དབྱར་གཞུང་དུས་ཀྱི་ཚན་ཁ་འབར་བའི་ཨ་ཆེན་གངས་ཀྱི་ལྟག་བརྒྱབ་ན།།
གཡང་གི་འབྲི་མོ་ཤག་ཤག་བཞོ་བའི་འབྲོག་མོ་ཤ་འཇམ་རུས་འཇམ་ཞིག།
མཛེས་པའི་མིག་གི་སྐད་ཆ་བཤད་ཞོར་གོམས་པའི་འདེགས་འཇོག་བསྒྱུར་ཙ་ན།།
སྟག་ཤར་གཞོན་ནུའི་སེམས་ཀྱི་རི་མོ་རང་དབང་མེད་པར་ཤོག་ངོར་ཕབ།།
དགུན་གཞུང་ཁ་བའི་མེ་ཏོག་གཏོར་བའི་ཧི་མ་ལ་ཡའི་མདུན་རྒྱབ་ན།།
ཝ་ཞྭ་དམར་པོའི་སྤུ་རིང་བར་ནས་ལ་གཞས་ལེན་པའི་འབྲོག་མོ་ཞིག།
ཕྱག་གཡས་འཇམ་པོ་ཐོད་ལ་གེར་ནས་གཡང་དཀར་འཚོ་བའི་བྲོ་བ་དེས།།
སྨྱུ་གུའི་རང་མདངས་སེམས་སུ་བསྐོར་བའི་འབྲོག་ཕྲུག་ཅིག་གི་རྣམ་ཤེས་ཁྲིད།།
སྟོན་གྱི་སྡོང་ལོ་མཁའ་རུ་བསྐྱོད་ཤུལ་སྤྲིན་པ་དཀར་པོའི་ཐུ་འོག་ན།།
ཕྱེ་ལེབ་གར་སྟབས་ལྷུན་གྱིས་གྲུབ་པའི་འབྲོག་མོ་ཁ་འཇམ་ཚིག་འཇམ་ཞིག།
སྐྲ་ཡི་ལན་བུས་གངས་ཀྱི་སྲོལ་རྒྱུན་འདྲེན་བྱེད་གམ་དུ་བསྐྱལ་བ་ན།།
རང་བྱུང་ཁམས་ལ་ལྟད་མོར་ཡོང་བའི་ཞིབ་འཇུག་གཞོན་ནུའི་མཁུར་ཚོས་བསྒུལ།།
དཔྱིད་ཀྱི་དཔལ་མོ་ཁུ་བྱུག་སྔོན་མོའི་མགྲིན་པའི་རྩལ་དུ་འཁྲུངས་ཤུལ་ན།།
ཕྱིང་དཀར་ཆར་ལ་ཙད་ལ་གཞེས་པའི་འབྲོག་མོ་ཨ་འཛོམས་ཡང་འཛོམས་ཤིག།
གཡང་གི་ཅང་ཤེས་རྟ་ལ་ཞོན་ནས་བག་མ་འགྲོ་བར་ཆས་པ་ན།།
ཐོད་པའི་ཁ་ཡིག་རང་བསྐོས་དེ་ཡིས་ནམ་མཁའི་མཐིང་དུ་རི་གླུ་བཏང་།།
སྤྱི་ཟླ་ཚེས་བཟང་ལ་སློབ་གླིང་དུ།