ཀྲུང་གོ་བོད་ཀྱི་དྲ་བའི་འཕྲིན། སྤྱི་ཚེས13ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་གཉིས་པའི་ཚོགས་འདུ་ཐེངས་ལྔ་པའི་དྲུང་ཡིག་ཁང་གི་གྲོས་གཞི་ཚོ་ཆུང་གིས་ཟུར་གསལ་བྱས་པར། ད་ཐེངས་ཀྱི་ཚོགས་ཆེན་རིང་ཚོགས་ཆེན་གྱི་དྲུང་ཡིག་ཁང་གི་གྲོས་གཞི་ཚོ་ཆུང་ལ་ཁྱོན་འཐུས་མི་ཚོགས་པ་དང་འཐུས་མིས་མིང་མཉམ་འགོད་ཐོག་ནས་བཏོན་པའི་གྲོས་གཞི514འབྱོར་བ་དང་། དེའི་ཁྲོད་ཁྲིམས་འཛུགས་ཐད་ཀྱི་གྲོས་གཞི492ཡོད་པ་དང་ལྟ་སྐུལ་ཐད་ཀྱི་གྲོས་གཞི16ཡོད་པ། དོན་ཚན་གཏན་འབེབས་དང་འབྲེལ་བ་ཡོད་པའི་གྲོས་གཞི6བཅས་ཡོད།
ཤེས་རྟོགས་བྱུང་བར་གཞིགས་ན། འཐུས་མིས་བཏོན་པའི་གྲོས་གཞིའི་ནང་དོན་གཙོ་བོ་ནི་རྒྱལ་ཁབ་ཀྱི་ལྟ་ཞིབ་སྒྲིག་སྲོལ་བསྒྱུར་བཅོས་ཟབ་ཏུ་གཏོང་རྒྱུ་དང་གོང་འཕེལ་གྱི་སྒྲིག་སྲོལ་གསར་པ་འཛུགས་རྒྱུ། བཅའ་ཁྲིམས་སྒྲིག་ལམ་འཐུས་སྒོ་ཚང་དུ་གཏོང་བ། སྤྱི་ཚོགས་རིང་ལུགས་ཀྱི་དམངས་གཙོ་ཆབ་སྲིད་གོང་འཕེལ་གཏོང་རྒྱུ། རིག་གནས་བྱ་གཞག་དང་རིག་གནས་ཐོན་ལས་གོང་འཕེལ་གཏོང་རྒྱུ། དམངས་འཚོ་ལེགས་བཅོས་དང་འགན་ལེན་ཏན་ཏིག་བྱེད་རྒྱུ། སྐྱེ་ཁམས་དཔལ་ཡོན་འཛུགས་རྒྱུར་སྐུལ་འདེད་གཏོང་རྒྱུ་བཅས་རེད། །