ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ཡིས་ཟླ་ལྔ་བའི་ཚེས་སོ་གཅིག་ཉིན་ཁོའི་མགྲིན་ཚབ་པ་བརྒྱུད་དེ་གསལ་སྒྲོག་སྤེལ་ནས། ཨ་ཧྥུའུ་ཧན་གྱི་རྒྱལ་ས་ཁཱ་པོར་ནས་ཉིན་དེར་བྱུང་བའི་འཇིགས་སྐུལ་འཇབ་རྒོལ་དོན་རྐྱེན་ལ་རྒོལ་གཏམ་དྲག་པོ་བཏང་བ་དང་། ངེས་པར་དུ་འཇིགས་སྐུལ་རིང་ལུགས་དང་ཐལ་སྤྱོད་རིང་ལུགས་ལ་ཆམ་ཕབ་གཏོང་བར་ཤུགས་སྣོན་དགོས་པ་ནན་བཤད་བྱས།
གསལ་སྒྲོག་ལས་བཤད་རྒྱུར། མི་སེར་དཀྱུས་མ་གང་འདོད་དུ་འཇབ་རྒོལ་བྱེད་པ་ནི་འགྲོ་མིའི་ཐོབ་ཐང་དང་རྒྱལ་སྤྱིའི་མི་ཆོས་རིང་ལུགས་ཀྱི་བཅའ་ཁྲིམས་ལ་འགལ་ཡོད་པ་དང་། རྒྱུ་མཚན་ཅི་ཞིག་ཡོད་ཀྱང་ཉེས་ཅན་འདག་ཐབས་མེད་ཟེར། འཇབ་རྒོལ་མཁན་དེ་ངེས་པར་དུ་ཁྲིམས་ལ་སྦྱོར་དགོས་ཟེར།
ཀུའུ་ཐི་ལོས་སི་ཡིས་གསལ་སྒྲོག་ནང་འཇབ་རྒོལ་ཁྲོད་ཀྱི་གནོད་ཐེབས་མཁན་དག་གི་ཁྱིམ་མིར་འཚམས་འདྲི་བྱས་པ་དང་། རྨས་མ་དག་སྔ་མོ་ནས་བདེ་ཐང་ཡོང་བའི་སྨོན་འདུན་ཞུས། ཁོས་མཉམ་འབྲེལ་རྒྱལ་ཚོགས་ཀྱིས་ཨ་ཧྥུའུ་ཧན་གྱི་མི་དམངས་དང་སྲིད་གཞུང་ལ་རྒྱབ་སྐྱོར་བྱེད་རྒྱུ་ཡིན་པ་བསྐྱར་སྒྲོག་བྱས།