རང་ཉིད་དྲན་ཚུལ།
— དགེ་རྒན་དུས་ཆེན་ལ།
འཆི་མེད།
ལོ་ཟླའི་འགྲོས་ཀྱིས་འཁོར་བའི་དུས་ཆེན་དེ་བསླེབས་པས། །
ཡལ་བའི་མི་ཚེའི་ཕྲེང་ལ་ཕྱིར་རྟོག་ཅིག་ཤོར་སོང་། །
ཀྱག་ཀྱོག་ལོ་ཟླའི་གྲོག་རོང་སྣ་ཚོགས་ཤིག་བརྒྱུད་ཀྱང་། །
སློབ་གསོའི་ལས་སྟེགས་འདི་ནས་གོམ་གང་ཙམ་མ་འགྱེལ། །
གསར་རྙིང་དུས་ཀྱི་རི་མོ་མིག་འོག་ནས་བརྒྱུད་པའི། །
མངར་ལ་སྐྱུར་བའི་འཚོ་བ་བྲང་ཁོག་ཏུ་བཅུག་སྟེ། །
བཅུ་ཕྲག་གསུམ་ལ་ཉེ་བའི་ལོ་ཟླ་ཡི་ནང་དུ། །
ལང་ཚོ་ཡོད་ཚད་ཕྱི་རབས་མདུན་ལམ་ལ་ཕུལ་ཡོད། །
ཞོགས་པའི་སྐར་མ་འཐུ་བའི་གོམ་ཆུང་གི་ཐག་སྒྲ། །
ནངས་མོ་རེ་བཞིན་སློབ་རའི་སྐྱེད་ཚལ་ན་གྲགས་ཡོད། །
བརྩེ་ཞིང་དུངས་པ་མ་བཅོས་སློབ་ཁང་གི་གྲུ་ན། །
ང་ཡི་ཡོད་ཚད་ལུས་པའི་རྔམ་ཚོར་ཞིག་སྐྱེས་ཡོང་། །
དྭངས་གསལ་བློ་རིག་རྣོ་བའི་མྱུག་ཚོགས་ཀྱི་གསེབ་ནས། །
དབྱུག་སྣེ་མ་བསྟན་མི་ཐུལ་བོད་ཕྲུག་གི་གཤིས་སྤྱོད། །
གཅར་རྡུང་སློབ་གསོ་མ་བྱས་རང་བྱས་སུ་སོང་ཚུལ། །
འདས་དོན་ཡིད་ལ་འཁོར་ན་མིག་ཆུ་ཞིག་འཁྱིལ་འོང་། །
མི་བྱེད་ལས་གཅིག་མེད་པའི་རང་ཉིད་ཀྱི་འཐབ་ཡ། །
སློབ་ཕྲུག་པྲ་ཚག་ང་ཡི་མི་ཚེ་རུ་གྱུར་ཏེ། །
ཚེ་ཡི་ཕྱེད་ཀ་དེ་ལྟ་དེ་ལྟར་ཏུ་ཟད་ཀྱང་། །
དཀའ་བའི་ལས་དེར་ཕངས་སུན་ལན་ཅིག་ལ་མ་སྐྱེས། །
ཉིན་མཚན་མཐུད་པའི་ལས་རེས་གཞུང་ཁང་དུ་བསྐྱལ་ཡོད། །
ཁྲིད་སྟེགས་ནོན་པའི་སྟ་གོན་ཉིན་གཅིག་ལ་མ་ཆག །
དབྱངས་གསལ་སོ་བཞིའི་ས་བོན་ཕྱོགས་བཅུ་རུ་གཏོར་དུས། །
སློབ་གསོའི་ལས་ལ་ང་རང་ནོངས་འགྱོད་ཅིག་མེད་དོ། །
ལེགས་བཤད་དམ་པའི་དགོངས་དོན་གཞི་རྩ་ལ་བཞག་ནས། །
ལམ་སྣེ་འཚོལ་བའི་བློ་ཐབས་ཅི་ནུས་ཀྱིས་ཕུལ་ཡོད། །
སྐར་ཚོགས་ལྟ་བུའི་སློབ་ཚོགས་ཕྱོགས་ཀུན་ཏུ་འཐོར་ན། །
ལན་རེར་ཡིད་ཁོང་གྲང་བའི་སྡུག་བསྔལ་ཡང་སྐྱེས་མྱོང་། །
རྟིང་མའི་ལོ་ལ་སླར་ཡང་སྐར་ཚོགས་ལྟར་མཇལ་དུས།།
མི་ཚེ་འོད་ཀྱིས་གཏམས་པའི་ཁྲིད་སྟེགས་ལ་བུད་དེ། །
ན་ཆུང་རེ་སྨོན་འཚོ་སྐྱོང་ཉམས་མྱོང་གིས་གཞི་བྱས། །
སྐད་དང་ཡི་གེའི་ལས་དོན་ཉིན་གཅིག་ལ་མ་དོར། །
རང་སེམས་དེ་ལ་གཏད་པའི་མི་ཚེ་འདི་བསམས་ན། །
སྐྱོ་ཡུས་དེ་ལ་བཤད་པའི་ལས་དབང་འདི་དྲན་ན། །
རང་ཉིད་བརྒྱུད་པའི་ལམ་བུ་རིན་ཐང་གིས་ཕྱུག་སྙམ། །
ས་སྨྱུག་ཟས་སུ་བསྟེན་པ་ཚེ་ནོམ་དུ་བསམས་ཡོད། །
ལས་གནས་རེ་ནས་འཛུམ་འཛུམ་དགེ་རྒན་ཞེས་འབོད་པའི། །
སློབ་མའི་ཚོགས་ཀྱིས་མ་ཁྱབ་ལས་རྐང་ཞིག་མི་འདུག །
ཚེ་འདི་སྐྱོ་ལ་སྡུག་པའི་མཐའ་དཀྱིལ་ལ་བསླེབས་ཀྱང་། །
སེམས་པ་དྲོད་ལ་ཁེན་ས་འདི་ཉིད་ལས་མི་མཁོ། །
འཇིག་རྟེན་འདི་ན་ཁ་ཚོན་ཆོད་པ་ཞིག་མེད་ཀྱང་། །
འདི་བྱས་ལས་ལ་སྙིང་བོ་ཡོད་པ་ཞིག་དཀོན་ཡང་། །
དུས་ཆེན་འདི་ལ་རང་ཉིད་ཕྱིར་དྲན་ཙམ་བྱེད་དུས། །
འདས་པའི་ལོ་ཟླ་དེ་དག་འོད་སྣང་གིས་ཕྱུག་སྙམ། །
རང་ཉིད་རང་གིས་དྲན་པའི་དེ་རིང་གི་ཞོགས་པ། །
འཇའ་ཚོན་བརྒྱུས་པའི་ལོ་ཟླའི་རྨི་ལམ་དེ་ཡིན་སོང་། །
ཉི་ཟེར་འཇམ་པོ་འཐུང་བའི་སྒེའུ་ཁུང་ལས་ལྟ་སྐབས། །
ཡུལ་ལྗོངས་མྱུལ་བའི་ངང་ཚུལ་སྨྱུག་རྩེ་རུ་འཁྱིལ་ཡོང་། །
མི་རིང་མི་ཐུང་དགེ་སློབ་གཏམ་རྒྱུད་ཀྱི་མཚར་སྡུག །
བྲིས་ན་ལྟ་ཅི་བསམས་ན་ཚར་རྒྱུ་ཡང་མི་འདུག །
མ་བསམ་སྣང་བ་འཁྲུལ་བའི་ཕྱིར་དྲན་ཙམ་སྐྱེས་པ། །
ཕྱོགས་བཞི་མཚམས་བརྒྱད་འཐོར་བའི་སློབ་གྲོགས་ཚོར་བསྐུར་ཡོད། །
2015.9.10ཉིན་རེབ་གོང་ནས།
དྲིན་ལྕི་བའི་དགེ་རྒན་རྣམས་ལ།
ཀླུ་འབུམ་ཚེ་རིང་།
སྒེའུ་ཁུང་ཕྱེས་པས་མུན་པ་རལ་ཞིང་འོད་ཀྱི་དབུགས་ཀྱིས་གྲེ་བ་བསལ།།
ལག་ནས་མ་ལྷོད་མིག་གིས་མ་བོར་ལམ་བུ་ཡངས་པོའི་སྣེ་སྟོན་བཞིན།།
ལག་མཐིལ་རྩེན་པའི་སྣང་སྲིད་རི་མོ་ཆུང་ཆུང་སྣོད་དུ་འཚེར་བའི་སླད།།
གསེར་གྱི་ལྡེ་མིག་འཇུངས་མེད་སྩོལ་མཁས་ཁྱེད་ཅག་རིགས་ཀྱི་རུས་རྐང་ཉིད།།
མཚན་ངོགས་སུ་བཏབ་པའི་འོད་སྣང་།
— དགེ་རྒན་གྱི་དུས་ཆེན་ལ་ཕུལ་བ།
དགའ•བཀྲ་ཤིས་རྡོ་རྗེ།(ཅོ་ནེ)
སེམས་ཀྱི་འཕར་ལྡིང་དམར་བོ།
ལག་གི་ས་སྨྱུག་དཀར་བོས་བྲིས།
རི་རབ་དང་གཙང་བོའི་རབ་ཁ་ནས་བྲིས།
ད་དུང་། མཚན་མོའི་ངོས་ཀྱི་སེམས་པ་དཀར་བོ་དེ།
སེམས་དཀར་ཀློང་གི་མཚན་མོ་ནག་པོ་དེ།
རུས་གསེང་ན་འཐིམ་པའི་རྐང་མར་དེས།
སྲིད་པའི་རི་མོ་འཁྱོག་ཏུ་མ་བཅུག་པས།
ད་གཟོད། ཐོད་པའི་རྒས་གཉེར་གྱི་མདུད་པ།
བརྩེ་བའི་ལྷག་བསམ་གྱི་དར་དཀར་རིང་མོས་ཤད་ཀི་འདུག
རུས་རྐང་ན་འོ་དྲི་འཐུལ་བའི་དགེ་རྒན་ལགས།
མཚན་ངོགས་སུ་བཏབ་པའི་འོད་སྣང་དེས།
མ་ནོར་བའི་ལམ་སྣེ་སྟོན་གི་འདུག
གཙང་བོའི་རབ་ཁ་ན་རྒྱུ་བའི་ཀོ་གྲུ་དེ།
དྭངས་གཙང་གི་ལོ་མའི་སྟེང་གི་ཡིག་འབྲུ་དག
ཁྱེད་ཀྱིས་བསྐུར་བའི་དྲན་ཤིང་དང་སྨོན་པ་ཡིན་འདུག
མུན་ནག་པའི་མཚན་མོ་ཞིག་ལ།
ཀོ་གྲུ་རུ་བསྡད་ནས་སེམས་ཁྲལ་དང་ན་ཟུག་ཀློག
རི་རྩེ་རུ་འགྲེང་ནས་རྗེས་ཤུལ་དང་རྨི་ལམ་བཙལ།
2015.9.9ཉིན།
ལེགས་སྐྱེས།
— དགེ་རྒན་དུས་ཆེན་ལ་ཕུལ་བ།
རྩིང་བ་དཀོན་བྷེ།(མདོ་ལྷོ)
བླ་མ་བསྟེན་ན། དགེ་བ་འཕེལ་ཞིང་།
མི་དགེ་བ་འགྲིབ་པས།
བླ་མ་ལས་ལྷག་པའི་སངས་རྒྱས་མེད།
དགེ་རྒན་བསྟེན་ན། མི་ཤེས་པ་སེལ་ཞིང་།
ཤེས་པ་གོང་འཕེལ་དུ་འགྲོ་བས།
དགེ་རྒན་ལས་ལྷག་པའི་ཡི་དམ་མེད།
བླ་མ་ནི་དགེ་རྒན་ཡིན་ལ།
དགེ་རྒན་ནི།
དོན་གྱི་སངས་རྒྱས་ཡིན་པས་།
ང་ཚོས་དགེ་རྒན་སངས་རྒྱས་སུ་སྒོམ་ནས།
འབུལ་བ་མེད་རུང་།
རང་རང་གི་ལུས་ངག་ཡིད་གསུམ་དབུལ་ན་ཅིས་མི་ཆོག
2015.9.9ཉིན་ལ།
ངའི་མི་ལོ་བཅོ་བརྒྱད།
_དགེ་རྒན་དུས་ཆེན་ཉིན་རང་ཉིད་ཐེངས་གཅིག་དྲན་པ།
འབྲུག་ལྗང་།
དགེ་རྒན འཇིག་རྟེན་ཆོས་བརྒྱད་སྤངས་མཁས་བྱ་བཏང་བ
གཟི་འོད་འབར་ཞིང་ཐེག་དཀའ་བའི་ཅོད་པན་འདི་མནབས་ནས་བཟུང
གཉོམ་ཆུང་བདག་བརྗེད་ཀྱི་ང་ཉིད
སྐྱ་རེངས་ཀྱི་འབོད་བརྡ་དང་ཆབས་ཅིག
མཚན་མོའི་མུན་ཁྲོད་ཀྱི་དགུ་ཚིགས་རེ་རེ་ནས
སློང་མོ་བའི་རྣམ་ཐར་འབད་པས་སྐྱོང་གིན
ལོ་རྒྱུས་ཀྱི་ཐེམ་སྐས་རེ་རེར་རྡོག་ཐོན་བྱུང་དུས
ཏག་ཏག་མི་ལོ་བཅོ་བརྒྱད་ལྷག་འདས
དུས་ཀྱི་མི་ཁ་དང་བསླུ་བྲིད་འོག་ཏུ
ལང་ཚོའི་རྨི་ལམ་ཤུགས་ཀྱིས་འཚོལ་ཞིང་སྙེག་ནས
ཨུ་ཚུགས་མཐར་སྐྱེལ་གྱི་སྐྱོ་སྒྲུང་རྒྱང་དུ་བསྲིངས
དུས་ཚོད་ཀྱི་རྒྱང་མིག་རང་ལ་བསྐོར་དུས
རྒྱང་བཞུད་བུ་སློབ་ཚོའི་འདྲ་པར་དང་བརྗེད་ཐོ
རྙིང་ཧྲུལ་གྱུར་ཟིན་པའི་ལས་བྱའི་འབྲི་དེབ་རེ་རེ
ཉིན་གཅིག་རིང་ལ་དབང་སྲིད་པའི་དུས་ཆེན་ཉིད་མ་གཏོགས
བྱ་བཏང་བ་ཁྱོད་ལ་ཅི་ཡང་ཡོད་རབས་མི་འདུག
ཡིན་ནའང དང་པོ་ནས་བདམས་ཟིན་པའི་ལམ་བུར་ལེ་བདའ་མི་བྱེད་རོགས
ལོ་རྒྱུས་ཀྱི་དྲི་བས་ཁྱོད་ཉིད་བརྗེད་མི་སྲིད་པའི་ལན་ཞིག་ལྡོན་ངེས
སྐྱ་རེངས་ཀྱི་སྒོ་གླེགས་རྡུང་མཁན་དེ་སུ་ཡིན་ལགས
ཉིན་མོའི་གོ་འབྱེད་པ་དེ་སུ་ཡིན་ལགས
མཚན་མོའི་མལ་ཚེ་སྲུང་མཁན་དེ་སུ་ཡིན་ལགས
ལོ་རྒྱུས་ཀྱི་བདེན་མིག་ར་སྤྲོད་མཁན་དེ་སུ་ཡིན་ལགས
བླ་མ སློབ་དཔོན བཤེས་གཉེན དགེ་རྒན
མདོར་དྲིལ་ན ཁྱོད་ཉིད་ལ
མཚན་བྱང་འདི་དག་ལས་ཅི་ཞིག་མཁོ་འདོད་ཨང
2016.9.10ཉིན།
དུས་ཆེན་གྱི་ལབ་གླེང་།
— དགེ་རྒན་དུས་ཆེན་ལ་ཕུལ་བ།
ལྡོང་ལུག་རྫི།(མཚོ་ལྷོ)
དེ་རིང་ནས་ཡར་བརྩིས་པའི་ཉིན་ལྔ་པ་ནི།
ངས་དབྱར་གྱི་འགྲུལ་བཞུད་ལ་གྱེས་བརྡ་བཏང་བའི་ཉིན་དང་པོ་ཡིན་ལ།
སློབ་མགོ་བརྩམས་པའི་ཚོགས་འདུའི་ཉིན་དང་པོ་ཡིན།
དུས་དེ་ནས་བཟུང་འགུལ་ཤེས་པའི་ཐ་སྙད་ལ།
སྐྱི་མོ་བརྗེ་རྒྱུའི་སྟ་གོན་བྱས་ཚར་ལ།
མཆུ་དང་དཔྲལ་བ་ཐོགས་ནས་བརྗོད་པ་བཟོས་ཡོད།
རང་སེམས་ནང་ལ་བསྐོར་ནས་ཟིན་བྲིས་ཤིག་འབྲི་བསམ་དུས།
གྲོགས་པོས་སྐད་འཕྲིན་ལས་དུས་ཆེན་གྱི་རྟེན་འབྲེལ་ཞུས་འོངས།
གྲོགས་མོས་དུས་ཆེན་གྱི་རྣམ་པ་དྲིས་ཡོང་།
ངས་རང་གི་དུས་ཆེན་ཐོན་ལ་ཉེ་བའང་།
ལས་བྱེད་ཚོ་དང་འདྲ་བར་ཤེས་ཀྱི་མེད་པ་འདྲ།
དུས་ཚོད་ཀྱིས་དམིགས་སུ་སྤྲད་པའི་དུས་ཆེན་དེ།
སྤྱིར་བརྗེད་ག་ལ་ཉན་མོད།
རྩག་རྩིག་གི་བྱ་ལས་མང་པོར་མགོ་འཁོར་ནས།
རང་ཉིད་ཀྱི་དུས་ཆེན་ཡང་བརྗེད་ངས་རྐུན་པོས་ཁྱེར་སོང་།
དོ་ནུབ་ངའི་སྨྱུ་གུ་སྨྲེང་བ་ཤ་ལེར།
ཤོག་ངོས་སུ་བཞུར་དོན་ཡང་།
དུས་ཆེན་འདི་དབང་ཆོག་པའི་ང་ཚོ་ནི།
བྲེལ་ཟིང་ཆེ་བའི་དུས་འདི་དང་ཅི་འདྲའི་མཚུངས་ཨང་།
ཀྱེ། སྟོང་གསུམ་ཁ་ལོ་བསྒྱུར་མྱོང་བའི་རིགས་ཀྱི་སྲས་པོ།
སྲིད་གསུམ་དབང་དུ་བསྡུས་མྱོང་བའི་རིགས་ཀྱི་སྲས་མོ།
ཁྱེད་ཚོ་ཡང་དུས་ཆེན་འདི་དབང་བའི་མྱི་བུ་དེ་དག་ལས་འཁྲུངས་པ་མ་བརྗེད་རོགས།
གཞོན་པ་དག་གི་ཡབ་ཆེན།
དཀར་མཛེས། སྤྱང་ལོ་བ།
མུ་མཐའ་མེད་པའི་རྩྭ་ཐང་ནས།
སྦྲ་ནག་ལ་སྒོ་དར་འཐེན་མཁན་གྱི།
གཞོན་པ་དག་གི་ཡབ་ཆེན།
ཉི་ཟླ་རི་བོ་ལ་སྙན་ཚིག་འབྲི་མཁན་གྱི།
ང་ཡི་སློབ་དཔོན་དམ་པ།
ཡར་ཀླུང་གཙང་པོའི་ཆུ་རྒྱུན་ནས།
བླ་རུས་ཆག་རོ་འགའ་སྒྲུག་མཁན་གྱི།
དུར་ཁྲོད་ཀྱི་ཕ་བོང་ཆེན་པོའི་ཁར་སླེབས་དུས།
ཁྱེད་ཀྱིས་བྱེ་མའི་ཐང་ཆེན་བརྒལ་ཏེ།
དུར་ཁྲོད་ཀྱི་ཕ་བོང་ཆེན་པོའི་ཁར་སླེབས་ཤིང་།
ཁྱེད་ནི་ང་ཡི་ལུས་ཀྱི་རྟེན་ས་དང་།
སེམས་ཀྱི་དམིགས་ས་ཁོ་ན་རུ་གྱུར།
སྒྲོན་མེ།
—དགེ་རྒན་དུས་ཆེན་ལ་ཕུལ་བ།
སྨུག་པོ།
སྒྲོན་མེ། རླུང་ཁ་ན་འདར་ལྕིག་ལྕིག
གངས་རིའི་ཕྲག་གོང་དུ་ཉལ་བའི།
གསེར་མདོག་གི་ཡིག་འབྲུ།
ཁྱེད་ཀྱི་རྣམ་ཤེས་ལ་བབས།
ཉི་མའི་འོད་མདངས་གཡར་བའི་ལང་ཚོ།
མེ་ཏོག་དང་རྩྭ་ལྗང་གི་སེམས་ཁོངས་སུ་བབས།
སྒྲོན་མེ། རླུང་ཁ་ན་འདར་ལྕིག་ལྕིག
རལ་གྲིའི་རྣོ་དབལ་འཁུར་ཏེ།
མུན་ནག་ལ་འཐབ་མོ་འགྱེད་པའི།
ལམ་གྱི་སྒྲོན་མེ། ལས་ཀྱི་སྲུང་དམག
སྒྲོན་མེ། རླུང་ཁ་ན་འདར་ལྕིག་ལྕིག
འོད་ཀྱི་མིག་ལ་གསེར་གྱི་གཟི་མདངས་འཁྱིལ།
རྡོག་སྣེ་ལ་ལོ་རྒྱུས་ཀྱི་རྣང་མ་ཆགས།
ལག་ཟུང་གིས་བྱབས་བྱབས་གནང་ས།
རྐང་ལམ་ཕྲ་མོའི་སྟེང་གི་གཞོན་ནུ།
སྒྲོན་མེ། རླུང་ཁ་ན་འདར་ལྕིག་ལྕིག
གངས་སེང་དཀར་མོའི་ངར་སྐད།
སྤང་ལྗོངས་སྔོན་མོའི་འཇམ་མཉེན།
ངག་གི་འདབ་མར་འཁྲུངས་པའི་རི་མོ།
ནམ་ཡང་རྒས་མི་སྲིད་པའི་སྙན་ངག
ཡལ་བ་མེད་པའི་འཛུམ་མདངས་ཀྱི་དྲོད་ཁོལ།
2016.9.8ཉིན།
ངའི་སེམས་ཁོང་གི་ཁྲུང་ཁྲུང་དཀར་མོ།
— དགེ་རྒན་དུས་ཆེན་བསུ།
ཅོ་བྱང་སྐར།(ཅོ་ནེ)
དཔྱིད་ཀྱི་སྒེག་མོས་རྒྱུད་དྲུག་གི་རོལ་ཆ་ག་ལེར་འབུད་དུས།
ཁྲུང་ཁྲུང་དཀར་མོ་ཁྱུ་དང་ཁྱུ་བྱས་ནས།
བར་སྣང་གན་ལ་རེ་བའི་ཀི་སྒྲ་ལྷིང་ལྷིང་ཁྱབ་ལ།
མི་ཡུལ་གན་ལ་བྱམས་པའི་མིག་ཟུང་ཡང་ཡང་འཁོར།
ངའི་གཏི་མུག་གི་མཁའ་དབྱིངས་ནས་ཁྲུང་ཁྲུང་གིས་ལྡིང་བསྐོར་བརྒྱབ་དུས།
སྐྱ་རངས་བཞིན་གསལ་ལ་དངས་པའི་མཁའ་དབུགས་ཤིག་གི་ཚེ་སྲོག་བསྩལ་བྱུང་།
ངའི་རབ་རིབ་ཀྱི་བར་སྣང་ནས་ཁྲུང་ཁྲུང་གིས་གཤོག་རྩལ་ངོམ་དུས།
འབྲོང་རྒོད་བཞིན་དཔའ་ལ་དར་པའི་ཀ་ཁ་ཡི་ལང་ཚོ་སྦྱིན་བྱུང་།
ངའི་སྲ་མཁྲེགས་ཀྱི་ཁོར་ཡུག་བརྩོན་འགྲུས་ཀྱི་ཆར་བས་བརླན་བྱུང་།
གཞིས་ཁྱིམ་ཀྱི་ཁོར་ཡུག་ལ་ལྗང་མདོག་གི་སྨྱུ་གུ་འབུས་བྱུང་།
ངའི་སེམས་ཀྱི་ཁྲུང་ཁྲུང་དཀར་མོ།
ཁྱེད་ཡོང་དུས། གཡང་ཟོག་དང་གཡང་ནོར། གྱི་ལིང་གི་ལོ་རྒྱུས་ཡོད་ལ།
འབྲོག་མའི་འཚོ་བ་ལ་རེ་ལྟོས་ཀྱི་མྱུ་གུ་འཁྲུངས།
ཁྱེད་ཡོང་དུས། ཁུག་བྱུག་དང་། ཕུག་རོན། སྐྱ་ཀ་སོགས་ཡོང་རྩིས་ཡོད་ལ།
ངའི་རྣ་བའི་བུ་གར་གསུངས་སྙན་དག་དལ་གྱིས་འཛུལ།
སྟོན་མཇུག་གི་སྡོང་ལོ་རླུང་གིས་འཕུར་དུས།
དགུན་གསུམ་གྱི་གྲང་ངར་ཤ་གསེང་རུས་རྟིང་ལ་བཙན་གྱིས་འཛུལ་དུས།
ད་དུང་ཁ་བ་བསྟུད་མར་འབབ་པའི་ཉིན་ཞག་རེ་ཡོད་དུས།
འདབ་ཆགས་སྟོང་གི་ཚོགས་རྣམས་འཕུར་སོང་རུང་།
ཤུལ་ན་འཇིགས་ཉམས་ཀྱི་ཞེད་སྣང་དང་སྐྱོ་བ་མེད་པར།
དལ་བུར་གཤོག་སྒྲོ་རྐྱོང་མཁན་དེ་ཚོ།
ཁྲུང་ཁྲུང་གཅིག་པུ་ཡིན་རྒྱུ། ང་ལ་ཡིད་ཆེས་ཡོད།
ལོ་ཡི་འཁོར་མོར་གཞིས་ཁྱིམ་འདི་བཙན་གྱིས་སྲུང་ལ་བྱམས་ཀྱིས་བསྐྱངས།
ལོ་ཡི་འཁོར་མོར་མི་རབས་ཤིག་དལ་གྱིས་བསྐྱངས་ལ་དུས་རབས་ཤིག་ལ་སྐྱེལ་མ་བྱས།
སུ་ཞིག་གིས།
རི་རབ་ཀྱི་རྩེ་ནས་ཀྭི་བསྭོ་ཡི་ལྷ་བསང་གཏོད།
སུ་ཞིག་གིས།
བྱེ་ཐང་གི་གཞུང་དུ་སྔོ་ལྗང་གི་ནེའུ་གསིང་བསྐྲུན།
ན་ཆུང་བའི་ང་ཚོ།
གཉོམ་ལག་མ་རྒྱས་པའི་ང་ཚོ།
མི་ལོ་བཅུ་ཕྲག་འགའི་རིང་ཏུ།
བྱམས་བྱམས་དང་བརྩེ་བརྩེས་བསྐྱངས།
འོ་བརྒྱལ་བཟོས་སོང་།
བདག་གི་དགེ་རྒན་དམ་པ།
འོད་ཀྱི་རེ་སྨོན།
— ཐེངས32པའི་དགེ་རྒན་དུས་ཆེན་ལ།
སྟག་རིག་འབྲུག་ཐར། (མཚོ་ལྷོ)
སྟོན་མཇུག་བང་བ་འབྲུ་ཡིས་བཀང་དུས།
འཛིན་མའི་གདོང་ལ་གསེར་མདོག་བཀྲ་དུས།
ཉིད་ལ་དབང་ཆོག་ཆོག་གི་དུས་ཆེན་དེ།
ང་དང་ཁྱོད་ཀྱི་སེམས་པའི་གས་སྲུབས་ནས་ལྗོན་པ་ལྟར་རྒྱས་འོངས།
འདབ་ལག་རྒྱས་པའི་ལྗོན་པ་དེ།
རྨི་ལམ་ལྗང་ཁུ་ཞིག་ཡིན།
སེམས་འདུན་དཀར་པོ་ཞིག་ཡིན།
ཉིན་ནས་ཟླ། ཟླ་ནས་ལོ།
ཟོ་ཆུན་འཁོར་མོ་ལྟར་སྔོ་ཡུག་ཡུག་གི་ནམ་མཁའ་དང་འབྲེལ་ནས།
ཉི་ཟླ་ལྟ་བུའི་འོད་སྣང་ཞིག་སྦྲུམ་སྟེ།
སྨག་ནག་པའི་མུན་པ་བཅིལ་བ་ལོ་རྒྱུས་ཀྱི་གླེགས་བམ་དུ་གསལ།
ཞབས་རྗེས་ཁྲིད་སྟེགས་ལ་འབྱར་ནས་ངག་གི་སྦྱིན་པའི་ཟེགས་མ་འཕྱོ་མྱོང་།
སྨྱུག་ཆུང་སོར་རྩེ་རུ་བསྒྲེངས་ཏེ་འབྲི་དེབ་ཀྱི་རྔམ་ཀ་ཚལ་བར་གསིལ་མྱོང་།
བརྩེ་སེམས་འབྲི་འོ་རུ་བསྲུབས་ནས་འབྲས་བཟང་གི་མར་ལོ་རབ་ཏུ་རྡོས་མྱོང་།
ནག་པང་ངོར་བརྡར་བའི་ས་སྨྱུག་གི་རྡུལ་ཕྲན་རེ་རེ་ནི།
ང་ཚོར་གནང་བའི་གཞན་ཕན་གྱི་སློབ་སྟོན་རེ་རེ་ཡིན།
མཁའ་དབྱིངས་སུ་གཏད་པའི་ཕྱག་རྒྱ་ཡི་འགྱུ་སྟབས་རེ་རེ་ནི།
ང་ཚོར་གནང་བའི་མདུན་སྐྱོད་ཀྱི་སྒུལ་ཤུགས་རེ་རེ་ཡིན།
ཁྱེད་ཀྱི་དྲིན་ལ། ང་ཚོས་དབྱངས་གསལ་གྱི་གཤོག་པ་བཙུགས་ཏེ།
ཤེས་རིག་གི་མཁའ་དབྱིངས་སུ་ལྡིང་སྐོར་བརྒྱབ་མྱོང་།
ཁྱེད་ཀྱི་དྲིན་ལ། ང་ཚོས་ཐབས་ཤེས་ཀྱི་ཉི་ཟླའི་འོག་ཏུ།
ཕུགས་བསམ་གྱི་རྡོ་ཐེམ་ལ་རྐང་པས་བརྫིས་མྱོང་།
དམའ་འབེབས་ཀྱི་དུག་མདའ་འཕེན་ན་འཕེན་དུ་ཆུགས།
ཟུར་ཟ་ཡི་མཆིལ་ཞགས་འཕེན་ན་འཕེན་དུ་ཆུགས།
སྒམ་བརླིང་བྲག་རི་འདྲ་བའི་བསམ་གཏན་གྱི་བློ་དེ་ཁྱེད་ལ་བདོག
དཀྱེལ་ཡངས་ཨ་སྔོན་ལྟ་བུའི་བཟོད་པ་ཡི་སྲོན་ཁ་དེ་ཁྱེད་ལ་མཆིས།
དེ་ནི་ཁྱེད་ཀྱིས་ལས་རིགས་འདི་བདམས་པའི་དན་རྟགས་ཉིད།
དེ་ནི་ཁྱེད་ཀྱིས་བྱ་བ་འདི་གཉེར་བའི་དོན་སྒོའོ།།