སྐྱེ་པ་དུ་མར་བསགས་པའི་བསོད་ནམས་ལས།།
འཛམ་གླིང་གཙུག་གི་ཆོས་ཀྱི་རྒྱལ་པོ་ཞིག།
མ་ཡུམ་ཆེན་པོའི་སྲས་སྐལ་གནང་བ་འདི།།
གངས་རིའི་བོད་པའི་ལེགས་བྱས་གྲུབ་པར་མངོན།།
རིན་ཆེན་ནོར་བུ་འབུམ་གྱིས་བླུ་ཐབས་མེད།།
གླང་ཆེན་སྟོབས་དང་འདྲ་བས་འཕྲོག་མི་ནུས།།
གོང་མ་ལྷ་ཡིས་རྒྱལ་སྲས་ཁྱེད་ལ་གནང་།།
སྒྲོལ་མ་དཀར་མོའི་རྣམ་སྤྲུལ་ཁྱེད་ལ་འདུད།།
གཟའ་སྐར་འཕྲོད་སྦྱོར་ལེགས་པའི་ལོ་ཟླ་སྟེ།།
རབ་བྱུང་བཅོ་ལྔའི་མེ་འབྲུག་ཟླ་བཞིའི་ནང་།།
མདོ་སྨད་བིས་མདོའི་བྲེ་ཚང་རིགས་རྒྱུད་ལ།།
རྟགས་མཚན་སྟོང་གིས་བརྒྱན་ནས་སྐུ་གཟུགས་བལྟམས།།
རིགས་རུས་མཆོག་གྱུར་ཅན་གྱི་སྐྱེ་བ་བཞེས།།
སྐུ་ན་ཆུང་བའི་དུས་ནས་བློ་རིག་གསལ།།
གཞན་ཕན་ལྷག་བསམ་སྒྲུབ་པར་རིང་ནས་གོམས།།
རྒན་བཀུར་ཆུང་གཅེས་སྲོལ་བཟང་རྒྱུད་ན་ངེས།།
ཁོ་མོ་གཞོན་ནུ་ལང་ཚོའི་མེ་ཏོག་རྒྱས།།
སྟོང་དཔོན་གུར་མགོན་ཚེ་བརྟན་གཞོན་དཔལ་དར།།
ལས་འབྲས་གསེར་གྱི་མདུད་པ་དམ་པོར་བཅིངས།།
གཉེན་སྟོན་ལྷ་དར་ནམ་མཁའི་དབྱིངས་ནས་འཐེན།།
རབ་བྱུང་བཅུ་དྲུག་ས་ཕོ་སྟག་གི་ལོར།།
སངས་རྒྱས་འོད་དཔོག་མེད་ཀྱི་རྣམ་སྤྲུལ་ཏེ།།
ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག།
ལྟས་བཟང་དུ་མས་བརྒྱན་ཞིང་མངོན་པར་འཁྲུངས།།
དེ་ནས་ལྷ་དང་བླ་མས་ལུང་བསྟན་གནང་།།
སྤྲུལ་སྐུ་འཚོལ་ཞིབ་འགྲོ་ལུགས་ཀུན་བསྒྲུབས་ནས།།
པཎ་ཆེན་སྐུ་ཕྲེང་བཅུ་བ་ངོས་འཛིན་མཛད།།
གསེར་ཁྲི་ཆེན་པོར་གསོལ་ནས་རྟེན་འབྲེལ་འགྲིག།
དུས་དེར་བཟུང་སྟེ་བཀུར་བསྟི་འཛད་མེད་ཀྱིས།།
ནང་མི་ཀུན་གྱིས་ཨ་མ་ཚང་ཞེས་འབོད།།
བྱམས་དང་སྙིང་རྗེ་སྔར་ལས་ལྷག་པར་གྱུར།།
ཐུགས་ཁྲེལ་བརྩོན་འགྲུས་སྔར་བཞིན་ལྷོད་མེད་མཆིས།།
གཅིག་སྟོང་ང་གཉིས་ལོ་ལ་རིན་པོ་ཆེ།།
བོད་ལྗོངས་ཕེབས་སྐབས་ཁོ་མོ་དང་ལྷན་དུ།།
མ་བུ་མཉམ་བྱོན་འཚོ་བཞེས་སྐལ་བ་ཐོབ།།
རིམ་པ་གསུམ་པའི་དཔོན་གནས་ཐོབ་ཐང་གནང་།།
གཅིག་སྟོང་ང་དྲུག་ལོ་ནས་མགོ་བཟུང་སྟེ།།
ཡབ་གཞིས་བསོད་སྒྲོལ་མཆོག་ལ་བོད་ལྗོངས་ཀྱི།།
སྲིད་གྲོས་ཀྲུའུ་ཞི་གཞོན་པའི་གོ་གནས་སྤྲད།།
རྒྱལ་ཁབ་ཆེན་པོའི་དོན་ལ་སྲི་ཞུ་བསྒྲུབས།།
ལྷག་པར་རྒྱལ་ཁབ་གོང་བུ་གཅིག་གྱུར་དང་།།
མི་རིགས་མཐུན་སྒྲིལ་བྱ་གཞག་བཅས་ཀྱི་ཐད།།
ནུས་ཤུགས་ཡོད་ཚད་བཏོན་ནས་མཐུན་རྐྱེན་བསྒྲུབས།།
གང་ཆེའི་མགོ་དཔོན་རྣམས་ཀྱིས་བསྔགས་པ་བརྗོད།།
ད་དུང་བོད་ཁུལ་བྱིངས་ཀྱི་བུད་མེད་རྣམས།།
སྣེ་ཁྲིད་མཛད་དེ་རིག་པའི་གསོ་སྦྱོང་དང་།།
མ་བུ་བདེ་ཐང་སོགས་སུ་ཐུགས་ཁུར་མཛད།།
ཕྱག་རྗེས་བླ་མེད་ཀུན་གྱིས་མཐོང་བ་བསྐྲུན།།
རྒྱུ་དང་འབྱོར་བ་ཕུན་སུམ་ཚོགས་ན་ཡང་།།
གཡུ་དང་བྱུ་རུའི་རྒྱན་གྱིས་མི་སྤྲས་ཤིང་།།
འདོད་ཆུང་ཆོག་ཤེས་རྒྱུད་ནས་དོར་མ་མྱོང་།།
ཆུད་ཟོས་རྒྱས་སྤྲོས་ཏིལ་ཙམ་ཡོད་རེ་སྐན།།
སྤྱིར་ན་པཎ་ཆེན་མཆོག་གི་ཡུམ་ཆེན་དང་།།
གོ་གནས་མཐོན་པོའི་དཔོན་ས་འབྱོར་ན་ཡང་།།
ནམ་རྒྱུན་བུད་མེད་དཀྱུས་མའི་བརྟུལ་ཞུགས་འཛིན།།
ཞིང་ཕྱུགས་ཀུན་ལ་འཚོ་སྐྱོང་གང་ལེགས་མཛད།།
བཀྲེས་སྐོམ་སྟོང་གིས་མནར་བའི་ཉམ་ཆུང་རྣམས།།
གཟིགས་བའི་མོད་ལ་ཐུགས་ཀྱིས་མ་བཟོད་པར།།
སྤྱན་ནས་མཆི་མ་དབང་མེད་འཐོར་བ་དང་།།
གཏོང་ཕོད་ཆེན་པོས་སྦྱིན་པ་གནང་བ་མཚར།།
རིག་གསར་དྲག་རླུང་འཛིན་མར་གཡོ་བའི་དུས།།
རིན་པོ་ཆེ་ལ་མནར་སྡུག་ཡ་ང་བ།།
གཏོང་སྐབས་མ་ཡུམ་མཆོག་ལ་ཉེས་འགལ་གྱིས།།
དོན་མེད་གནོད་འཚེ་བཟོས་པ་སུས་མི་མཁྱེན།།
ཡིན་ཀྱང་སྲིད་ཇུས་གསར་བའི་ཉིན་བྱེད་སྟོང་།།
ལྷན་གཅིག་འཕྲོ་བའི་སྐལ་བཟང་རྫོགས་ལྡན་དུས།།
སླེབས་དང་མཉམ་དུ་བཅོས་བསྒྱུར་སྒོ་འབྱེད་དཔལ།།
བགྲོད་ལམ་ཡངས་པར་འབད་པས་མདུན་དུ་བསྐྱོད།།
ཆོལ་གསུམ་གངས་ཅན་ཡུལ་ལ་ཤེས་བྱའི་དཔལ།།
ཁྱོན་ཀུན་ཤར་བའི་བོད་མི་སྐྱིད་པའི་ལམ།།
འཚོ་བཞེས་ལེགས་པོ་རོལ་ནས་མ་འགྱངས་པར།།
མི་འདོད་རྐྱེན་ངན་སྣ་ཚོགས་མདུན་དུ་མངོན།།
དཀར་གསལ་བཅོ་ལྔའི་དུང་ཟླ་འཛིན་མའི་སྟེང་།།
མ་བསམ་གློ་བུར་ལྷུང་བཞིན་རིན་པོ་ཆེའི།།
ཆོས་སྐུའི་བཀོད་པ་རྫོགས་པའི་ཚུལ་བསྟན་ཅིང་།།
འཛམ་གླིང་ཟླུམ་པོར་རེ་ཞིག་མུན་པས་གཡོགས།།
མ་ཡུམ་མགོ་ལ་སྡུག་བསྔལ་རི་རབ་ཞིག།
ལྟུང་བ་ཇི་བཞིན་ཐེག་པར་དཀའ་མོད་ཀྱང་།།
བཟོད་བསྲན་སྟོབས་ཀྱིས་མ་ཁུར་ཐབས་དབེན་པས།།
གཞུང་དོན་ཆེན་པའི་ལས་ལ་འབད་འབུངས་མཛད།།
དེ་ནས་མ་འགྱངས་གཏན་གྲོགས་དག་ཞིང་ལ།།
བདེ་བར་གཤེགས་པའི་ངོ་མཚར་ཚུལ་མངོན་ཏེ།།
ཁོ་མོ་གཅིག་པུ་ཕྱིས་སུ་བསྐྱུར་ན་ཡང་།།
བཟོད་དཀའི་མནར་སྡུག་བསྲན་ནས་དོན་ཆེན་བསྒྲུབས།།
མ་ཡུམ་མཆོག་གིས་རང་ནུས་གང་ལྕོགས་ཀྱིས།།
རྒྱལ་སྲས་ལགས་ཀྱི་ཤུལ་བཞག་མཛད་འཕྲིན་རྣམས།།
མུ་མཐུད་སྐྱོང་སླད་མདོ་དབུས་ཁམས་གསུམ་གྱི།།
དགོན་སྡེ་འཛུགས་སྐྲུན་བྱ་གཞག་བརྩོན་པས་བསྐྱངས།།
སྔ་ཕྱིར་ཀྲུང་དབྱང་དང་ནི་ཞིང་ཆེན་གྱི།།
མགོ་ཁྲིད་གཙོ་བོ་རྣམས་དང་གང་མང་དུ།།
མཇལ་འཕྲད་མཛད་དེ་རྒྱལ་གཅེས་ཆོས་གཅེས་ཀྱི།།
རྒྱུན་འཛིན་ལེགས་པོ་དགོས་པའི་སྙན་ཞུ་ཕུལ།།
ཁོང་ཉིད་བགྲེས་ནས་དགུང་ལོ་བརྒྱད་ཅུར་སོན།།
ཡིན་ཀྱང་རང་གི་མི་རིགས་སློབ་གསོ་ལ།།
དུངས་པའི་སྤོབས་སེམས་ཅུང་ཙམ་མ་ཉམས་པར།།
ཞིན་ཧྭ་བོད་ཡིག་སློབ་འབྲིང་ཐུགས་ཀྱིས་བསྐྱངས།།
ཆོས་ཀྱི་རྒྱལ་མཚན་མཆོག་གིས་སློབ་འབྲིང་འདི།།
གསར་བཞེངས་མཛད་པའི་ཚུན་ལ་བོད་པའི་ཡིག།
སྦྱང་མགོ་བརྩམས་ནས་གྲུབ་འབྲས་གཡུར་དུ་ཟ།།
རང་རིགས་སློབ་བུ་འབུམ་ཕྲག་གསོ་སྐྱོང་མཛད།།
ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ།།
ཡང་སྲིད་མྱུར་འབྱོན་གསོལ་འདེབས་རེ་འདུན་དག།
ཀྲུང་དབྱང་འབྲེལ་ཡོད་མགོ་བར་གསལ་བོར་ཞུས།།
རྒྱལ་ཁབ་མགོ་བའི་གདམས་པ་དང་དུ་བླངས།།
གཉིས་སྟོང་བཅུ་གཉིས་ཟླ་དྲུག་ཚེས་ཉེར་དགུར།།
མི་རྟག་ནམ་མཁའི་དབྱིངས་ནས་དྲག་ཆར་བསྙིལ།།
ས་གཞི་ཆེན་པོར་མུན་པའི་སྤྲིན་ནག་འཐིབས།།
ཡུམ་ཆེན་དགོངས་པ་རྫོགས་པའི་ཚུལ་བསྟན་བྱུང་།།
མདོ་དབུས་ཁམས་གསུམ་གངས་ཅན་པ་རྣམས་ལ།།
མྱ་ངན་འབུམ་གྱིས་མནར་ནས་སྐྱོ་གདུང་གི།།
མིག་ཆུ་དབང་མེད་དྲག་ཆར་ཇི་བཞིན་བཞུར།།
མ་ཎི་ཡིག་དྲུག་དབྱངས་ཀྱིས་གནམ་ས་ཁེངས།།
ཏང་གི་གཙོ་འཛིན་དང་པོའི་སྐུ་དངོས་དང་།།
དབུ་ཁྲིད་གཞན་པས་མྱ་ངན་ཞུ་འཕྲིན་ཕུལ་།།
གཉེན་ཉེ་ཡོངས་ལ་ལྷག་བསམ་ཟོལ་མེད་ཀྱིས།།
འཚམས་འདྲི་སེམས་གསོ་ཡང་ཡང་མཛད་པ་རྨད།།
སྤྱི་ཟླ་བདུན་པའི་ཚེས་བཞིའི་ཉིན་མོ་ལ།།
གནའ་བོའི་བོད་པའི་སྲོལ་རྒྱུན་འགྲོ་ལུགས་ལྟར།།
ཕ་ཡུལ་གཞིས་ཁྱིམ་དྲོད་མོར་གདུང་བཞུས་པའི།།
ཆོ་ག་གཟབ་རྒྱས་སྤེལ་ནས་ལྟས་བཟང་མངོན།།
ཡུམ་ཆེན་སྐུ་ཉིད་མི་ཚེ་གང་བོ་ལ།།
ཏང་དང་རྒྱལ་ཁབ་མཉམ་བཞུགས་མཉམ་འགྲོ་དང་།།
སྤྱི་ཚོགས་འཕེལ་རྒྱས་འབངས་མིའི་བདེ་སྐྱིད་སླད།།
མཛད་རྗེས་བླ་ལྷག་བསྐྲུན་པར་ཀུན་གྱིས་བསྔགས།།
ཁོ་མོ་ཏང་གི་མཛའ་མཐུན་གྲོགས་པོ་དང་།།
རྒྱལ་གཅེས་ཆོས་གཅེས་ཅན་གྱི་མཚན་སྙན་ཐོབ།།
འབངས་དང་སྐྱིད་སྡུག་མཉམ་མྱོང་བྱམས་བརྩེ་ཅན།།
བློ་བརྟན་འགྱུར་མེད་རྡོ་རྗེ་བྲག་དང་མཚུངས།།
སྐུ་ཉིད་དག་པའི་ཞིང་དུ་ཕེབས་པ་སྟེ།།
རྒྱལ་ཁབ་ཡོངས་སུ་གྱོང་གུད་བཟོས་པ་དང་།།
སྒོས་སུ་གངས་ཅན་ཡོངས་ལ་གྱོང་ཆེན་རེག།
ངེད་ཚོས་དུས་གཏན་ཡིད་དུ་བརྗེད་མི་སྲིད།།
ཅེས་གཅོད་པ་དོན་གྲུབ་ཀྱིས་སྤྱི་ལོ2018ལོའི་ཟླ8པའི་ཚེས7ལ་གནའ་མཁར་ཟི་ལིང་དུ་གུས་པས་སྦྱར་བ་དགེའོ།།