ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཐུར་ཁེའི་ཕྱི་འབྲེལ་བློན་ཆེན་ཆཱ་ཝུའུ་ཧྲི་ཨོ་ལུའུ་ཡིས་ཚེས་བཅོ་བརྒྱད་ཉིན་བསྟན་དོན། ཐུར་ཁེ་དང་ཨུ་རུ་སི་ཡིས་ཉེ་སྔོན་བཀོད་པའི་གྲོས་མཐུན་ལྟར་དུ། ཐུར་ཁེ་ཕྱོགས་ཀྱིས་སི་རི་ཡཱའི་དབྱི་ཏི་ལེ་པུའུ་ས་ཁུལ་དུ་དམག་དཔུང་ཁ་སྣོན་བྱེད་རྒྱུ་ཡིན་ཟེར།
ཆཱ་ཝུའུ་ཧྲི་ཨོ་ལུའུ་ཡིས་ཉིན་དེར་ཨན་ཁཱ་ལཱ་ནས་འཚམས་འདྲིར་ཡོང་བའི་ཅོར་ཏན་གྱི་དཔོན་པོ་དང་མཉམ་དུ་སྤེལ་བའི་གསར་འགོད་པའི་སྣེ་ལེན་ཚོགས་འདུའི་སྟེང་བཤད་རྒྱུར། ཐུར་ཁེ་དང་ཨུ་རུ་སིའི་གྲོས་མཐུན་ལྟར་དུ། ཐུར་ཁེ་ཡིས་དབྱེ་ཏི་ལེ་པུའུ་ས་ཁུལ་དུ་དམག་དཔུང་ཁ་སྣོན་བྱས་ཏེ། ཨུ་རུ་སིའི་ཕྱོགས་དང་མཉམ་དུ་མཐའ་མཚམས་སྲུང་སྐྱོབ་བྱས་ནས། ས་ཁུལ་དེའི་ད་ལྟའི་གནས་བབ་སྲུང་འཛིན་དང་མི་སེར་དཀྱུས་མ་ཡུལ་གཞན་དུ་འཁྱམ་པར་སྔོན་འགོག་བྱེད་རྒྱུ་ཡིན་ཟེར། ཁོས་བཤད་རྒྱུར། ཐུར་ཁེ་ཡིས་དེའི་སྔོན་དབྱི་ཏི་ལེ་པུའུ་ནས་བཙུགས་པའི་ལྟ་ཞིབ་གནས་བཅུ་གཉིས་སོར་འཇོག་བྱས་ཡོད་པར་མ་ཟད། མི་བསྡད་མེད་པའི་གནམ་གྲུ་བཀོལ་ནས་འཁྲུག་རྩོད་ཕྱོགས་ཁག་གཉིས་བར་གྱི་དམག་དོན་མིན་པའི་ས་ཁུལ་ལ་ལྟ་རྟོག་དོ་དམ་བྱེད་རྒྱུ་ཡིན་ཟེར། །