མི་ཚེ་རང་ལ་མི་དབང་། 

རྨི་ལམ་ལྟ་བུའི་མི་ཚེ་འདི།།

ང་ལ་དབང་ན་སྐྱིད་ཅིག་རེད།།

སེམས་ཀྱི་ཁ་ཕྱོགས་ལྗང་ཁུ་འདི།།

ང་ཡིས་ཚོར་ན་བདེ་ཞིག་རེད།།


སྐྱིད་སྐྱིད་འདྲ་བའི་མི་ཚེ་འདི།།

ནམ་ཡང་བདེ་ན་སྐྱིད་ཅིག་རེད།།

བདེ་བདེ་འདྲ་བའི་མི་ཚེ་འདི།།

རང་ལ་དབང་ན་བདེ་ཞིག་རེད།།


མི་ཤེས་མི་གོ་སྒྱུ་མའི་གར།།

མི་མཐོང་མི་རིག་གཡོ་སྒྱུའི་འཁོར།།

མི་ཡག་མི་རྟོགས་འཇིག་རྟེན་འདི།།

མི་ཚེ་གཅིག་གི་རྩེད་རོགས་རེད།།


ཁ་བ་ལྟ་བུའི་སྲས་མོ་ཞིག །

མི་ཚེ་ཡིན་ནམ་འཁོར་བ་ཡིན།།

ཉིན་རེ་ཡོད་ལ་ཉིན་རེ་མེད།།

འདི་ནི་མི་ཚེའི་བཟློས་གར་ཅིག །


གཞོན་དུས་རང་གི་ལམ་མ་མཐོང་།།

རྒས་དུས་གང་ནས་མཐོང་རྒྱུ་རེད།།

མི་ཚེ་ཟེར་བའི་སྒྱུ་མའི་གར།།

འཁྲབ་སྟོན་ཅིག་གི་གདོང་པགས་རེད།།


མི་རྟག་འཁོར་ལོའི་ཁ་ཕྱོགས་སུ།།

ང་དང་ཁྱེད་ཅག་ཚང་མ་འདུས།།

འདི་ནས་གང་ལ་བགྲོད་པར་བྱ།།

མི་ཚེ་རང་ལ་དབང་ན་འདོད།།


རླུང་བུ་ལྟ་བུའི་རྔུབ་ཕྱོགས་ན།།

ཟུག་ངུ་ཞིག་གི་ཨག་སྐད་ཡོད།།

ས་རྡུལ་འཐིབ་པའི་ཡུལ་ཕྱོགས་ན།།

ན་ཟུག་དམར་པོའི་ཁྲག་མཆོད་ཡོད།།


ཆུ་བོ་བཞུར་བའི་གར་སྟབས་ཁྲོད།།

གཞན་ལ་བརྫིས་བའི་གཡོ་ཅན་མོད།།

མེ་རི་འབར་བའི་ལྕེ་རྩེ་ན།།

ཞེ་སྡང་འགྲན་པའི་ལག་དམར་མང་།།


འབྱུང་བ་འཁྲུགས་པའི་དམར་འཛིངས་ཁྲོད།།

མི་ཚེ་ཟེར་བའི་གར་སྟབས་མང་།།

འཁོར་བ་ཟེར་བའི་བསྐྱར་ཟློས་ཁྲོད།།

དབྱངས་རྟ་འདྲ་བའི་སྐྱོ་གླུ་འཐེན།།


མི་ཚེ་ཟེར་བ་དབང་རྒྱུ་ན།།

འདི་འདྲ་སྐྱོ་དོན་གང་ན་ཡོད།།

འདི་འདྲ་སྡུག་དོན་གང་ན་ཡོད།།

མི་རྟག་མི་ཚོགས་ཡུན་གྱིས་གཟིགས།།


གཟིགས་པ་ཙམ་གྱིས་མི་མཁྱེན་ལ།།

བལྟས་བ་ཙམ་གྱིས་མ་ཚོར་ཡང་།།

མངོན་མེད་ལྐོག་ནས་རྟོགས་རྒྱུ་མང་།།

དེའི་ཕྱིར་མི་ཚེ་རང་ལག་མིན།།


གཞན་ལ་འགྲོགས་ནས་ཁ་ཡག་བཤད།།

དཔོན་པོ་མཐོང་དུས་ངོ་དགའ་བྱས།།

རྒྱུ་ཆེན་མཐོང་དུས་རྒྱུ་མ་འགུལ།།

དེའི་ཕྱིར་མི་ཚེ་རང་ལག་མིན།།


ལྟོ་བའི་ཆེད་དུ་འདྲེས་སྐད་བཤད།།

རྒྱབ་གྱི་ཆེད་དུ་གཞན་པ་བཅོམ།།

ཐམས་ཅད་མི་རྟག་འཁོར་བར་སྐྱེས།།

དེའི་ཕྱིར་མི་ཚེ་རང་ལག་མིན།།


ཡོད་ཚད་མི་རྟག་གྲོང་ཚོ་ནས།།

གཅིག་གིས་གཅིག་ལ་འཕྱ་མོད་བྱས།།

དེ་འདྲ་བྱས་ན་དོན་བྱ་མེད།།

རང་གི་ལམ་དེ་རང་གིས་འཚོལ།།


འཇིག་རྟེན་འདི་ལ་ལྟ་རྒྱུ་ན།།

མི་མངོན་སྒྱུ་མའི་གར་ཞིག་རེད།།

དེའི་ཕྱིར་རང་གི་མི་ཚེ་འདི།།

རང་ལ་མི་དབང་ཡིད་རེ་སྐྱོ།།

རྩོམ་སྒྲིག་པ། རྡོ་རྗེ་བསམ་འགྲུབ།

དཔྱད་མཆན 0 ཡོད།