རྩོམ་རིག་སྤྱིའི་སྡིངས་ཆ་བླ་ན་མཐོ་བའི་དུས་རབས་ཤིག་གི་བ་དན་མངོན་པར་འཕགས་པའི་བཀྲ་ཤིས་བདེ་ལེགས་དང་ལྷན་ཏུ། བསྡུས་བརྗོད་སྙན་འགྱུར་གྱི་བག་དྲོ་ཅུང་ཟད་བག་འཁུམ་པའི་སྣང་ཚོར་རྣ་ནག་པ་བྱུང་སྟེ། སྣང་སེམས་ཟུང་དུ་ཞུགས་པའི་ངག་གི་བརྟུལ་ཞུགས་ལས་ལངས་ཏེ་བདེ་སྟོང་ཆོས་དབྱིངས་ཀྱི་རོ་མཉམ་ལ་མངའ་དབང་འབྱོར་བའི་གྲུབ་རྟགས་མངོན་དུ་གྱུར་ཕྱིར་ལྷོད་ཀྱིས་སྨྲས་པ།
ཁག་དང་པོ།
རབ་མཛེས་ཀེ་ལ་ཤ་ཡི་རྡུལ་བརྩེགས་དབུས།།
སྣང་སེམས་རོ་མཉམ་སྨུག་པའི་སྐ་རགས་དཀྲིས།།
བདག་ཡིད་གཤོག་པས་འཁྱུད་ཅིང་ནམ་མཁའ་ལ།།
སྙན་ཚིག་པི་ཝང་དཀྲོལ་བཞིན་ཡུད་ཙམ་འཕུར།།
བདེ་སྟོང་ངག་གི་རྩལ་ཆེན་མ་ཐོབ་ཅིང་།།
སྡེབ་སྦྱོར་རིག་པའི་དཔུང་ཤ་མི་རྒོད་མོད།།
ཚངས་དབྱངས་ངག་གི་ཡོན་ཏན་ཆུ་གཏེར་གྱི།།
ཆུ་ཐིགས་ཙམ་ཡང་རེག་ལ་སྐོམ་པས་གདུང་།།
དར་དིར་སྒྲ་ཡི་འདུ་བྱེད་ཀྱིས།།
སྣང་བའི་སྐོམ་པ་སེལ་བྱེད་ཅིང་།།
ཞི་ཁྲོའི་ཞལ་ཐང་རྙིང་བའི་ངོས།།
སེམས་ཀྱི་སྐུད་པ་རིང་དུ་སྤྱུགས།།
བར་སྣང་ཐོག་རེག་བྲལ་བ་ལ།།
སྒྱུ་མའི་འཇའ་གཟུགས་ཤར་འདི་ཀོ།
སྣང་སྲིད་ལྦུ་བའི་མེ་ཏོག་གི།
སྒྲེན་གཟུགས་ལ་ནི་གང་ཅི་སྲེད།།
ཀྱེ་མ་མིག་གི་འཐབ་མོ་ལས།།
བཟོད་མེད་བརྩེ་བའི་དུཿཁ་སྟེར།།
སྲིད་པའི་གཙང་བོ་སྐྱོམ་པ་ཡི།།
རླབས་ཀྱི་སྒྲ་ནི་ཇི་འདྲའི་སྙན།།
སྐྱེས་ཐོབ་སེམས་ཀྱི་ཀློང་ཡངས་སུ།།
སྣ་ཚོགས་པདྨའི་ཟེ་བ་འཐོར།།
དོན་དམ་པད་མའི་གེ་སར་ཉིད།།
གསང་བའི་ཕྱག་རྒྱ་གྲོལ་བ་ལས།།
མི་ཕྱེད་དགའ་བའི་སྙིམ་པ་ལ།།
ཡིད་འོང་ལྕུག་འདར་ལན་མང་བྱེད།།
སྲིད་པའི་གཏམ་རྒྱུད་དྲན་བྱེད་ཀྱི།།
སྒྱུ་མའི་ཁ་དོག་སྨུག་པོ་དག།
མིག་དང་ཡིད་ཡུལ་ལྷུང་ཙ་ན།།
རྣམ་པར་མ་ངེས་འཕྱང་མོ་ཉུག།
ཡིད་ཀྱི་རྦ་རླབས་འཕྱོ་བའི་གཟིས།།
ཚོར་བའི་དར་སྐུད་རབ་ཏུ་དཀྲོལ།།
སྣང་བ་སེམས་ཀྱི་འདུས་མདོ་ནས།།
སྣང་སེམས་མ་བུ་འཕྲོད་འདྲ་བྱུང་།།
ཕྱི་རོལ་ཀུན་ཏུ་རགས་པ་དང་།།
གཉུག་མ་དེ་བཞིན་ཉིད་ཀྱི་མདངས།།
ཅི་ཡང་འཆར་ལ་ཅི་མི་འཆར།།
མེ་ལོང་ངོས་ཀྱི་གཟུགས་དེ་བཞིན།།
སྒྱུ་མའི་ཕོ་བྲང་འཇིག་པ་དང་།།
བརྟན་གཡོའི་ལས་སྣང་གསལ་བ་ཡི།།
ཆག་འཇིག་རྡུལ་གྱི་གླང་བོ་ཆེ།།
ཇི་སྙེད་སུ་དག་ཀུན་གྱིས་ཞོན།།
རང་བྱུང་ཉི་ཟླའི་འཆར་ནུབ་ཀྱང་།།
རྩལ་ལྡན་ངག་ལ་རན་གྱུར་མོད།།
སྡེབ་སྦྱོར་ཚིག་གི་ལོ་མ་ཡིས།།
ནམ་དུའང་གླགས་ཙམ་རྙེད་མ་ཡིན།།
གཙུག་ལག་ཉི་མའི་ཟེར་ཕྲེང་གིས།།
བདེ་ཆེན་གཡུ་ཡི་མཎྡལ་དགོད།།
ལྷུན་གྲུབ་རིག་པའི་པད་ཚལ་དུ།།
ངག་གི་བཅུད་བཟང་ཆར་དུ་བསྙིལ།།
མཚན་མོའི་སྐར་མ་རེ་རེ་ཡི།།
འོད་ཀྱི་ཐེག་ལེ་མིག་གི་སྒོར།།
ཕོག་པའི་སྣང་བས་ཡིད་ཀྱི་གཏིང་།།
བསིལ་བའི་རེག་བྱས་གང་བར་བྱེད།།
པ་སངས་སེམས་ཀྱི་འཆར་སྒོ་རུ།།
རྣམ་པར་བཀྲ་བའི་སྐྱེ་མཆེད་ལྔ།།
རྫིང་བུའི་ཁ་རུ་གཡོ་བ་ཡི།།
ཞིམ་པའི་སྤོས་ཆབ་མྱོང་བར་བྱེད།།
པ་ཏྲའི་གཡུང་དྲུང་འཁྱིལ་བའི་དབུས།།
ནག་ནོག་སྤུ་ཤད་ལྡང་བ་ཡིས།།
མ་དག་སེམས་ཀྱི་ཟ་ཟུར་དུ།།
ཆང་གི་ལྦུ་བ་སབ་སོབ་འཕྱུར།།
དེ་ནི་སྣང་བ་འཕྲུལ་བའི་བརྙན།།
ཡིད་ཀྱི་སྐར་ཕྲན་འདར་བའི་སྟེང་།།
སྨིན་མ་འཁྱུག་པའི་ཟློས་གར་སྟེ།།
སེམས་པའི་ལོངས་སྤྱོད་དུ་བླངས་ནས།།
ངག་གི་སྒྲིབ་པ་རབ་བསལ་བའི།།
ཆུ་ཟླའི་དྭངས་གསལ་ཤེལ་གྱི་ངོས།།
ལང་ཚོའི་མཛེས་པ་ཁྱོད་ཀྱི་ངོར།།
ཡང་དག་ཚུལ་གྱིས་འཆར་ལགས་སམ།།
ཁག་གཉིས་པ།
གང་ཚེ་གདུང་བའི་ལྷགས་རླུང་ལས།།
དཔལ་ལྡན་ཁྲོ་གཉེར་བསྡུས་པའི་ཚེ།།
ས་ཆེན་ཡོམ་ཡོམ་འདར་བ་ཡི།།
ངལ་བའི་རྒྱུ་བ་ཅི་ཞིག་མཆིས།།
གངས་སྟོད་གངས་ལྷ་མེ་ཏོག་ནི།།
དུས་ཀྱི་སོ་ནམ་མི་དགོས་ཏེ།།
སྒེག་ལྡན་ཉི་ཟླའི་བང་རིམ་ནས།།
ཡིད་འོང་འདབ་མའི་གཤོག་འགྱུ་ལྡེམ།།
བསིལ་འཇམ་གངས་རླུང་རྒྱུ་བའི་ཆར།།
རིག་བྱེད་མཁན་གྱི་མགྲིན་པ་ལས།།
ཤུགས་འབྱུང་རྩལ་དང་ཆབ་ཅིག་ཏུ།།
སྙན་འཇེབས་དབྱངས་ཀྱི་བདུད་རྩི་འཇོ།།
འདི་སྣང་སྐྱེད་ཚལ་དྲི་ཟའི་གར།།
བདག་མགྲིན་རྒྱ་གླིང་ཁབ་ནས་རོལ།།
སྙན་པའི་ཐེག་པ་ལ་མོས་པའི།།
ཐོས་འཛིན་བཅུད་ལ་བཟི་སྣང་སྟེར།།
ཉམས་ཀྱི་སྣང་བ་སྤྲིན་ཕུང་ལས།།
མཁའ་དབྱིངས་སྨན་ཆར་འབྱུང་བ་ཡིས།།
རང་བྱུང་གཤིས་ཀྱི་ཚེ་སྲོག་ལ།།
མཛེས་པའི་སྣང་བ་ཅི་ཡང་སྟེར།།
སྒྱུ་འཕྲུལ་ལྷ་མོའི་མཛུབ་རྩེ་ཡི།།
རབ་གསལ་འོད་ཀྱི་གོང་བུ་དེ།།
སྨྲ་བསམ་བརྗོད་ལས་འདས་ནའང་།།
རབ་འབྱམས་ངག་གི་གདངས་ལས་རྙེད།།
ཁྱོད་ཀྱི་མིག་ནི་དག་པ་ལ།།
སྲིད་པའི་ནགས་ཚལ་སྟུག་པོ་ཡང་།།
ཡང་ཡང་བསལ་བའི་སེང་ལྡེང་གི།
ཡལ་འདབ་རྩེ་ན་མཆོང་ལྡིང་བྱེད།།
ཁྱོད་ཡིད་དཔག་བསལ་ལྗོན་པ་ཡི།།
བསྐལ་བའི་དཔག་ཚད་མཐའ་མེད་ཀྱི།།
བསིལ་གྲིབ་ཐུགས་རྗེའི་སྐྱིབས་ཀ་ནས།།
རང་སེམས་གསོ་བའི་གླིང་བུ་འབུད།།
ཁྱོད་ལུས་མིའམ་ཅི་ཡི་གཟུགས།།
མཚར་སྡུག་འབུམ་འཁྱུད་ལང་ཚོའི་དཔྱིད།།
དཔྱིད་དཔལ་དུས་ཀྱི་རྫིང་འགྲམ་ནས།།
གསང་ཆེན་དབྱངས་ཀྱི་རྒྱུད་མངས་དཀྲོལ།།
ཁྱོད་ཀྱི་ངག་ནི་ཚངས་པའི་གསུང་།།
འབྱམས་སུ་ཀླས་པའི་ཟབ་དོན་ལྡན།།
ཀུན་རྟོག་བཅིབས་པའི་གཅིག་པུ་བས།།
སྲིད་པའི་རྔ་ཆེན་ཡང་ཡང་རྡུང་།།
ཁག་གསུམ་པ།
ཨེ་མ་སྨུག་སྤྲིན་དུམ་བུར་ཆད།།
མཚམས་སྤྲིན་བླ་བྲེ་རི་སྒང་གཡོ།།
རྣམ་པར་མི་གཡོ་སེམས་ཀྱི་འགྲོས།།
སྣོད་བཅུད་བླ་ཁམས་འདར་ལ་ལྟོས།།
འདར་བའི་གཟུགས་དང་སྒྲ་དབྱངས་ཀྱིས།།
ཚུར་སྣང་གཤོག་པའི་མཐའ་བརྐྱངས་ཏེ།།
མ་བྲིས་ལྷན་སྐྱེས་ལང་ཚོའི་གཟི།།
རྨ་བྱའི་སྒྲོ་ཕྲན་འགུལ་བའི་བརྙན།།
སྣ་ཚོགས་ཡིད་ཀྱི་ཁང་བུར་སྡུད།།
མཚར་འཛིན་རྟོག་པའི་ངལ་བ་ཞི།།
གཡུ་ལོ་བཀོད་པའི་ནགས་མའི་སྐྱེད་ཚལ་དུ།།
ལྕུག་ཕྲན་ཚང་ཚིང་གསེབ་ཀྱི་འདབ་ཆགས་ཀྱེ།།
མི་སྙན་ཅ་ཅོ་སྒྲོག་པ་སྤངས་གྱུར་ནས།།
དུས་ཀྱི་ན་བཟའི་ཁ་དོག་ཅི་ཡིན་གསུང་།།
ངག་གི་གྲེ་བ་མ་སངས་གྱ་མ་གྱུ།།
ཚིག་གི་དོན་རིས་མ་དོད་སྣ་མ་སྣོག།
སེང་ལྡེང་ཡལ་འདབ་དབུས་མའི་སྡོང་བོ་རུ།།
ཐོས་གྲོལ་སྙན་པའི་ཅོང་སྒྲ་ལན་ཅིག་གསུང་།།
གཡོ་བའི་རླུང་ཆེན་སྔོན་མོ་ཡིས།།
སེམས་ཀྱི་སྨུག་པ་རིང་དུ་དེད།།
སྣང་སྟོང་སེམས་ཀྱི་ཕང་བ་རུ།།
སུ་ཡི་ལང་ཚོའི་གསང་རྣམ་མངོན།།
མ་རྙིང་པ་ཡི་ཟེའུ་འབྲུའི་བཅུད།།
སྦྲང་ཆུང་ལྕེ་ལ་བཞད་གྱུར་ཚེ།།
སྙན་ངག་མཁན་ཡང་ཡིད་འགྱུར་གྱིས།།
རབ་ཏུ་ཕྱུག་པའི་བཟོ་བོ་གནང་།།
རང་བྱུང་ངག་གི་གྲེ་འགྱུར་གྱིས།།
རྣམ་ཤེས་སྲོག་ཤིང་གསོ་བ་ལ།།
མི་སྣང་ཡིད་ཀྱི་འཁྲི་ཤིང་གི།
ལྗོན་བཟང་དུད་པའི་འབྲས་བུ་སྨིན།།
དུས་ཚིགས་སྐྱ་བོའི་བཤུལ་ལམ་དུ།།
དབྱངས་ཅན་ཀ་ལ་པིང་ཀ་ཡི།།
མགྲིན་པའི་རྩ་སྦུབས་ཉེར་དྲངས་ཏེ།།
རྒྱལ་ཁམས་ཡུལ་ལ་གཞས་གྱེར་ན།།
གཉུག་མ་འོད་གསལ་བདེ་བས་བཟི།།
འཁྲུལ་བའི་རྨི་ལམ་ཡལ་བར་འགྱུར།།
གཙང་འགྲམ་སྡོང་ལོར་སེར་ཐིག་ལྷུང་།།
ཕྱི་ནང་ཟུང་འཇུག་ངག་ལ་འཁྱིལ།།
འཁྱིལ་བའི་ཟུངས་ཁྲག་ཚིགས་སུ་བརྒྱུས།།
མི་ཤིག་སྐུད་པ་རང་གྲོལ་ཡིས།།
ཐོས་འཛིན་གསོ་བའི་ཡིད་འགྱུར་བསྐྱེད།།
མི་རྟག་པ་ཡི་གཟུགས་སྣང་ནི།།
སྣང་བའི་རོ་འཛིན་མ་བཅོས་པ།།
ཁྱབ་བརྡལ་འོད་ཟེར་བྱེ་བ་བརྒྱས།།
གང་ཞིག་མ་འདྲེས་རྣམ་པར་འབྱེད།།
བཅོ་ལྔའི་ཟླ་དཀར་ཁམ་གང་གིས།།
ས་ཆེན་ཧྲིལ་བོ་གསལ་བྱས་པ།།
སྒྲ་གཅན་ཡིད་ཀྱིས་མ་བཟོད་དེ།།
སྡང་བའི་ཞལ་ཁ་ཆེ་རུ་བགྲད།།
མ་བགྲོས་རླུང་ཆེན་ལྡང་དང་ལྷན།།
སྲིད་པའི་སྣང་བ་སྐད་ཅིག་ནུབ།།
ནུབ་མཐའི་སྐར་མ་ཡིབ་གྱུར་ཚེ།།
སྨག་མཚོའི་འགྲམ་ནས་མེ་སྒོང་གསོ།།
སྐྱེ་བོ་མཐའ་ཡས་གཅོམ་ཆུང་གིས།།
ཞལ་ཁ་རྒོད་ཅིང་ཀུ་ཅོ་འདོན།།
རྗེས་ཆགས་སྐྱོ་བའི་ན་བུན་འཐིབས།།
ཁག་བཞི་པ།
རྫ་རྒྱལ་མེས་པོའི་རུས་རྐང་གི།
གདོད་མའི་རྣམ་ཤེས་མ་བོར་བ།།
སྲིད་པའི་རྒྱུད་མངས་སྔོན་པོ་འདི།།
གཅིག་པུར་རྒྱུ་དེས་དཀྲོལ་ཙ་ན།།
སྒྲ་དེ་མ་བཅོས་ལྷུན་གྱིས་གྲུབ།།
གདངས་དེ་མ་འགྱུར་རྣལ་དུ་གནས།།
སེམས་ཀྱི་ག་ཤེད་བཅོམ་ནས་ཀྱང་།།
བཟོད་བླག་མ་རྙེད་ཀྱེ་མ་གདུང་།།
ལྷོ་སྤྲིན་དབྱིངས་ཀྱི་བྱ་རྒྱལ་ཁྱུང་།།
མུ་འཁྱུད་ས་འཛིན་སྡེར་མོས་མནན།།
ཁྲོ་བའི་ཉམས་ཀྱིས་དུག་སྦྲུལ་གྱི།།
མ་རུང་ལྕེ་རྩེ་འཇོམས་པར་བྱེད།།
རྒྱུ་བའི་རྣམ་ཤེས་ཕྲ་མོ་དེས།།
གཏིང་དུ་གཉིད་པའི་ར་རོ་བ།།
གང་དག་བསལ་ཅིང་དཀྲོག་ནས་སུ།།
མི་འཇིགས་སྤོབས་པའི་གོ་ཁྲབ་གསོལ།།
ཨེ་མ་མཚར་བའི་གད་རྒྱངས་ཀྱིས།།
སྤྲོས་འཛིན་ཡིད་ཀྱི་བང་སོ་བཀང་།།
དེ་བཞིན་ཉིད་ཀྱི་ཤིང་དྲུང་ནས།།
སྤྲོས་བྲལ་དབྱངས་ཀྱི་འཁོར་ལོ་སྐོར།།
འཁོར་ལོའི་གཤོག་པ་མཉེན་མོ་དེས།།
སྲིད་པའི་རྫ་སྒང་གྱོང་པོ་དེ།།
རྣམ་པར་དུལ་བའི་ངང་བཟང་དེ།།
ཀུན་རྫོབ་མིག་ལ་ཤིན་ཏུ་མཚར།།
རྡུལ་འཛིན་མེ་ཏོག་གཡོ་བྱེད་ཀྱི།།
བསིལ་འཇམ་རླུང་གི་རྒྱུ་བ་ནི།།
རྣམ་པར་མཛེས་པའི་སྐྱེད་ཚལ་དུ།།
བུང་བའི་སྒྲ་བརྙན་ཁུར་བཞིན་ལྡང་།།
རླན་གཤེར་སྤྲིན་ཕུང་བཤུམ་པའི་གཟུགས།།
རྔ་ཡབ་པད་མའི་ཆུ་ཐིགས་འཛིན།།
ལུས་ཀྱི་ལང་ཚོའི་གཞོགས་ཕྱེད་དུ།།
མཉེས་གཤིན་རེག་བྱའི་འཇམ་པ་སྟེར།།
ཟབ་མོ་ཚིག་གིས་མ་བཅིངས་ལྷོད་པོའི་དབྱངས།།
རྒྱས་པའི་སྒྲོག་ལས་གྲོལ་བའི་འཇམ་པོའི་གདངས།།
རྨ་བྱ་དུངས་བའི་ངག་རིག་གླིང་བུ་ཡིས།།
སྐྱེས་ལྡན་ཡིད་ཀྱི་སྙན་དབང་གསོ་བར་བྱེད།།
སྐྱོ་ཉམས་དོད་པའི་ངང་པ་མོ།།
གཤོག་པ་ནང་དུ་རྡེབ་པའི་མུར།།
ལུས་ཀྱི་ཤུགས་ནི་ཟད་གྱུར་ཏེ།།
མཆུ་ཏོ་རིང་མོ་སྐོམ་པས་མནར།།
སྒྱུ་མའི་བརྩེ་འདང་མཚོ་ལ་འཁྱིལ།།
ངང་དཀར་བྱ་ཕོ་འཕུར་བའི་རྩལ།།
ཡིད་ལ་བརྣག་པའི་དགའ་བ་ཡིས།།
རྗེས་སོང་སྣང་བའི་སྐོམ་པ་གསོས།།
ཆུ་ནང་པད་མའི་སྡོང་བོ་ལ།།
ངག་གི་སྦྲང་རྩི་སྒྱེ་མོ་གང་།།
མིག་ལ་ཤར་བའི་སྦྲང་ཆུང་གིས།།
ཡིད་ཀྱི་དམ་ཚིག་མཚོ་ཁར་འབུས།།
དགྱེས་བཞད་པད་མའི་གྲོལ་འཛུམ་གྱིས།།
མ་བཅོས་ཡིད་ཀྱི་བརྟན་པ་བཅོམ།།
རྗེས་ཆགས་སྲེད་པའི་འཆིང་ཐག་གིས།།
གྲིབ་གཟུགས་ཁྲོད་ཀྱི་སྣང་བརྙན་འཕྲོག།
བརྩེ་བའི་ཡན་ལག་རྒྱས་བྱེད་ཀྱི།།
ཞེ་གཏིང་བྲག་བརྐོས་རི་མོ་ནི།།
སུས་ཀྱང་བསུབ་མེད་རང་བཞིན་གྲུབ།།
རིང་དུ་མ་གྱེས་ཞལ་མཇལ་བྱུང་།།
ཁག་ལྔ་པ།
སྒྱུ་མའི་རྩལ་ལྡན་གླང་ཆེན་སྨྱོན་པ་ཡིས།།
སྟོབས་ལྡན་ཤེད་ཀྱིས་བཅོམ་ལ་ཆགས་ཐོགས་བྲལ།།
དེ་བཞིན་སེམས་རིག་གདོད་མའི་ཚུར་སྣང་གི།
ཉམས་ཀྱི་སྒོ་མོ་རིག་པའི་རྩལ་དུ་ཤར།།
ཀུན་ཤེས་དཔྱོད་པའི་རྟོག་པ་ཕྲ་མོ་ཡིས།།
མེ་ལོང་ནང་གི་གཟུགས་བརྙན་གྱ་མ་གྱུ།།
ཕྱོགས་སུ་མ་ལྷུང་གཟུ་བོའི་ཐིག་ཕྲན་དུ།།
དྲང་བོར་རྐྱོང་བའི་སེམས་ཀྱི་ཏིང་འཛིན་གསལ།།
རི་སུལ་ནགས་མའི་བསིལ་གྲིབ་ཉམས་དགའ་རུ།།
རིག་བྱེད་ངག་གི་མགྲིན་ལ་རྩལ་ཐོབ་པའི།།
དྲང་སྲོང་སྨ་ར་ཅན་གྱི་ཡིད་བྱེད་ཀྱིས།།
སྣང་སྲིད་སྐུད་པར་བརྒྱུས་པའི་ཉམས་གླུ་ལེན།།
དེ་ཚེ་གནས་སྣང་སེམས་ཀྱི་ཉིན་སྲིབ་ཏུ།།
རྟོག་པ་རུ་ཤན་ཉུལ་བའི་རྗེས་འདེད་ཀྱིས།།
སེམས་ཀྱི་གསང་བ་དྭངས་གསལ་ཆུ་མོའི་གཞུང་།།
རབ་གསལ་ཤར་བ་ངོ་མཚར་རྨད་དུ་བྱུང་།།
དེ་ནི་འཇམ་མཉེན་པད་མའི་འདབ།།
ལྷུག་ལྷུག་དགོད་པའི་ངོ་གདོང་སྟེ།།
སྐྱུར་རྩིས་བྱུགས་པའི་མཉེན་ལྕུག་གིས།།
བག་ཡངས་དགའ་སྤྲོའི་སྣང་བ་བཀུག།
ཚོར་བའི་རྒྱ་མཚོ་འཕྱུར་བ་ཡིས།།
སྒྱུ་མའི་རྦ་རླབས་ཁྱོར་བ་གང་།།
སྐམ་ཞིང་རྙིད་པའི་སྣང་བ་ལ།།
འཐོར་བའི་བཟོད་པ་ཡིད་ལ་དགེ།
སྣང་སེམས་གཉུག་མའི་ང་རོ་ནི།།
སྐྱེས་ལྡན་སྣང་བ་འགུག་པའི་གླུ།།
མ་བཅོས་དགའ་བའི་སྐྱེད་ཚལ་ཏུ།།
རིག་པའི་བུ་ལ་ཡང་ཡང་ཟློ།།
དེ་ཚེ་ཕྱི་རོལ་འཇིག་རྟེན་ཞེས་བྱ་འདུ་བྱེད་ཡུལ་དུ་ཤར་བ་ལ།།
ངལ་བའི་རྒྱུ་བ་ཅི་ཡང་མི་དགོས་གློག་ཞགས་འཁྱུག་པའི་སྐད་ཅིག་མར།།
སྤྲིན་དཀར་བུང་བ་མཁའ་ནས་འཁྲིགས་ཤིང་མཛེས་ལྡན་མེ་ཏོག་ས་ནས་བཞད།།
སྲོག་ལྡན་སྐྱེ་འགྲོ་འཆི་བས་དེད་ཅིང་སྒྱུ་མའི་ཆོས་ལ་ངེས་ཤེས་རྙེད།།
རིག་བྱེད་ངག་གི་གཏམ་གླེང་བར་ནས་བསམ་གཏན་པ་ཡི་སེམས་ངོ་མཐོང་།།
མ་བཅོས་བྱང་ཆུབ་ལྗོན་པའི་འོག།
ཉམས་སྣང་ཞི་བ་ཆེན་པོ་ཡི།།
སྐྱོ་གར་རྣོ་ལ་ཕབ་བྱེད་ཀྱི།།
མགྲིན་པའི་རྩ་སྦུབས་ཤུགས་ཀྱིས་གྲོལ།།
དུས་ཀྱི་བགྲོད་པ་མྱུར་བ་སོགས།།
སྒྱུ་མའི་ངོ་གདོང་སྐྱ་བོ་ཡིས།།
འབྲས་བཟང་ཁུར་གྱིས་དུད་པ་ཡི།།
སྡོང་བོ་ལྟར་དུ་འདོད་དགུར་འཐོར།།
མི་རྟག་གཡོ་བའི་ངང་ཚུལ་གྱིས།།
མཐའ་བྲལ་རླུང་གི་དཀྱིལ་འཁོར་དུ།།
བཙན་རླུང་དུས་ལྟར་རྒོད་ནའང་།།
ང་ནི་བདེ་གཤེགས་སྙིང་པོ་སྟེ།།
སུས་ཀྱང་མ་བཅོས་ལྷུན་གྱིས་གྲུབ།།
ཁག་དྲུག་པ།
ཀྱེ་ཀྱེ་ངག་གི་གདངས་སྒྲ་ལས།།
ལན་ཅིག་ཉིད་ལ་ཤོར་བ་ཡི།།
ཚིག་གི་མདའ་མོ་སྙིང་ཕྲན་གྱིས།།
སྣང་སྲིད་སྒྱུ་མའི་སྟོང་ཁམས་དཀྲུགས།
མི་གཡོ་ནེམ་པའི་འབོལ་སྟེགས་སུ།།
བདེ་ཆེན་དག་པའི་ང་རོ་ཆེ།།
སྣང་སེམས་གཉུག་མའི་བ་སྤུ་ཡང་།།
གྱེན་དུ་གཟེངས་ཤིང་རྨི་ལམ་སྒུལ།།
མི་འཇིགས་རྣོ་བའི་ལྕེ་ཞགས་ཀྱིས།།
གཡུ་ལོའི་ཚང་ཚིང་སྲེག་བྱེད་ཅིང་།།
སྒྱུ་མའི་གཟུགས་བྱད་ཡོད་དོ་ཅོག།
གཙང་བོའི་གཞུང་ལ་ཤུགས་ཀྱིས་འདྲེན།།
འཁོར་འདས་སྲིད་པའི་ཁབ་རྩེ་ན།།
གློ་བུར་ལྗན་ལྗིན་མ་དག་པ།།
གང་དག་རྣམ་པར་ངེས་པའི་བློས།།
ཅི་ཡང་མེད་པའི་མཐའ་ལ་དེད།།
ཚེ་རབས་འདི་ཕྱིའི་སྣང་བ་མི་བདེན་རང་སྣང་ཉམས་དགའི་བྱིས་བློ་དང་།།
ཆུ་བུར་རྡོལ་རྣམས་དཀའ་ཐུབ་སྤྱད་པའི་དྲང་སྲོང་ལས་ཀྱང་མཐར་ལྟུང་བ།།
བདེན་པའི་དོན་ཅན་རྣམ་པར་ངེས་པའི་གཙུག་ཏོར་ཅན་གྱི་ཕྱག་རྒྱ་ཡིས།།
མ་དག་ཆོས་ཚུལ་བདེན་པར་ལྟ་ལ་མགོ་བོ་མཐོ་བའི་སྐྱེངས་པ་སྟེར།།
ཇི་ལྟར་བློ་གྲོས་རྩལ་རྒྱས་པ།།
ཤེས་བྱའི་གསང་རྒྱ་བརྟོལ་མཁས་པ།།
མ་རིག་སྣང་བའི་འཕྱམ་སོ་ནས།།
གཉུག་མའི་གླུ་ཆུང་ཡོད་རེ་ཀན།།
རང་བྱུང་མགྲིན་པའི་རྩལ་ཁ་ལས།།
ལྷན་སྐྱེས་ཡིད་ཀྱི་དྲན་ངོགས་གསལ།།
རིག་རྩལ་དགོངས་ཀློང་གསལ་བྱེད་ཨ།།
སྐྱེ་མེད་དབྱིངས་ནས་དབུ་མར་ཞུགས།།
དོན་དམ་ཀུན་གཞིའི་སྣང་ངོ་རུ།།
ཕྱི་ནང་ཟུང་འཇུག་ཡ་མ་བྲལ།།
དེ་ལྟའི་གནས་སྣང་མ་ལུས་པ།།
བདག་གི་མ་བཅོས་སྨྱུག་རྩེར་ལུད།།
རབ་འབྱམས་མེ་ཏོག་འདར་བ་ནི།།
ཟབ་ཡངས་བརྗོད་མི་ཤེས་པ་ལ།།
བུང་བ་གར་གྱིས་རྩེན་པའི་བརྙན།།
མཐོང་བའི་མོད་ལ་ཚོར་བས་བཟི།།
གཤིས་ཞེས་བྱ་བ་དེ་ཉིད་དེ།།
ཇི་བཞིན་བརྗོད་པ་མི་ནུས་མོད།།
རིག་བྱེད་རྩལ་གྱིས་མཚོན་པ་ནི།།
གཤིས་ལས་སྙན་པའི་དབྱངས་རྟའོ།།
ཁག་བདུན་པ།
སྐོམ་པས་གདུང་བའི་རི་དྭགས་མིག།
ཆུ་ཡི་དཀྱིལ་འཁོར་ལ་ཕྱོགས་ཤིང་།།
དཔུང་བ་མེ་ལྕེའི་ལྕགས་མདའ་བཞིན།།
རྡོ་རྗེ་རི་ལ་མཐུ་རྩལ་འགྲན།།
རྣམ་པར་དག་པའི་རྡུལ་ཕྲན་ལས།།
ཚོར་བའི་རྒྱ་མཚོར་འཁྲུངས་པ་ཡི།།
མེ་ཏོག་པདྨའི་གེ་སར་རྩེར།།
སྨུག་པས་བཟུང་རྣམས་ལྟ་ན་སྡུག།
བསྐལ་བའི་དུས་ཚོད་མཐའ་མ་རེར།།
ཨུ་དུམ་ཝ་རའི་འཛུམ་བརྒྱ་གྲོལ།།
ཆོས་དབྱིངས་སྐྱེ་འཆི་མེད་པ་ཡང་།།
གང་སྣང་སྐུ་ཡི་རྒྱན་དུ་ཤར།།
སྤྲོས་བྲལ་གཞི་ཡི་འདར་ལྕུག་གིས།།
ནང་གི་ངལ་དུབ་སེལ་བྱེད་པ།།
འཆི་མེད་བདེ་བའི་བསོད་ནམས་སུ།།
བསིལ་འཇམ་བུམ་པའི་ཁ་རྒྱན་མཛེས།།
བརྩོན་པའི་རྒྱུ་བ་རིང་བསྟེན་ནས།།
སྙིང་རྗེའི་རལ་གྲིས་སྨག་ལ་བརྡར།།
ཐུགས་རྗེ་མཉེས་པ་གསུམ་མངའ་བ།།
དབྱིངས་རིག་དཀོན་ཅོག་མཁའ་ན་རྩེན།།
འདི་ན་ལྷན་སྐྱེས་ཞི་བ་ཆེ།།
རྣམ་དག་སྲིད་པའི་བང་སོ་བརྗིད།
སྙན་པའི་རྫ་རྔ་འཁྲོལ་བ་ལ།།
ཞིམ་མེད་སྤོབས་པའི་སྤྲོ་བ་རྒྱས།།
རིག་བྱེད་དབྱངས་ལྡན་བྱིན་ཆགས་ཀྱི།།
ངག་གི་གཟི་བརྗིད་དཔལ་འབར་བ།།
མི་མཇེད་ཞིང་གི་ནོར་བུ་ཆེ།།
རིན་ཆེན་སྐུད་པའི་རྣོ་ལ་དྲངས།།
དབྱིངས་ཀྱི་དྲོད་ཐིག་ས་ལ་ལྷུང་སྟབས་ཀྱིས།།
ལུས་སེམས་མ་ཞི་རྔུལ་ཆུའི་འོབས་སུ་དྲངས།།
སྒྱུ་འཕྲུལ་སྣ་དགུའི་དགོས་འདོད་འབྱུང་ཙ་ན།།
འོ་སྐོལ་སྣང་བ་བསིལ་བའི་ངོགས་སུ་འཁྲིད།།
སྲིད་པའི་ནགས་ཚལ་ཡོམ་ཡོམ་འདར་བ་དང་།།
སྒྱུ་མའི་མེ་ལྕེ་ལམ་ལམ་མཆེད་པ་ཡིས།།
མས་ཀྱི་སྐྱོ་ཤས་འབྱུང་ལ་གསོས་འདེབས་སོ།།
ཡས་ཀྱི་དག་མཉམ་ལྟ་བར་ངར་ལྡུད་དོ།།
དམ་ཚིག་མེ་ཏོག་ཆུན་པོ་ལ།།
གསང་བ་སྒྱུ་མའི་འཇའ་གཟུགས་ཀྱིས།།
སྒྲིབ་མེད་དག་ཅིང་ཚངས་པ་ཡི།།
ཤིས་བརྗོད་འདབ་དྲུག་སལ་སིལ་འཐོར།།
རིན་ཆེན་གཞལ་ཡས་ཕོ་བྲང་ན།།
སྣ་ཚོགས་མཚར་སྡུག་སྟོང་གི་དཔལ།།
ལྷུན་གྲུབ་སེང་གེའི་ཁྲི་འཕང་དུ།།
མགོན་པོའི་འཛུམ་ཞལ་ཉམས་རེ་དགའ།།
མཉམ་ཉིད་རྫོགས་པ་ཆེན་པ་ཡི།།
བདེ་ཆེན་ཆོས་ཀྱི་འཁོར་ལོ་ཉིད།།
རིག་སྟོང་མི་ཤིགས་སེམས་དཔའ་ཡི།།
རྡོ་རྗེ་དཀྱིལ་ཀྲུང་བཅས་ཏེ་ཞུ།།
གང་ཞིག་ཟབ་མོ་གསང་བ་སྔགས།།
ཚིག་གི་སྲད་བུར་བརྒྱུས་པའི་འཕྲེང་།།
གཙུག་ན་གཡོ་བའི་བྲ་བྲེ་བཞིན།།
ཆོས་ལས་ཆོས་ཟབ་ཟ་མ་ཏོག།
ངག་གི་གཙང་ཆེན་རབ་ཏུ་བྲུག།
ཡིད་ཀྱི་བརྟན་པ་བདེ་བར་གཤེགས།།
སྐུ་ཡི་ཞབས་པད་ཉི་ཟླའི་གྲོགས།།
ཀུན་བཟང་བརྟན་གཡོའི་རྒྱུད་སྨིན་ཤོག།
ཁག་བརྒྱད་པ།
སྐུ་ལང་ཚོའི་གཟི་བྱིན་དཔལ་དུ་སྡུག།
གསུང་ཡན་ལན་དྲུག་ཅུའི་འཇམ་ཤ་ལྡན།།
ཐུགས་འོད་གསལ་ཡེ་ཤེས་རང་འབར་ལ།།
ངས་སྒོ་གསུམ་འབུལ་བའི་གུས་པ་ཞུ།།
གཞི་མ་སྤྲོས་གདོད་མའི་སྐྱེད་ཚལ་དུ།།
ལམ་ལྷུན་གྲུབ་བསིལ་འཇམ་སྙེ་མ་འབུས།།
ཕྱི་མཁའ་ལམ་ཆུ་འཛིན་ཕུང་པོའི་ཚོམ།།
ནང་མཉམ་ཉིད་ཤེས་རབ་རལ་གྲི་རྣོ།།
གླུ་གྲེ་འགྱུར་མགྲིན་པ་དར་སྐུད་ལ།།
ཚིག་རང་བབ་འཁོར་འདས་དྲི་ཟའི་དབྱངས།།
ཕར་སྲིད་པའི་དར་ལྕོག་ལྷབ་ལྷུབ་ལེན།།
ཚུར་མི་རྟག་ཆོས་ཀྱི་གོ་བ་ལོངས།།
སེམས་རིག་པ་དབྱིངས་ཀྱི་ཆོ་ག་འདི།།
གནད་བསྡུས་ན་སེམས་ངོ་འཕྲོད་པའི་བརྡ།།
ང་གླུ་པ་སྲིད་པའི་རྫ་སྒང་ན།།
ཁྱོད་ཉན་མཁན་རྫ་རྒྱུད་གོང་འོག་ན།།
ཆོས་སྣང་སྲིད་སྒྱུ་མའི་རྣམ་ཐར་འདི།།
ངག་མ་བཅོས་ཤུགས་འབྱུང་དབྱངས་སུ་འགུག།
ཡིད་ཀུན་རྟོག་འདུ་བྱེད་ཕྲ་མོ་ཡིས།།
ཆོས་ཀུན་རྫོབ་བདེན་མེད་རྨི་ལམ་དཀྲུགས།།
ཚེ་མི་རྟག་རྩྭ་རྩེའི་ཟིལ་བ་བཞིན།།
ལས་མི་བསླུ་ལུ་གུ་རྒྱུད་དུ་འབྱུང་།།
བུ་རང་གོ་ཆོད་པའི་དཔའ་གདེང་གིས།།
ནགས་དབེན་པའི་ཁྲོད་ནས་སད་རྟོགས་ཁྱེར།།
རྒྱུད་སྨིན་བྱེད་དབང་གི་ཁོག་དབུབས་ཤིང་།།
ལམ་གྲོལ་བྱེད་གདམས་པའི་མན་ངག་རྙེད།།
ནང་ཀུན་གཞིའི་ཁམས་ལ་གདེང་ཐོབ་ནས།།
བུ་སྣང་སྟོང་མཁའ་ལ་ཤུགས་ཀྱིས་འཕུར།།
མཁའ་ཡར་གཅོད་ཡེ་ཤེས་གཤོག་རྩལ་རྒྱས།།
ས་མར་འབབ་སྙིང་རྗེའི་རྐང་ཟུང་ཐོགས།།
ཉམས་དགའ་བ་བསིལ་བའི་བྲག་སྐྱིབས་ནས།།
ཆོས་ཟབ་རྒྱས་རྟོགས་པའི་རང་རྣམ་མགུར།།
ཁྱོད་ཚུར་ཤོག་མོས་གུས་དག་པས་ཤོག།
ང་ཕར་ཡོང་ཐུགས་རྗེའི་འཛུམ་པས་ཡོང་།།
བུ་སློབ་ཟུང་དགྱེས་འཛུམ་དགའ་ལྡན་གྱིས།།
བརྡ་བརྒྱུད་གསུམ་དཀྱིལ་འཁོར་ཚོམ་བུར་དགོད།།
ཁག་དགུ་པ།
རུས་པའི་ཐལ་དཀར་མེ་ཏོག་གི།
སྙིང་ལ་ཤར་བའི་བཅུད་ཁུ་སྟེ།།
སྦྲང་ཆུང་མྱོས་པའི་བཟི་གླུ་ཡིས།།
ཚོགས་ཀྱི་འཁོར་ལོ་འུར་དུ་བྱས།།
ཞལ་འཛུམ་ཟླ་བའི་དཀྱིལ་འཁོར་ལས།།
ཤེལ་གྱི་མུ་ཏིག་འོད་དུ་འཚེར།།
ཟབ་མོའི་གནད་ལས་མཐར་ཕྱིན་ཅིང་།།
བརྡ་བརྒྱུད་ཕོག་པའི་ལན་དུ་ནི།།
རིང་མིན་ཉེ་བའི་གླུ་དབྱངས་ལེན།།
རྣམ་པར་སྒེག་པའི་ཡིད་ཀྱི་གླིང་གར་ཁྱེད་ཀྱི་ལང་ཚོའི་ཆུ་རིས་འཐོར།།
པིར་གྱིས་མ་བཞེངས་ཞི་བའི་མདངས་ཀྱིས་རྨ་བྱའི་སྒྲོ་ཕྲན་ཟིལ་གྱིས་གནོན།།
དེ་ནི་མ་བཅོས་རང་བྱུང་ཞིག་སྟེ་རྫུ་འཕྲུལ་ལྷ་ཡི་ཁང་བཟང་དུ།།
ཚིག་གི་ཆོ་འཕྲུལ་ལན་བརྒྱ་འབར་བའི་རྟོག་འགྱུ་མྱུར་བའི་ན་ཆུང་གིས།།
ཉམས་འགྱུར་སྟོང་གི་རྒྱུད་སྐུད་ཀློང་ནས་བླ་སྲོག་འགུག་པའི་སྐྱོམ་འདར་ཚོར།།
ཆུ་ནང་ཟླ་གཟུགས་འདར་ཙ་ན།།
འདྲེན་བྱེད་ཀྱིས་ནི་མཛེས་པ་མཐོང་།།
ནང་གི་ཡིད་འཛིན་ཀྱོ་བ་ཡིས།།
རབ་ཏུ་བཏུལ་བའི་དངན་པ་ཤོར།།
སེང་ལྡེང་ནགས་ཀྱི་དྲ་བ་ན།།
སེང་གེའི་རྔམ་སྐད་དར་དིར་སྒྲོག།
འགྱུར་མི་འདྲ་བའི་གད་རྒྱངས་ཀྱིས།།
ས་ཆེན་འདི་ཡང་གཉོམ་པོར་བྱས།།
སྣང་བ་མ་བསྡུས་སེམས་ཀྱི་ངོར།།
ཁྱེད་ཀྱི་གཟུགས་མེད་འཇའ་ལམ་གྱི།
ཡེ་ནས་དག་པའི་འཕྲུལ་འཁོར་ནི།།
རི་དྭགས་མཆེ་བའི་དོ་ཟླ་མིན།།
རིག་པ་གཞི་གྲོལ་ཤེལ་དཀར་གྱི།།
ཟག་མེད་ཤིན་སྦྱངས་བདེ་བའི་རོ།།
བདུད་རྩི་མྱོང་གྲོལ་ལྗགས་ཐོག་ཏུ།།
བབ་པའི་སྐལ་བཟང་བརྗོད་ལས་འདས།།
དཔག་ཡས་ཕན་བདེའི་ཞབས་པད་ཟུང་།།
སྲིད་པའི་ཁྱམས་སུ་བསྐྱངས་ནས་སུ།།
གླང་པོ་ཆེ་ཡི་གླལ་བསྒྱིངས་ཀྱིས།།
སྦྲིད་པའི་རྨོངས་གཉིད་ཁད་ཀྱིས་དཀྲོགས།།
ཁག་བཅུ་པ།
སྲིད་པའི་འཆིང་བ་མ་ལུས་བཀྲོལ་བ་ཡི།།
སྐྱབས་དེ་འཁོར་བའི་སྐྱོ་གར་ལ་ཕྱོགས་ནས།།
གཉེན་པོ་མདུང་གིས་བསྣུན་པ་མ་ལགས་ཏེ།།
ཞི་བ་བདེ་གཤེགས་གསལ་བའི་འཇུག་ངོགས་སུ།།
རྣམ་དག་བསིལ་བའི་ལྗོངས་ཆེན་རབ་བསྟན་ནས།།
འབོད་པའི་སྒྲ་དང་སྐྱེལ་མའི་ཕྱག་བརྡ་ཡིས།།
སྲིད་པའི་འཆིང་རྒྱ་འདི་ལས་ཕ་རོལ་ཏུ།།
ཡིད་བྱེད་རྣམ་པར་དག་པའི་ཉེར་ལེན་གྱིས།།
བརྟན་གཡོ་འཁོར་བའི་འདམ་ལས་རིང་དུ་འདྲེན།།
སྒྱུ་འཕྲུལ་རྡོ་རྗེ་ཞགས་པ་ཡིས།།
ཆོས་ཀྱི་འཁོར་ལོ་རབ་ཏུ་བསྐོར།།
མི་མཇེད་གདུལ་བྱའི་སྙིམ་པ་ལ།།
ཚོགས་གཉིས་བསོད་ནམས་ཆར་དུ་བསྙིལ།།
བཅོམ་ལྡན་ལྷ་ཡི་དབང་པོ་ལ།།
དད་པའི་མེ་ཏོག་རྣམ་ཀུན་ཏུ།།
སྐུ་བཞི་ཟུང་འཇུག་མི་ཕྱེད་པའི།།
གུས་པའི་ཕྱག་འཚལ་རྨད་དུ་བྱུང་།།
ལམ་བཟང་གསལ་བའི་དཀྱིལ་འཁོར་དུ།།
ཕྱག་ན་ཆོས་ཀུན་གསལ་བྱེད་ཀྱི།།
རིགས་པའི་རལ་གྲི་རྣོན་པོ་དང་།།
པདྨའི་དབུས་སུ་པོ་ཏི་འཆང་།།
སྒྲིབ་བྲལ་ཀུན་གཤིས་འཇམ་དབྱངས་ཀྱི།།
ཞལ་གྱི་འཛུམ་དང་དབྱེར་མེད་པའི།།
མཚར་སྡུག་གཟི་བྱིན་བསྩལ་ཏུ་གསོལ།།
ཐུགས་རྗེའི་ལྷ་དབང་པད་མ་དཀར།།
ཕྱག་གི་ཤེལ་དཀར་མུ་ཏིག་གི།
སྙིང་རྗེའི་འོད་ཟེར་འཇམ་པོ་ཡི།།
བྱིན་རླབས་སྟོང་གི་རང་སྒྲ་ཡིས།།
ཟག་མེད་བདུད་རྩིའི་བསུང་ཞིམ་སྩོལ།།
ཕྱག་མཚན་མི་ཕྱེད་ནུས་མཐུ་ཡིས།།
ཀུན་གཞིའི་མཐིལ་དུ་རྒྱ་གྲམ་བསྣོལ།།
གསང་བའི་རྒྱལ་པོ་རྡོ་རྗེ་འཛིན།།
བདེ་ཆེན་ངལ་གསོའི་དབུགས་དབྱུང་སྩོལ།།
སངས་རྒྱས་ཀུན་གྱི་སྐུ་གསུང་ཐུགས།།
གཅིག་ཏུ་འདུས་པའི་གེ་སར་ནི།།
བདེ་གཤེགས་ཡི་དམ་ལྷག་པའི་ལྷ།།
བཅོམ་ལྡན་ཚད་མའི་སྐྱེས་བུ་ལ།།
དངོས་འབྱོར་ཡིད་སྤྲུལ་མཆོད་པ་འབུལ།།
རིགས་བརྒྱའི་ཁྱབ་བདག་གཙུག་གི་ཏོག།
མཁྱེན་བརྩེ་ནུས་པའི་ཕ་ཕོག་སྩོལ།།
ཁག་བཅུ་གཅིག་པ།
ཁུར་མོང་བསེར་བུས་གཏོར་བ་ཡི།།
གནམ་ས་ཁད་ཅིག་ཕྱེ་བའི་ངོགས།།
ཚིག་གི་ཚོན་ཁ་མདངས་བཀྲ་ལ།།
དབྱངས་ཀྱི་འདེགས་འཇོག་ངེས་པ་ཡི།།
གླུ་དེ་རྒྱུད་མངས་བཞད་པའི་སྒྲ།།
གཞས་དེ་སྣང་སེམས་འདྲེས་པའི་བརྡ།།
འོ་སྐོལ་བསིལ་གྲིབ་ཉམས་དགའ་རུ།།
རབ་ཏུ་འཁོད་ཅིང་སྟོང་དབྱིངས་ཀྱི།།
སྒྱུ་མའི་མཐིལ་ལ་ཉམས་ཀྱིས་ལྟ།།
ཞི་བའི་མདངས་ལ་ཐལ་མོ་སྦྱར།།
སྒྱུ་འཕྲུལ་སྣ་དགུའི་བ་དན་དཀར་པོ་གཙུག་ལག་ཉི་ཟླའི་འགྲམ་དུ་གཡོ།།
སེམས་རིག་པདྨའི་འདབ་མ་ཡངས་པོ་དྲི་བཟང་རྫིང་བུའི་ཚལ་ན་ལྡེམ།།
མིག་དང་རྣ་བའི་རྒྱུ་ལམ་འདྲེན་པའི་ཤེས་བྱའི་པད་ཚལ་སྟུག་པོ་དེ།།
མངར་བཅུད་འཛིན་པའི་བུམ་པའི་ཁ་རྒྱན་མཛེས་སྡུག་རྨ་བྱའི་སྒྲོ་ཕྲན་བཞིན།།
སྙན་ངག་པ་ཡི་ངག་ལས་བྱུང་ཚེ་མཆོག་གྱུར་བདེ་བའི་སིམ་པ་སྟེར།།
ཚངས་སྲས་ངག་གི་རྣོ་སྐུད་ཀྱིས།།
སྟོང་ཁམས་སྲིད་པའི་རང་མདངས་སྔོག།
སྣང་སྲིད་ཆོས་ཉིད་འདུས་པ་ཡི།།
རོལ་དབྱངས་དེས་ཀྱང་རབ་ཏུ་སྔོག།
རྡུལ་དང་རྡུལ་ཕྲན་གྱེས་པ་ནའང།།
སྙན་པའི་རོ་བཅུད་ཕུན་ཚོགས་དེ།།
གང་གིས་གཞོམ་གཞིག་བྲལ་བས་ན།།
དོན་དམ་དབྱངས་ཀྱི་ཕོ་བྲང་བརྗིད།།
སྙན་པ་ཚིག་གི་སྡེབ་སྦྱོར་མ་ཡིན་སྤྲོས་བྲལ་དབྱིངས་ཀྱི་གནད་བརྒྱ་དཀྲོལ་བའི་སྲིད་པའི་རྒྱུད་མངས་སྔོན་པོ་འདིས།།
རྟོག་པའི་འཆིང་རྒྱ་རལ་བར་བྱེད་པའི་རིག་བྱེད་མཐུ་རྩལ་ངག་གི་དཔལ་ལྡན་སུ་ཡང་མྱོས་པའི་ཆང་རྩི་ཡིས།།
འཁོར་འདས་ཞི་དྲག་བློ་ཡི་བཀོད་པ་ཅིག་ཅར་སྟོན་ལ་ཆགས་ཐོགས་བྲལ་བའི་རིག་པའི་གསང་བརྡ་ལྷོད་པོ་དེས།།
སེམས་ཉིད་གཉུག་མའི་མཛེས་ལྗོངས་ཉུལ་ཏེ་བདེ་སྟོང་ཚོར་བའི་དཀྱིལ་འཁོར་དབུས་ནས་མཐོང་ཐོས་དྲན་པའི་བློ་གྲོས་རྫོགས།།
ཚིག་གི་ལྡ་ལྡིར་རྩུབ་རེག་བྲལ།།
དབྱངས་ཀྱི་འཕར་ལྡིང་སྲོག་ལ་ཞུགས།།
དོན་དམ་ཟེའུ་འབྲུ་མ་རྙིངས་པའི།།
སྙན་པའི་གད་རྒྱངས་མཐོན་པོ་དེ།།
གཙུག་ལག་ཉི་ཟླའི་བླ་བྲེ་བཞིན།།
ས་གསུམ་གཡང་གི་དཔལ་དུ་ཆེ།།
གང་ཞིག་ཡི་གེའི་འདུ་བྱེད་ཀྱི།།
ཚིག་གི་ཅོད་པཎ་ལོ་ལེགས་ཤིང་།།
དོན་གྱི་འབྲས་བུ་གཡུར་ཟ་བའི།།
ལེགས་པའི་ཕུན་ཚོགས་མ་ལུས་པ།།
སྙན་ངག་ཁམས་ཀྱི་དྭངས་བསིལ་དང་།།
བློ་གྲོས་རྩེ་བརྒྱ་འབར་བ་གཉིས།།
ལྷན་ཅིག་གྲོགས་སུ་བསྡེབས་པའོ།།
བདག་གི་མགྲིན་པའི་རྒྱལ་ཁབ་ཀྱི།།
འཕུར་ལམ་བསྙེགས་པའི་ཐང་དཀར་རྒོད།།
དབྱིངས་རིག་སེམས་ཀྱི་བསིལ་གྲིབ་འོག།
གྲིམ་ལྷོད་རན་ལ་གདངས་རྣོ་བའི།།
ཐོས་འཛིན་གསོ་བའི་གླུ་དབྱངས་དག།
རྒྱལ་ཁམས་ཟིལ་གྱིས་གནོན་པ་ཡི།།
རྔ་བོ་ཆེ་བཞིན་ཁྱབ་གྱུར་ཅིག།
ཁག་བཅུ་གཉིས་པ།
ཀུན་ཏུ་རྟོག་པའི་དྲ་བ་དྲ་ཕྱེད་ཀྱི།།
ལྕགས་ཀྱུས་མ་བཟུང་རང་གྲོལ་སེམས་ཀྱི་གཤིས།།
འཕྲལ་སྣང་སྨུག་པའི་ཆུ་རྡུལ་འཁྲིགས་པ་ཡིས།།
སེམས་ཀྱི་ཉིན་སྲིབ་འདི་དག་མོག་པོར་བྱས།།
འོད་གསལ་སེམས་ཀྱི་རང་བཞིན་གཡའ་དག་ཀྱང་།།
གློ་བུར་དྲི་མས་སྒྲིབ་གྱུར་བསལ་བ་ཡི།།
ཤེས་རབ་རལ་གྲི་འཆང་བ་གང་དེ་ཡིས།།
ཉོན་མོངས་དགྲ་རྣམས་མ་ལུས་འཇོམས་པ་ཡི།།
ཀ་དག་ཆོས་ཉིད་གསལ་སྣང་ལམ་དུ་བསྒྱུར།།
ཏིང་འཛིན་གཡུ་ལོ་རྒྱས་པའི་ཚལ།།
བློ་གྲོས་གཤོག་འགྱུར་རྫོགས་པ་ཡི།།
སྒྲིབ་པ་རྣམ་དག་ལང་ཚོའི་དཔྱིད།།
ཡི་དམ་ལྷག་པའི་ལྷ་རུ་ཤར།།
ཉན་རང་ལས་ཀྱང་རིང་དུ་འཕགས།།
འཕགས་པ་ལས་ཀྱང་ཡེ་ཤེས་ཀྱི།།
གསལ་རིག་སེམས་ཀྱི་མདངས་ཤར་པའི།།
ཨ་ར་པ་ཙའི་རྣམ་རོལ་གང་།།
ལྷན་སྐྱེས་དད་པའི་ཀློང་ན་རྩེན།།
ཐུགས་རྗེ་འཛུམ་པའི་གེ་སར་བཞད།།
འཛིན་པའི་གནད་གྲོལ་དམར་སེར་ཅན།།
མཐའ་བྲལ་ཆོས་ཀྱི་གསང་ལམ་གྱི།།
སྒོ་འཕར་འབྱེད་པའི་ལྡེ་མིག་ཐོགས།།
ཡེ་ཤེས་འོད་ཟེར་གསེར་གྱི་རི།།
གཞོན་ནུའི་རྣམ་རོལ་དངུལ་གྱི་མཚོ།།
ཉོན་མོངས་ཆམ་ལ་ཕབ་པའི་ལྷ།།
དག་པའི་རང་རིག་བླ་ན་མེད།།
ཐུགས་ཀར་ཟླ་སྟེང་སྔགས་ཀྱིས་བསྐོར།།
ས་བཅུའི་བྱང་སེམས་པོ་ཏི་བསྣམས།།
བདེ་གཤེགས་དག་པའི་སྐུར་བཞེངས་ལ།།
སྒོ་གསུམ་གུས་པས་ཕྱག་འཚལ་ལོ།།
ཁག་བཅུ་གསུམ་པ།
རིག་བྱེད་ངག་གི་རྩལ་ལས་བྱུང་བའི་སྙན་པའི་རོ་ངད་འཛིན་པ་གང་།།
ཚིག་གི་རོལ་རྩེད་སྲོག་ཏུ་བཟུང་བའི་ཡི་གེའི་འདུ་བྱེད་མ་ཡིན་ཏེ།།
དགའ་སྐྱོ་ཚོར་འདུའི་རྒྱུད་མངས་དཀྲོལ་བའི་མེ་སྟག་དམར་པོའི་རང་གཤིས་ཀྱིས།།
རྣམ་པར་ཤེས་པའི་གཏིང་ལ་སིམ་པའི་མཆོག་གི་དངོས་གྲུབ་དེ་ཁོ་ན།།
འདི་སྣང་ལས་ཀྱི་རྨི་ལམ་དུ།།
ཤར་བའི་ཁ་དོག་སྣ་ཚོགས་ཀྱང་།།
ཚ་ཕོག་བརྒྱབ་པའི་སྣང་བ་བཞིན།།
སྙན་ངག་རོལ་མོས་བཀྲེས་སྐོམ་སེལ།།
ཀྱེ་མ་མུན་པའི་གྲིབ་ངོགས་ཀྱི།།
ཇི་སྙེད་སུ་དག་གདུང་བའི་ཁུར།།
བཟོད་མེད་མིག་ཆུའི་ཐིགས་པ་ཡི།།
མྱ་ངན་སེལ་བའི་སྡོངས་གྲོགས་བྱེད།།
བྱེ་མའི་ཐང་སྟོང་གཅོད་པའི་རྔ་མོང་དང་།།
གྲོག་རོང་གཡང་ས་བརྒལ་བའི་སྐེད་ལམ་བཞིན།།
ཕུན་ཚོགས་སྙན་པས་འཆང་བའི་ངག་རིག་གིས།།
བདག་སེམས་བདེ་ལྡན་ཞིང་དུ་ངལ་གསོར་ཁྲིད།།
གཡོ་བའི་མཚོ་ཆེན་བགྲོད་པའི་གྲུ་གཟིངས་དང་།།
ཉིན་ལམ་བཅོ་བརྒྱད་འགྲིམ་པའི་རྟ་ཕོ་བཞིན།།
རིག་བྱེད་ཅོ་ཀའི་མགྲིན་གླུ་སྙན་མོ་ཡིས།།
བདག་ལུས་མཐོང་གྲོལ་རི་ཡི་རྩེ་མོར་ཁྲིད།།
བདུད་རྩི་བསིལ་མ་ངག་གི་བཅུད་དུ་བབས།།
མཛེས་ལྡན་རྨ་བྱ་དགའ་བའི་རོལ་མོ་བཞིན།།
བདག་གི་ངག་ནི་འགྱུར་ཁུགས་སྟོང་གི་བཅུད།།
ཚངས་པའི་བུ་མོས་ཤིས་པའི་ཆར་ཆེན་ཕོབས།།
— རེ་ཞིག་སྟོང་ཁམས་ཀྱི་སྐར་མ་ནུབ་རིར་ཡིབ་པའི་མྱ་ངམ་གྱི་འགྱུར་ལྡོག་ལྟར་ངག་གི་འགྱུར་ཁུགས་ཁོ་ནས་སིམ་པའི་ར་རོ་བ་དེ་བཟློག་ཕྱིར་སྒྲ་མིང་ལ་མཚོ་བྱུང་ངག་གི་སྤུ་གྲི་རུ་འབོད་པས་མདོ་སྨད་ཁམས་ཕྱོགས་ཀྱི་ཆར་གཏོགས། ཨ་མྱེ་རྡོ་རྗེ་གཡུ་ཁྲོམ་གྱི་པང་ཁུག་ནས་མཇུག་བསྡུས་སོ།། །།