ཀྲུང་གོ་བོད་ཀྱི་དྲ་བའི་འཕྲིན། ཟླ8ཚེས30ཉིན། ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་སྤམ་རྩེ་རགས་གྲོང་རྡལ་གྱི་ད་ལོར་དགུང་ལོ50ལ་ཕེབས་པའི་ཐོགས་མེད་ནི་གནས་དེ་ནས་ས་སྐྱེས་རྡོ་སྐྱེས་ཀྱི་བོད་རིགས་ཤིག་ཡིན་པ་དང་། ཁོ་མོས་ལོ16ནས་བོད་རིགས་ཀྱི་རྒྱན་གོས་ཇུས་འགོད་ལག་རྩལ་སློབ་སྦྱོང་བྱེད་འགོ་བརྩམས་ཤིང་། ལོ་མང་རིང་ལ་འབད་བརྩོན་བྱས་པ་བརྒྱུད། སྤམ་རྩེ་རགས་ཀྱི་སྐོར་བྲོའི་རྒྱན་གོས་ཚེམ་བཟོ་བྱེད་པར་བརྟེན་ནས་བདེ་ཆེན་ཁུལ་གྱི་མངོན་མིན་རིག་གནས་ཤུལ་བཞག་གི་རྒྱུན་འཛིན་པར་གྱུར་པ་རེད།
2013ལོར་ཐོགས་མེད་ཀྱིས་བོད་རིགས་ཀྱི་སྲོལ་རྒྱུན་ལག་ཤེས་བཟོ་རྩལ་གོས་རྒྱན་ཀུང་སི་ཞིག་བཙུགས་ནས་རང་གི་ལག་རྩལ་རང་གི་བུ་མོ་དང་ལས་བཟོ་བ་ཚོར་བསླབས་པ་རེད། མིག་སྔར། ཀུང་སི་འདི་ཡིས་བཟོས་པའི་བོད་ཀྱི་གོས་རྒྱན་ནི་ཡུན་ནན་དང་། བོད་ལྗོངས། སི་ཁྲོན། མཚོ་སྔོན་སོགས་ས་ཆར་བྲིན་འཚོང་བྱེད་བཞིན་ཡོད་ལ། ད་ལོའི་ལོ་མཇུག་ཏུ་ཐོགས་མེད་ཀྱིས་ད་དུང་རང་གི་ཚེམ་བཟོ་བྱས་པའི་གོས་རྒྱན་ཁྱེར་ནས་བལ་ཡུལ་དུ་འགྲེམས་སྟོན་ལ་ཞུགས་རྒྱུ་རེད། །