དཔྱིད་ཀའི་སིལ་སྡོང་མེ་ཏོག

timg (11).jpg


རླུང་བུའི་ལག་ཟུང་གིས་བསྐྱོམ་པའི་མེ་ཏོག་གི་ཐང་གས

དཔྱིད་ཀྱི་བདག་མོའི་བཞིན་རས་ལ་ཁ་དོག་བསྣན་ཅིང

ན་ནིང་གི་ཁ་བས་གཙེས་པའི་ལོ་མའི་སེར་ཐིག་དེ

བདག་གི་ཕྲག་སྟེང་ནས་འཛིན་མའི་གཞི་ལ་འཐིམ་དུས

སྐྱ་ཐིང་ཐིང་གི་ལོ་ཡིས་ཁུར་པའི་སྡུག་ཡུས་དག

ཁྱོད་ཀྱི་འཛུམ་བག་གིས་ནམ་མཁའི་མཐའ་རུ་སྤྱུགས་པས

ཚོན་གྱིས་བྱུགས་པའི་ངའི་ཕ་ཡུལ་ན

གཞན་ལ་མ་སླེབས་པའི་དཔྱིད་ཀྱི་སྒེག་མོ

སུ་ཡིས་ཀྱང་མྱོང་བཞིན་པའི་ཉི་འོད་བཞིན

འཛུམ་དམུལ་དམུལ འོད་ཀྲིག་ཀྲིག

མཛེས་མའི་འགྲམ་ཆུས་བརླན་པའི་སྤྲིན་བཅུད་ཀྱི་གོམ་སྒྲས

ཁ་ཕོ་ལས་བཙན་པའི་གཡུ་འབྲུག་མལ་ལས་དཀྲོགས་པས

མེ་ཏོག་གི་མཁུར་ཚོས་ལ་བརྩེ་བའི་དམར་མདངས་རྒྱས་ཤིང

དུས་ཆད་མི་དགོས་པའི་ས་སྲོད་ཀྱི་དུས་དེར

རྨ་ཆུའི་བརྩེ་བ་ལས་མཆེད་པའི་གཞས་ཆུང་ཕྲ་མོས

བདག་ཀྱང་འདྲེན་ལ ཁྱོད་ཀྱང་བསུ

རྒྱང་རིང་ནས་གནས་འདིར་བཏེགས་པའི་དྲན་སྣང་དག

མཁའ་རླངས་ཁྲོད་གཤོག་ཟུང་གིས་སྤུར་ཞིང

བུང་བའི་འདོད་ཡོན་ན་རྒྱུ་བའི་བསུང་ཞིམ་གྱིས

གནའ་མཁར་འདིའི་རྐང་མཐིལ་ནས་དབུ་རྩེའིི་བར

བརྗེད་བྱང་དུ་ཆགས་པའི་རི་མོའི་མདངས་ཅི་རིགས་བདུད་རྩིར་ཕབ་ཅིང

གང་དྲན་དྲན་གྱིས་ཕྱུག་པའི་མགྲོན་པོའི་ཚོགས

རྐང་རྗེས་འཚོལ་བའི་གྲུ་ཟུར་རེ་རེ་ན

སྣང་བས་འཁྱམས དྲན་པས་རྒྱུ

ཚེ་ཡི་སྙིང་པོའི་ངོ་བོ་སྨིན་པའི་མེ་ལོང་དང

མི་རྟག་རིས་སུ་མ་ཁྱེར་བའི་སྤྲིན་གྱི་མེ་ཏོག

ད་དུང་དཔྱིད་ཀྱི་བདག་མོའི་སྐྲ་ལོ་སོགས

ཡོད་ཚད་ཁྱོད་ཀྱི་པང་བ་རུ་བཞད་ཅིང་བཀྲ་བས

སྐག་བྱུགས་མི་དགོས་པའི་དཔྱིད་ཀ་འདིར

ཚོས་ཀྱིས་མ་བརྒྱན་པའི་བྱ་དངོས་མི་མཆིས་ན

བདག་ཁྱོད་ལས་སྒེག ཁྱོད་བདག་ལས་འཕྱོར

ཙག་ངར་ཞུས་ཚར་བའི་དཔྱིད་ཀའམ

དཔྱིད་ཀའི་ཚ་རུས་རུམ་པའི་ངའི་ཕ་ཡུལ

ལྗང་མདོག་གི་ཀློང་ན་ཉར་བའི་མེ་ཏོག་བཞིན

ཕྱི་མིག་མི་གླེང་ལ་འབྱུང་འགྱུར་ཡང་མི་བསམ་པར

ཁ་དོག་གིས་འཕྲུལ་བའི་འཇིག་རྟེན་འདིར

མེ་ཏོག་ཁོ་ན་གླེང་བཞིན

རླུང་བུས་སེམས་པ་སྤུར སེམས་པས་གཞས་ཆུང་གྱེར

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།