མདུན་ཤོག- རིག་གནས།- གསུང་འབུམ།

རོལ་མོའི་བསྟན་བཅོས། སྨོན་ཚིག

ས་སྐྱ་པཎྜི་ཏ་ཀུན་དགའ་རྒྱལ་མཚན།    2015-03-18 20:20

    དེ་ལྟར་ཤེས་བྱ་ཀུན་ལ་སྔོན་སྦྱངས་མཐུས། །འདིར་ནི་བློ་གྲོས་རྣམ་པར་གསལ་ཐོབ་པ། །དཔལ་ལྡན་དགེ་བསྙེན་ཀུན་དགའ་རྒྱལ་མཚན་གྱིས། །གྲོགས་པོ་དགའ་བ་སྤེལ་ཕྱིར་བཀོད་པ་ཡིན། །རང་བློ་ཤེས་བྱ་ཀུན་ལ་མ་སྦྱངས་ན། །ཐམས་ཅད་མཁྱེན་པ་ནམ་མཁའི་མཐའ་ལྟར་རིང༌། །དེ་ལྟར་དགོངས་ནས་རྒྱལ་དང་དེ་སྲས་ཀྱིས། །ཤེས་བྱའི་གནས་ཀུན་སྦྱངས་ཞེས་ལེགས་པར་གསུངས། །གང་དག་མ་འོངས་དུས་ན་འགྲོ་བ་ཡི། །སྒྲོན་མ་ལྷ་མིའི་བླ་མར་བྱའོ་ཞེས། །བརྩོན་པ་དམ་པའི་གནས་ལ་ཁས་འཆེ་བའི། །རྒྱལ་བའི་སྲས་དེས་མཆོག་ཏུ་ཤེས་བྱ་སྦྱང༌། །སྔོན་ཆད་གཞན་གྱི་ཡིད་ལ་མ་ཤར་བ། །འདི་འདྲ་གང་གིས་ཤེས་དེ་བློ་གྲོས་ལྡན། །རྒན་པོ་རྣམས་ཀྱིས་ཡང་ཡང་རྣམ་དཔྱད་པའི། །དོན་དེ་རྟོགས་ཀྱང་དེ་ལ་ངོ་མཚར་མེད། །དེ་ལྟར་གཞན་དོན་ལ་དགྱེས་རྒྱལ་བ་ཡི། །སྲས་ཀྱི་འཇུག་ཡུལ་ཕྱོགས་ཙམ་ཕྱེ་བ་ལས། །བསོད་ནམས་གྲུབ་པ་གང་ཡོད་དེ་ཡིས་བདག། །འགྲོ་ལ་ཕན་མཛད་ཆོས་ཀྱི་རྒྱལ་པོར་ཤོག །

    རིག་པའི་གནས་ཀྱི་བྱེ་བྲག་གསལ་བར་བྱེད་པ་རོལ་མོའི་བསྟན་བཅོས་མདོ་ཙམ་བཤད་པ་ཞེས་བྱ་བ་ཤེས་བྱའི་གནས་ཡོངས་སུ་གྲགས་པ་ཕལ་མོ་ཆེ་བློའི་ཡུལ་དུ་བྱས་པའི་པཎྜི་ཏ་ལོ་གཞོན་ཡང༌བློ་གྲོས་རྒན་པ་ཤཱཀྱའི་དགེ་བསྙེན་ཀུན་དགའ་རྒྱལ་མཚན་གྱིས་རིག་པའི་འབྱུང་གནས་དཔལ་ས་སྐྱའི་དགོན་པར་སྦྱར་བའོ།། །།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག