བཀྲ་ཤིས་ལོ་གསར་ཚེས་གཅིག །
ཞིམ་མངར་ཟས་ཀྱི་ཐོག་མ། །
འོ་ཇ་བདུད་རྩིའི་མཆོད་བཤམས། །
ལྷ་བསང་སྔོན་མོའི་དུ་བར། །
རེ་བའི་ཀི་བསྭོ་བསྟར་ནས། །
མཆོག་གསུམ་ལྷ་ལ་ཕུལ་ཡོད། །
བཀྲ་ཤིས་ལོ་གསར་ཚེས་གཅིག །
ཕ་དང་ཨ་ཁུ་འཛོམས་བྱུང་། །
ཆང་གཞས་མཉམ་དུ་བཏང་ཡོད།
བཀྲ་ཤིས་གནམ་ལོ་གསར་པར། །
རིགས་རྒྱུད་གཙང་མའི་ཕ་ཁྱིམ། །
ཕ་དང་ཨ་ཁུས་བཀྱགས་ཡོད། །
བཀྲ་ཤིས་ལོ་གསར་ཚེས་གཅིག །
མ་དང་སྲུ་མོ་འདུས་ཡོང་། །
བཀྲ་ཤིས་བྲོ་གར་འཁྲབ་སོང་། །
བདེ་ལེགས་གཡང་གི་འབྱུང་ཁུངས། །
སྲིད་པའི་སྦྲ་རྒན་མཐིང་སྨུག །
མ་དང་སྲུ་མོས་ཕུབ་ཡོད། །
བཀྲ་ཤིས་ལོ་གསར་ཚེས་གཅིག །
སྤུན་དང་ན་ཟླ་ཕེབས་བྱུང་། །
དབྱངས་གསལ་ཕྲེང་བར་བརྒྱུས་ནས།
རྟེན་འབྲེལ་གླུ་ཡི་མཆོད་པ། །
གཞིས་བྱེས་བོད་མི་ཡོངས་ལ། །
བཀྲ་ཤིས་ཁ་གཡང་འབོད་དོ། །