ཀྲུང་གོ་བོད་ཀྱི་དྲ་བ།

རྒྱལ་བ་ཚངས་དབྱངས་རྒྱ་མཚོ་།

ཡོང་ཁུངས། : མཚོ་སྔོན་བོད་ཡིག་གསར་འགྱུར།   རྩོམ་པ་པོ། : (ལྷ་ས།)འབའ་སྨད་རྒྱལ་ལོ་ཚེ་རིང་།   སྤེལ་དུས། : 2017-12-18
ཡིག་གཟུགས། :ཆུང་། འབྲིང་། ཆེ།

དང་པོ། རྒྱབ་ལྗོངས།

ཁྱེད་རང་མེ་ཏོག་དང་བསྡེབས་ནས་སྐྱེས་པ་ནས།

སྒོ་ག་གེ་མོ་ཞིག་རང་གི་ཕུགས་བསམ་གྱིས་ཕྱེ་རྗེས།

གྲགས་འགུལ་ཅི་ཡང་མེད་པར།

ད་དུང་ཡང་། གཏམ་རྒྱུད་ཅིག་འབྲི་བར་བྲེལ།


དུས་དེ་ནས་བཟུང་། ཁྱེད་ཀྱིས།

མགུར་གླུའི་ས་བོན་རེ་རེའི་བྲོ་བ་རྙེད།


ཁྱེད་རང་གཙང་ཆུ་དང་བསྡེབས་ནས་བཞུར་བ་ནས།

སེམས་ཆུང་ངང་འཚོས་པའི་སྒོ་དེ་སེམས་ཆུང་གིས་ཕྱེ་རྗེས།

སེམས་ཚེགས་ཀྱི་ཐ་སྙད་མུ་ཏིག་བཞིན་ཐོར།

དེ་དང་བསྡོངས་ནས།

སྒོ་དེའི་ལྡེ་མིག་ནམ་ཞིག་བོར་འགྲོ་བའི་དངངས་སྐྲག་སྐྱེས།


དུས་དེ་ནས་བཟུང་།

མགུར་གླུའི་ས་བོན་རེ་རེ་ལ་གཤོག་པ་ཐོགས།


ཁྱེད་རང་ཆུ་འཛིན་དང་བསྡེབས་ནམ་མཁར་རྒྱུ་བ་ནས།

རྫུ་འཕྲུལ་ལྟ་བུའི་སྒོ་དེ་ཕྱེ།

སྒོ་དེ་ནི་རྩོད་གཞི་ཆེ་བའི་མེ་ཏོག་ལྡུམ་ར་ཞིག་ཏུ་གྱུར།

དེ་དང་བསྡོངས།

མེ་ཏོག་ཁག་ཅིག་གི་སྐྱེ་སྟོབས་ལ་སྨོན་ལམ་བཏབ།


དུས་དེ་ནས་བཟུང་།

མགུར་གླུའི་ས་བོན་རེ་རེ་ནམ་མཁར་འཕུར།


ཁྱེད་རང་འབྲུག་སྒྲ་དང་བསྡེབས་ནས་གྲགས་ཤིང་།

རྨི་ལམ་ལྟ་བུའི་སྒོ་དེ་ཕྱེ་རྗེས།

གནས་ལུགས་ཀྱིས་བསྐྲུན་པའི་བདེན་དོན་ལ།

གཡས་གཡོན་གྱི་མི་ཡིས་ཡིད་རྟོན་མི་འཆའ་ཕྱིར།

བབ་ཅོལ་ཚིག་གི་ཐོ་བས།

སྡེ་མཐར་སྤྱུགས།

དེ་དང་བསྡོངས།

འཇིག་རྟེན་གྱི་ཆོ་འཕྲུལ་ནི་དགོད་སླ་ལ་ངུ་སྐྱེན་པ་ཞིག་ཏུ་མཐོང་།


དུས་དེ་ནས་བཟུང་།

མགུར་གླུའི་ས་བོན་རེ་རེར་བྱམས་པའི་སེམས་སུ་བབས།


གཉིས་པ། དྲིན་གཟོའི་གླུ

ཁྱེད་ཀྱིས། འཇའ་ཚོན་ལྟ་བུའི་མེ་ཏོག་གི་ཚོགས་ལ།

རྨི་ལམ་གྱི་ས་བོན་བཏབ་མྱོང་ཕྱིར།

ལོ་རྒྱུས་ཀྱི་མེ་ཏོག་ལ་གསེར་གྱི་བུང་བ་དེ་བསུས་མྱོང་ཕྱིར།

མི་རབས་ཤིག་གི་རྡོག་ལམ་ཆེད་དུ་ན་ཟུག་ཇི་སྙེད་ཅིག་ལུས་སུ་གྱོན་མྱོང་ཕྱིར།

དུས་རབས་ཉེར་གཅིག་པའི་སྨྱུག་ཐོགས་པ་ཞིག་གིས།

ཁྱེད་ལ་མཆོད་ཆང་འདྲེན།

ལུས་ཀྱིས་བཀུར་མྱོང་བའི་ཡིད་སྨོན་གྱི་མཆོད་ཆང་འདི་ཁྱེད་ལ་འབུལ།

ངག་གིས་བཀུག་མྱོང་བའི་དབྱངས་རྟའི་མཆོད་ཆང་འདི་ཁྱེད་ལ་འབུལ།

ཡིད་ཀྱིས་བཀྱགས་མྱོང་བའི་ཉིན་ཐོའི་མཆོད་ཆང་འདི་ཁྱེད་ལ་འབུལ།

རྒྱལ་བ་ཚངས་དབྱངས་རྒྱ་མཚོ།

གསུམ་པ། དྲན་གདུང་།

རྒྱལ་བ་ཁྱེད་ཀྱིས།

སུས་ཀྱང་བཤད་མྱོང་མེད་པའི་མགུར་གླུ་རིང་མོ་ཞིག་བརྩམས་མྱོང་ཕྱིར།

ངག་རྒྱུན་གང་རུང་ཞིག་ཏུ་གྲགས་མྱོང་མེད་པའི་ཞབས་རྗེས་ཤིག་བཀོད་ཡོད་ཕྱིར།

མི་རེ་རེ་ལ་དབྱངས་རྟ་སྙན་མོ་ཞིག་སྐྱེས་སུ་བཏེགས་ཡོད་ཕྱིར།

རྒྱལ་བ་ཁྱེད་རང་།

གནས་འདིའི་མི་རྣམས་ལ་བཀའ་དྲིན་ཅི་འདྲའི་ཆེ་ཨང་།

མགུར་གླུ་ཤོ་ལོ་ཀ་རེ་རེ་ངག་ཏུ་དྲངས་པའི་སྐབས་དང་།

ལོ་རྒྱུས་ཀྱི་ཤོག་ལྷེ་རེ་རེར་མཇལ་བའི་དུས་སུ།

ངས་ཁྱེད་ཉིད་ཧ་ཅང་དྲན་ཨང་།

རྒྱལ་བ་ཚངས་དབྱངས་རྒྱ་མཚོ།

བཞི་པ། ལི་ཐང་ན་ཁྱེད་ལ་ཅི་ཞིག་ཡོད།

དུས་དེར། ལི་ཐང་གི་ཞལ་ངོར།

ཇི་ལྟ་བུའི་དཀར་ཆག་ཤར་འདུག

ཛ་དྲག་གི་ཆུ་བོ་གྱེན་དུ་བཞུར་བཞིན་ཡོད་དམ།

ལྐོག་མིག་གི་མདའ་མོ་སྔར་ལྟར་རྣོ་འམ།

འཁྱོགས་ཟོལ་གྱི་ལམ་དེ་སྔར་ལྟར་གྱ་གྱུ་ལྡན་ནམ།

སྐབས་དེ་ལྟ་བུ་ཞིག་ལ།

ཁྱེད་ཀྱིས།

ལི་ཐང་གི་ནམ་ཟླ་གོས་སུ་གྱོན་ཏེ།

མཁའ་དབུགས་ག་གེ་མོ་ཞིག་རྔུབ་བཞིན།

སེམས་ཀྱི་གདུང་བ་གང་རུང་བསྲན་ནས།

བྱ་དེ་ཁྲུང་ཁྲུང་དཀར་པོ།

ང་ལ་གཤོག་རྩལ་གཡོར་དང་།

ཐག་རིང་རྒྱང་ལ་མི་འགྲོ།

ལི་ཐང་བསྐོར་ནས་སླེབས་ཡོང་།

ཞེས་པའི་མགུར་གླུ་སྙན་མོ་དེ།

ལི་ཐང་གི་ལྗོངས་ནས་བརྩམས་ཤིང་།

ལི་ཐང་གི་དཀར་ཆག་ཏུ་བཀོད།

དེ་ལྟ་ནའང་།

གྲིབ་མ་ཞིག་གིས།

ཁྱེད་ཀྱི་རང་དབང་གི་ཕུགས་བསམ་ལ།

ཡང་ཡང་མནར་གཅོད་གཏོང་།

ཡང་ཡང་གཏོང་།


རྩོམ་སྒྲིག་པ། : རྡོ་རྗེ་བསམ་འགྲུབ།