ཨ་ཚོགས་བློ་བཟང་མཁས་བཙུན།
ཤར་ཙོང་ཆུ་སྔོན་མོའི་ལྷོ་རྒྱུད་ན།།
ཆུ་རྨ་ཀླུང་རིང་མོའི་བྱང་ཕྱོགས་སུ།།
དབུས་ཙོང་ཁ་མཐོན་པོའི་འདབས་རོལ་ཏུ།།
རྗེ་ཙོང་ཁ་འཇམ་དབྱངས་ཡབ་སྲས་དྲན།།
ཕ་འཇམ་དབྱངས་འཇིགས་མཛད་མི་བུའི་ཚུལ།།
བུ་འཇམ་དབྱངས་གཞོན་ནུ་གླེགས་རལ་འཛིན།།
གླིང་ཉི་ཟླ་ཟུང་གི་ཁྱབ་རྒྱ་ཅན།།
ཕ་དོན་གྲུབ་རིན་ཆེན་ཡབ་སྲས་དྲན།།
དགོངས་ཁྱུང་འདྲ་སྐྱེ་བའི་མངོན་པ་དྲན།།
ཁྱུང་ཚང་སྒོ་སྲུང་འདྲའི་རྣམ་ཐར་དྲན།།
དུས་ཉེན་སྲུང་བྱ་ར་གཡེལ་མེད་དྲན།།
ནོར་རིན་ཆེན་བཅལ་པའི་ཐུགས་བསྐྱེད་དྲན།།
འགང་ཕ་ཚབ་བྱེད་སྒོ་བསླབ་པ་དྲན།།
བྱམས་མ་ཚབ་ནུ་ཞོ་བླུད་སྙམ་དྲན།།
གཏམ་ཚེ་གཅིག་གཞུང་བསྲིངས་ཞལ་གདམས་དྲན།།
ཁྱུང་གླིང་བཞི་བསྐོར་པ་ལྷག་པར་དྲན།།
སྤྱིར་ཕ་བཟང་བོད་ལ་དྲིན་པོ་ཆེ།།
སྒོས་ཕྱི་རབས་བོད་ལ་དྲིན་རེ་ཆེ།།
བུ་འཛམ་གླིང་གཡས་བཞག་རྒྱན་དུ་ཆེ།།
ཆེ་ཁྱུང་ཆེན་རྒོད་པོ་ཨ་རེ་དྲན།།
སྐུ་མཐོང་གྲོལ་ཆེན་མོ་མཇལ་དུས་དྲན།།
གཞུང་པོད་ཆེན་བཅོ་བརྒྱད་རྩིག་དུས་དྲན།།
འགྲན་དོ་ཡ་མེད་སྙམ་ལྷག་ཏུ་དྲན།།
དྲིན་བསམ་ཞིང་བསམ་ཞིང་ངུ་རེ་བྲོ།།
དབུ་ཐོས་བསམ་འདི་ནས་བརྙེས་པ་དྲན།།
གནས་འདི་ནས་རྒྱང་ལ་བྱོན་ཚུལ་དྲན།།
བྱོན་བསྟན་དོན་ཕྱོགས་མེད་རྣམ་ཐར་དྲན།།
དྲིན་བསམ་ཞིང་བསམ་ཞིང་ངུ་རེ་བྲོ།།
ཡུལ་ཕུ་ནུ་ཕ་ས་མ་མཐོང་དྲན།།
དྲིན་ཕ་མའི་ཞལ་མཇལ་མ་ཡོང་དྲན།།
གནས་འབྲོག་རི་དགའ་ལྡན་དབུ་རྩེ་སྟེ།།
ཡུལ་མདོ་སྨད་ཡང་ཡང་གཟིགས་པ་དྲན།།
བྱ་ཁུ་བྱུག་མི་གྲག་གྲོས་བཏབ་དྲན།།
བྱེའུ་འཇོལ་མོ་མི་ཡོང་ཁ་ཆད་དྲན།།
སྐུ་ཉིད་ཀྱི་མྱོང་བ་ཅན་ཡང་དྲན།།
ཡུལ་ཙོང་ཁའི་སྐྱིད་སྡུག་སུ་ལ་བཤད།།
ད་དེ་ནས་སེམས་ཁ་ལྷོད་ཙམ་ཡིན།།
ལྷོད་དྲན་པའི་མཆི་མ་མིད་དགོས་ཡོད།།
གདོང་མཆི་མས་བརླན་པ་འབྱིད་ཀིན་ལ།།
གནས་སྟོད་སྨད་ཡུལ་ལ་གཡེང་ཙམ་བགྱིད།།
ས་པད་མ་འདབ་བརྒྱད་བཅུད་ལ་བཟེད།།
གནམ་འཁོར་ལོ་རྩུབས་བརྒྱད་གཡང་ལ་འཁོར།།
ཕྱོགས་བཀྲ་ཤིས་རྟགས་བརྒྱད་དངོས་གྲུབ་གཏོད།།
ཡུལ་འདི་འདྲའི་ངོ་སོ་ཡར་ལ་བསྟོད།།
གནས་ཞྭ་སེར་བསྟན་པའི་ཆུ་འགོ་ཡིན།།
འབྲོག་སྒྲུབ་བརྒྱུད་བསྟན་པའི་མ་དགོན་ཡིན།།
བྲིས་རྩོམ་པ་ལེགས་བཤད་འབྱུང་གནས་ཡིན།།
མ་འགྲོ་ཀུན་བདེ་འགྲོའི་གཞི་མ་ཡིན།།
དབྱར་ཟླ་བ་གསུམ་དེ་གཡུ་ཡི་རི།།
གཡུ་སྒྲོལ་མ་སྔོན་མོའི་མཛེས་པ་ངོམ།
སྟོན་ཟླ་བ་གསུམ་དེ་གསེར་གྱི་གཞོང་།།
གཞོང་ནོར་བུའི་སྤུངས་པ་བསྟན་འགྲོའི་དགེ།
དེ་དགུན་ཟླ་གསུམ་དེ་ཤེལ་གྱི་ཡུལ།།
ཤེལ་དཀར་པོ་གངས་ཀྱི་མཆོད་རྟེན་ཡོད།།
ཐང་ཆེན་པོ་དངུལ་གྱི་གཞོང་བ་ཡོད།།
རི་དེའུ་འབུར་དུང་གི་བུམ་པ་ཡོད།།
གངས་ཁ་བ་རྫ་རྒྱུད་རི་རྒྱུད་རེད།།
ས་སྨུག་ཀླུང་ལ་ལུང་ཐང་མ་ཡིན།།
བྱེའུ་ཅོ་ག་འབྲལ་མེད་གྲོགས་གཅིག་ལ།།
གནས་དབེན་པའི་སྐྱོ་སྣང་གསལ་གསལ་ཡིན།།
དགོང་ཉི་ཟེར་ས་མཐའི་རི་ལ་འགོས།།
རི་གྲིབ་སོའི་སོ་ཁ་ཉེ་སར་གཏད།།
བྱ་ཕོ་རོག་ནག་ཆུང་ནགས་ལ་གཟས།།
གནས་དབེན་པའི་ཨ་ཇོ་སྐྱོ་དུང་ངེ།།
ས་ཡར་བལྟས་རྒྱབ་རི་སྨུག་པོ་དེ།།
རྫ་མཐོན་པོ་མ་ཅིག་ལྷ་མོ་རི།།
དགོང་ཟླ་བ་དུང་གིས་ཞལ་རེ་དཀར།།
ནངས་ཉི་ཟེར་གཞོན་ནུས་སྐུ་རེ་བརྒྱན།།
སྐུ་གཡུ་བཟང་སྒྲོལ་མ་སྔོན་མོ་ལ།།
ཕྱག་མདའ་དར་ནོར་གཞོང་འདོད་རྒུའི་བདག།།
སྨན་མཛེས་མ་སྟོང་གི་རྣམ་འགྱུར་རྫོགས།།
མ་མཛངས་མ་མང་བོའི་དངོས་གྲུབ་སྙིལ།།
མ་བཟང་མོ་ཤིང་བཟའ་ཨ་ཆོས་གཅིག།
སྨན་མཛངས་མ་བསོད་ནམས་མཚོ་མོ་གཉིས།།
དཔོན་ལྷ་ལྕམ་བསོད་ནམས་སྒྲོལ་མ་གསུམ།།
མ་མོ་སྨན་སྟོང་གི་དྭངས་རྩེ་ཡིན།།
ལྷོ་རི་རྒྱུད་སྨུག་པོ་འབྲུག་འདྲ་ཡོད།།
འབྲུག་གཡུ་ལོའི་དབུ་འཕང་དགུང་ལ་གཏད།།
གནས་གཞི་བདག་ཨ་མེས་སྙིང་རི་དེ།།
འགྲོ་མགོན་སྐྱབས་གཡེལ་བ་མེད་པ་ཡོད།།
ཕོ་སྨུག་པོ་འཁོར་གསུམ་སྲུང་བ་ཅན།།
བཅིབས་གཡག་རྒོད་མཐིང་བ་ངུར་ཞགས་མ།།
ཕྱག་རལ་གྲི་ཤུབས་མེད་སྔོ་ཤལ་ལེ།།
བུ་རྒོད་པོ་སྟོང་གི་སྐྱེ་རྒྱུད་ཡོད།།
བླ་ཆེན་པོ་དགོངས་པ་རབ་གསལ་གཅིག།
རྗེ་རྒྱལ་བ་ཙོང་ཁ་ཡབ་སྲས་གཉིས།།
ཕ་བླ་མ་སྤྱན་རས་གཟིགས་དངོས་གསུམ།།
བུ་སྟག་འདྲ་གཟིག་འདྲའི་དཔུང་ཆེན་བསྒྲིགས།།
བྱང་བྲག་དཀར་རྫ་རྒྱུད་ཤེལ་འདྲ་ཡོད།།
ཤེལ་དཀར་པོའི་གདན་ས་ཨ་རེ་སྐྱིད།།
ཕ་བླ་མའི་གཟི་བྱིན་འཁྱིལ་བ་ཡོད།།།
ལྷ་ཡི་དམ་སྲུང་མའི་སྲུང་བ་ཡོད།།
མདུན་རྫ་ཆུ་སྔོན་མོ་སི་ལི་ལི།།
བྱ་སྐྱ་ཀའི་འགྲོན་བརྡ་ཆ་ལ་ལ།།
ནགས་གཡུ་ལོ་འཚང་ཁ་ཤིག་སེ་ཤིག།
གནས་དབེན་པའི་སྐྱོ་བ་རང་སངས་ཡིན།།
ནངས་ཉི་འཆར་སྔ་བ་པང་ན་ཡོད།།
པང་འོད་གསལ་མ་བུ་སྔ་འཆར་དགེ།།
དགོང་འཕྱི་བ་ཉི་ཟེར་རུམ་ན་ཡོད།།
གཉིད་རྣལ་འབྱོར་བདེ་བའི་དགའ་སྟོན་ཡིན།།
དེ་དགུན་ཉིན་འོད་ཆེན་ལྷོ་ནས་འཆར།།
ལྷོ་འོད་ཆེན་དྲོད་ཁོལ་ཉིན་གང་ཡིན།།
འདི་དཔྱིད་ཉིན་རིང་མོ་ཤར་ནས་འབུད།།
ཤར་བསིལ་གྲིབ་ལ་དང་ལུང་ལ་བཀོན།
ཞོགས་ལངས་བརྡ་ཅན་གྱི་ཕོ་རོག་ཡོད།།
དགོང་ཉལ་བརྡ་གཏོང་གི་འུག་ཆུང་ཡོད།།
ཉིན་སྐྱོ་བ་སངས་བའི་འཇོལ་མོ་ཡོད།།
ནོར་སྦྱིན་བདག་འཁྲིད་པའི་སྐྱ་ཀ་ཡོད།།
བྱ་བྱེའུ་རིགས་མི་གཅིག་སྣ་ཚོགས་པ།།
སྐད་གདངས་སྙན་མི་འདྲ་སོ་སོའི་ཁྱད།།
ལི་དྲིལ་ཏིང་མི་དགོས་རང་བྱུང་བ།།
སྒྲ་སིལ་སྙན་རོལ་མོ་ཨོཾ་ཨཱ་ཧཱུཾ།།
ཤིང་ལྗོན་པ་གཡུ་ཡི་ལོ་མ་ཅན།།
སྐུ་དྲི་བཟང་མཆོད་པའི་དྲི་ཆབ་མ།།
སྤང་མེ་ཏོག་གསེར་གྱི་སེ་བ་ཅན།།
རྐང་ཟིལ་བ་སྦྱིན་པའི་ཞབས་བསིལ་མ།།
དུང་ལོ་མ་ཅན་གྱི་བ་ལི་དང་།།
ཤིང་གསེར་ལོ་འབར་བའི་མཁན་པའི་རིགས།།
ལྗང་གཡུ་ལོ་ཅན་གྱི་ཤུག་པ་བཅས།།
མཆོད་ལྷ་མོ་བརྒྱད་ཀྱི་བརྩེ་བ་ཡོད།།
སྒང་ཤེའུ་ཆུང་མ་བུ་བསྒྲིགས་ནས་གཤར།།
གཞུང་ངང་ཆུང་ཁྱོ་ཤུག་འགྲོས་སྟབས་མཉམ།།
སྤང་ན་ལུང་རིང་མོ་སྦྲང་གི་ཡུལ།།
སྣང་སྲིད་པའི་ལྟད་མོ་ཆེ་བར་ཡོད།།
འགང་སྲིད་དཔལ་རིག་གསུམ་ལས་སྒོ་ཆེ།།
སྟོབས་གཞན་སྡེ་དབང་བསྒྱུར་རྡོ་རིང་ཡོད།།
བསྟན་འགྲོ་དོན་བྱས་པ་བསམ་མི་ཁྱབ།།
གླིང་ཆེ་རྒུ་མང་བོའི་འཁྲུངས་གཞིས་ཡིན།།
སྟོད་ཆུ་དཀར་བསང་ལྕམ་མ་སྲུའི་གཡང་།
བར་འབྲོག་རུ་སྤུན་གསུམ་ཕུ་ནུའི་གཡང་།།།
སྨད་མཛེས་མའི་ཐང་ལ་དཔའ་བོའི་ཡུལ།།
ཡུལ་བཟང་སྤྱོད་ལྷ་གནས་ཙོང་ཁ་བ།།
ཞེས་ཆོས་རྗེ་བླ་མ༧དོན་གྲུབ་རིན་ཆེན་པའི་སྒྲུབ་གནས་བཞུགས་ཡུལ་གྱི་ཡུལ་ལུང་གཙོས་པའི་ཙོང་ཁའི་ཡུལ་ལ་ཅུང་ཟད་བསྔགས་པ། གནས་མཆོག་ཆུ་དཀར་རི་ཁྲོད་ཅེས་པ་འདི་ནི། སྒྲུབ་གནས་ཤིན་ཏུ་བྱིན་ཆགས་ཤིང་ལོ་རྒྱུས་ཀྱི་དཔྱད་དང་རྣམ་ཐར་གྱི་འགང་དང་ལྡན་པ་གང་ལ། ལོ་གཅིག་འདི་ལ་གནས་ཀྱི་གསེར་མཇལ་ཐེངས་བདུན་ལེན་པའི་གནས་མཇལ་བ་ཨུ་ཚུགས་ཅན་དང་། མངོན་ཞེན་ཅན། སྙན་ངག་སྨྲ་བའི་གྲགས་པ་ཅན་ཨ་ཚོགས་བློ་བཟང་མཁས་བཙུན་དུ་འབོད་པས་བྲིས་པའི་ཡི་གེ་བ་ནི། རང་དབོན་འཚོ་བྱེད་འཛིན་པ་བཀྲ་ཤིས་ཟླ་བའོ།
སྤྱི་ལོ༢༠༡༧ ཧོར་ཟླ ༡༡ ཚེས ༥ ཉིན།