ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་ཀྱི་དྲུང་ཡིག་ཆེན་མོ་ཀུའུ་ཐི་ལེ་སི་ཡིས་ཚེས་བཅུ་གཉིས་ཉིན་བཤད་རྒྱུར། འཛམ་གླིང་ཡོངས་ཀྱི་ཁྱབ་ཁོངས་སུ་ཨེ་ཙི་ནད་འགོག་བཅོས་བྱེད་པར་གྲུབ་འབྲས་ཐོབ་ཡོད་ན་ཡང་། འབྲེལ་ཡོད་འབད་བརྩོན་གྱི་རྒྱུན་ད་དུང་ལྷོད་མི་རུང་ཟེར།
ཀུའུ་ཐི་ལེ་སི་ཡིས་ཉིན་དེར་མཉམ་འབྲེལ་རྒྱལ་ཚོགས་ཚོགས་ཆེན་གྱི་ཨེ་ཙི་ནད་འགོག་བཅོས་དཔྱད་གླེང་ཚོགས་འདུའིི་སྟེང་གཏམ་བཤད་སྤེལ་སྐབས། ཨེ་ཙི་ནད་འགོག་བཅོས་བྱ་བ་དེ་འཛམ་གླིང་ཡོངས་ཀྱི་ཁྱབ་ཁོངས་སུ་བརྟན་བརླིང་ངང་གོང་འཕེལ་བྱུང་བ་དང་། མི་སྔར་ལས་མང་པོར་ཨེ་ཙི་ནད་དུག་གི་ཞིབ་བཤེར་དང་སྨན་བཅོས་ཐོབ་ཐུབ་ཡོད་ལ། མ་བུའི་བར་དུ་ནད་དུག་འགོས་ཚད་ཇེ་ཉུང་དུ་སོང་བ་དང་བསྟུན་ནས། བྱིས་པར་ཨེ་ཙི་ནད་དུག་ཕོག་ཚད་བསྟུད་མར་ཇེ་ཉུང་དུ་སོང་ཡོད་ཅེས་བཤད།
ཡིན་ན་ཡང་ཀུའུ་ཐི་ལེ་སི་ཡིས་ད་དུང་བསྟན་དོན། འཛམ་གླིང་ཡོངས་ཀྱི་ཨེ་ཙི་ནད་འགོག་བཅོས་ཀྱི་འཕེལ་རིམ་དོ་མཉམ་མིན། གཞོན་ནུ་མ་རྣམས་ལ་ཨེ་ཙི་ནད་དུག་ཕོག་ཚད་མཐོ་བ་དང་གནོད་འཚེ་འབྱུང་ཚད་གཞན་ལས་སླ་ཟེར། ཁོས་བྱེད་ཐབས་སྤྱད་དེ་ན་གཞོན་རྣམས་ལ་རང་སྲུང་གི་ནུས་པ་ཡོད་པར་བྱེད་དགོས་པ་དང་། དེའི་ནང་དུ་ལུས་ཁམས་དང་སྐྱེ་འཕེལ་བདེ་ཐང་གི་ཞབས་ཞུ་འདོན་སྤྲོད་བྱེད་པ་དང་། ཨེ་ཙི་ནད་དུག་ཕོག་པའི་ན་གཞོན་རྣམས་ལ་ནད་དུག་གི་སྨན་བཅོས་བྱེད་པ་སོགས་འདུ་ཞེས་བཤད།
ཀུའུ་ཐི་ལེ་སི་ཡིས་བཤད་རྒྱུར། སྔོན་འགོག་ནི་ཨེ་ཙི་ནད་འགོས་མཆེད་ཀྱི་རྒྱུ་ལམ་འགོག་པའི་གནད་འགག་ཡིན་ལ། ཨེ་ཙི་ནད་ནི་རྩ་བ་ནས་མེད་པར་བཏང་ཆོག་པ་ཞིག་ཡིན་པས། འཛམ་གླིང་ཡོངས་ཀྱིས་དེའི་ཐད་ནས་མཉམ་དུ་འབད་བརྩོན་བྱེད་དགོས་ཟེར། །