ཐགས་མགོ་གཡས་འཁྱིལ་བསམ་སྟེ།།
རྒྱུ་སྤུན་བསྒྲིལ་ནས་སླེབས་ཡོད།།
ཐགས་ལ་ཨ་ཅེ་འབྲོག་མོས།།
སྐྱོ་རོགས་ཡོད་འགྲོ་མ་བསམ།།
ཡར་འབྲོག་གཡུ་མཚོ་བསམ་སྟེ།།
ཀོ་གྲུ་འཕྲེད་ལ་བཏང་ཡོད།།
གཡུ་མཚོར་ཉ་མོས་སྐྱོ་རོགས།།
ཡོད་འགྲོ་བསམ་པ་མ་བྱུང་།།
སུ་རུའི་མེ་ཏོག་བསམ་སྟེ།།
སྦྲང་མས་གཡས་བསྐོར་བརྒྱབ་ཡོད།།
སུ་རུར་འདྲེ་བྱ་སྲེག་པས།།
གཡོན་བསྐོར་བརྒྱབ་ཡོད་མ་བསམ།།
གཡང་འཁྱིལ་ཐབ་ཚང་བསམ་སྟེ།།
རླུང་བུས་དབྱང་རླུང་བསྣམས་ཡོད།།
ཐབ་ཀར་སླ་ང་ནག་པོས།།
སྐྱོ་རོགས་ཡོད་འགྲོ་མ་བསམ།།
རྫ་རིའི་ཆུ་མགོ་བསམ་སྟེ།།
འབྲོང་གཡག་རྫ་རུ་ཕྱིན་ཡོད།།
ཆུ་མགོར་ཀླུ་རྒྱལ་བཙན་པོས།།
སྐྱོ་རོགས་ཡོད་འགྲོ་མ་བསམ།།
ལྷ་བསང་ཀླུ་བསང་གཏང་བར།།
ཤུག་པས་བྲག་ཚང་བསྐྱུར་ཡོད།།
བསང་ལ་བསང་རྩིས་སྐྱོ་རོགས།།
ཡོད་འགྲོ་བསམ་པ་མ་བྱུང་།།
བུ་མོས་ཕོ་ལྷ་བསམ་སྟེ།།
གླིང་དཀར་སྟོད་ལ་སླེབས་ཡོད།།
ཕོ་ལྷར་གཞི་བདག་སྐྱོ་རོགས།།
ཡོད་འགྲོ་བསམ་པ་མ་བྱུང་།།
ཕར་འཁོར་ལ་མོའི་རྒྱབ་ཀྱི།
ཡུན་བསོགས་དུག་ཆུ་མི་བཏུང་།།
དེ་ལས་རྫ་ལ་འགོས་ཏེ།།
རྫ་ཆུ་བསིལ་མ་བཏུང་རྒྱུ།
གྱི་ལིང་ཇོ་རྒྱ་མི་བཞོན།།
བཞོན་ཏེ་ཡོབ་འདྲུལ་མི་གཏོང་།།
དེ་ལས་རྟ་རྒན་སྔོ་སྐྱར།།
བཞོན་ཏེ་སིམ་སིམ་བགྲོད་རྒྱུ།
བྲག་རི་མཐོ་ལ་མི་འཛེག།
འཛེག་སྟེ་ཆུ་ལོ་མི་ཟ།།
དེ་ལས་ཞིང་ཁའི་ནས་ཆུང་།།
བཏོག་སྟེ་རྩམ་པ་བཟའ་རྒྱུ།
སྨད་ཀྱི་གྲོང་དུ་ཕྱིན་ཏེ།།
ཆུང་འདྲིས་ཨེ་ཡོང་མི་བལྟ།།
དེ་ལས་ལོ་རྒན་དྲུག་ཅུ།།
བཙལ་ཏེ་བག་ཕེབས་གནང་རྒྱུ།
དཀར་ཡོལ་ཚེ་རིང་ལོ་བརྒྱ།
ལག་སོན་ཨེ་འབྱུང་མི་བལྟ།།
དཀར་སངས་ཧྲུག་ཧྲུག་བྱུང་ཚེ།།
འགྱོད་སེམས་དེ་ལས་མི་འདུག།
སྲོད་ཀྱི་གྲིབ་མར་མི་བསྒུག།
རྐང་ལམ་ཕྲ་མོར་མི་བལྟ།།
དེ་ལས་བློ་སེམས་བདེ་མོས།།
རྨི་ལམ་ཞིམ་པོ་རུམ་རྒྱུ།
རྒྱ་གྲོང་དཀྱིལ་དུ་ཕྱིན་ཏེ།།
དར་དང་གོས་ལ་མི་བལྟ།།
དེ་ལས་མ་མོའི་སློག་པ།།
གྱོན་ཚེ་ལུས་ལ་འཇམ་པ།།
གཡང་ཆགས་རི་ལ་མི་འགྲོ།
སྨན་རྩྭ་བཏུ་བར་མི་འགྲོ།
སེམས་ཅན་སྤུ་གྲ་ཅན་གྱི།
ཐུགས་སེམས་དཀྲུག་འདོད་མི་འདུག།
རྒྱ་མཚོའི་གཏིང་དུ་ཕྱིན་ཏེ།།
གཡུ་བྱུར་ཨེ་ལོན་མི་བལྟ།།
དེ་ལས་རི་ཁྲོད་འགྲིམ་སྟེ།།
ལྷ་ཆོས་བསྒྲུབ་ལ་རེམ་འདོད།།
རི་འདི་ཤར་རིའི་རི་རྒྱུད།།
རི་བོའི་ཆགས་ལུགས་གཅིག་ཡིན།།
བློ་སྟེ་ནུབ་ཀྱི་རི་ལ།།
འཁོར་དང་མ་འཁོར་མི་འདུག།
ཤིང་འདི་ལྷ་ཤིང་ཤུག་པ།།
ཤིང་གི་སྐྱེ་ལུགས་གཅིག་ཡིན།།
མར་འཁོར་གསོམ་པའི་ཤིང་ལ།།
འཁོར་དང་མ་འཁོར་མི་འདུག།
མཚོ་འདི་ཡར་འབྲོག་གཡུ་མཚོ།།
མཚོ་མོའི་བཞུར་ཕྱོགས་གཅིག་ཡིན།།
བློ་སྟེ་མ་ཕམ་གཡུ་མཚོར།།
འཁོར་དང་མ་འཁོར་མི་འདུག།
གདུ་བུ་གསེར་གྱི་གདུ་བུ།།
མགར་བས་རྡུང་ལུགས་གཅིག་ཡིན།།
བསམ་བློ་དངུལ་གདུབ་ཕྱོགས་སུ།།
འཁོར་དང་མ་འཁོར་མི་འདུག།
ཡུལ་དེ་འཕྱོང་རྒྱས་ཡུལ་རེད།།
མི་ཁ་འཁོར་ལུགས་གཅིག་ཡིན།།
འཕྱོང་རྒྱས་ཟླ་སྒྲོལ་ཕྱོགས་སུ།།
འཁོར་དང་མ་འཁོར་མི་འདུག།
རྒྱན་ཆ་བྱུ་རུའི་སྐེ་རྒྱན།།
རྒྱུན་ཐག་གཅིག་གི་སྟེང་ཡིན།།
བསམ་བློ་གཡུ་ཡི་ཕྱོགས་སུ།།
བཏང་དང་མ་བཏང་མི་འདུག།
ཆུ་དང་ཆར་བས་དེད་པས།།
གཞུང་གི་ཆུ་ཟམ་གཟས་ཡོད།།
ཆུ་ཟམ་ལྕང་མ་རློན་པ།།
ཡིད་ཐང་ཆད་རོོགས་ཡིན་སོང་།།
ཆུ་ཟམ་ལྕང་མ་རློན་པར།།
བགྲོད་མཁན་དེ་ཙམ་མེད་མོད།།
ཚེ་ཟད་བུ་མོ་དེ་ཡིས།།
ཕྱིར་ལྟོས་མེད་པར་བུད་སོང་།།
མཆོད་མེ་སྐོང་བུ་གང་ལ།།
མར་ཁུ་དེ་ཙམ་མི་དགོས།།
ཆུ་མོ་འདོམས་པ་གང་དུ།།
ཉ་བརྒྱ་ཆུད་རབས་མི་འདུག།
བྱེའུ་ཆུང་ལྕང་མར་འཁྱུད་དེ།།
རེ་ཞིག་བསྡད་ན་བསམ་ཡང་།།
སྡོང་ལོ་ཡམ་ཡོམ་གནང་བས།།
སེམས་ཀྱིས་ཁོ་ཐག་ཆོད་སོང་།།
ཚོགས་ཆེན་འདུ་ཁང་གཅིག་ཏུ།།
གྲལ་ཤར་བརྒྱ་དང་བཅོ་བརྒྱད།།
གྲལ་ཤར་གཅིག་གི་གདན་དུ།།
ང་གཉིས་འཁོར་རྒྱུ་དཀའ་སོང་།།
འཇིག་རྟེན་བྱ་བའི་ལས་ཏེ།།
ཐོབ་ཤོར་གཉིས་ལས་མི་འདུག།
ལས་འཕྲོའི་མདུད་པ་གྲོལ་བར།།
ང་ཡང་སྐྱོ་དོན་མི་འདུག།
བློ་རུ་བཏེགས་པའི་གཡུ་ཆུང་།།
གཞན་གྱི་མགུལ་དུ་དཔྱངས་ཚེ།།
གཡུ་ཆུང་གངས་དཀར་སེམས་སུ།།
བཏེགས་དང་མ་བཏེགས་མི་འདུག།
དུས་ཆད་བྱས་པའི་ཉིན་དེ།།
ཉི་ཤུའི་ནག་ཏུ་ཁེལ་ཚེ།།
ཉག་གའི་ལམ་ཕྲན་དེ་རུ།།
བལྟས་དང་མ་བལྟས་མི་འདུག།
གསེར་གྱི་རྒྱ་ཕིབས་སྟེང་དུ།།
གསེར་གྱི་རྒྱ་གླིང་བོས་ཀྱང་།།
རྣ་བའི་རྒྱབ་ཏུ་གཡུགས་ཚེ།།
བོས་དང་མ་བོས་མི་འདུག།
སྲིད་པའི་ལ་རིང་བཅོ་བརྒྱད།།
གོམ་པས་འཇལ་ཏེ་ཕྱིན་ཡང་།།
ཆུང་འདྲིིས་གར་བསྡད་མེད་ཚེ།།
ཕྱིན་དང་མ་ཕྱིན་མི་འདུག།
ཐབ་ཀར་གཡང་དྲུང་བྲིས་ཀྱང་།།
ཐབ་ལྷ་འཁོར་རྒྱུ་མེད་ཚེ།།
ཐབ་ཀར་གཡང་དྲུང་རི་མོ།།
བྲིས་དང་མ་བྲིས་མི་འདུག།
བླ་མ་གསེར་ཞྭ་ཅན་ལ།།
གདུགས་དང་རྒྱལ་མཚན་བསྐོར་ཡང་།།
ཉམས་རྟོགས་རྒྱུད་དུ་མེད་ཚེ།།
བསྐོར་དང་མ་བསྐོར་མི་འདུག།
གནམ་གྱི་སྐར་མ་བརྩིས་ཏེ།།
མཚན་མོའི་སྨག་ལ་རེམ་ཡང་།།
བྱམས་པ་འགྱུར་བག་ཅན་དེ།།
གཞན་གྱི་འདུན་མར་ཆས་སོང་།།
སྔས་ཐོག་གཅིག་གི་མནའ་དེ།།
འགྲོ་ཞོར་བཤད་པའི་ཚིག་རེད།།
ཁྲེལ་གཞུང་མེད་པའི་བྱམས་པས།།
ང་རང་རླུང་དུ་བསྐུར་སོང་།།
འཇིག་རྟེན་ཕོ་རེ་མོ་རེ།།
བགྲོད་དགོས་སྲིད་པའི་དཔེ་རེད།།
ཞག་གསུམ་བགྲོད་རོགས་འཚོལ་བ།།
ཡིད་ཐང་ཆད་རོགས་ཡིན་སོང་།།
དང་པོ་ང་གཉིས་བགྲོད་དུས།།
གོམ་པའི་འདེགས་འཇོག་མཉམ་པ།།
བར་དུ་ཆར་ཆུས་དེད་དུས།།
ཁྱེད་རང་ང་ལས་མགྱོགས་པ།།
རྟ་དང་སྒ་གཉིས་དབར་དུ།།
ཆད་མེད་གློ་ཐག་འཐེན་ཡང་།།
རྟ་ཕོ་ཇག་པར་ཕྲད་དུས།།
གསེར་སྒ་གཡུགས་བློ་བདེ་བ།།
ནངས་མོར་ཁྲོམ་དུ་ཕྲད་དུས།།
ང་ཡོང་ཁོ་ཡོང་གསུངས་བྱུང་།།
སྲོད་ཀྱི་འགྲོ་རོགས་འདུག་རོགས།།
པུས་མོ་སྐྱ་རིལ་ཡིན་པ།།
སྤྱན་ཆབ་ཁྲུམ་ཁྲུམ་མི་གཏོང་།།
ལས་ཀྱིས་བསྐོས་པ་ཡིན་སོང་།།
ཕ་མ་བུ་རྒྱུད་གཅིག་ལ།།
བསོད་ནམས་མི་འདྲ་ཁྱད་ཡོད།།
ཕྱི་རུ་བབས་པའི་ཆར་བ།།
ཞག་གསུམ་ཆར་ཐག་ཆོད་སོང་།།
སེམས་སུ་བབས་པའི་ཆར་བ།།
མ་ཆོད་ཟླ་སྣེ་ལོ་ཡིན།།
རྟ་ཕོ་གར་འགྲོའི་ཕྱོགས་སུ།།
སྤྱན་མིག་ཧྲིག་ཧྲིག་བཏང་ཡང་།།
རྟ་ཕོ་གར་འགྲོ་སྲབ་རེད།།
སྲབ་ཁ་འཐེན་མཁན་ལག་རེད།།
འདྲིས་པ་དེ་ནི་མ་བྱུང་།།
བསྐོས་པ་དེ་དང་འགལ་སོང་།།
ཕུ་ཡི་ཆོས་འཁོར་གླིང་དུ།།
ང་རང་འགྲོ་གྲབས་མཛད་ཡོད། །