟོབས་ལགས།
ཨ་ཨ། ངས་ཁྱེད་ཀྱི་བཞིན་རས་ལས་རིགས་རྒྱུད་ཅིག་གི་རྒྱབ་ལྗོངས་མཐོང་བྱུང་བ་འདྲ།
4
ག་ལེར་ཉོན་དང་། གསེར་དངུལ་རྩྭ་ཐང་ལས་མཆེད་པའི་འབྲི་མོའི་བཞོ་དབྱངས་དེ་ནི།
རྒྱང་རིང་ནས་རྒྱང་རིང་དུ་ལྷོད་ཀྱིས་འཐེན་པའི་རྒྱལ་ཁའི་གཞས་གདངས་དེ་མ་ཡིན་ནམ།
ཨ་ཨ། ངས་བརྙན་ཡོལ་ལས་ཤུགས་ཀྱིས་བགྲོད་པའི་འདུར་རྒྱུག་དེའི་བདེ་རྩལ་བསམ་བཞིན།
ཁྱེད་ཀྱི་བར་ཐག་ལས་བར་ཐག་གཞན་ཞིག་མཐོང་བྱུང་བ་འདྲ།
5
གངས་དཀར་པོའི་ལ་ཐོད་དུ་བསྡུས་པའི་ལོ་ངོ་ཁྲི་ཕྲག་གི་རྒྱལ་ཕམ་དང་རེ་སྙེག་སྒོམ་བཞིན།
རྫ་ཁོག་ནས་ཁད་ཀྱིས་རྒས་པའི་འབྲོང་རྒོད་ཅིག་གི་གཏམ་རྒྱུད་དང་ན་ཟུག་བསམ་བཞིན།
ལ་ལས་ཆང་ཕོར་བཏེགས་ནས་ཁྱེད་ཀྱི་རྒྱལ་ཁ་གྲོང་ཁྱེར་འདིའི་མཁའ་རུ་བསྒྲེངས་ཡོད་ལ།
ལ་ལས་མར་མེ་སྒྲོན་བཞིན་ཁྱེད་ཀྱི་རྒྱལ་ཁ་སྟོན་མཚན་འདིའི་དབྱིངས་སུ་མཆོད་ཡོད།
ཨ་ཨ། ངས་སྙིང་རུས་དང་སྤོབས་པ་ལས་འཕྱུར་བའི་སྔར་མེད་གྱི་རླབས་སྒྲར་ཉན་བཞིན།
ཁྱེད་ཀྱི་རྒྱལ་ཁ་ལས་རྒྱལ་ཁ་གཞན་ཞིག་མཐོང་བྱུང་བ་འདྲ།
ཆོས་དབྱིངས་སྐྱིད།
གསེར་ཐང་རྙེད།
མཆི་མ་ཉིལ་བའི་སེམས་ཚོར་གྱི་སྙིང་བོ།
གསེར་དངུལ་རྩྭ་ཐང་ནས་འཚར་ལོངས་བྱུང་བའི་འབྲོག་མོ་ཕལ་བ།
རིགས་ཞེན་པ་ཁྲི་སྟོང་གི་མིག་ཀོང་ན་འོད་ཀྲིག་ཀྲིག་ཏུ་འཚེར་བའི་མུ་ཏིག་གི་ཕྲེང་བ།
ཚེ་སྲོག་གི་བག་འཁུམས་ལ་བསྩལ་བའི་གསེར་མདོག་གི་སྤོབས་པ།
གངས་ཅན་པ་ཁྲི་སྟོང་གི་སེམས་སྙིང་གཅིག་ཏུ་བསྡུ་ཕོད་པའི་ངེས་དོན་གྱི་མཛེས་མ།
འཛུམ་མདངས་ཁོ་ནས་འཛམ་གླིང་ལ་སེམས་འགུལ་ཐེབས་སུ་བཅུག་པའི་མི་ནུབ་པའི་དར་ཆ།
དཀའ་ཁག་གྲངས་མེད་ལ་ཚེ་སྲོག་གིས་ཡ་ལན་སྤྲད་པའི་མི་གཟུགས་ཀྱི་རྡོ་རྗེ་ཕ་ལམ།
ཆུ་ཚོད་གཅིག་དང་སྐར་མ་ཉེར་བརྒྱད་ལ་མ་གྲོས་གཅིག་མཐུན་གྱིས་ལག་རྡང་སྦྲེལ་དུ་བཅུག་པའི་གཅིག་སྒྲིལ་གྱི་ཁ་ལོ་པ།
རྒྱལ་ན་དགའ་ཞིང་ཕམ་ནའང་དུངས་པའི་སྐྱེ་འགྲོ་ཁྲི་སྟོང་གི་རྣམ་ཤེས་འཁོར་ས།
ཁྱེད་ཀྱི་ལུས་ཕུང་བདེ་ཞིང་།
འཛུམ་མདངས་ཀྱི་ཉི་འོད་རྟག་ཏུ་གསལ་ཞིང་འཚེར་ན།
དེ་ཡིས་འཐུས།
༢༠༡༦.༨.༢༡ཉིན།