རྫ་སྐྱེས་ཕུར་བ། ལོ་རབས་བརྒྱད་ཅུའི་ནང་རྫ་ཆུ་ཁར་སྐྱེས། རོང་བོ་དགོན་ཆེན། ལྷ་སའི་སེ་ར་དགོན་པ། བྱེས་ཀྱི་སེ་ར་དགོན་བཅས་ནས་སློབ་གཉེར་བྱས་ཤིང་།《གངས་རྒྱན་མེ་ཏོག》དང་། 《སྦྲང་ཆར》 《ཟླ་ཟེར》《མི་རིགས་ཀྱི་རྩོམ་རིག》《གངས་དཀར་རི་བོ》སོགས་དུས་དེབ་མང་པོར་སྙན་ངག་དཀོད། བརྩམས་ཆོས་ལ༢༠༡༤ལོར་ཀན་སུའུ་མི་རིགས་དཔེ་སྐྲུན་ཁང་ནས་དཔར་བསྐྲུན་བྱས་པའི་སྙན་དེབ《ཟིལ་བ》དང་། གཞས་ཚིག《ཡར་ཀླུང》སོགས་ཡོད། ད་སྐབས་《རྫ་ཆུའི་རླབས་སྒྲ》དྲ་བའི་དོ་དམ་པ་དང་། 《ནས་སོན》ལོ་དེབ་ཀྱི་སྤྱིའི་ལྟ་སྐུལ་བའི་ལས་ཞོར་སྔར་ལྟར་སྙན་ངག་འབྲི་བར་བརྩོན་བཞིན་ཡོད།
ཐིག་ལེ་སྔོན་པོ།
དབེན་པའི་རྨི་ལམ་སྐྱ་བོ་རི་སུལ་ན་བུན་ལ་འཁྲིལ་ཞིང་།།
རྩ་རླུང་གཏུམ་མོ་ཟུང་སྦྱོར་རང་སྣང་བུམ་ཆུང་གིས་བཅུས་ཏེ།།
ཚོར་རྟོག་བྱང་སྤྲིན་དྭངས་མས་མཐའ་དག་གཟུགས་ཅན་དུ་ཕབ་ན།།
འདུ་ཤེས་མེ་ལོང་འོད་པོ་སྣང་བས་གང་མཚར་དུ་དབྱི་འདོད།།
འཛད་མེད་བུམ་ཆུ་ཁམ་གང་ཕྱི་གསལ་མཆོད་ཡོན་ལ་བཀྱགས་ཤིང་།།
རྣམ་ཤེས་ཐིག་ལེ་དམར་པོ་ནང་བཅུད་སྒོམ་ཁང་དུ་བསྐྱེད་ནས།།
གསང་བ་སེམས་བྲིས་མ་དེ་ཡི་གེའི་གཤོག་རླབས་སུ་བཏེགས་ཚེ།།
བདེ་ཆེན་འདྲེན་པའི་ཆང་མ་རང་དང་མཉམ་མཉམ་ལ་ཡོད་འདྲ།།
བ་མོ་ཟེར་མས་བདས་པ་འཆི་བའི་སྐྱ་ཐིག་ཏུ་ཕབ་ལ།།
ངང་སེར་ཆ་རུ་འཕུར་བ་བརྩེ་བའི་སྣང་བརྙན་དུ་བྲིས་ཏེ།།
ཚོགས་དྲུག་ཕལ་བའི་ངོ་བོ་སྙན་ཚིག་ཨ་ལོང་ལ་བརྒྱུས་འདི།།
གཏིང་ཟབ་ཀློང་ཡངས་རེད་དོ་སྨྱུག་རྩེ་ཡང་ཡང་དུ་བསྒུལ་བྱུང་།།
ཕྱི་དབེན་རྣང་ཞིང་ལེབ་མོ་གྲུ་བཞི་ཟུར་གསུམ་དུ་བལྟས་འགྲོ།།
ནང་དབེན་ཡིད་ཀྱི་སྙེ་མ་མགོ་ལྕོགས་གང་མགྱོགས་ཀྱིས་ལྡེམ་འདུག།
དབེན་གསུམ་རླུང་བུའི་འགྲོས་ལ་གསེར་སྨུག་ལང་ལིང་རེ་འཁོར་བས།།
ང་ཡིས་སྣང་གླུ་ཉན་པའི་རྣ་ཅོག་རིངས་རིངས་སུ་བཏང་ཡོད།།
སྐད་ཅིག་གཡོ་བའི་སྤྲིན་པ་རྫི་མོའི་འཛུམ་ཀོང་ལས་འཁྱུགས་སོང་།།
གསལ་ལ་མི་གསལ་མཆིད་ཅིག་རྫི་མོའི་སྔས་འགྲམ་དུ་བཞུར་སོང་།།
དྲང་གཏམ་གློག་མ་སྤྲིན་གྱིས་བརྩེ་འཕྲིན་བར་སྣང་ལ་གཏོར་བས།།
མགྲིན་པའི་ཨོལ་མདུད་དག་པའི་གླིང་བུ་ང་རང་གིས་དཀྲོལ་ཡོད།།
2014/9/15
ངག་ལ་སྨུག་པ་ལངས་སོང་།
---གླུ་མ་བསྟན་པ་དབང་མོར་ཕུལ་བ།
རྟོག་པའི་རི་ཟོམ་གྱི་བྱེ་འུ་ནགས་ལ་འཕུར་ཞིང་།།
ཟབ་ཡངས་སྤྲོས་བྲལ་གྱི་ངག་ལ་ཆུ་ཀླུང་བྲུག་ན།།
ན་ཆུང་ཟུར་མིག་གི་ཁ་མཐའ་བརྩེ་བས་རླན་གྱིན།།
དབྱངས་ཅན་མགྲིན་པ་ལ་ཕྱག་གིས་ཡང་ཡང་ལོས་རེག།
ཉི་མའི་གསལ་སྒྲིབ་ཀྱི་ཞྭ་མོ་དབུ་ལ་གཡོགས་ཏེ།།
དབུ་ལྕང་ལན་བུ་དེ་སྤྲིན་པས་ཤད་ཀྱིན་འོང་ན།།
གར་མའི་མཚན་མདོག་གི་ལྭ་བ་ཁྱོད་ལ་ཡག་སོང་།།
རྒྱལ་མོ་རོང་ཁོག་གི་ངག་ལ་སྨུག་པ་ལངས་སོང་།།
༼ཆུང་འདྲིས༽་གཞས་དབྱངས་ཀྱི་ཁ་མཐའ་སྲིད་པ་གན་རེད།།
བབ་ཆགས་ངང་འཇམ་གྱི་ཁྱོད་རང་འཁོར་བ་འདི་རེད།།
གཉུག་མའི་ཁྲ་རྒྱན་ལ་བཏབ་པའི་སྣང་བའི་མུ་ཏིག།
བརྩེ་གཞས་གསེར་ནག་གི་བཅུད་ལ་ད་ཡང་བསྙལ་དགོས།།
རི་རྩེ་སྤྲིན་དཀར་གྱིས་གཅུད་པའི་༼ཧི་མ་ལ་ཡ༽།།
མཚན་མལ་ཁང་ཁྱིམ་གྱི་ཡོལ་བས་ཁོག་ཡ་མི་འདུག།
ཁྱོད་ཀྱི་གླུ་ངག་གི་གདངས་སུ་དྲོད་ཀྱིས་འཕྱུར་ཏེ།།
དེ་རིང་གནམ་ས་ཡི་སྒོ་མོ་གཅིག་ཏུ་ཕྱེས་སོང་།།
༢༠༡༤/༡/༡༨
བྱང་ལ་དྭགས།
བརྡ་གསར་རྙིང་ཐོབ་ཀྱི་གོ་ས་མི་རྩོད།།
ངག་དབྱངས་གསལ་གནའ་བོའི་རི་དར་ཕྱར་མི།།
གཏམ་བདེན་པའི་སྨྲ་བ་ཀ་ཁས་ཤོད་པའི།།
བྱང་ལ་དྭགས་བོད་ཀྱི་ཚིག་མཛོད་ཡག་པོ།།
གཤིས་མ་བཅོས་བྱང་ཐང་འབྲོག་བུའི་རང་ཚུགས།།
ངག་དག་གཙང་ཕ་སྐད་རྡོ་རྗེའི་རང་གདངས།།
སྲོལ་མ་ཉམས་ཡབ་ཆེན་སྨུག་པོ་གདོང་གཞི།།
བྱང་གཡེར་ཆེན་ལ་དྭགས་འབྲོག་ན་ཡོད་ལེ།།
འཛུམ་དམུལ་དམུལ་ཞལ་རིས་སྨུག་མདངས་འཁྱིལ་ལ།།
འགྲམ་མཁུར་ཚོས་བྱིར་དམར་ཚོན་ཁ་གསལ་བའི།།
ལས་ཀུན་སྤྱོད་དྲང་བའི་གཞུང་རྟ་སྲུང་མི།།
ས་དེ་ཀའི་སྨན་ཆུང་ངང་འཇམ་རང་ཡོད།།
མདོག་ཁམས་ཅན་དཀར་ཡོལ་འབྲུག་མའི་ནང་དུ།།
ཟས་གང་ཞིམ་བརྩེ་བའི་སེམས་ཀྱིས་བླུགས་ཏེ།།
རིན་མི་དགོས་མགྲོན་པོ་བསུ་བར་བྲེལ་བ།།
བྱང་ལ་དྭགས་འབྲོག་གི་གཤིས་ལུགས་ཡིན་ལེ།།
བློ་ཆོས་ལ་འདུན་པའི་རུས་རྐང་སྲ་ཞིང་།།
མགོན་དམ་པའི་གསུང་གི་རང་སྒྲ་ཐོས་ཚེ།
ལུས་བ་སྤུ་ལན་བརྒྱར་གཡོ་ཞིང་གུས་པ།།
བྱང་ལ་དྭགས་མི་ཡི་ངང་ཚུལ་ཡིན་ལེ།།
རི་གཅིག་མཐོ་གཅིག་ལ་འགྲན་པའི་ངང་ཚུལ།།
གངས་གཡེར་ཆེན་གཡེར་ཆུང་བརྩི་བ་གྲངས་མེད།།
དབྱར་ཟླ་གསུམ་གངས་ལ་ཁ་བ་བབས་པ།།
ངས་མཐོང་བའི་ལ་དྭགས་བྱང་ཐང་རེད་དོ།།
རླུང་སྨུག་པས་ངར་ཁ་ཤེད་ཀྱིས་འགྲན་ས།།
གངས་ཁ་བས་གདན་ཐོབ་སུ་ཆེ་རྩོད་ས།།
མཐོ་མཐོ་བས་ཉི་མ་མཆན་ནས་ཤར་ས།།
བོད་བསིལ་མོ་ལྗོངས་ཀྱི་བྱང་ན་ཡོད་དོ།།
ཙེག་བསེར་བུ་རྒོད་པོ་ལུས་ལ་གཟན་ཆེ།།
དགོང་ཉི་མའི་ཚ་གཟེར་མིག་ལ་གཟན་ཆེ།།
དེ་ཡིན་རུང་ངང་འཇམ་འཚོ་བའི་ཡུལ་དེ།།
སེམས་ཐང་དཀར་ཡང་ཡང་འཁོར་ས་ཞིག་ཡིན།།
དྭངས་གསལ་གསལ་སེམས་ཀྱི་རླབས་ལ་འདྲེས་ཤིང་།།
སྔོ་ཡུག་ཡུག་ནམ་མཁའི་མདངས་ཞུན་འཛིན་པའི།
རླབས་མེ་ཏོག་དགོད་པའི་སེང་གེ་ཁ་འབབ།།
ཡུལ་འདི་ནས་འཁྱུག་པས་ང་རང་སྐྱིད་སོང་།།
ཆབ་དྭངས་ལ་གཙང་པའི་བསིལ་མོ་དེ་ནས།།
རླབས་དབུ་དཀར་རྩེན་པའི་བཞུར་འགྲོས་ཉན་ནས།།
ལས་མི་བརྟན་སྤྲིན་གྱི་ཡོ་ལང་བསམ་གྱིན།།
ལག་ཆུ་ལ་བྱིང་སྟེ་རེ་ཞིག་ལུས་སོང་།།
སྦྲང་ཐལ།
བར་སྣང་ཁྱབ་པའི་མེ་ལོང་ཞིག།
སྐར་མའི་ཚོགས་ཀྱི་འོད་དང་བཅས།།
ཐེངས་རེར་མདུན་དུ་བཞད་པ་ན།།
ང་ཡི་སྦྲང་ཐལ་དེ་རུ་འཁོར།།
གང་ལ་ཧད་པའི་མིག་གཉིས་ཀྱིས།།
བརླན་བཤེར་བསྒོས་པའི་མེ་ལོང་བཙལ།།
གཤོག་པའི་རྩལ་ཤུགས་གང་ཡོད་ཀྱིས།།
ཉི་ཟེར་བརྒལ་ཏེ་འཕུར་བའི་མཐར།།
མེ་ལོང་ནང་གི་འོད་ཟེར་ནི།།
སྟོང་པའི་རོ་ལ་འཐིམ་ཏེ་འདུག།
ང་ཡི་གཤོག་པའི་རླབས་མཉེན་གྱིས།།
ཆུ་ཁར་གཡེང་བའི་དབུ་བ་འཛིན།།
དེ་ན་སྨིག་རྒྱུ་ཡངས་པའི་མཁའ།།
དེ་ན་ས་སྲོད་གདུང་བའི་ཁམས།།
གྲིབ་བརྙན་ནགས་སུ་མཆེད་པ་ལྟའི།།
སྨྲེང་བའི་ཆུ་རུ་དཔྱངས་པ་ཡིས།།
ཡིད་ཀྱི་འོད་གསལ་ཙམ་པོ་ཞིག།
སྐད་ཅིག་འགྱུར་བའི་སྔས་ལ་ཕྱོགས།།
༢༠༡༤/༩/༥
བཏགས་ཚུལ།
སྨུག་པ་ཚམ་ཚོམ་རེ་རེ་ཚུར་ལ་འོངས།།
དེ་ལ་མཛེས་སྡུག་ཅེས་པ་རང་གིས་བསྙད།།
སྣང་བ་དཀར་དམར་མང་པོ་སྤྲིན་ལ་འདྲེས།།
དེ་ལ་བརྩེ་དུང་ཞེས་པ་རང་གིས་བཏགས།།
སྡོང་མགོའི་ལོ་མ་ཁ་མདོག་ཡང་ཡང་བརྗེས།།
དེ་ནི་འཇིག་རྟེན་ཟེར་ཡའི་མི་རྣམས་བརྗོད།།
ཁྲ་ཚོམ་མེ་ཏོག་འགའ་ནི་མདུན་དུ་བཞད།།
འཁོར་བའི་སྙིང་པོ་ཞེས་ཏེ་ཀུན་གྱིས་མྱོང་།།
འགྱུར་བ་མང་པོ་གློག་དམར་འཁྱུག་གིན་ཐོན།།
ཐམས་ཅན་སྨྲ་བ་མེད་པར་རེ་ཞིག་ཧད།།
༢༠༡༤/༡༡/༨ཉིན།