ཀྲུང་གོ་བོད་ཀྱི་དྲ་བ།

རྫོགས་ཆེན་རུ་དམ་ལུང་པའི་ངོ་མཚར་མཛེས་ལྗོངས།

ཡོང་ཁུངས། : ཀྲུང་གོ་བོད་ཀྱི་དྲ་བ།   རྩོམ་པ་པོ། : གྲོག་མ།(ཆབ་མདོ)   སྤེལ་དུས། : 2017-07-18
ཡིག་གཟུགས། :ཆུང་། འབྲིང་། ཆེ།

༄༅།།བདེ་ལེགས་སུ་གྱུར་ཅིག

དུས་གསུམ་གྱང་གི་རི་མོ་མ་བྲིས་སྔོན།།

མ་བཅོས་རང་བྱུང་འོད་ཀྱི་ཐིགས་པ་ཞིག།

པདྨའི་གུར་ཁྱིམ་ནང་དུ་ལྷུན་གྱིས་གྲུབ།།

གུ་རུ་ཡིད་བཞིན་ནོར་བུ་སྤྱི་བོར་མཆོད།།


མགྲིན་པ་གཡས་དཀྱུས་དུང་གི་བུམ་པ་རུ།།

རྟག་ཏུ་འཁྱིལ་བའི་ལྷ་མོ་བདུད་རྩི་མ།།

མཛེས་སྒེག་ངག་གི་བཅུད་ལ་རོལ་བཞིན་དུ།།

རྗེས་ཆགས་སྤྱན་གྱི་ཨུཏྤལ་བདག་ལ་གཟིགས།།


རྨད་བྱུང་ཚིག་གི་རོལ་རྩེད་ངོམ་ས་ནས།།

ཁྱེད་ཀྱིས་བརྩེ་དང་དུང་བའི་པི་ཝང་འཁྲོལ།།

དྲང་སྲོང་རིག་བྱེད་སྨྲ་བའི་དབང་པོ་དེས།།

ལྷ་མོ་དབྱངས་ལྡན་མ་ཞེས་མངའ་གསོལ་མཛད།།


ཁྱོད་ཀྱི་དམ་ཚིག་མི་འགྱུར་དར་གྱི་མདུད།།

ཕྱི་ཐག་གཙང་པོའི་རྒྱུན་ལས་རིང་ལགས་ན།།

དེ་རིང་བདག་བློའི་གཏེར་གྱི་ཁ་ཕྱེས་ལ།།

སྨྲ་བའི་སྤོབས་པ་སད་པར་མཛད་དུ་གསོལ།།


ཀརྨ་ཆགས་མེད་སྙིང་གི་གའུའི་ནང་།།

རིག་པ་ཚད་ཕེབས་རྙེད་པའི་འཁོར་ལོ་དེ།།

མདོ་ཁམས་སྨད་དུ་སྟོབས་ཀྱིས་རྒྱུ་བའི་གཏམ།།

སྲིད་རྩེའི་བར་དུ་སྙན་གྲགས་འབར་གྱུར་ཅིག།


གཡུང་དྲུང་དམུ་ཐག་རིང་མོ་ཆད་ཤུལ་ན།།

ལམ་དང་ཟམ་པ་མང་པོའི་རྒྱ་གྲམ་ཆགས།།

དེ་ཡི་སྣེ་མོ་ཐམས་ཅད་ཕར་བསྲིངས་ནས།།

བོད་ཀྱི་དགོན་ཆེན་བརྒྱ་ཡི་སྒོ་རུ་ཟུག།


རྟེན་འབྲེལ་མེ་ཏོག་སྣ་ཚོགས་བཀྲ་ན་ཡང་།།

དེ་ཡི་ནང་གི་པདྨ་དཀར་པོ་སྟེ།།

མདོ་ཁམས་སྡེ་དགེའི་རུ་དམ་ལུང་པ་ནི།།

རྨ་བྱས་སྒྲོ་གུར་ཕུབ་པ་ཇི་བཞིན་ཆགས།།


གསེར་གྱི་ས་གཞི་ཆེན་པོའི་སྒལ་གཞུང་དུ།།

མཛེས་པའི་རྒྱན་དང་བཀོད་པ་མ་བྱས་པར།།

རི་བྲག་ནགས་ཚལ་སྟོང་ཕྲག་གྱེན་དུ་ལངས།།

ཡུལ་དང་སྡེ་ཆེན་རང་བཞིན་ཤུགས་ཀྱིས་ཆགས།།


རྫོགས་ཆེན་རུ་དམ་ལྷ་ཡི་ལུང་པ་ནི།།

མཚོ་དང་རྦབ་ཆུ་སྤོས་ཤིང་མེ་ཏོག་སོགས།།

རི་མོ་མཁན་གྱིས་རིས་སུ་བྲིས་པ་འམ།།

བྱེད་པོའི་བློ་ཡིས་བཞེངས་པའི་སྐྱེད་ཚལ་འདྲ།།


སྔོན་ཚེ་གྲུབ་དབང་པདྨ་རིག་འཛིན་ལ།།

ས་འདི་ཆོས་སྐྱོང་སྲུང་མས་སྐྱེས་ཕུལ་ཞིང་།།

འོ་མ་དྲག་ཏུ་འཕྱུར་བའི་རྟེན་འབྲེལ་གྱིས།།

གདན་ས་རྫོགས་ཆེན་ཆགས་ཞེས་གཏམ་དུ་གྲགས།།


དེ་ནས་བཟུང་སྟེ་བསྐལ་པ་ད་ལྟའི་བར།།

མཁས་གྲུབ་གསེར་རིའི་ཕྲེང་བ་མ་ཆད་པར།།

ལུང་རྟོགས་ཆོས་ཀྱི་དགའ་སྟོན་རྒྱུན་བསྐྱངས་ཏེ།།

འཛམ་གླིང་ཁྱོན་དུ་གྲག་ཅིང་འབར་བ་ལགས།།


རྒྱལ་བསྟན་མ་དྲོས་མཚོ་ལས་བབས་པ་ཡི།།

སྔ་འགྱུར་ཆུ་བོ་གངྒའི་རྒྱུན་བཟང་ལ།།

སྔ་དར་ཕྱི་དར་ཡང་དར་རྣམ་གསུམ་གྱི།།

ཆོས་ཀྱི་བྱུང་བའི་ཆེ་བ་གླེང་ས་ན།།


སྔ་དར་རིག་འཛིན་གྲུབ་ཐོབ་ཀུན་ཀྱི་ཁྱིམ།།

དཔལ་གྱི་བསམ་ཡས་མཆིམས་ཕུ་ཡིན་ལགས་ན།།

ཕྱི་དར་མཁས་དང་གྲུབ་ཐོབ་རྣམས་ཀྱི་ཡུམ།།

རྫོགས་ཆེན་རུ་དམ་ལུང་པ་མ་ལགས་སམ།།


སྟེང་ཕྱོགས་ནམ་མཁའ་རྫོང་ནི་ཡངས་ཤིང་ཆེ།།

ཁ་བ་ལྷབ་ལྷུབ་འབབ་ཅིང་གྲང་ངར་རྒོད།།

རྩ་རླུང་རང་དབང་འབྱོར་བའི་སྒོམ་ཆེན་གྱིས།།

ཏིང་འཛིན་ཡེང་མེད་སྐྱོང་བའི་གནས་མཆོག་ཟེར།།


འོག་ཕྱོགས་ཚེ་རིང་ལྗོངས་ནི་བག་རེ་གྲོ།།

སྦྲང་ཆར་སིབ་སིབ་འབབ་ཅིང་སྨན་བསུང་འཐུལ།།

སྐལ་ལྡན་དོན་གཉེར་ཅན་གྱི་སློབ་མ་ཡིས།།

མན་ངག་སེང་གེའི་འོ་མ་འཇོ་ས་ཟེར།།


མཁའ་ནས་ཉི་ཟླ་འཛུམ་བཞིན་འཛུམ་བཞིན་འགྲོ།།

ས་ནས་གངས་ཆབ་སྔོན་མོས་གཏམ་བཟང་སྒྲོག།

ཐོད་བརྒལ་ལམ་གྱི་སྣང་བཞི་མཐར་ཕྱིན་ཏེ།།

ཕུང་ལྔ་འོད་སྐུར་གྲུབ་པའི་གནས་མཆོག་ལགས།།


པདྨ་རིག་འཛིན་ཕུག་དང་གཤིན་རྗེ་ཕུག།

མི་ཕམ་སྒྲུབ་ཕུག་དཔལ་སྤྲུལ་ཕུག་པ་སོགས།།

གྲུབ་མཆོག་རིག་འཛིན་སྟོང་གི་གཤེགས་ཤུལ་ནི།།

དང་བའི་བ་སྤུ་ཟིང་ཞིང་གཡོ་བ་ཡོད།།


རང་བྱུང་ལྷུན་གྱིས་གྲུབ་པའི་ཀེའུ་ཚང་དུ།།

དཀྱིལ་དཀྲུང་ཡུད་ཙམ་བྱས་པའི་ལྷིང་འཇགས་ཀྱིས།།

ཟང་ཟིང་འདོད་ཡོན་མེ་ཡི་ཚ་ངར་ལ།།

སྲེད་ཅིང་རྨོངས་པའི་གདུང་བ་ཞི་བར་བྱེད།།


མཚོ་དང་ལྟེང་ཀ་གཡས་སུ་འཁྱིལ་བའི་འགྲམ།།

སྐལ་བཟང་ལྷོད་བག་ཨེན་ཙམ་བསྟེན་ན་ཡང་།།

འཇིག་རྟེན་འཁོར་བ་སྒྱུ་མའི་གར་སྟབས་ལ།།

ཞེན་ཅིང་ཆགས་པའི་བློ་སྣ་བསྟུང་བར་ནུས།།


རྡོ་རྗེ་འཆང་དབང་དཔལ་སྤྲུལ་འཇིགས་མེད་པས།།

བྱང་ཆུབ་སེམས་ཀྱི་ཉམས་ལེན་མཐར་ཕྱིན་ཏེ།།

སྤྱོད་འཇུག་ཆེན་མོའི་མེ་ཏོག་བཀྲ་བའི་གནས།།

ཡུལ་འདི་ཡ་མཚན་ཤིན་ཏུ་ཆེ་བ་ལགས།།


ཐང་དཀར་རྒོད་ཀྱི་གཤོག་རྩལ་ངལ་བ་ཡི།།

གངས་རིའི་དབུ་རྩེ་ཤིན་ཏུ་མཐོ་བའི་གནས།།

ལྷག་མཐོང་ནམ་མཁའ་ཅོག་གེར་འཇོག་ས་སྟེ།།

ཚེ་དབང་རིག་འཛིན་མཁའ་སྤྱོད་གྲུབ་པའི་ཡུལ།།


རྫ་ཆུ་སིལ་མ་སྐད་སྙན་ལྷུང་ལྷུང་འབབ།།

ནགས་ཀྱི་གཡུ་ལོ་ལྡེམ་བཞིན་ལྡེམ་བཞིན་གཡོ།།

དཔལ་སྤྲུལ་འཇིགས་མེད་ཆོས་ཀྱི་དབང་པོ་ཡིས།།

སྙན་ངག་དྲི་ཟའི་རྒྱུད་མང་འདི་ནས་དཀྲོལ།།


ཡལ་འདབ་ཤིག་ཤིག་གཡོ་བའི་ལྗོན་རྩེ་ནས།།

བྱ་དང་ཁུ་བྱུག་གསུང་སྙན་ལྷང་ལྷང་གྲག།

གནས་ལྔ་སྨྲ་བའི་པཎ་ཆེན་མི་ཕམ་པས།།

རིག་འཕྲུལ་སྟོང་གི་བསྟན་བཅོས་འདི་ནས་བརྩམས།།


སྤང་ཐང་ཡངས་ཤིང་མེ་ཏོག་ཕང་ཕུང་བཞད།།

བུང་བ་རྣམས་ཀྱང་འཕུར་ལྡིང་གར་ལ་རོལ།།

བོད་སྤྲུལ་མདོ་སྔགས་བསྟན་པའི་ཉི་མ་ཡིས།།

གཞུང་ཆེན་སྦྲང་རྩི་འཐུང་བའི་ལྡུམ་ར་ཡིན།།


གཡང་གཟར་བྲག་ལས་ཕུ་ཆུ་དྲག་ཏུ་འབབ།།

དུང་ཆེན་བུས་པའི་སྐད་སྙན་ཤུགས་ཀྱིས་འབྱུང་།།

རྡོ་གྲུབ་འཇིགས་མེད་ཕྲིན་ལས་འོད་ཟེར་པས།།

ཡི་དམ་གཤིན་རྗེ་འགྲུབ་ཅིང་ཞལ་གཟིགས་ཐོབ།།


རྒན་པའི་མིག་ལས་དད་པའི་འོད་མདངས་མཐོང་།།

གཞོན་རབས་རྣམས་ཀྱི་བློ་གྲོས་གློག་ལས་མྱུར།།

རྒྱལ་སྲས་གཞན་ཕན་མཐའ་ཡས་ཐུགས་འཕྲོག་སྟེ།།

ཤྲཱི་སེང་ཧའི་ཆོས་གྲྭ་ཆེན་མོ་བཏབ།།


འགྲོ་དོན་ནམ་མཁའ་ཤིན་ཏུ་ཁོད་ཡངས་ཤིང་།།

འཕྲིན་ལས་རླུང་གི་རྒྱུ་བ་རྟག་ཏུ་འོང་།།

མཁན་ཆེན་གཞན་དགའ་ཆོས་ཀྱི་སྣང་བ་དེས།།

བཅུ་གསུམ་གྲངས་ལྡན་གཞུང་གི་དར་ཆེན་བསྒྲེངས།།


ཕུ་ན་དཔངས་མཐོའི་གངས་རི་འགྱུར་བ་མེད།།

མདའ་ན་ཕྱུག་ཆེན་ལྷ་སྡེ་གཡང་དུ་ཆགས།།

ངག་ཆུང་སེང་གེ་དཀར་མོའི་ཕྲུ་གུ་ལ།།

མཁས་མཛངས་གཡུ་རལ་རྒྱས་སའང་འདི་ན་ཡིན།།


བསྟན་པའི་སྦྱིན་བདག་མངའ་ཐང་ཆེ་བ་དང་།།

བསྟན་འཛིན་སྐྱེས་བུ་སྐུ་ཚེ་བརྟན་བཞིན་དུ།།

དར་མའི་ལུས་ལ་རྒྱན་ཆས་སྤྲས་པ་བཞིན།།

རྫོགས་ཆེན་དགོན་པའི་འཕྲིན་ལས་མཁའ་དང་མཉམ།།


ཁང་བཟངས་གསེར་གྱི་པ་ཏྲ་འཁྱིལ་བའི་དབུས།།

མཉམ་བཞག་ཆུ་བོའི་རྒྱུན་བཟང་སྐྱོང་མཁས་པ།།

མདོ་ཁམས་ཡུལ་གྱི་ངག་རིག་སྨྲ་བའི་དཔལ།།

པདྨ་སྐལ་བཟང་གནས་འདིའི་རྒྱན་དུ་བཞུགས།།


དེ་ནི་ཁམ་པ་དངུལ་གྱི་དབུ་རྒྱན་ལ།།

རིན་ཆེན་གཟི་དང་བྱུ་རུ་མ་བཏགས་པར།།

རང་འོད་ཤིན་དུ་འཚེར་བའི་ཕ་ལམ་ཞིག།

བསམ་བཞིན་ཕྲ་རུ་བཀོད་དང་ཡང་དག་མཚུངས།།


དེ་ལྟར་རྫོགས་ཆེན་རུ་དམ་ངོ་མཚར་ལྗོངས།།

ཕྱི་ཡི་བཀོད་པ་ནང་གི་སྙིང་པོ་སོགས།།

བཤད་པས་མི་ཚར་བརྗོད་ཀྱིས་མི་ལང་བས།།

སྙན་ངག་སྨྲ་བའི་ལྕེ་ཡང་ངལ་བར་གྱུར།།

   བླ་རུང་ཆོས་སྒར་གྱི་དབྱར་གནང་སྐབས་སུ་རྫོགས་ཆེན་ལ་ལྗོངས་རྒྱུར་སོང་བའི་གཏམ་ཤོ་ལོ་ཀ་མཚན་བཟང་སོ་གཉིས་ཀྱི་གྲངས་དང་ལྡན་པ་རྫོགས་སོ།།

རྩོམ་སྒྲིག་པ། : རྡོ་རྗེ་བསམ་འགྲུབ།