ཞིང་གྲོང་ནས་སྐྱེས་ཤིང་ཞིང་གྲོང་ནས་ནར་སོན་པའི་ང་དང་ང་ལྟ་བུར་མཚོན་ན། བག་ཆགས་ཀྱི་དབང་གིས་ཉིན་གཅིག་གི་ཟས་ཐུན་གསུམ་པོའི་ཁྲོད་ཆེས་གལ་ཆེ་བར་བརྩི་བ་ནི་ཞོགས་ཟས་དང་དགོང་ཟས་ཡིན་ལ། དེ་ནི་ངའི་སྙིང་ཉེ་བའི་ཡུལ་མི་ཚོས་དུས་རྒྱུན་འཚོ་བའི་ཁྲོད་ཞོགས་ཟས་འགྲངས་ཐག་ཆོད་པ་ཞིག་མ་ཟོས་ཚེ། ཉིན་གང་བོར་ལས་ཀ་ལས་དགོས་པས་ལུས་སྟོབས་ཀྱིས་མི་ཐེག་པ་དང་། ཟས་ཞིམ་པོ་དགོང་ཟས་ལ་འཇོག་པ་དེ་ཡང་ཉིན་གང་བོར་ལས་ཀས་ཁོམ་ལོང་བྲལ་བས། དགོང་མོ་སེམས་ལྷོད་ལ་བབས་ནས་ཁ་ཟས་གཡོ་བ་དང་བཟའ་བ་སོགས་བྱེད་ཆོག་པས་ལོས་ཡིན་སྙམ་བྱུང་། གང་ལྟར་ཉིན་རྒྱུན་ཞོགས་པར་བཟའ་མི་གང་བོ་ཡར་ལངས་རྗེས།ཨ་མས་བཟའ་མི་གང་བོར་གོ་རེ་སླང་བཙོས་མ་དང་ཞོག་ཁོག་བཙོས་མ། ནས་ཕྱེ་གོ་རེ་སོགས་འཛོམས་ཚོད་ཀྱིས་བཟའ་བཏུང་ཕུན་སུམ་ཚོགས་པ་གཡོས་སྦྱོར་བྱེད་ལ། ཨ་ཅེ་དང་ཨ་སྲུ།ཕུ་བོ་ཆེ་བ་ཚང་མས་ནངས་ལས་ཙག་ཙིག་ལས་ཚར་རྗེས། ང་དང་ཕུ་བོ་ཆུང་བ་གཉིས་ཀྱིས་ཀྱང་དཔེ་ཆ་བློར་སྐྱོར་མཚམས་བཞག་ཅིང་། བཟའ་གོ་ཁ་གང་བོ་ཅོག་ཙེ་གཅིག་ཏུ་རུབ་སྟེ་ནངས་ཇ་འཐུང་བའི་ངང་ཚུལ་དེ་ནམ་རྒྱུན་ངའི་དྲན་པའི་རྩིག་ལྡེབས་ངོས་སུ་ཝ་ལེར་ཝ་ལེར་འཆར་འོང་ཞིང་། དེ་དུས་ཀྱི་ཉིན་རེ་རེར་འགྱུར་བ་ཆེན་པོ་མེད་པའི་གོ་རེ་སླང་བཙོས་མ་ཟ་བ་དང་འོ་ཇ་མངར་མོ་འཐུང་བའི་སྐྱིད་སྣང་དེ་དུས་ད་ལྟ་ཇི་ལྟར་བཙལ་ཡང་རྙེད་རྒྱུ་ཞིག་མ་བྱུང་།

    དུས་ཀྱི་འཁོར་འགྲོས་བར་མེད་དུ་རྒྱུ་བར་བསྟུན། བདག་ཀྱང་སློབ་འབྲིང་ནས་མཐོ་འབྲིང་། མཐོ་འབྲིང་ནས་སློབ་ཆེན་དུ་འགྲིམས་པའི་གོ་སྐབས་སྨིན་པའི་ཁྲོད། ཡུལ་མི་གཉེན་ཉེ་དང་བྲལ་ཏེ་ས་ཐག་རིང་བོར་འགྲིམ་དགོས་བྱུང་ལ། དེ་ནས་བཟུང་ཕ་ཡུལ་གྱི་ནངས་ཇ་ཞིམ་པོ་འཐུང་བའི་གྲངས་ཀ་ཡང་ཇེ་ཉུང་ནས་ཇེ་ཉུང་དུ་སོང་ཞིང་། དེ་ནས་བཟུང་ནངས་ཇ་འཐུང་བའི་རེ་ལྟོས་ཀྱང་ཆུང་དུས་བཞིན་ལྷས་ར་ནས་དཔེ་ཆ་བློར་སྐྱོར་ཞོར་ཨ་མས་ནངས་ཇ་འཐུང་གིན་ཤོག་ཅེས་པའི་འབོད་བརྡ་གཏོང་བར་རེ་ཞིང་བསྒུགས་བསྡད་པ་ཞིག་མིན་པར། སློབ་གྲྭའི་ཇ་ཁང་དུ་འབྲས་ཐུག་དང་སྲན་ཁུ་སོགས་འཐུང་བར་གོམས་ཁུལ་བྱས་ཤིང་། སྐབས་འགར་ཆུ་ཁོལ་ཇ་ཕོར་གང་རེ་འཐུངས་རྗེས་ནངས་ཇའི་ཚབ་བྱས་པ་ཡིན། སློབ་མཐར་ཕྱིན་རྗེས་བྱ་བར་ཞུགས་པ་ནས་རང་ཉིད་ཀྱང་ཁྱིམ་བདག་ཨ་མར་གྱུར་པའི་དུས་དེ་རིང་། དཔལ་འབྱོར་གྱི་འཕེལ་ཁ་དར་ཞིང་འཚོ་བའི་ཆ་རྐྱེན་སྔར་ལས་ལྡབ་འགྱུར་གྱིས་བཟང་ནས་བཟང་དུ་ཕྱིན་པ་མིག་མཐོང་ལག་ཟིན་དུ་ཡོད་ལ། དེ་བཞིན་དུ་རྒྱལ་ཁབ་ཀྱི་ལས་བྱེད་པ་ཞིག་ཡིན་ཚད་ཀྱང་སྔར་ལས་བྲེལ་འཚུབ་ཀྱིས་ཁེངས་པའང་སྨོས་མེད་རེད། དེ་བས། བདག་ཀྱང་དེ་ལས་མ་འདས་པས། ངའི་ཨ་མ་བཞིན་ནངས་སྔ་མོར་ཞོགས་ཟས་གཡོས་སྦྱོར་བྱེད་པ་ཁོ་ནར་བྲེལ་ཁོམ་མེད་ལ། ཡོད་ཀྱང་བཟའ་མི་གང་བོ་མཉམ་དུ་འཛོམས་ནས་ནངས་ཇ་ཞིམ་པོ་ཞིག་ལྷོད་ཀྱིག་གེར་འཐུང་ཁོམ་ག་ལ་ཡོད་དེ། སྐྱ་རེངས་གསལ་མ་ཐག་རང་ཉིད་དང་པོ་བྱས་ནས་ཡར་ལངས་རྗེས་བུ་མོར་སློབ་གྲྭར་འགྲོ་རན་སོང་ཞེས་ཡང་ཡང་འབོད་པ་དང་། ནངས་མོའི་མཆོད་བཤམས་སོགས་བྱས་ཚར་ཏེ་བུ་མོ་དང་མཉམ་དུ་ཚོང་ཁང་ལས་ཉོས་པའི་གོ་རེ་དང་འོ་མ་སོགས་འགན་བབ་ཀྱི་ཚུལ་དུ་འཐུངས་རྗེས། སློབ་ཁྲིད་ཀྱི་རྗེས་ཆོད་དགོས་པ་དང་ལས་ཀའི་རྗེས་སུ་ལུས་མི་རུང་ཞེས་རང་རང་སར་བརྒྱུག་དགོས། སྐབས་འགར་དེ་འདྲའི་སྔ་མོ་ཞིག་ནས་ཟས་ཀྱི་ཡི་གའང་མེད་པས། ནངས་ཇ་འཐུང་བའི་གོམས་སྲོལ་དེ་ཡང་བསྒྱུར་ཏེ་ནངས་ཇའི་དུས་ལ་ནངས་ཇ་མི་འཐུང་བའི་གྲངས་ཀ་ཡང་ཇེ་མང་ནས་ཇེ་མང་དུ་སོང་ཞིང་། རིམ་བཞིན་གོམས་ལོབས་སུ་གྱུར་ཏེ། གྲོད་པ་ལྟོགས་ནས་སྲོན་མི་ཐུབ་པའི་སྐབས་སུ་ད་གཟོད་གོ་རེ་ཉུང་ཙམ་ཟོས་པ་ཡིན། དེ་ལྟར་ལོ་ངོ་ཁ་ཤས་འགོར་བ་ན། ཕོ་བའི་འཇུ་སྟོབས་མི་བཟང་བ་དང་མཁྲིས་རྡོ་ཆགས་པ་སོགས་ནད་ཡམས་ཀྱང་ཇེ་མང་ནས་ཇེ་མང་ཡིན་ལ།སྨན་པར་སྟོན་ཐེངས་རེར་བཟའ་བཏུང་གི་ཐད་ནས་མཉམ་འཇོག་གང་ལེགས་བྱེད་དགོས་ཚུལ་དང་། ནངས་ཇ་དུས་ལྟར་འཐུང་དགོས་པའི་རྒྱུ་མཚན་གང་མང་བཤད་བྱུང་ལ། ནམ་རྒྱུན་ནངས་ཇ་མ་འཐུང་བའི་གནོད་སྐྱོན་དངོས་སུ་མྱོང་བ་དང་ཆབས་ཅིག རང་གི་ཉེ་འཁོར་དུ་མི་གང་མང་ཞིག་གིས་ནངས་ཇ་དུས་ལྟར་འཐུང་གིན་མེད་པ་དང་། རང་ཉིད་སློབ་ཆེན་འགྲིམ་སྐབས་སློབ་གྲོགས་མང་པོ་ཞིག་གིས་ནངས་ཇ་འཐུང་བར་དོ་སྣང་མི་བྱེད་པའི་སྣང་ཚུལ་ཡིད་ལ་འཁོར་འོང་བས། ནངས་ཇ་མི་འཐུང་བའི་གནོད་སྐྱོན་ཆེན་པོ་བཅུ་གཤམ་དུ་བཀོད་པ་ལགས།

    གཅིག ཚོ་གསོག་སླ་བ། ནངས་ཇ་མ་འཐུངས་ཚེ།གུང་ཇ་དང་ནུབ་འཚལ་འཐུང་སྐབས་ཟ་མ་མང་པོ་བཟའ་ངེས་ཤིང་། ལྷག་པར་ནུབ་འཚལ་མང་པོ་འཐུངས་རྗེས། ཕོ་བས་ཟས་འཇུ་ཁོམ་མེད་པར་གཉིད་དུ་ཡུར་ནས་ངལ་གསོ་བ་ཡིན་ལ། དེ་ལྟར་ཡུན་རིང་འགོར་ཚེ་ལུས་ཕུང་དུ་ཞག་ཚིལ་མང་པོ་བསགས་ནས་ཚོ་གསོག་པ་རེད།

    གཉིས།བུད་མེད་ཀྱི་བཞིན་མདངས་ལ་གནོད་པ།

    ནངས་ཇ་མི་འཐུང་བ་ནི་སྐྱེས་པ་ཚོས་དུ་ཆང་བག་མེད་དུ་སྤྱོད་པ་དང་མཚུངས་པར། བུད་མེད་ཀྱི་བཞིན་མདངས་ལ་གནོད་པ་ཆེན་པོ་སྐྱེལ་བ་རེད་ལ། གལ་ཏེ་ནངས་ཇ་མ་འཐུངས་ཚེ། ཁྲག་རྩ་དམའ་བ་དང་འཚོ་བཅུད་ཀྱིས་མི་འདང་བ་སོགས་ནད་རིགས་སྣ་ཚོགས་བསླང་སྲིད་ལ། དེ་ལས་བུད་མེད་ཀྱི་བཞིན་མདངས་སེར་ནག་དང་སྐྱ་བོར་འགྱུར་སྲིད།

    གསུམ།རྒས་སླ་བ། ནངས་ཇ་མ་འཐུངས་ཚེ། མིའི་ལུས་ཁམས་ཀྱིས་ཁོག་ནང་གི་མངར་ཆ་དང་སྤྲི་དཀར་མང་པོར་བརྟེན་དགོས་ལ། དེ་ལྟར་ཡུན་རིང་སོང་ཚེ་སྐྱི་པགས་སྐམ་པོར་འགྱུར་བ་དང་ཁྲག་རྩ་ཇེ་དམའ་རུ་འགྲོ་བ། གཉེར་མ་ཆགས་པ་སོགས་བྱས་ཏེ་སྔ་མོ་ནས་རྒས་འགྲོ་བ་རེད།

    བཞི། རྩ་སྐམ་པ། རྒྱུན་དུ་ནངས་ཇ་མ་འཐུངས་ཚེ། ཕོ་རྒྱུའི་འགུལ་ཚད་རིམ་བཞིན་ཇེ་གཉོམ་དུ་གྱུར་ཏེ།རྩ་སྐམ་སླ་བ་རེད།

    ལྔ། འཚོ་བཅུད་དོ་སྙོམས་མ་ཡོང་བར་ལུས་ཁམས་ཀྱི་འགོག་སྟོབས་ནུས་པ་ཇེ་གཉོམ་དུ་འགྱུར་བ། གལ་ཏེ་ནངས་ཇ་མ་འཐུངས་ཚེ། ལུས་ཁམས་སུ་ཉིན་ཧྲིལ་བོར་མཁོ་བའི་འཚོ་བཅུད་ཀྱིས་མི་འདང་བར་མ་ཟད། སྤྱིར་བཏང་དུ་སྔ་དྲོའི་ཆུ་ཚོད་དགུ་དང་བཅུ་ཡས་མས་སུ་ཕོ་བ་ལྟོགས་ནས་ཕོ་རྒྱུ་འགུལ་སྐྱོད་དྲག་པོ་བྱེད་སྲིད་ལ། དེ་དུས་ཕོ་བའི་རྒྱུ་རྩི་ལ་གནོད་པ་བཟོ་བ་དང་། དེ་ནས་འཇུ་ལམ་ནས་ནད་གཞི་བསླངས་ཏེ་ལུས་ཡོངས་ཀྱི་རིམས་འགོག་ནུས་པ་ཇེ་ཞན་དུ་སོང་བ་ལས་ལུས་ཀྱི་འགོག་སྟོབས་ཀྱང་ཇེ་གཉོམ་དུ་འགྲོ་བ་རེད།

    དྲུག མཁྲིས་རྡོ་ཆགས་པ། གལ་ཏེ་ནངས་ཇ་མ་འཐུངས་ཚེ། ཕོ་བ་སྟོང་ཡང་ཕོ་རྒྱུ་འགུལ་སྐྱོད་བྱེད་པ་དང་།དེ་ནས་དགོང་མོར་ཟགས་ཐོན་བྱུང་བའི་ཕོ་བའི་ཆུ་སྐྱུར་གྱིས་ཕོ་བའི་སྐྱི་མོར་ཕོག་ཐུག་གཏོང་ལ། དེས་ཕོ་རྩིར་གནོད་འཚེ་གཏོང་བར་མ་ཟད། མཁྲིས་སྣོད་ནང་གི་མཁྲིས་ཁུའང་ཕྱིར་ཐོན་མ་ཐུབ་པར་ཡུན་རིང་འགོར་ཚེ། མཁྲིས་རྡོ་ཆགས་པ་རེད་ལ། ཞིབ་འཇུག་བྱས་པ་ལྟར་ན། ལོ་ན20ནས35བར་གྱི་མཁྲིས་རྡོ་ཆགས་པའི་ནད་པའི་ཁྲོད། 80%ནས90%ལ་ནངས་ཇ་མི་འཐུང་བའི་གོམས་སྲོལ་ཆགས་ཡོད་པ་རེད།

    བདུན། འཇུ་ལམ་གྱི་ནད་གཞི་བསླང་བ། གལ་ཏེ་ནངས་ཇ་མ་འཐུངས་ཚེ། ཕོ་བའི་ཆུ་སྐྱུར་དང་མཁྲིས་ཁུ་ཕྱིར་ཕུད་མི་ཐུབ་པ་དང་། དེ་ལྟར་ཡུན་རིང་སོང་ཚེ་ཕོ་བའི་འཇུ་ལམ་ལ་གནོད་འཚེ་བཏང་སྟེ། ཕོ་བའི་གཉན་ཚད་དང་བད་ཀན་སྨུག་པོ། མཁྲིས་རྡོ་ཆགས་པ་སོགས་ཀྱི་ནད་འབྱུང་བ་རེད།

    བརྒྱད། ཀླད་ཤུགས་ལ་གནོད་པ། ཀླད་དབང་འཁོར་སྐྱོད་བྱེད་པར་ཁྲག་རྒྱུན་ཁྲོད་ཀྱི་མངར་ཆར་བརྟེན་དགོས་ཤིང་། གལ་ཏེ་ནངས་ཇ་མ་འཐུངས་ཚེ། ཁྲག་གི་མངར་ཆའི་ཚད་ལྟོས་བཅས་ཀྱིས་ཇེ་དམའ་རུ་འགྲོ་བ་དང་། དེ་ལས་དབང་རྩའི་མ་ལག་ལ་དུས་ཐོག་ཏུ་ཁྲག་མངར་མཁོ་འདོན་བྱེད་མི་ཐུབ་པ་རེད།

    དགུ གཅོང་ནད་འབྱུང་སླ་བ། ནངས་ཇ་མ་འཐུངས་བར་ཕོ་སྟོང་དུ་ལས་ཀར་ཞུགས་ཚེ། ཨོལ་གོང་གཤེར་རྨེན་དང་ཀླད་ཞབས་ཀྱི་འཕང་གཟུགས་སོགས་གཤེར་རྨེན་རིགས་འགུལ་སྐྱོད་བྱས་ཏེ། རྨེན་གཟུགས་ཀྱི་གཟུགས་ནུས་ཚད་བརྒལ་འབྱུང་བར་མ་ཟད།ལུས་གཞི་སྐྱུར་འགྱུར་བྱས་ཏེ་གཅོང་ནད་འབྱུང་སླ་བ་རེད།

    བཅུ། སྙིང་རྩ་འགགས་པའི་ནད་འབྱུང་སླ་བ།གལ་ཏེ་ནངས་ཇ་མ་འཐུངས་པར་ཁོག་སྟོང་དུ་བསྡད་ཚེ། མིའི་ལུས་ཁམས་ཀྱི་ཁྲག་རྒྱུན་ཁྲོད་རིགསBཅན་གྱི་ཁྲག་རྡོག་རིལ་མོའི་སྤྲི་དཀར་མང་པོ་ཆགས་པ་དང་། དེས་ཁྲག་རྒྱུན་སྲ་མོར་ཆགས་ཏེ་སྙིང་རྩ་འགགས་པའི་ནད་བསླང་བ་རེད།།

    མཚོ་སྔོན་བོད་ཡིག་གསར་འགྱུར།པར་ངོས18པ།2015·04·24།   

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།


འབྲེལ་ཡོད་རྩོམ་ཡིག