དོང་ཙེ་མང་ན་དགའ་བའི་ངེས་པ་མེད། །
ནོར་ནི་སེམས་ངལ་རྒྱུ་དང་བདུད་ཀྱི་གྲོགས། །
དངུལ་ཁུག་སྟོངས་པ་ངོ་ཚའི་གནས་མ་ཡིན། །
གང་གཱའི་བྱེ་མས་ཕྱུག་པ་སངས་རྒྱས་ཡིན། །
སྔོ་ལྗང་དཔྱིད་དཔལ་ཡིན་པའི་ངེས་པ་མེད། །
སྡོང་སྐམ་གཅེར་བུ་ལས་ཀྱང་སྙིང་བོ་མཚོན། །
དེ་རིང་བཏང་སྙོམས་སྒོམ་པའི་ཐབས་ཟིན་པས། །
མདུན་གྱི་བདུད་མོ་མཛེས་མར་འགྱུར་བ་མཐོང་། །
གྲགས་པ་ཐོབ་ཀྱང་གོ་གནས་འཕར་ངེས་མེད། །
འདམ་སྐྱེས་རྩྭ་ཕྲན་ཆུང་ཡང་སྐྱེ་སྟོབས་འབར། །
རི་མགོའི་རྩྭ་ལྗང་བསྐམས་ཀྱང་སོས་པར་འགྱུར། །
མི་ཡི་ཡུལ་འདིར་སྐྱིད་སྡུག་རེས་མོས་འཁོར། །
དར་ལ་དྲག་པ་རྟག་པའི་ངེས་པ་མེད། །
བཟང་བཏུང་ངན་ངོན་སྐྱིད་པའི་རྒྱུ་རུ་འགྱུར། །
དྲང་སྲོང་ལ་ནི་ཚེ་ཐུབ་མན་ངག་ཐོབ། །
སྣོད་བཅུད་མཐུན་སྡེབ་བྱེད་མཁས་གྲུབ་པ་ཡིན། །
བག་ཕེབས་གྱུར་ན་ལྷ་ཡིན་ངེས་པ་མེད། །
རྣལ་འབྱོར་ཉིད་ནི་སྒོམ་ལས་བྱུང་བ་ཡིན། །
ཉི་ཟེར་ཚ་ཞིང་འཁྲིས་ཀྱི་རྫིང་བུ་བསིལ། །
ཆུ་སྐྱེས་པད་མ་མཚར་ཞིང་སྙིང་དུ་སྡུག །
1998ལོའི《སྦྲང་ཆར་》དེབ་དང་པོའི་སྟེང་བཀོད།