ལོ་ཟླའི་འཁོར་འགྲོས་ཆུ་བོའི་རྒྱུན་ལས་མགྱོགས།།

    སྤྱི་ཚོགས་འཕེལ་འགྱུར་རྟ་ཕོའི་བང་ལས་མྱུར།།

    དུས་རབས་གསར་བའི་དགའ་འཛུམ་སྟོན་པའི་དུས།།

    རྙིང་ཞེན་མཁྲེགས་འཛིན་བྱེད་པ་སུ་ཡི་སྐྱོན།།

    རྒྱུ་ཅན་གོང་དུ་བཀུར་བ་དབུལ་བོའི་སྲོལ།།

    རྒྱུ་མེད་བརྙས་བཅོས་བྱེད་པ་ཕྱུག་པོའི་ལུགས།།

    དབུལ་ཕྱུག་ཁྱད་པར་ཙམ་གྱི་བགོ་སྐལ་ལ།།

    སྲོལ་ངན་འདི་འདྲ་དར་དང་ཁྱབ་པ་ཅི།།

    རྒྱུ་དང་ངོ་སོ་ཙམ་ཞིག་འཐོབ་པའི་ཆེད།།

    རང་གི་ཤ་ལས་མཆེད་པའི་བུ་མོ་རྣམས།།

    བཙན་གྱིས་གནས་ལ་རྫོངས་པའི་ཕ་མ་དག།

    རང་འདུན་གཞན་གྱི་སྡུག་ཏུ་ཅིའི་ཕྱིར་སྦྱར།།

    རྩྭ་ས་ལག་མཐིལ་ཙམ་ཞིག་བདག་འཛིན་སླད།།

    ཕུ་ནུ་ནང་དམེ་བྱེད་པའི་གཡུལ་བཤམས་ཏེ།།

    རང་རིགས་རང་གིས་བརླགས་པའི་བོད་མི་འགས།།

    སྐྱོ་གར་འདི་འདྲ་འཁྲབ་པ་གང་གི་ཆེད།།

    འུར་ཆ་མགོ་རུ་ཡང་ཡང་སྐོར་བཞིན་དུ།།

    དཀར་ནག་ཕྱུགས་རྗེས་འབྲངས་པའི་བྱིས་པ་ཚོས།།

    ལ་ལུང་རི་ན་མི་ཚེ་ཟད་པ་འདི།།

    དབང་ཆེན་སུ་ཡིས་བསྩལ་པའི་ལས་སྐལ་ཡིན།།

    གཡོ་ཁྲམ་ལས་ལ་མཁས་པ་གྲུང་བོར་རློམ།།

    དུ་ཆང་གྲོགས་ལ་བརྩི་བ་མཆོག་ཏུ་འཛིན།།

    གཞན་སེམས་བསླུ་ལ་མཁས་པའི་སྐྱེ་བོ་རྣམས།།

    རྒྱུ་འབྲས་རྒྱ་མ་སེམས་སུ་མ་བཟུང་ངམ།།

    རྒྱང་རིང་མ་ཡུམ་སློབ་གྲྭའི་དགའ་ཚལ་ནས།།

    བྱམས་ལྡན་ཕ་མའི་རེ་ལྟོས་རྒྱང་དུ་བོར།།

    ནམ་རྒྱུན་རྩེད་འཇོར་གཡེང་བའི་སློབ་བུ་ཚོས།།

    ཕ་མའི་གདོང་གི་གཉེར་རིས་མ་བརྩིས་སམ།།

    བོད་སྐད་བཤད་ན་བླུན་པོར་བརྩི་མཁན་མང་།།

    བོད་ཡིག་བཀོལ་སྤྱོད་མཁོ་མེད་སྨྲ་མཁན་མང་།།

    བོད་ལྭ་གྱོན་ན་ངོ་ཚར་སྙམ་མཁན་མང་།།

    རང་ལུས་བོད་ལས་སྤྱུགས་པའི་ཐབས་ཡོད་དམ།།

    ངས་ཁྱོད་ལ་སྙིང་གཏམ་ཞིག་བཤད་རྩིས་ཡོད།

    སྙིང་གཏམ་དེའི་མིང་ལ་ག་ལེ་ག་ལེར་བྱོས་ཟེར།

    ག་ལེ་ག་ལེར་བྱས་ན།

    བོང་བུས་ཀྱང་རྒྱལ་ཁམས་བསྐོར་ཡོང་ཟེར་བ་དེ་ཡིན།

    ངས་ཁྱོད་ལ་སེམས་གཞས་ཤིག་ལེན་རྩིས་ཡོད།

    སེམས་གཞས་དེའི་མིང་ལ་ག་ལེ་ག་ལེར་བྱོས་ཟེར།

    ག་ལེ་ག་ལེར་བྱས་ན།

    རུས་སྦལ་གྱིས་ཀྱང་རྒྱལ་ཁ་ལོན་ཡོང་ཟེར་བ་དེ་ཡིན།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།


འབྲེལ་ཡོད་རྩོམ་ཡིག