ཐོལ་མགུར།

143.jpg

ཞེ་ལ་བཞག་པའི་སྟར་ཀས།།

སྡོང་བོ་ཡོམ་ཡོམ་བྱས་བྱུང་།།

བྱིའུ་ཆུང་ཞེད་སྣང་སྐྱེས་ནས།།

འཕུར་གྲབས་འཕུར་གྲབས་བྱས་ཀྱང་།།

བྱིའུ་ཆུང་མིག་གི་མཐའ་ལ།།

ཞེན་ཆགས་ལས་འཕྲོ་འཁྱིལ་དུས།།

ཅག་ཅག་ཅག་ཅག་གནང་བཞིན།།

འཕུར་རྒྱུ་བརྗེད་ལ་ཉེ་བ།།


དབེན་པའི་ཡུལ་གྱི་ནགས་ལ།།

སྟར་ཀ་འདི་འདྲ་འཁྲུངས་པ།།

བྱིའུ་བྱང་ཆུབ་སེམས་དཔའི།།

ཐུགས་བསྐྱེད་ཟབ་པ་མིན་འགྲོ།།

སྟར་ཀའི་ལྗོན་པ་འདི་ལ།།

ཡལ་འདབ་བརྒྱ་དང་བརྒྱད་འདུག།

རི་ཁྲོད་དབེན་པ་འཚོལ་བའི།།

བྱི་འུ་འབབ་ས་མིན་ནམ།།


གཙང་བོའི་གཞུང་ལ་བཏང་བའི།།

གྲུ་དེ་ང་རང་ཡིན་ཚེ།།

ཚངས་དབྱངས་རྒྱ་མཚོ་བསུས་ཏེ།།

རི་ཁྲོད་བསྙེག་རྒྱུ་བྱུང་ན།།

དང་པོ་འགྲོ་སའི་རི་ཁྲོད།།

མདོ་ཁམས་ནགས་ལ་བྱས་ཤིང་།།

སྟར་ཀའི་ལྗོན་པ་ཞིག་ལ།།

མགུར་དང་དབྱངས་ཀྱིས་མདུད་ཆོག།


དང་པོ་ལྗོན་པ་དེ་ཡིན།།

བར་དུ་བྱི་འུ་དེ་ཡིན།།

མཇུག་ཏུ་ལས་འཕྲོ་དེ་ཡིན།།

མཐའ་མར་འཛོམས་ས་དེ་ཡིན།།

རྩོམ་སྒྲིག་པ། རྡོ་རྗེ་བསམ་འགྲུབ།

དཔྱད་མཆན 0 ཡོད།