ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་ལམ། ཀྲུང་གུང་ཀྲུང་དབྱང་གཞུང་སྒྲུབ་ཐིན་དང་རྒྱལ་སྲིད་སྤྱི་ཁྱབ་གཞུང་སྒྲུབ་ཐིན་གཉིས་ཀྱིས«ཞིང་སྡེའི་མི་སྡོད་ཁོར་ཡུག་ལོ་གསུམ་ལ་དག་ཐེར་བཅོས་སྐྱོང་བྱེད་པའི་འགུལ་སྐྱོད་ཇུས་གཞི»འགྲེམ་སྤེལ་བྱས་པར་མ་ཟད་བརྡ་ཐོ་བཏང་སྟེ་ས་གནས་སོ་སོ་དང་ལས་ཁུངས་སོ་སོས་དོན་དངོས་དང་སྦྲེལ་ནས་ལག་བསྟར་དང་དངོས་འབེབས་བཟང་བོ་བྱེད་དགོས་པའི་རེ་བ་བཏོན།
«ཇུས་གཞིའི»ནང་བསྟན་དོན། ཉིས་སྟོང་ཉི་ཤུ་ལོའི་བར་དུ་ཞིང་སྡེའི་མི་སྡོད་ཁོར་ཡུག་ལེགས་བཅོས་མངོན་གསལ་བྱེད་པ་དང་སྡེ་བའི་ཁོར་ཡུག་དག་གཙང་དང་གོ་རིམ་ལྡན་པར་བསྒྱུར་དགོས་ཟེར།
«ཇུས་གཞིའི»ནང་ད་དུང་ཞིང་སྡེའི་མི་སྡོད་ཁོར་ཡུག་དག་ཐེར་བཅོས་སྐྱོང་བྱེད་པའི་ལས་འགན་གཙོ་བོ་དང་སྡེ་དམངས་ཀྱིས་གཙོ་གཞིའི་ནུས་པ་འདོན་པ། སྲིད་ཇུས་ཀྱི་རྒྱབ་སྐྱོར་ནུས་པ་ཇེ་ཆེར་གཏོང་བ། གོ་རིམ་ལྡན་པའི་སྒོ་ནས་ལག་བསྟར་བྱེད་པ། བྱེད་ཐབས་འགན་སྲུང་སོགས་ཕྱོགས་ཀྱི་བྱ་བའི་ཐད་ལ་བསམ་འཆར་དང་རེ་བ་བཏོན།