ཟླ་དྲུག་པའི་ཚེས་བཅུ་གཉིས་ཉིན། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་སྤྱི་ཁྱབ་ལས་འཛིན་པ་ཐེན་ཡེ་ཀྲི་མུས་ཀྱིས་ཝེ་ཡེ་ནཱ་རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་གསར་འགྱུར་སྒྲོག་སྤེལ་ཚོགས་འདུའི་སྟེང་གཏམ་བཤད་སྤེལ།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་སྤྱི་ཁྱབ་ལས་འཛིན་པ་ཐེན་ཡེ་ཀྲི་མུས་ཀྱིས་ཚེས་བཅུ་གཉིས་ཉིན་བསྟན་དོན། ལས་ཁུངས་དེས་ཁྲའོ་ཞན་གྱི་ཉིང་རྡུལ་ནུས་པའི་འཆར་གཞིའི་དབྱེ་ཞིབ་བྱ་བར་ཤུགས་སྣོན་བྱས་ཏེ། གནད་དོན་དེའི་ཐད་ནས་དགོས་ངེས་ཀྱི་ནུས་པ་འདོན་པར་གྲ་སྒྲིག་གང་ལེགས་བྱས་ཡོད་ཟེར།
ཐེན་ཡེ་ཀྲི་མུས་ཀྱིས་ཉིན་དེར་རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱི་གསར་འགྱུར་སྒྲོག་སྤེལ་ཚོགས་འདུའི་སྟེང་བཤད་རྒྱུར། མིག་སྔར་ལས་ཁུངས་དེའི་དཔྱད་ཞིབ་མི་སྣས་ཁྲའོ་ཞན་གྱི་མངའ་ཁོངས་སུ་བྱ་བ་བྱེད་བཞིན་མེད་པས། འཁོར་སྐར་གྱི་པར་རིས་སོགས་ལ་བརྟེན་ནས་ཁྲའོ་ཞན་གྱི་ཉིང་རྡུལ་ནུས་པའི་འཆར་གཞིའི་འཕེལ་རྒྱས་གནས་ཚུལ་ལ་རྒྱུས་ལོན་མི་བྱེད་ཐབས་མེད་ཡིན་པ་དང་། དེ་ལས་ཁྲའོ་ཞན་གྱི་ཉིང་རྡུལ་ནུས་པའི་འཆར་གཞིའི་དབྱེ་ཞིབ་བྱ་བར་ཤུགས་སྣོན་བྱེད་རྒྱུ་ཡིན་ཟེར།
ཐེན་ཡེ་ཀྲི་མུས་ཀྱིས་ཁྲའོ་ཞན་གྱིས་འབྲེལ་ཡོད་གྲོས་ཆོད་ལག་བསྟར་བྱས་ཏེ་རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་བར་མཉམ་ལས་བྱེད་དགོས་པའི་སྐུལ་མ་བཏང་། ཁོས་ད་རུང་བསྟན་དོན། མིག་སྔར་ཁྲའོ་ཞན་གྱིས་གནད་དོན་དེའི་ཐད་ནས་རྣམ་འགྱུར་ལེགས་པོ་བསྟན་པའི་སྣང་ཚུལ་ཅི་ཡང་མཐོང་རྒྱུ་མེད་ཀྱང་། རྒྱལ་སྤྱིའི་རྡུལ་ཕྲན་ནུས་པའི་ལས་ཁུངས་ཀྱིས་གྲ་སྒྲིག་གང་ལེགས་བྱས་ཏེ་དུས་ངེས་མེད་དུ་དགོས་ངེས་ཀྱི་ནུས་པ་འདོན་རྩིས་ཡོད་ཟེར།