མདུན་ཤོག- རིག་གནས།- གསུང་འབུམ།

རོལ་མོའི་བསྟན་བཅོས། ལེའུ་སྟེ་དང་པོ།

ས་སྐྱ་པཎྜི་ཏ་ཀུན་དགའ་རྒྱལ་མཚན།    2015-03-18 20:22

    རྒྱལ་བ་རྣམས་ཀྱི་གསུང་གི་རྣམ་འཕྲུལ་ལས། །བྱུང་བའི་རྡོ་རྗེ་དབྱངས་ཅན་ལ་བཏུད་ནས། །རོལ་མོའི་སྦྱོར་བས་གཞན་ལ་ཕན་པ་ཡི། །དྲི་མེད་གཞུང་འདི་བདག་གིས་བཤད་པར་བྱ། །དད་ལྡན་རྣམས་ཀྱི་མཆོད་པ་དང༌། །བཀྲེན་པ་རྣམས་ཀྱི་འཚོ་བ་དང༌། །ཆགས་ཅན་རྣམས་ཀྱི་ཡིད་གཡོ་བ། །དེ་ཀུན་རོལ་མོ་མཁས་ལས་འབྱུང༌། །བློ་ངན་གཟུགས་ཀྱིས་ཕོངས་པའང་རུང༌། །རིགས་ངན་ནོར་དང་བྲལ་ཡང་བླ། །རོལ་མོའི་ཆ་ལ་མཁས་གྱུར་ན༑ ༑ཚོགས་ཀྱི་ནང་ན་རྒྱན་ལྟར་མཛེས། །གང་ན་ཐོད་དང་སྐྲ་གསར་དང༌། །གར་དང་རོལ་མོའི་སྒྲ་ཡོད་པ། །དེ་ན་མྱ་ངན་ཡོད་མིན་པས། །དེས་ན་རོལ་མོ་བསྔགས་པ་ཡིན། །འགའ་ཞིག་འགའ་ལ་མི་མཛེས་ཤིང༌། །ལ་ལ་གཞན་ལ་མཛེས་མ་ཡིན། །མཁས་རྨོངས་སྐྱེས་པ་བུད་མེད་སོགས། །ཀུན་ལ་མཛེས་པ་རོལ་མོ་ཡིན། །དཀོན་མཆོག་མཆོད་ཕྱིར་འདུས་པ་དང༌། །ཕན་ཚུན་བལྟ་ཕྱིར་འདུས་པ་དང༌། །ཕུན་སུམ་ཚོགས་པ་མཐོང་བའི་ཚེ། །མཁས་པས་རོལ་མོ་བརྩམ་པར་བྱ། །ལྷན་ཅིག་སྐྱེས་དང་རྐྱེན་གཞན་ལས། །བྱུང་བའི་རོལ་མོ་གཉིས་སུ་འདོད༑ ༑དེ་དག་རྣམ་པ་ཐ་དད་པའི། །དབྱེ་བས་དཔག་མེད་འགྱུར་བར་བཤད༑ ༑དེ་ལ་ལྷན་ཅིག་སྐྱེས་པ་ཡི། །ང་རོ་རྣམ་པ་བཞི་ཡིན་ཏེ། །འདྲེན་པ་དང་ནི་བཀུག་པ་དང༌། །སྒྱུར་བ་དང་ནི་ལྟཻངས་ཉིད་དོ། །དེ་དག་འདྲེན་པའི་དབྱེ་བ་ཡིས༑ ༑ཐ་དད་འགྱུར་བའང་བཤད་པར་བྱ། །དྲང་པོ་བསྒྲེང་དང་བཀུག་པ་དང༌༑ ༑བསྟོད་དང་སྨད་པའི་ང་རོས་དྲང༌། །ཁུགས་ལ་རྐྱང་དང་བརྩེགས་པ་སྟེ། །དེ་ལ་གཉིས་གསུམ་བཞི་སོགས་སོ། །བསྒྱུར་ལ་མགྲིན་ལྕེ་སྣ་ལྡན་ཏེ། །དེ་ལ་རིང་དང་ཐུང་གཉིས་སྦྱར། །ལྟེངས་ལ་རིང་དང་ཐུང་བ་སྟེ། །དེ་ལ་ཁྱད་པར་ཐོག་མཐའ་རགས། །མདའ་གཞུ་ཡི་ནི་འཕྲུལ་འཁོར་ལྟར། །རང་སྒྲ་རྐྱང་པས་མི་ནུས་ཕྱིར༑ ༑དེ་དག་ཚོགས་པའི་སྦྱོར་བ་ཡིས། །རྣ་བ་བདེ་བར་བྱེད་པ་ཡིན། །དེ་ལ་རྐྱང་པ་མ་འདྲེས་པ། །ཚོགས་པ་སྤེལ་བའི་སྦྱོར་བ་སྟེ། །དེ་ཡང་སྦྱོར་དང་དངོས་གཞི་དང༌། །མཇུག་ལ་གཉིས་གསུམ་བཞི་པོ་སྤེལ། །སོ་སོར་སྤེལ་དང་བསྲེས་སྤེལ་བས། །སྤེལ་བ་དེ་ཡང་གཉིས་སུ་འགྱུར། །སོ་སོར་སྤེལ་བ་ཐ་དད་དེ། །བསྲེས་སྤེལ་ཐ་དད་གཉིས་གཅིག་འགྱུར། །དྲངས་ནས་བཀུག་དང་བཀུག་དྲངས་ལ༑ ༑བསྒྱུར་ལྟེངས་ལྟེངས་བསྒྱུར་སྦྱར་བ་དང༌། །དྲངས་ནས་བསྒྱུར་དང་བསྒྱུར་དྲངས་ལ། །བཀུག་ལྟེངས་ལྟེངས་བཀུག་སྦྱར་བ་དང༌། །དྲངས་ནས་ལྟེངས་དང་ལྟེངས་ནས་དྲངས། །བཀུག་བསྒྱུར་བསྒྱུར་བཀུག་སྦྱར་བ་དང༌། །རང་སྒྲ་རྐྱང་པས་དྲངས་པ་ལ། །གཞན་སྒྲ་བརྩེགས་པ་སྦྱར་བ་དང༌། །རང་ཉིད་ཡོངས་སུ་བརྩེགས་པ་ལ། །གཞན་སྒྲ་རྐྱང་པ་སྦྱར་བ་དང༌། །རང་ཉིད་ཡོངས་སུ་དྲངས་པ་ལ༑ ༑རང་ཉིད་ཡོངས་སུ་སྦྱར་བ་དང༌། །རང་ཉིད་བརྩེགས་པ་དེ་ཉིད་ལས། །བརྩེགས་པའི་དོན་གཞན་སྦྱར་བར་བྱ། །དེ་ལྟར་སྦྱར་བ་དེ་དག་ལའང༌། །རང་ངམ་གཞན་ནམ་བསྲེས་པ་དག །གཉིས་གསུམ་བཞི་སོགས་ཅི་རིགས་པར། །དེ་དག་རྣམས་ཀྱི་རྗེས་སུ་བླང༌། །དེ་ཡང་དབྱེ་ན་རྣམ་གཉིས་ཏེ། །བསྟན་བྱ་མེད་པའི་ང་རོ་དབྱངས། །དབྱངས་དང་ལྡན་པར་འགྱུར་མོད་ཀྱང༌། །དོན་ལྡན་སྟོན་པ་ཚིག་ཡིན་ཏེ། །འདི་ཡང་སོ་སོའམ་སྤེལ་བ་ཡི། །ཚུལ་ལ་ཞིབ་པའི་བློ་ཡིས་དཔྱད། །དབྱངས་ཀྱི་དྲངས་ལ་ཚིག་གིས་དགུག །དབྱངས་ཀྱིས་བསྒྱུར་ལ་ཚིག་གིས་ལྟེངས། །དབྱངས་ཀྱིས་དྲངས་ལ་ཚིག་དྲངས་དང༌། །དབྱངས་ཀྱིས་བཀུག་ལ་ཚིག་བཀུག་དང༌། །དབྱངས་ཀྱིས་བསྒྱུར་ལ་ཚིག་བསྒྱུར་དང༌། །དབྱངས་ཀྱིས་ལྟེངས་ལ་ཚིག་ལྟེངས་དང༌། །དེ་དག་བཟློག་སྟེ་བླང་བའོ། །དེ་ལ་མཚམས་སྦྱོར་དབྱངས་ཉིད་དམ། །ཡང་ན་ཚིག་གིས་སྦྱར་བར་བྱ། །ཡང་ན་མཚམས་སྦྱོར་མེད་པ་རུ། །རང་ཉིད་སྦྱར་ཏེ་བླང་བར་བྱ། །དེ་ཡང་རིམ་དང་ཅིག་ཅར་དང༌། །མྱུར་དང་བུལ་བའི་རྩོལ་བ་དང༌། །བསྒྲིམས་དང་ཀློད་པའི་ང་རོ་དང༌། །བཏེག་པ་དང་ནི་བཅུམ་པ་རྣམས། །ཕོ་མོ་མ་ནིང་འདྲེན་པ་ལ། །རྐྱང་པའམ་སྤེལ་བས་ང་རོ་དྲངས༑ ༑དེ་ལ་ཕོ་སྒྲ་བརྗིད་པ་སྟེ། །མོ་ཡི་སྒྲ་ལ་སྙན་པ་འབྱུང༌། །མ་ནིང་སྒྲ་ནི་བཙུན་པ་ཡིན། །དེ་བཞིན་ཕོ་སྒྲ་གསལ་ལ་ངར། །མོ་ཡི་སྒྲ་ནི་ཕྲ་ཞིང་འདར། །མ་ནིང་འགྱུར་ཞིང་མཉེན་པ་དགོས། །དེ་ལྟར་སྒྲ་སྦྱོར་དེ་དག་ཉིད། །སྦྱོར་བའམ་དངོས་གཞི་མཇུག་རྣམས་ལ། །སོ་སོ་བ་འམ་སྤེལ་བ་ལས། །མེད་ཅེས་མཁས་རྣམས་ངེས་པར་བྱ། །དེ་ལྟའི་དབྱེ་བ་དེ་དག་ཀྱང༌། །འདྲེན་པའི་དུས་སུ་འདྲོངས་པ་དང༌། །བསྒྱུར་ཚེ་འགྱུར་དང་འགུགས་པ་ཡི། །དུས་སུ་ཁུགས་དང་ལྟེེངས་ལ་འཇམ༑ ༑ཐམས་ཅད་དུ་ནི་མཉེན་པ་དང༌། །ཕོ་མོ་ལ་སོགས་སྒྲ་དག་ལ། །རང་སྒྲ་ལེགས་པར་ཕྱིན་པ་དང༌། །ཚིག་གི་དུས་སུ་ཚིག་གསལ་ཞིང༌། །དབྱངས་ལ་དབྱངས་ཉིད་གསལ་བ་དང༌། །དེ་དག་བསྲེས་ཚེ་ལེགས་འདྲེ་ལ། །འདྲེས་ནས་སོ་སོར་གསལ་བའོ། །དབྱངས་མཁན་རྣམས་ཀྱིས་ཐམས་ཅད་དུ། །གང་ལས་འདྲེན་དང་གང་དུ་དགུག །གང་དུ་བསྒྱུར་དང་གང་དུ་ལྟཻེངས། །གང་དུ་འཇོག་དང་གང་གིས་སྦྱོར། །གང་བསྟོད་གང་དུ་སྨད་པར་བྱ། །གང་བསྒྲིམས་གང་དུ་ལྷོད་པར་བྱ། །གང་དུ་དབྱངས་ཡིན་གང་དུ་ཚིག །གང་དུ་མྱུར་དང་གང་དུ་དལ། །གང་ཞིག་ཕོ་སྒྲ་གང་དུ་མོ། །གང་དུ་མ་ནིང་སྒྲ་དྲངས་དང༌། །གང་དུ་བསྲེས་སྤེལ་བྱ་བ་རྣམས༑ ༑ཚིགས་བཅད་རིམ་པ་གང་ལེན་པ། །དེ་ལ་ས་མཚམས་མཁས་པར་བྱ། །དེ་ལྟར་ཤེས་ནས་རྐྱེན་ལ་བརྟག །འདྲེན་པའི་རྐྱེན་དུ་ཨ་ཨ་སོགས། །བསྒྱུར་བའི་རྐྱེན་དུ་ལ་ལོ་སོགས། །བཀུག་པའི་རྐྱེན་དུ་ཨའི་སོགས། །ལྟེངས་པའི་རྐྱེན་དུ་ཨ་ཨ་སོགས། །འདྲེན་པ་ལ་སོགས་དེ་དག་ལ། །རིང་བ་དང་ནི་ཐུང་བ་དང༌། །རྐྱེན་དང་ས་མཚམས་གཅོད་པ་དང༌། །དྲག་ཞན་ལ་སོགས་ངེས་པ་དང༌། །མ་ངེས་པ་ཡང་ཤེས་པར་བྱ། །དེ་ལྟར་ཤེས་ནས་སློབ་མ་ལའང༌། །འདི་དག་འདི་ཡི་གནས་ཡིན་ཞེས། །སོ་སོར་ཕྱེ་ལ་བསླབ་པར་བྱ། །དེ་ལྟར་སོ་སོའི་དབྱངས་ཤེས་ནས། །སྤྱི་ཡི་སྦྱོར་བ་ཉིད་བཤད་བྱ། །མཆོད་དབྱངས་བསྒྱུར་བ་གཙོ་བོ་སྟེ། །གླུ་ལ་འདྲེན་པ་གཙོ་བོ་ཡིན། །རྟོགས་བརྗོད་ལ་ནི་བསྒྱུར་ཐུང་ངོ༌། །རྗེས་སུ་བརྗོད་ལ་བསྒྱུར་འདྲེན་ཐུང༌། །སྤྱིར་ནི་ཀུན་ལ་ཀུན་འཇུག་ཀྱང༌། །འདི་དག་གཙོ་བོར་འདྲེན་པར་མཐོང༌། །དེ་ལྟར་དབྱངས་སྦྱོར་ཤེས་རྣམས་ལ། །མཚོན་པར་བྱེད་པའི་དཔེ་གཞན་བཤད། །མདའ་གཞུ་ལྕགས་ཀྱུ་གཤོལ་མདའ་དང༌། །གདུགས་དང་བསེ་རུ་རྡོ་རྗེ་ནས། །རྦ་རླབས་འཁོར་ལོ་འདྲ་བ་སྟེ། །གང་ཞིག་འདྲེན་པའི་དབྱངས་རྣམས་ལ། །དཔེ་འདི་བདེན་པར་ཁོ་བོས་མཐོང༌། །དེ་ལྟར་བསྡུས་ཏེ་རྒྱས་བཤད་པ། །འདི་ལས་སྤྲོས་པ་གཞན་མེད་དོ། །རྣམ་པར་སྤྲོས་ན་མཐའ་ཡས་ཏེ། །རྣམ་པར་རྟོག་པས་འབྱེད་ཕྱིར་རོ། །དེས་ན་བློ་གྲོས་ལྡན་པ་ཡིས༑ ༑དང་པོར་སློབ་དཔོན་མཁས་བསྟེན་ཏེ། །ཕྱི་ནས་རང་གིས་ལེགས་བརྟགས་ན། །དྲི་ཟའི་དབང་པོ་ལྟ་བུར་འགྱུར། །རོལ་མོའི་བསྟན་བཅོས་ལས་དབྱངས་ཀྱི་ལེའུ་སྟེ་དང་པོའོ།། །།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག