དགེ་རྒན་དུས་ཆེན་ལ་དགེ་རྒན་དྲན་པ།

སང་ཉིན་ནི་དགེ་རྒན་དུས་ཆེན་རེད་ཟེར། ཞིབ་ཏུ་བསམས་ན་ང་ལ་དགེ་རྒན་བཀའ་དྲིན་ཅན་གཅིག་ལས་མི་འདུག གཅིག་དེ་ཡང་མི་མཚན་སྙན་གྲགས་ཅན་དེ་འདྲ་ཅང་མིན། ཕྱི་ཚུལ་ལ་ཆེས་སྤྱིར་བཏང་བ་ཞིག་ཀྱང་ཡིན། ནང་ཉམས་ག་འདྲ་ཡིན་པ་སུས་ཤེས། ཤེས་ཐབས་མེད་ཀྱང་ཤེས་འདོད་ཆེ། མི་ལ་ལས་ང་ལ་ཁྱོད་ཀྱི་དགེ་རྒན་དེ་སྦས་པའི་རྣལ་འབྱོར་པ་ཞིག་རེད་ཟེར་མོད་དེའང་ཨེ་ཡིན་མི་ཤེས་པས་ད་བསྐྱུར་འཇོག སྤྱིར་ངས་ད་ལྟ་ཡི་གེ་དང་ཡི་གེ་མཐུད་ནས། ཐ་སྙད་དང་ཐ་སྙད་སྦྲེལ་ནས། སྔོན་རབས་དང་ད་བྱུང་བསྡེབས་ནས་མི་སེམས་དགའ་རུ་འཇུག་ཐུབ་པ་དང་ཁྲོ་རུ་འཇུག་ཤེས་པ་སོགས་ནི་ཁོའི་བཀའ་དྲིན་མིན་ཟེར་ས་མི་འགྲོ་བ་འདྲ། དེས་ཀྱང་མི་ཚད་དོ། ། ག་ལེར་ལབ་ཡོང་ཨ།

ཁོའི་མིང་ལ་པདྨ་རྒྱལ་མཚན་ཟེར། ལྷ་སའི་སྐད་ཀྱིས་བཤད་ན་ཁོ་ནི་ངའི“སྤོ་ལགས”ཀྱང་རེད། རེད་མོད། ངས་ད་རེས་ཆེས་སྐད་ནག་ལ་བཅུག་ནས་ཁོ་ལ་རྗེས་དྲན་སྐྱུར་པོ་ཞིག་བྱེད་རྒྱུ་ཡིན་པས། ཁོ་ཟེར་བ་ལས་ཁོང་མི་ཟེར་ལ་ཤི་ཟེར་བ་ལས་གཤེགས་མི་ཟེར་བ་ཡིན། དེ་ཡང་ཅི་ལ་ཞེ་ན། ཁོ་འཇིག་རྟེན་འདི་ན་ཡོད་དུས་ཀྱང་ངས་ཞེ་སའི་ཚིག་ཅིག་ཁོ་ལ་ལབ་མ་མྱོང་བ་འདྲ། དེ་དུས་ལབ་ཀྱང་མི་ཤེས། ད་ཚོད་ལབ་ཀྱང་ཁོས་ཐོས་དོགས་མེད་པས། ད་ཐད་ཀར་འབྲོག་རྟགས་འབྲོག་བཤད་ཀྱིས་འཐུས་པར་བྱེད།

ངས་དྲན་གསལ་ལ་ཁོས་གཡོགས་མ་ལྗང་ནག་ཅིག་གྱོན། ཕྲེང་བ་ནག་པོ་བརྒྱ་དཔོན་གྱི་ཏོག་ལ་མདོག་སྣ་ཚོགས་ཀྱིས་བརྒྱན་པ་ཞིག་འཛིན། ཁོས་མདོག་དེ་དག་རྒྱལ་བ་རིགས་ལྔའི་མཚོན་བྱེད་ཡིན་ཟེར། དེ་མིན་ད་དུང་ཕྲེང་བ་ཞིག་ཡོད་པ་ནི་ཁོས་སྒྲོལ་མའི་བསྙེན་ཕྲེང་ཡིན་ཟེར། ཕྲེང་བ་དེ་སྐར་མ་སྟོང་ལྡན་ངོ་མ་ཞིག་ཡིན། ཁོས་སྒྲོལ་མའི་བསྙེན་པ་འཕུད་སྐབས་ང་ཚོ་བྱིས་པ་སྐོར་ཞིག་མེ་ཏོག་ཙ་མ་ཙི་ཐོག་འཐུ་རུ་འགྲོ་མྱོང་། མེ་ཏོག་དེ་བསྙེན་པ་འཕུད་པར་མཁོ་ཟེར། ང་ཚོས་སྒང་རྒན་ནག་ལྡང་བརྒྱུད་ནས་ན་དམར་ལེབ་བར་དུ་མེ་ཏོག་དེ་འཐུ་བཞིན་སོང་། ལམ་དུ་ཁྱ་མ་གླང་མའི་རྫུབས་ལ་ཐུག་ནས་འགྲོ་དཀའ་མོ་བྱུང་། ན་བྱེའུ་གྱོ་ལྡང་དང་བྲག་བྱིའུ་དམར་རིལ་སོགས་བྱ་རིགས་བྱེའུ་རིགས་མང་པོ་ག་ས་གང་དུ་བབས་འདུག མཐར་ང་ཚོས་མེ་ཏོག་ཙ་མ་ཙི་ཐོག་མང་པོ་རྙེད་བྱུང་། མེ་ཏོག་དེ་སེར་པོའི་ནང་གི་སེར་པོ་ཞིག་ཡིན། ཡུ་བ་བཅད་ནས་བུས་ན་སྒྲ་ཅུང་སྙན་མི་སྙན་པ་ཞིག་གྲག་དཔེ།

དེ་ལྟར་ང་རང་ཆུང་དུས་ནས་ཁོའི་གམ་དུ་ལག་ཆགས་པ་ཡིན་པས་ཁོའི་ལྟ་སྤྱོད་སོགས་དང་པོར་མི་འདོད་བཞིན་དུ་སྦྱངས། གཞུག་ནས་ཁོའི་ལྟ་སྤྱོད་དེ་ཚོ་ངའི་ལྟ་སྤྱོད་དུ་ཡང་གྱུར་ཏེ་ཕར་ལ་འཕེན་བསམ་ཡང་འཕེན་མི་ཐུབ་པ་ཞིག་ཏུ་གྱུར་སོང་།

ཁོས་ང་ལ་ང་རང་ལོ་དགུ་ཡིན་དུས་ཀ་ཁ་ག་ང་སོགས་ཚེག་བསྟར་སྦྱོར་ཀློག་སོགས་བསླབས། ཁོ་ནི་མི་བཙན་པོ་ཞིག་ཀྱང་ཡིན། ཁོས་ངོ་གནག་ནས་བསླབས་པས་ངས་ཀྱང་ཤུ་རེས་སྦྱངས་པ་ཡིན། ཁོས་ང་ལ་གོ་ཁའི་ནང་དུ་གན་རྐྱལ་དུ་འདུག་པ་སོགས་ཀྱང་བྱེད་དུ་མི་འཇུག དེས་ང་རྒྱལ་འཕེལ་ཡོང་ཟེར། སྐབས་དེར་རྣར་མ་སོང་མོད། ད་ལྟ་འདང་བརྒྱབ་ན་གོ་རྒྱུ་ཙིག་གེ་ཞིག་ཡོད་པ་འདྲ། ཁོས་བྱིས་པ་ཚོས་སྐད་ཆ་མང་པོ་བཤད་ན་རྒན་གཏམ་རེད་ཟེར་ནས་མཚམས་གཅོད། ཟ་མ་འཕྲོ་བརླག་བྱས་ན་བུ་བསད་པའི་ཚོད་ཀྱིས་སྡུག་བསྔལ་བྱེད། དེ་བྱས་ན་བསོད་ནམས་ཟད་འགྲོ་དང་འདི་བྱས་ན་ཁ་ལས་ཉམས་འགྲོ་སོགས་ཆོག་དང་མི་ཆོག རུང་དང་མི་རུང་འདུལ་བ་ལས་ཞིབ་པ་ཟེར་རྒྱུ་ཡོད།

ཁོ་ང་ལ་འདང་ཡང་ཡོད། ཁོས་ངའི་ངོ་ལ་བལྟས་ནས་བསྟོད་པ་མི་བྱེད་པ་མ་གཏོགས། མི་གཞན་ལ“ཞི་ལུ་འདི་རྣམ་ཤེས་དགའ་ཅན་ཞིག་ཡིན། ཀློག་དག་ཅིང་ཀློག་མྱུར”སོགས་ཟེར་བ་རེད། ཁོས་ང་ལ་ཞལ་འདོན་ཕྱོགས་བསྒྲིགས་བློར་འཛིན་དུ་བཅུག་པའི་ཕན་ཆད་དུ། ལོ་རེ་རེར་ཏིང་འཕགས་བསྐལ་གསུམ་ཚར་རེ་ཀློག་འདོན་བྱེད་དུ་འཇུག ཏིང་འཕགས་བསྐལ་གསུམ་གྱི་གླེགས་བམ་དེ་དག་གི་ཐུམ་ཡག་པ་དང་། ཤོག་ངོས་དང་པོ་ནས་མར་ལ་ཚོན་མདངས་ཅན་གྱི་སྐུ་རིས་ཅུང་མང་བ་སོགས་ཀྱིས་ངའི་ཡིད་ཕྲོགས་མྱོང་། ཁོས་ང་ལ་ཏིང་འཕགས་བསྐལ་གསུམ་གྱི་ཕན་ནས་གསེར་འོད་ས་བཅུ་མ་དང་གཟུངས་བསྡུས་སོགས་ཀློག་ཏུ་བཅུག

ཁོ་ཡུལ་ན་མེད་དུས་མེད་དུས་ངས་ཁོའི་མཆོད་སྒམ་གློངས་མྱོང་། མཆོད་སྒམ་ནི་སྤུས་ཀ་ཤིང་ཡིན་པའི་དམར་པོ་ཞིག་ཡིན། མཐའ་ལ་དུང་ཕྲེང་གི་རི་མོ་སྟབས་བདེ་ཞིག་ཡོད། སྒམ་དེ་སྟོད་སྨད་དུ་ཆོད་ཡོད་པའམ་སྟོད་སྨད་གཉིས་ཅན་ཞིག་ཡིན། སྟོད་ཀྱི་ཆ་ལ་སྟོན་སྐུ་ལི་མ་གོས་སེར་གྱིས་བཏུམས་པ་ཞིག་ཡོད། གཙུག་ཏོར་མ་གཏོགས་མི་རིག་མོད། ཁོས་སྐུ་དེ་ཆེ་ཆེ་གཉན་གཉན་ཞིག་ལ་བཀུར་དཔེ། སྐབས་རེར་ཁོས་སྐུ་དེ་ལ་ཐོད་པ་གཏུགས་ནས་ཡུད་ཙམ་རེར་ཁ་རོག་ཏུ་འདུག་དཔེ། དེ་ནས་ཁོས་རང་གི་མིག་ཆུ་རང་གི་ལག་པས་འབྱིད་དཔེ། མཆོད་སྒམ་གྱི་སྟོད་ཀྱི་ཆར་ད་དུང་པོ་ཏ་ལ་དང་ཇོ་བོ་ཤཱཀྱ་མུ་ནེ་གཙོ་བོ་བྱས་ནས་ལྷ་སའི་གནས་འགངས་ཆེན་དང་སྐུ་བྱིན་ཅན་མང་པོའི་པར་རིས་བཤམས་ཡོད། ཨ་རོལ་སྐུ་ཕྲེང་ལྔ་པ་དང་ཆུ་བཟང་སྐུ་ཕྲེང་ལྔ་པའི་པར་རིས་ཀྱང་བཤམས་ཡོད། བླ་མ་དེ་གཉིས་ཁོའི་བླ་མའི་གཙོ་གྲས་ཤིག་ཡིན་ས་རེད། གནད་འགག་གི་སྐབས་ལ་ཁོས“ཨ་རོལ་རྡོ་རྗེ་འཆང་མཁྱེན། ཆུ་བཟང་རྡོ་རྗེ་འཆང་མཁྱེན”ཞེས་གསོལ་བ་འདེབས་དཔེ། རྟེན་དེ་དག་གི་མདུན་ལ་ཆུ་མཆོད་བདུན་ཚར་དང་མཆོད་མེ་སྐོར་ཞིག་དང་མཚན་ཐུབ་གཅིག་བཅས་བསྒྲོན་ཡོད། ཆུ་མཆོད་དང་པོའི་སྣོད་དེ་ཁ་ཅུང་འདལ་ཡོད་པ་ཞིག་ཡིན། དེའི་ནང་ལ་རྣམ་པ་ཛམ་དཀར་དང་། སྤུས་ཀ་ཟངས་མ། ཆེ་ཆུང་བྱིས་པའི་ལག་མཐིལ་ཙམ་ཞིག་བཞུགས་སུ་གསོལ་ཡོད། ཉིན་རེ་རེའི་སྔ་དྲོ་རེ་རེར་ཆུ་མཆོད་བཤམ་དགོས་ཤིང་ཕྱི་དྲོ་རེ་རེར་གཤེགས་དགོས། བཤམས་དུས་གཤེགས་དུས་གཉིས་པོར་འདོན་རྒྱུ་སོ་སོ་ཡོད། མཆོད་སྒམ་གྱི་སྨད་དུ་དཔེ་ཆ་ཅུང་མང་པོ་ཞིག་བསྒྲིགས་ཡོད་ཅིང་། ལག་བསྣོགས་ལ་སོང་ཡོད་པའི་མི་ལ་རས་པའི་རྣམ་ཐར་དང་། མདོ་མཛངས་བླུན། རྗེ་ཙོང་ཁ་པའི་རྣམ་ཐར། རྒྱབ་ཤོག་རྙིང་ཟད་དུ་སོང་ནས་ཡང་བསྐྱར་སྦྱར་ཡོད་པའི་ཧོར་གླིང་གཡུལ་འགྱེད་སྟོད་སྨད། བཙུན་པ་ཚུལ་ཁྲིམས་རིན་ཆེན་གྱིས་བརྩམས་པའི་རིག་གནས་ལྔའི་རྣམ་གཞག་དང་། ཐང་སྟོང་རྒྱལ་པོའི་རྣམ་ཐར་སོགས་དཔེ་ཆ་མགོ་བཙེམས་མ་མང་པོ་ཡོད། སྒམ་ནང་གི་ཅུང་མཐོ་སར་གོང་ནས་བཤད་པའི་ཏིང་འཕགས་བསྐལ་གསུམ་སོགས་དཔེ་ཆ་སྣ་རིང་མའམ་གླེགས་བམ་གྱི་རིགས་སུ་གྱུར་པ་དག་བརྩིགས་ཡོད། མཆོད་སྒམ་ནང་གི་ཟ་ཟུར་ལ་བཟང་དྲུག་དང་། ཤུག་པ་དང་། མཁན་པ་དང་། ལྷ་ས་ནས་ཁྱེར་ཡོང་བའི་མནོལ་བསང་གི་རྫས་སོགས་ཡོད། དེས་ཡིན་ས་རེད། མཆོད་སྒམ་གྱི་གམ་ལ་བཅར་བ་ཙམ་གྱིས་སྣ་ནང་ལ་ཞིམ་དྲི་ཚད་མེད་ཅིག་འཐུལ་རྒྱུ་ཡོད་དཔེ།

འདི་ལྟར་རྗེས་དྲན་བྱས་ནས་ཡོང་ན། དགེ་རྒན་ཁོའི་ཁ་རིས་ངོ་མདོག་སོགས་དེ་རིང་ཡིད་ལ་དེ་ཙམ་མི་ཡོང་མོད། བཤད་པའི་སྐད་ཆ་ལ་ལ་ནམ་ཡང་བརྗེད་རྒྱུ་མི་འདུག ཁོས་ང་ལ“ཁྱོད་ལག་ཆགས་ན་ཡིག་གཟུགས་ཅུང་ཟད་སྦྱོང་དགོས། སུམ་རྟགས་རང་སྦྱོང་བྱོས་དང་། དེ་ནས་རང་མགོ་ཐོན་ན”ཟེར་དཔེ།

ཡང་ཁོ་ལ་སྒམ་ཆུང་ཞིག་ཡོད་པའི་ནང་དུ་ངང་བའི་གསེར་སྒོང་ཟེར་བ་འདྲ་བོ། ལོ་གྱོན་མ་ཟེར་བ་འདྲ་བོ། ཟླ་ཤེལ་ཟེར་བ་འདྲ་བོ། རིལ་དཀར་ཟེར་བ་འདྲ་བོ། དཔའ་རིས་རིལ་དམར་ཟེར་བ་འདྲ་བོ། ན་རོ་སུམ་སྦྱོར་ཟེར་བ་འདྲ་བོ། འབྲུག་རུས་ཟེར་བ་འདྲ་བོ། ཤིང་མངར་ཟེར་བ་འདྲ་བོ་སོགས་སྤྱིར་བཏང་གི་སྨན་རྫས་སྣ་ཚོགས་ཡོད། གྲོང་ཁྱེར་ལ་ཁ་ཐག་རིང་ཞིང་སྨན་པ་ཤིན་ཏུ་དཀོན་པའི་གནས་སྐབས་དེ་སོགས་ལ། ཁོས་ང་ཚོ་ཁྱིམ་མི་ཚོའི་ཆམ་པ་སོགས་ལ་གོང་གི་སྨན་རིགས་སྤྱིར་བཏང་བ་དེ་དག་བཏང་ནས་སངས་དྲག་བྱས་མྱོང་།

ང་རང་ཆུང་བྱིས་པ་ཡིན་དུས་ནས་གཉིད་ཡུལ་མི་བདེ་བ་ཞིག་ཡིན། རྨི་ལམ་འཇིགས་པོས་ནམ་གུང་གློ་བུར་སད་དེ་ཁོག་སྟོད་ཡར་བཀྱགས་ན། ཐོད་པར་རྔུལ་ཆུས་བརླན་ཡོད། སྤོ་བོའམ་དགེ་རྒན་ཁོ་དང་ཁོའི་ཆུང་མ་སྟེ་ངའི་རྨོ་མོ་གཉིས་ངའི་གམ་དུ་ཡོང་སྟེ་མཉམ་གཅིག་ལྟ་བུས“ཀུན་ནས་གོ་ཆ་དགའ་བའི་བརྗིད་ཀྱིས། ། རྩོད་དང་རྨི་ལམ་ངན་པ་སེལ་མ། །”ཞེས་སྒྲོལ་བསྟོད་ཀྱི་མཚམས་ཤིག་ནས་མར་ལ་དང་། གདུགས་ཐུང་སོགས་འདོན་ལ། མཐར་ཟློག་པ་མང་པོ་བྱེད་དཔེ། དེས་ངའི་སེམས་ཁ་གློ་བུར་བདེ་སྟེ་ཡང་བསྐྱར་གཉིད་ལ་འཇུག་ཐུབ། སྐབས་རེར་ཁོས་ང་ལ་བཀའ་བསྒོ་བྱེད་རྒྱུ་རེད། གླེགས་ཤིང་སྲ་མོ་ཅན་གྱི་དཔེ་ཆ་ཞིག་གིས་ངའི་མགོ་ལ་དྲག་ཙམ་གཞུས་ནས་འདོན་པ་འདོན་རྒྱུ་རེད། དེ་དུས་དེས་ཀྱང་ཕན་པ་འདྲ།

རྨོ་མོས་ཁོ་ལ་བརྩི་བཀུར་ཚད་མེད་བྱེད། ཁོའི་ལས་ཀ་ནི་གཙོ་བོ་ཆོས་འདོན་རྒྱུ་དང་མཚམས་ལ་འདུག་རྒྱུ་གཉིས་ཡིན། མཚམས་རེར་ཟ་མ་ལེན་དུ་རྟ་རྐྱང་རྐྱང་ཞིག་ལ་བྱོན་ནས་རྫོང་ཐོག་ལ་འགྲོ་དཔེ་མོད། དེ་དུས་ཚོད་ཐུང་ཐུང་གི་བྱ་བ་ཞིག་ཡིན། ཕྱུགས་འཚོ་སྐྱོང་དང་ལས་གང་ལྕི་གང་དཀའ་སོགས་རྨོ་མོས་འགན་དུ་ལེན། ལྷག་པར་འབྲོག་མོ་ཞིག་གི་འགན་ཁུར་གཙོ་བོ་སྟེ། བཞོ་ཕྱུགས་དཀར་ལས། བཀལ་འཁེལ་ཐགས་འཐག ལྕི་འཕུད་ཐང་ལས་སོགས་ལས་ཀ་ཆ་ཚང་རྨོ་མོས་བྱེད་ཀྱིན་ཡོད་པ་འདྲ།

ལར་ངས་སྤོ་བོ་བཟའ་དཔོན་ཡིན་པའི་ཁྱིམ་ཚང་དེ་དང་པོར་ནི་མི་ལ་རས་པ་ཚང་ལྟ་བུའི་ཕྱུག་པོ་ཞིག་རེད། ལ་ལས་དེ་ནི་ངའི་དགེ་རྒན་དེས་ཁ་ཏོན་དགེ་སྦྱོང་བྱས་པས་རེད་ཟེར་མོད། ངས་བལྟས་ན་གཙོ་བོ་ངའི་རྨོ་མོ་དེའི་བསགས་སྲུང་དང་བདག་གཉེར་ལ་རག་ལས་ཡོད་པ་འདྲ། ས་ཆའི་ཚོད་ཀྱི་རི་དྭགས་ཟེར་བ་ནང་བཞིན་ངེད་ཚང་གི་མགོའི་ཁང་པ། སྣོད་ཅ་ལག ཟས་ཟ་མ། གོས་རྒྱན་ཆ་སོགས་འཕེལ་ཞིང་དར་དྲགས་པ་ཞིག་ཡོད། འབྲོག་པ་རྒད་པོ་ཞིག་གིས་ངའི་དགེ་རྒན་ནམ་སྤོ་བོ་ལ། “ཨ་རོགས། ད་ཁྱེད་ཚང་ནི། བཙན་ལོ་ལམ་ལ་གྲགས། ། ཕྱུགས་ཟླ་ལམ་ལ་འཕེལ། ། ཞེས་པ་ཡོང་འདུག་གཱ”ཞེས་ལབ་པར། ངའི་དགེ་རྒན་དེས་ངོ་གནག་སྟེ་ལན་དུ“རྟག་ཞད་ཡོད་ནི་མ་རེད། ཟིལ་བ་འདྲ་བོ་ཡིན་ནི་རེད”ཟེར་སྐད། དེ་དུས་ངེད་ཚང་ལ་ནད་མེད་དུག་མེད་དང་གཟུགས་བཟང་སྤུས་ཡག་གི་ནོར་ནག་བརྒྱ་གྲངས་ལས་བརྒལ་བ་ཡོད་ཟེར། རྟ་མཆོག་དང་རྒོད་མ་ཡང་མང་སྐད། འོན་ཀྱང་ལུག་ནི་མང་པོ་མེད་པ་འདྲ། ནོར་ཁྱུར་བུད་ནས་བལྟས་ན་ངོ་མ་གཡག་ཆེན་རི་སྣ་འདྲ་འདྲ་ཡོད་དཔེ། ལྷ་གཡག མགོན་རྟ། གནམ་ལུག་སོགས་སྲུང་མར་འཐེན་པ་ཁོ་ནར་ཡང་བཅུ་ཕྲག་གཉིས་ཙམ་ཡོད། དེ་དག་ཟོག་ཡིན་ཡང་ལུས་སྣང་དག་ནས་ཡོད་ཟེར་ཆོག སྤུ་ཁ་གསལ་ཀྱི་ལེ་དང་རྣམ་རིག་གྲིམ་དྭངས་སེ་ཡོད། ལྷག་པར་ལོ་རེ་རེར་སྲུང་ཁ་གསོ་དུས་སུ་ཉམས་ཟིལ་ཆེ་བ་ལ་ཚད་མེད། བསང་ཁྲི་མཐོན་པོ་ཞིག་གི་ཐོག་ལ་མེ་ལྕེ་བང་བ་ཙམ་འབར། ཤུག་དྲི་དང་མར་དྲིས་དཔག་ཚད་ཁྱབ། མེ་ལྕེའི་ཁྲོད་དུ་རྐང་གཏོར་ཟུར་གསུམ་ཟླ་གམ་སོགས་སྣུམ་ཆིལ་ལེར་འཚིག གཏོར་ཤིང་སྟེང་ལ་དྲེག་པ་དང་འབྲི་མོག་བསྐུས་ཡོད་པ་དེ་སོགས་སྐག་སྐག་ཏུ་འབར་ནས་ཁ་བཀད། རྭ་རྩེ་དང་རྔོག་མར་མར་དཀར་བྱུགས་ཡོད་ཅིང་སྲུང་རྟགས་སུ་བལ་དཀར་དར་ཚོན་བཅས་དཔྱངས་ཡོད་པ་ལ་རླུང་གིས་བསྐྱོད་དཔེ། ཟོག་དེ་དག་གི་མགོ་ནས་ཟེ་བ་དང་དེ་ནས་རྔ་མའི་བར་ཆུ་དཀར་ནག་གཉིས་ཀྱིས་བཤལ་དཔེ། བཤལ་མ་ཐག་སྤྲུག་རྡེབ་བྱས་ན་སྲུང་མ་དགའ་བར་ངོས་འཛིན། ངའི་དགེ་རྒན་དེས་ལྷ་འབོད་ཀླུ་སྐུལ་མང་པོ་མི་བྱེད་མོད་ཆོས་སྐྱོང་ལ་སྐྱབས་འཇུག་དང་གཞི་བདག་ལ་གཏད་གཉེར་ཐུང་ཐུང་རེ་བྱས་ན་ཉན་མཁན་ལ་ཤ་ཟིང་སྤུ་ཟིང་ཡོང་དཔེ། བསང་ཕུད་རྗེས་ཕྱག་གཏན་ནས་མི་འཚལ། འཚལ་དུ་ཡང་མི་འཇུག ཁོས་གདེང་དང་ལྡན་པའི་སྒོ་ནས“གཞི་བདག་ལ་སྐྱབས་སུ་འགྲོ་མི་ཉན་གྲོགས་སུ་འགུག་དགོས”ཟེར་ལ་དངོས་གནས་བྲན་ལྟར་འཁྲིད་ཀྱིན་ལོས་ཡོད་འདོད་པ་ཞིག་ཡིན།

འདི་ལྟར་མི་དྲན་དགུ་དྲན་བྱས་ནས་ཡོང་ན་ངས་ངེད་ཚང་ལ་བག་ཧ་རྒྱ་རྒྱ་རྭ་ཅོ་ཟངས་ཐུར་བཞིན་རྣོ་བ་ཞིག་ཡོད་པའང་དྲན་བྱུང་། ཅི་ལ་ཞེ་ན། བག་ཧ་དེ་ཡང་ངའི་དགེ་རྒན་ནམ་སྤོ་བོ་དེས་ཆི་ལེན་ནས་ཉོས་ཡོང་བ་ཞིག་ཡིན། མགོ་རྣ་ཅུང་ཆེ། རྭ་སྦོམ་ཞིང་ཀོར། ཨོལ་བ་ལུགས། ཧར་བརྒྱབ་ན་ཁ་རླངས་དཀར་ཆིལ་ཆིལ་ཡོང་། ཉི་མ་དྲོ་དུས་དྲོ་དུས་དང་ཕྱི་དྲོའི་མཚམས་སྤྲིན་གྱི་འོད་ངོགས་ནས་གད་པའི་ནང་འཕག་ར་བྱེད་པ་དང་རྭ་ཅོ་ས་ནང་ལ་བཙུགས་ནས་ས་ལྷབ་བེ་ལྷུབ་བེ་གནམ་ལ་འཕེན་པ་སོགས་ཧ་ལས་པའི་བརྗིད་པོ་ཡོད་ཡ། ངའི་བག་ཧ་དེ་གཡག་འཛིང་བྱས་ན་ཐུབ་པའི་མཐའ་ཞིག་མེད། ང་ཚོས་ཚུལ་དེ་ལ“སྣ་སྡོད་མི་འདུག”ཟེར་བ་ཡིན། ཡང་འབྲོག་པ་ཚོས་གཡག་འཛིང་བྱས་པར་ཐུག་བརྒྱབ་པ་ཟེར། ང་ཚོ་བྱིས་པ་ཚོས་བག་ཧ་མང་པོ་ཐོད་གཏུགས་ནས་སོང་ན་ངེད་ཚང་གི་བག་ཧ་དེ་ཇེ་ངར་ཇེ་ཐུ་ཇེ་གཏུམ་ཇེ་དྲག་ཡིན་ཡ། རྭ་སྣེ་སྔོ་ཡུག་གེ ཟེ་བ་སྒུར་ལྷང་ངེ་། རྨིག་པ་རྡོ་ནང་ཧྲག་ཧྲག་ཏུ་འདྲུད། ཐུག་བརྒྱབ་ནས་ཁ་སྣ་ནས་ཁྲག་དམར་ཟེད་ཟེད་བབས་ཀྱང་ཕྱི་ནུར་མེད་པ། མིག་རྩ་དམར་ལྷོག་ལྷོག་ཡར་ལྟ་མར་ལྟ་བྱེད་པའི་ངའི་བག་ཧ་འབྲོང་འདྲ་བོ་དེ་ངོ་མས་འཇིགས་ཡ། འོན་ཀྱང་མཐའ་མར་ངའི་བག་ཧ་དེ་གློ་བུར་བའི་ནད་ཅིག་གིས་ཤི་སོང་། སྐབས་དེའི་ང་ལ་མཚོན་ན་བག་ཧ་དེ་ཤི་ཐལ་ཟེར་བ་ལས་འཛམ་གླིང་འཁྲུག་ཆེན་གསུམ་པ་ལང་རྒྱུ་རེད་ཟེར་ན“ཨོ”ཞིག་ཡིན།

རེད་དེ། དར་བའི་མཐའ་མར་རྒུད་པ་ཟེར་བ་དེ་ངོ་མ་རེད། སྐབས་ཤིག་ནས་ངའི་དགེ་རྒན་ནམ་སྤོ་བོ་དེར་ཚ་བོ་འདང་ཆེན་ཞིག་ཡོད་པ་གདོན་གྱིས་བཟུང་བ་ནང་བཞིན་ངེད་ཚང་དང་རྩྭ་ས་རྩོད་དོ། ། གནས་མ་ཡིན་པའི་འཁོན་རྩོད་དྲག་པོ་བསླངས་པས། ངའི་དགེ་རྒན་དེ་བློ་ཕམ་བྱུང་། ངེས་འབྱུང་སྐྱེས། ཁེ་གཞན་ལ་སྟེར་བ་དང་གྱོང་རང་གིས་འཁུར་བའི་བརྟུལ་ཞུགས་དེ་མཐར་ཆགས་སུ་བསྐྱངས། བྱ་རྡོ་ཐོག་ནས་འཕུར་བ་བཞིན་ཡུལ་བྱོལ་དུ་འགྲོ་རྒྱུ་ཐག་བཅད། ངའི་ལྟེ་བའི་མེ་ཏོག་བཅད་སའི་རྩྭ་ར་གསེར་གྱི་མར་ཁུ་འདྲ་བ་དེའང་བསྐྱུར་ཐལ་ལོ། ། ང་དེ་དུས་ལོ་ཆུང་དྲགས་ནས་ཚིག་གཅིག་ལབ་པའི་དབང་ཆ་ཡང་ག་ལ་ཡོད་ཀྱི། མེད་པ་མ་གཏོགས་ཚད་དེར་ལྷུང་མི་སྲིད་དོ། །

ཡུལ་བྱོལ་དུ་སོང་བའི་ལོ་ངན་ཞིག་ལ་ངེད་ཚང་གི་རྟ་ནོར་ལུག་གསུམ་ཡོངས་རྫོགས་ཁངས་ཆགས་དྲག་པོ་ཐེངས་འགའ་ལ་ཁག་བཞག་ནས་ཤི་ཐག་མེད་ཐག་ཆད་སོང་། ཟླ་གཅིག་ཙམ་ལ་མ་ཁྱེར་བའི་ཁངས་ཆགས་དེའི་འོབས་ན་ངེད་ཚང་གི་རྟ་ནོར་ལུག་གསུམ་པོ་ནག་ཐར་རེ་བརྗིད་ཡོ་རེ་ཤི་ཡོད། ཁངས་གསེབ་ནས་དུད་འགྲོ་དེ་དག་གི་རྭ་རྩེ་དང་རྔ་རྔོག་ཙམ་རེ་མཐོང་ཐུབ་སྐད།

རྒུད་ཐོག་རྒུད་བཞག་ཅིག་ལ། སྐབས་དེར་ངའི་རྨོ་མོ་ཡང་སྙིང་ནད་ཀྱིས་སམ་གང་ལྟར་ནད་དྲག་པོ་ཞིག་གིས་བཟུང་ནས་ཚེ་ལས་འདས། མོ་ཚེ་ལས་འདས་ཁར་ངའི་དགེ་རྒན་དེས་མོའི་ཁོག་སྟོད་བསྐྱོར་ནས“འུ་གཉིས་ལྷ་སའི་ཇོ་བོ་རིན་པོ་ཆེ་ལ་མཇལ་བ་དྲན་ནམ། ཇོ་བོ་རིན་པོ་ཆེ་དྲན་པར་གྱིས”ཞེས་ནན་གྱིས་བརྗོད་པ་ངའི་ཡིད་དུ་ད་དུང་གསལ་ལྷང་ངེར་འདུག རྨོ་མོས་ཀྱང་ཕྱིར་ལན་དུ“ངས་གསལ་པོར་དྲན་གྱིན་འདུག”ཟེར་རོ། ། རྨོ་མོ་འཆི་ལ་ཉེ་དུས་ངའི་དགེ་རྒན་དེས་མོའི་ཁ་ལ་སྐྱེ་བདུན་རིལ་བུ་བསྒྲེས་ཐལ། དེའི་སྔོན་ལ་ཇོ་བོའི་ན་བཟའ་སོགས་བདུག་པ་བྱས་ནས་བདུགས་ཐལ།

རྨོ་མོ་འདས་རྗེས་ང་ཚོ་ཁྱིམ་མི་ཚོས་མོ་ལ་དྲིན་ཆེན་མ་ཞེས་འབོད་དགོས་པ་ཡིན། དེ་ནི་འབྲོག་པ་ཚོས་ཤི་བོར་བརྩི་བཀུར་བྱེད་སྟངས་ཤིག་ཡིན། དྲིན་ཆེན་མ་སོང་ནས་ཅང་མ་འགོར་བར་ངའི་དགེ་རྒན་ནམ་སྤོ་བོ་ཡང་ན་ཚ་དྲག་པོ་ཅང་མེད་པར། མངགས་བཅོལ་ཁ་ཆེམས་ཀྱང་མེད་པར། ཞོགས་པ་ཞིག་ལ་བཟང་སྤྱོད་ཚར་འགའ་བཏོན་ནས་ཤི་ཐལ་ལོ། ། སྡེ་མི་ཚོས་འཆི་ཁར་འདས་རྟགས་བཞག་ཐལ་ཟེར་མོད་མི་ཤི་ཁྱིམ་སྟོང་དུ་གྱུར་པས་སྡུག་གི་དེ་འདས་རྟགས་ཡིན་མ་ཡིན་གྱིས་རོ་ལ་རྒྱོབ་ཅིག །

ད་ནི་ང་ཚོ་ཁྱིམ་མི་ཚོས་ཁོ་ལའང་དྲིན་ཆེན་པོ་ཞེས་འབོད་དགོས་པ་ཡིན། དྲིན་ཆེན་པོ་སོང་ཤུལ་དུ་ང་ཚོའི་ལག་སྣེར་རེ་ཞིག་ཁོའི་ཁ་ཏོན་དཔེ་ཆ་མ་གཏོགས་ཅི་ཡང་ལྷག་མི་འདུག་ལ། ཁ་ཏོན་དཔེ་ཆ་ནི་གླེགས་བམ་སྣ་ཐུང་མ་ཞིག་ཡིན། དཔེ་ཐུམ་ཚི་དྲེག་གིས་ཟིན་འདུག ནང་གི་དཔེ་ཤོག་ཕལ་ཆེར་ཡང་ཟད་དྲགས་ཤིང་རྙིང་དྲགས་ནས་ཀློག་ཀྱང་དཀའ་བ་ཆགས་འདུག ཀློག་ཐུབ་པ་མང་ཆེ་བ་ནི་སྒྲོལ་མའི་སྐོར་རེད། བསྙེན་ཡིག་དང་སྒྲུབ་ཐབས་དེ་འདྲ་རྐྱང་རྐྱང་རེད། ཡི་གེ་མེད་པའི་ཤོག་བུ་འགའི་སྟེང་ལ་ཁབ་སྣེས་གཙགས་ནས་རྡེའུ་འབུམ་གྱི་དབྱིབས་འདྲ་བོ་མང་པོ་ཕབ་འདུག དེ་ལ་ཤོག་བུ་ཆུང་ཆུང་རེ་སྦྱར་ནས་ལག་བྲིས་ཀྱིས“བཟང་སྤྱོད་ཁྲི་འགྲུབ”དང“ལྟུང་བཤགས་ཁྲི་འགྲུབ”སོགས་བྲིས་ཡོད་དོ། །

རྗེས་ནས་ག་ལེར་ཤེས་པ་ནི། ངའི་དགེ་རྒན་ནམ་དྲིན་ཆེན་པོ་དེས་མི་གཞན་ལ་ང་རང་བཅོལ་ཡོད་པའི་མ་ཚད། ངའི་ཆེད་དུ་མཁོ་དངོས་བསགས་ཡོད་པ་ནི། དཔེར་ན། འཇམ་ལ་དྲོ་བའི་གོས་ཚར། བརྗིད་ལ་སྲ་བའི་ཕྲུག་ལྭ། ཝ་ཞྭ་ཚུན་ཆད་ལ་ཞྭ་ལུང་ཡང་བཏགས་ནས་འདུག ད་དུང་རྟ་སྒ་གོང་ཆེན། ཡོབ་ཆེན་བཟང་ཤོས། རྨེད་ཐག་ཡག་གྲས་སོགས་འབྲོག་པའི་ཕོ་ཤར་ཞིག་ལ་དགོས་དགོས་མཁོ་མཁོ་ཚང་མ་བསྒྲིགས་ཚར་འདུག ཡིན་ནའང་ང་རང་ལག་ཆགས་རྒྱུ་འགོར་དྲགས་པས། མཁོ་དངོས་དེ་དག་ཀྱང་རིམ་གྱིས་གཞན་ལ་དབང་བར་གྱུར། མི་རྒན་གྱི་བསོགས་པ་ཁྱི་རྒན་གྱི་ཁ་ཟས་ཞེས་པ་ངོ་མ་ཡིན་འདུག་ཨང་།

ངའི་དགེ་རྒན་དེ་སྒྲོལ་མའི་རྣལ་འབྱོར་པ་ཡིན་པས་ངའི་ཨ་མ་དངོས་ཏེ་ཁོའི་བུ་སྐལ་མའི་མིང་ལའང་སྒྲོལ་མ་ཞེས་བཏགས་ཡོད་པ་དང་། ངའི་སྲིང་མོའི་མིང་ལའང་ཏཱ་རེ་བཏགས་ཡོད་པ་སོགས་གཞུག་གཞུག་ནས་ཤེས་པ་ཡིན།

ང་ཚོ་ཁྱིམ་མི་ཚོར་མཚོན་ན་མགོ་ཐོག་གི་ཉི་མ་ལྟ་བུའི་ལོ་ལོན་དེ་གཉིས་ཕྱི་མའི་ཡུལ་ལ་སོང་རྗེས། མ་གཞི་ནས་ངའི་ཨ་མ་ནད་པ་ཡིན་ཁར། ང་དང་སྲིང་མོ་ཚོ་ལོ་ཆུང་དྲགས་པ་སོགས་ཀྱིས་སྡུག་ཅུང་ཟད་མྱངས་པ་ཡིན། ངའི་ཨ་མ་དེས་ཀྱང་ངེད་ཚང་གི་སྤོ་བོ་རྨོ་མོ་ཟེར་ན་འདྲ། ལོ་ལོན་གཡང་རྒན་དེ་གཉིས་ཀྱི་དྲིན་ལ་སྤྱིར་ན་སྐྱིད་ཅུང་ཟད་བརྒྱབ་པ་ཡིན་མོད་མཐར་གཤིན་རྗེའི་ལག་ནས་མ་ཐར།

ཤི་ཐག་སོས་ཐག་ཆོད་པའི་དེ་རིང་ད། ངེད་ཚང་ངམ་ངའི་དགེ་རྒན་ནམ་ངའི་སྤོ་བོའི་ཁྱིམ་ཚང་འདི་གཏན་ཉིལ་དུ་གཏོང་མཁན་གྱི་མི་དེ་དེང་སང་ག་འདྲ་རེད་ཅེས་གཞན་ལ་དྲིས་པ་ཡིན་ཏེ། ཁོ་ཡང་སྔར་ཞིག་ནས་ན་སྡུག་ཐུ་མོ་ཆེ་བཟོད་པར་དཀའ་བ་མྱངས་ནས་ཤི་ཐལ་ཟེར། ད་ངོ་མ“འཁོར་བའི་ཆོས་ལ་གད་མོ་བྲོ”ཟེར་བ་དེ་ལས་དྲན་རྒྱུ་མི་འདུག

ངའི་དགེ་རྒན་ནམ་ངེད་ཚང་གི་དྲིན་ཆེན་པོ་དེ་གསོན་ངོགས་སུ་ཡོད་དུས་ང་རང་ན་ཕྲ་དྲགས་པས་ཁོ་ལ་ཅི་ཡང་འདྲི་ཐུབ་མེད་ལ། བགྲོ་གླེང་སོགས་ལྷག་ཏུ་ཡོང་མྱོང་མེད། ཁོ་ད་ལྟ་ད་དུང་ཡོད་ན་ཅི་མ་རུང་། ཁོས་ཡང་སྙིང་ཅི་ཞིག་བསམས་ཡོད་པ་ཡིན་ནམ། ཁོས་ཆོས་ལུགས་ཞེས་པ་ཚད་ག་འདྲ་ཞིག་ལ་བཞག་ཡོད་ན། འདི་ལྟར་ཕྱིར་དྲན་བྱས་ན་སྐབས་དེའི་དགེ་བོ་ཕལ་ཆེ་བ་དང་མི་འདྲ་བར་ཁོའི་ཡི་གེར་དག་ཆ་འདུག ཁོས་ཤིང་ལ་འབྲི་སྨྱུག་བཟོ་ཞིང་བཟོས་པ་བཞུན་མོ་ཡོད། ཁོས་སྣག་ཚ་བསྒྲུངས་ནས་དབུ་མེད་སྣ་ཚོགས་འབྲི་ཡང་འབྲི།

ཁོ་གསོན་ངོགས་ན་ཡོད་དུས་ཁོས་ང་རང་ཁྲིད་ནས་དགོན་པ་ཞིག་གི་འཆམ་ལ་བལྟ་རུ་འགྲོ་མྱོང་། དགོན་པ་དེ་དགེ་ལུགས་པའི་དགོན་པ་ཞིག་ཡིན་ནའང་ལོ་རྒྱུན་ལ་བཀའ་བརྒྱུད་མི་ལའི་འཆམ་ཞིག་རྩེ་བཞིན་འདུག འཆམ་དེར་རྗེ་བཙུན་དུ་བཅོས་པ་ཞིག་གིས་མགུར་ཤྭ་བ་རང་གྲོལ་སོགས་གསུངས་མདོག་བྱེད། ཨ་ར་དཀར་ནག་ཟེར་བ་ཡིན་ལས་ཆེ། གཉིས་ཀྱིས་ཕན་ཚུན་གྱི་མགོ་ནས་ཤིག་འདྲ་བ་ཞིག་འཐུ་མདོག་བྱེད། ད་དུང་ཐ་གུ་གཉིས་ཟེར་བ་ཞིག་ཡོད། དེ་གཉིས་འཁོར་ལོ་འཁོར་བ་བཞིན་དུ་ཡུན་རིང་ལ་འཁོར་ཐུབ། ཁོག་སྨད་དུ་ཐ་གུ་ཁྲ་བོ་བསྟར་འདུག་ལ་མགྱོགས་མྱུར་གྱིས་འཁོར་ཚེ་ཐ་གུ་དག་དྲང་ཤད་ལེར་འགྲོ་ཞིང་། ཐ་གུ་ཕན་ཚུན་དཀྲི་བ་སོགས་སྤྱིར་བཏང་མི་ཡོང་བ་འདྲ། མ་ཟད་འཁོར་ཡུན་རིང་པོ་ཡིན་པས་བྱིས་པའི་མིག་ལ་མཛེས་ཤིང་འཐད་པ་ཞིག་རེད། ངའི་དགེ་རྒན་ཁོ་འཆམ་དེ་ལ་ཧ་ཅང་དགའ་ཞིང་ཁོ་ཡང་ཆུང་དུས་དགོན་པ་དེ་ནས་ཡིན་ས་རེད། ཁོས་ང་རང་དགོན་པའི་གྲྭ་ཤག་ཅིག་ཏུ་ཁྲིད་ནས་ངེད་གཉིས་ཀྱིས་དགོན་པ་དེའི་སྤྱི་པ་ནས་ཐོན་པའི་འབྲས་ཉོག་ཟོས་པ་ཡིན། འབྲས་ཉོག་ཀྱང་ཞིམ་མོད་ལྷག་ཏུ་འབྲས་ཉོག་ནང་གི་སིལ་དམར་དག་ཞིམ་ཡ། ང་དགེ་རྒན་ཁོ་དང་འགྲོགས་ནས་ཅུང་ཐག་རིང་ཞིག་ལ་སོང་བ་ཐེངས་དེ་ཡིན་པ་འདྲ།

ངས་འདི་ལྟར་དགེ་རྒན་ཁོའི་སྤྱོད་ལམ་ནས་བཟོ་ལྟ། གཤིས་རྒྱུད་ནས་བྱ་སྤྱོད་ཚུན་ཆད་དྲན་གསོ་བྱས་པ་ཡིན་མོད། ངའི་དྲན་ངོགས་སུ་ངོ་མ་མང་པོ་མི་འདུག་ཡ། ཁོའི་ལག་པ་གཉིས་ཀྱི་མཛུབ་མོ་སྐོར་ཞིག་གི་མགོ་བཅད་ཡོད། དེ་ནི་ཁོས་ཆུང་དུས་ཤིག་ལ་གློག་རྫས་ཤིག་སྐམ་གཅུན་བྱས་པས་རྫས་དེ་ཁ་བཀད་ནས་རྨས་སོང་བ་རེད་ཟེར། ཁོ་དུས་དབང་གིས་གྲྭ་པ་ལོག་དགོས་བྱུང་ནའང་། ཁོ་རང་རང་གི་དགོན་པ་དེར་སྙིང་ནས་དགའ་ཞིང་དད་པ་འདྲ་ཞིག་འདུག ཁོས་དགོན་པ་དེའི་གྲྭ་པ་དག་ལའང་རྩིས་ཆེན་པོ་བྱེད། ཁོའི་ཉལ་ཚར་འདོན་མཁན་ཡང་དགོན་པ་དེའི་གྲྭ་པ་ཞིག་ཡིན་དགོས་ཟེར་ལ། ཁོ་འཆི་ཁར་གྲྭ་པ་ཞིག་གི་མིང་ནས་བཟུང་སྟེ“ཉལ་ཚར་འདོན་མཁན་ངེས་པར་དེ་ཡིན་དགོས”ཟེར་བས་གཞུག་ནས་ངའི་ཨ་མ་སོགས་ཀྱིས་ཀྱང་གྲྭ་པ་དེ་བོས་ནས་དེར་ཐར་མདོ་ཞལ་ཕྱེ་རུ་བཅུག་ཡོད་པ་འདྲ།

མི་གཞན་གྱི་རྣམ་ཐར་ལོ་རྒྱུས་སོགས་ལས་ཁོའི་འདྲ་ས་རེ་ཨེ་རྙེད་བལྟས་པ་ཡིན་མོད། ཁོའི་ཉམས་དེ་དང་སྤྱོད་པ་དེ་སྒྲ་སྒྱུར་མར་པ་དང་མཚུངས་མདོག་ཁ་སེ་ཞིག་མེད་དམ་སྙམ། ད་ལྟའི་མི་གསོན་པོ་དག་གི་ཁྲོད་ནས་ཁོའི་ཁ་རི་ངོ་མདོག་ཅིག་བཙལ་དགོས་ན་ནི། སྙན་ངག་པ་ལྗང་བུའི་ཁ་རི་ངོ་མདོག་དེ་རེད་སྙམ། གསལ་པོར་མི་དྲན་མོད་ཕལ་ཆེར་དེ་འདྲ་ཞིག་རེད་འདོད། །

རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།