ཝང་ཅན་ཅུན་གྱིས་མཚོ་སྔོན་ཞིང་ཆེན་དབུལ་སྐྱོར་གསར་སྤེལ་ཅུའུ་ཡི་བྱ་བར་རྟོག་ཞིབ་བྱས།

ཀྲུང་གོ་བོད་ཀྱི་དྲ་བའི་འཕྲིན། ཟླ་གཉིས་པའི་ཚེས་བཅུ་གཅིག་ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཝང་ཅན་ཅུན་ཞིང་ཆེན་དབུལ་སྐྱོར་གསར་སྤེལ་ཅུའུ་རུ་སོང་ནས། དབུལ་སྐྱོར་འཐབ་ཕྱོགས་ཀྱི་ལས་བྱེད་པར་འཚམས་འདྲི་བྱས་པ་དང་། དབུལ་སྐྱོར་མཁྲེགས་གཏོར་གྱི་བྱ་བར་རྟོག་ཞིབ་བྱས། ཁོས་ནན་གྱིས་བསྟན་དོན། ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་ལག་ལེན་མཐར་ཕྱིན་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དབུལ་སྐྱོར་གསར་སྤེལ་བྱ་བའི་སྐོར་གྱི་རྣམ་བཤད་གལ་ཆེན་སློབ་སྦྱོང་དང་རྒྱུས་ལོན་གཏིང་ཟབ་བྱེད་པ། ཀྲུང་དབྱང་གི་དབུལ་སྐྱོར་མཁྲེགས་གཏོར་ཆེད་དོན་སྐོར་ཞིབ་ཐད་ནས་རྙེད་པའི་གནད་དོན་ལ་དག་ཐེར་ལེགས་བཅོས་བྱས་ཏེ། སེམས་ཤུགས་གཅིག་སྒྲིལ་གྱིས་དབུལ་ཐར་མཁྲེགས་གཏོར་ཐད་ཀྱི་རྒྱལ་ཁ་ལེན་དགོས་ཟེར།

རྟོག་ཞིབ་བྱེད་སྐབས། ཝང་ཅན་ཅུན་ཞིང་ཆེན་དབུལ་སྐྱོར་གསར་སྤེལ་ཅུའུ་གཞུང་སྒྲུབ་ཁང་དང་འཆར་འགོད་ནོར་སྲིད་ཁྲུའུ། སྲིད་ཇུས་ཁྲིམས་སྲོལ་ཁྲུའུ་སོགས་སུ་སོང་ནས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ནས་ཞིང་ཆེན་ཡོངས་ཀྱི་དབུལ་ཐར་མཁྲེགས་གཏོར་བྱ་བའི་ལས་གནས་སུ་འབད་འཐབ་བྱེད་བཞིན་པའི་ལས་བཟོ་བར་འཚམས་འདྲི་དང་བཀའ་དྲིན་ཞུས་པ་མ་ཟད། བྱེ་བྲག་གི་བྱ་བའི་ཐད་ནས་ཚང་མ་དང་བརྗེ་རེས་བྱས།

ཞིང་ཆེན་དང་ཡུལ་ཤུལ་ཁུལ། དཔའ་ལུང་རྫོང་དབུལ་སྐྱོར་སྡེ་ཁག་གི་འགན་ཁུར་མི་སྣ། དཔའ་ལུང་རྫོང་བ་ཡན་གྲོང་རྡལ་བུ་རྒྱུད་གོང་མ་སྡེ་བ་སོགས་ཀྱི་ཧྲུའུ་ཅི་དང་པོའི་གཏམ་བཤད་ལ་ཉན་རྗེས། ཝང་ཅན་ཅུན་གྱིས་ཉེ་བའི་ལོ་འདི་འགའི་རིང་མཚོ་སྔོན་ཞིང་ཆེན་གྱི་དབུལ་ཐར་མཁྲེགས་གཏོར་བྱ་བའི་ཐད་ནས་བླངས་པའི་གྲུབ་འབྲས་ལ་ཁས་ལེན་གང་ལེགས་བྱས། ཁོས་བཤད་རྒྱུར། དབུལ་ཐར་མཁྲེགས་གཏོར་ནི་ད་ལོ་དང་སང་ལོའི་ཏང་ཡོངས་ཀྱི་བྱ་བ་གཙོ་བོ་ཡིན་པས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཧ་ཅང་མཐོང་ཆེན་བྱེད་ཀྱིན་ཡོད། རིག་ལམ་གསལ་བོ་བྱས་ནས། དབུལ་ཕོངས་དང་དཀའ་ཁག་གི་འབྲེལ་བར་རྒྱུས་ལོན་ཡང་དག་བྱེད་པ་དང་། ཚུལ་བསྒྱུར་དང་འཕེལ་རྒྱས་ཁྲོད་ཀྱི་དབུལ་ཕོངས་ལ་ལྟ་སྟངས་བཟང་བོ་འཛིན་པ།  ཏང་ཨུ་དང་སྲིད་གཞུང་། ལས་བྱེད་པའི་བརྩོན་སེམས་ཆེར་སྐྱེད་དགོས་པ་མ་ཟད། མང་ཚོགས་དང་ལྷག་པར་དུ་དབུལ་ཕོངས་མང་ཚོགས་ཀྱི་བརྩོན་སེམས་ཆེར་སྐྱེད་དེ། ཏང་ཀྲུང་དབྱང་གིས་ང་ཚོར་སྤྲད་པའ་ལས་འགན་ཡོངས་འགྲུབ་བྱེད་དགོས་ཟེར།

ཝང་ཅན་ཅུན་གྱིས་ནན་གྱིས་བསྟན་དོན། ཀྲུང་དབྱང་དབུལ་ཐར་མཁྲེགས་གཏོར་གྱི་ཆེད་དོན་སྐོར་ཞིབ་ཐད་ནས་མཚོ་སྔོན་ཞིང་ཆེན་ལ་ཕྱོགས་བཞིའི་ཐད་ཀྱི་གནད་དོན་བཅུ་གཉིས་ཕྱིར་ལྡོག་བྱས་པ་དང་། ཞིང་ཆེན་ཏང་ཨུའི་ཚང་འཛོམས་གྲོས་ཚོགས་དང་ཞིང་ཆེན་གྱི་ཚོགས་ཆེན་གཉིས་སྟེང་འབྱོར་འབྲིང་སྤྱི་ཚོགས་ཁྱོན་ཡོངས་ནས་འགྲུབ་པར་བྱེད་པའི་གཏན་ཁེལ་རང་བཞིན་གྱི་རྨང་གཞི་འདིང་རྒྱུ་བཀོད་སྒྲིག་བྱས་པས། ངེས་པར་དུ་མཐོང་ཆེན་བྱེད་པ་དང་། མྱུར་དུ་འགུལ་སྐྱོད་བྱེད་དགོས། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་ནས་གཙོ་འགན་ཁུར་བའི་སྡེ་ཁག རིམ་པ་སོ་སོའི་ལས་བྱེད་པ་ནས་ཧྲུའུ་ཅི་དང་པོ་ཚང་མས་ཏན་ཏན་ཏིག་ཏིག་དང་ནན་ནན་ཏན་ཏན་གྱིས་རང་འགན་བྱ་བ་བཟང་བོར་བསྒྲུབ་དགོས་ཟེར།

ཡན་ཅིན་ཧའེ་དང་ཡུས་ཚོང་ལི་གཉིས་ཀྱིས་མཉམ་དུ་རྟོག་ཞིབ་བྱས། །

རྩོམ་སྒྲིག་པ། རྡོ་རྗེ་བསམ་འགྲུབ།

དཔྱད་མཆན 0 ཡོད།