ཟླ་བརྒྱད་པའི་ཚེས་སུམ་ཅུའི་ཉིན། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ཡིས་ཅཱ་ཧྲ་ས་ཁུལ་གྱི་པེ་ཐི་ལཱ་ཞི་ཡཱ་མཁར་གྲོང་ནས་བསྡུས་པའི་གསར་འགོད་པའི་སྣེ་ལེན་ཚོགས་འདུའི་སྟེང་གཏམ་བཤད་བཞིན་པ།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལོས་སི་ཡིས་ཟླ་བརྒྱད་པའི་ཚེས་སུམ་ཅུའི་ཉིན་ཅཱ་ཧྲ་ས་ཁུལ་ནས་ནན་གྱིས་བསྟན་དོན། ཅཱ་ཧྲ་ས་ཁུལ་ནི་ཕཱ་ལེ་སི་ཐན་གྱི་འབྲལ་ཐབས་མེད་པའི་ཁག་ཅིག་ཡིན་པ་དང་། ཕཱ་ལེ་སི་ཐན་མི་དམངས་ཀྱིས་མཐུན་སྒྲིལ་གཅིག་གྱུར་བྱེད་དགོས་པའི་འབོད་སྐུལ་བཏང་།
ཀུའུ་ཐི་ལོས་སི་ཡིས་ཉིན་དེར་ཅཱ་ཧྲ་ས་ཁུལ་གྱི་པེ་ཐི་ལཱ་ཞི་ཡཱ་མཁར་གྲོང་ནས་བསྡུས་པའི་གསར་འགོད་པའི་སྣེ་ལེན་ཚོགས་འདུའི་སྟེང་། ཕཱ་ལེ་སི་ཐན་མི་དམངས་ཀྱིས་ཕཱ་ལེ་སི་ཐན་བཅིངས་འགྲོལ་རྩ་འཛུགས་ཀྱིས་གཏན་འབེབས་བྱས་པའི་ཇུས་གཞིའི་འོག་མཐུན་སྒྲིལ་གཅིག་གྱུར་བྱེད་དགོས་པའི་འབོད་སྐུལ་བཏང་བ་དང་། ཕཱ་ལེ་སི་ཐན་ནང་ཁུལ་གྱི་ཁ་བྲལ་དེས་ཕཱ་ལེ་སི་ཐན་ལས་དོན་ལ་གཏོར་བརླག་ཐེབས་སྲིད་པ་ནན་བཤད་བྱས།
ཁོས་ད་རུང་རྒྱལ་ཁབ་གཉིས་ཀྱི་ཇུས་གཞིའི་བཀག་རྒྱ་སེལ་ནས། སྒེར་ཚུགས་ཀྱི་ཕཱ་ལེ་སི་ཐན་རྒྱལ་ཁབ་འཛུགས་པའི་དམིགས་འབེན་མངོན་འགྱུར་བྱེད་པར་སྟབས་བདེ་བསྐྲུན་དགོས་པའི་འབོད་སྐུལ་བཏང་། ཁོས་བཤད་རྒྱུར། དབྱི་སི་རལ་དང་མཉམ་དུ་ཞི་བདེ་དང་བདེ་འཇགས་ལོངས་སུ་སྤྱོད་པའི་ཕཱ་ལེ་སི་ཐན་རྒྱལ་ཁབ་ཅིག་མཐོང་འདོད་ཡོད་པ་དང་། ཡང་བསྐྱར་ཅཱ་ཧྲ་ས་ཁུལ་དུ་འཚམས་འདྲི་བྱེད་པའི་རེ་བ་ཡོད་ཟེར།
ཀུའུ་ཐི་ལོས་སི་ཡིས་ཅཱ་ཧྲ་ས་ཁུལ་གྱི་ཛ་དྲག་ཆེ་བའི་མི་ཆོས་རིང་ལུགས་ཀྱི་ཉམས་ཉེན་ལ་ཡིད་འཕང་བའི་ཚུལ་བསྟན་པ་དང་། རྒྱལ་སྤྱིའི་སྤྱི་ཚོགས་ཀྱིས་ཅཱ་ཧྲ་ས་ཁུལ་ལ་མི་ཆོས་རིང་ལུགས་ཀྱི་རོགས་སྐྱོར་བྱེད་དགོས་པའི་འབོད་སྐུལ་བཏང་བར་མ་ཟད། ས་ཁུལ་དེར་མེ་སྒོར་ས་ཡ་བཞིའི་རོགས་སྐྱོར་མ་དངུལ་འདོན་སྤྲོད་བྱེད་རྒྱུ་ཁྱབ་སྒྲོག་བྱས།
ཀུའུ་ཐི་ལོས་སི་ཡིས་ཉིན་དེར་ཅཱ་ཧྲ་ས་ཁུལ་བྱང་ངོས་ཀྱི་དབྱི་སི་རལ་དང་འབྲེལ་བའི་ཨེ་ལོས་ཙི་ཞིབ་བཤེར་ས་ཚིགས་བརྒྱུད་དེ་ས་ཁུལ་དེར་འཚམས་འདྲི་བྱས་པ་དང་། ས་དེའི་མི་ཆོས་རིང་ལུགས་ཀྱི་གནས་ཚུལ་ལ་རྟོག་ཞིབ་བྱས།
རྒྱུས་ལོན་བྱུང་བ་ལྟར་ན། ཀུའུ་ཐི་ལོས་སི་ཡིས་ཐེངས་འདིའི་འགྲུལ་བཞུད་སྐབས་སུ་མིག་སྔར་ཅཱ་ཧྲ་ས་ཁུལ་དུ་ཚོད་འཛིན་བྱེད་པའི་ཕཱ་ལེ་སི་ཐན་དབྱི་སི་ལན་འགོག་རྒོལ་རྩ་འཛུགས་ཧཱ་མཱ་སིའི་དཔོན་རིགས་ལ་ཐུག་འཕྲད་མ་བྱས་པ་རེད།
ཀུའུ་ཐི་ལོས་སི་ཟླ་བརྒྱད་པའི་ཚེས་ཉེར་བརྒྱད་ཉིན་དབྱི་སི་རལ་དུ་འཚམས་འདྲིར་འབྱོར་བ་དང་། ཚེས་ཉེར་དགུའི་ཉིན་ཅོར་ཏན་གཙང་བོའི་ནུབ་འགྲམ་གྱི་ལཱ་མུའུ་ཨན་ལཱ་གྲོང་ཁྱེར་དུ་འབྱོར་ནས་ཕཱ་ལེ་སི་ཐན་གྱི་ཙུང་ལི་ཧཱ་མུའུ་ཏཱ་ལཱ་དང་ཐུག་འཕྲད་བྱས། དེ་ནི་ཀུའུ་ཐི་ལོས་སི་ཡིས་ད་ལོའི་ཟླ་དང་པོར་མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོའི་འགན་ཁུར་བའི་ཚུན་ལ་ཐོག་དང་པོར་ཕཱ་ལེ་སི་ཐན་དང་དབྱི་སི་རལ་ས་ཁུལ་དུ་འཚམས་འདྲི་བྱས་པ་རེད།