མདུན་ཤོག- རིག་གནས་འཚོ་བ།- རིག་གནས་འགྱུར་སྟངས།

གུ་གེ་རྒྱལ་རབས་ཀྱི་གནའ་ཤུལ་སྲུང་སྐྱོང་ཞིག་གསོ་ལས་གཞི་ཡོངས་སུ་མཇུག་རྫོགས།

  ཡོང་ཁུངས། འོད་ཟེར་ཉིན་ཚཊ།    2014-12-11 19:26

    གསར་འགོད་པས་བོད་ལྗོངས་མངའ་རིས་ས་ཁུལ་རྩ་མདའ་རྫོང་རིག་དངོས་ཅུས་ནས་རྒྱུས་ལོན་བྱུང་བ་ལྟར་ན། རྒྱལ་ཡོངས་ཀྱི་རིག་དངོས་སྲུང་སྐྱོང་སྡེ་ཁག་སྐོར་དང་པོ་ལས་ཡ་གྱལ་གཅིག་སྟེ་བོད་ལྗོངས་གུ་གེ་རྒྱལ་རབས་ཀྱི་གནའ་ཤུལ་ལ་ལོ་ངོ་གསུམ་ལྷག་གི་རིང་དུ་གཞི་རྒྱ་ཆེ་བའི་སྲུང་སྐྱོང་ཞིག་གསོ་ལས་གཞི་གཉེར་བ་བརྒྱུད། ཉེ་ཆར་ཡོངས་སུ་ལེགས་འགྲུབ་བྱུང་ཡོད་པ་མ་ཟད། རྒྱལ་ཁབ་རིག་དངོས་ཅུས་ཀྱིས་ཞིབ་བཤེར་ཚོད་ལེན་ཆེད་མཁས་པའི་ཚོ་ཆུང་གིས་ཞིབ་བཤེར་ཚོད་ལེན་མཇུག་རྫོགས་ཡོད་པ་རེད།

    དུས་རབས་བཅུ་བའི་སྔ་རྗེས་སུ་བཞེངས་བསྐྲུན་བྱས་པའི་གུ་གེ་རྒྱལ་རབས་ཀྱི་རྫོང་མཁར་གནའ་ཤུལ་ནི་བོད་ལྗོངས་མངའ་རིས་ས་ཁུལ་རྩ་མདའ་རྫོང་དུ་ཡོད། དེ་ནི་བོད་ལྗོངས་ནུབ་ཕྱོགས་སུ་ཡོད་པའི་གུ་གེ་རྒྱལ་རབས་ཀྱིས་ཤུལ་དུ་བཞག་པའི་གཞི་རྒྱ་ཆེས་ཆེ་བའི་རྫོང་མཁར་གྱི་གནའ་ཤུལ་ཆེན་པོ་ཞིག་ཡིན།

    གུ་གེ་རྒྱལ་རབས་ཀྱི་གནའ་ཤུལ་སྲུང་སྐྱོང་ཞིག་གསོའི་ལས་གཞི་ནི། ༢༠༡༡ ལོའི་ཟླ ༥ བར་དངོས་སུ་གཉེར་འགོ་བརྩམས། བསྡོམས་པས་མ་དངུལ་སྒོར་ཁྲི ༥༧༤༤ བཏང་ཡོད་ལ། དེ་ནི་ད་བར་དུ་གུ་གེ་རྒྱལ་རབས་ཀྱི་གནའ་ཤུལ་དུ་གཉེར་བའི་གཞི་རྒྱ་ཆེས་ཆེ་བའི་སྲུང་སྐྱོང་ཞིག་གསོའི་ལས་གཞི་ཡིན་པ་རེད།

    ལྡེབས་རིས་ཞིག་གསོ་ནི་གུ་གེ་རྒྱལ་རབས་གནའ་ཤུལ་སྲུང་སྐྱོང་ལས་གཞི་ཁྲོད་ཀྱི་ཆེས་གལ་ཆེ་བའི་སྐོར་ཞིག་ཡིན། སྤྱི་ལོའི་དུས་རབས ༡༥ བའི་དུས་དཀྱིལ་དུ་བཞེངས་བའི་གུ་གེ་རྒྱལ་རབས་ཀྱི་ལྡེབས་རིས་ནི། ལོ་རྒྱུས་ཡུན་རིང་ཞིང་རང་བྱུང་གིས་ཤུགས་རྐྱེན་ཐེབས་པས། རྙིང་རུལ་སོགས་ཀྱི་གནད་དོན་མང་པོ་འདུག རྩ་མདའ་རྫོང་རིག་དངོས་ཅུས་ཀྱི་ཅུས་ཀྲང་བློ་བསྟན་གྱིས། ལྡེབས་རིས་ཞིག་གསོ་བྱེད་པའི་བརྒྱུད་རིམ་ཁྲོད་དུ། ཆེད་མཁས་པ་ཚོས་ཐོག་མའི་རྣམ་པ་སོར་འཇོག་བྱེད་པའི་རྩ་དོན་དམ་སྲུང་བྱས་པ་རེད། མིག་སྔའི་བར་དུ། བསྡོམས་པས་ལྡེབས་རིས་རྒྱ་ཁྱོན་སྨི་གྲུ་བཞི་མ་ ༡༢༧༠ ལྷག་ཞིག་གསོ་བྱས་ཡོད་ལ། དེའི་ཁྲོད་དུ་སྒྲོལ་མ་ལྷ་ཁང་དང་དུས་འཁོར་ལྷ་ཁང་། འཇིགས་བྱེད་ལྷ་ཁང་སོགས་འདུས་པ་རེད།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག