མདོ་སྔགས་ལམ་བཟང་སྒྲུབ་ལ་བསླབ་བྱ་ཞིག་དགོས་ཀྱང་༎

    གཞན་ཕན་ཁུར་དུ་བླངས་པའི་ངང་ཚུལ་རེ་མཐོང་ན༎

    གསུམ་ལྡན་ངུར་སྨྲིག་པ་རང་བྱེད་པོ་རུ་བསམས་ཏེ༎

    རང་ལ་ཚོགས་བསགས་མེད་ན་ཡི་མུག་རེ་སྐྱེས་འོང་༎

    ཚེ་ལ་འདི་དང་ཕྱི་མའི་སྐྱེ་བ་ཞིག་མཆིས་པས༎

    དེང་གི་སྐུ་སྐྱེ་སྐྱབས་སུ་བསྟེན་པ་རང་བྱུང་མོད༎

    བདེན་ཁ་གསེར་གྱི་ཐག་པས་དམ་པོ་རུ་བསྡམས་རུང་༎

    རྙེད་དཀའི་མི་ལུས་ཟད་ན་རང་སྡུག་དེ་ཚོར་འོང་༎

    ནོར་རྐུན་མི་རྐུན་གཤིན་རྗེའི་ལག་འོག་ཏུ་ཐར་བ༎

    ལྐོག་གྱུར་བསང་མཆོད་ཕུད་དེ་སྐྱབས་ཤིག་ཀྱང་རྙེད་ལ༎

    མངོན་གྱུར་འཆི་བ་མིག་གིས་མཐོང་བ་དེ་བཟོད་ཀྱང་༎

    ཉེས་སྤྱོད་ཆུ་མིག་བརྡོལ་ན་རང་མཚང་ཡང་དྲན་འོང་༎

    བདེ་འགྲོའི་རི་ན་ལྷ་ཡི་དར་ལྕོག་དེ་མ་ཟད༎

    བདེ་བ་ཅན་ན་འདོད་པའི་གཤོག་པ་རེ་ཐོགས་ཀྱང་༎

    གར་འགྲོ་གར་འདུག་རང་ལ་ངེས་གཏན་ནི་དཀོན་ཕྱིར༎

    དམྱལ་བའི་གཏིང་རྡོ་མཐོང་ན་སྡུག་གླུ་རེ་ཤོར་འོངས༎

    སྐྱིད་སྡུག་མི་ཚེ་ལམ་གྱི་འཇའ་ཚོན་ལས་མཛེས་ཤིང་༎

    གདམ་དབང་ཡོད་ཀྱང་གང་བསམ་ཅི་འདོད་རེ་སྐྱེས་མོད༎

    ཐར་ལམ་མེད་ན་ངང་བ་འདམ་ཟུག་ལས་སྡུག་པས༎

    རང་སྡུག་རང་གིས་ཉོས་ཚེ་འཇིགས་པ་རེ་སྐྱེས་འོང་༎

    གཞན་ཕན་འཛུམ་ངོ་ཉི་མའི་འོད་ཟེར་བཞིན་འཕྲོས་ཤིང་།།

    འདི་ཕྱིའི་སྐྱབས་འཇུག་དགོང་ཁའི་མར་མེ་ལྟར་གཟིམས་ན༎

    བསྟན་པའི་སྒོ་རུ་ཚུད་པའི་མགོ་ནག་གི་ཕྲེང་འཛིན༎

    རང་ཉིད་གར་འགྲོ་མེད་ན་ཡི་མུག་ཅིག་འཁོར་འོང་༎

    སྡོམ་གསུམ་ནོར་བུ་རྙེད་དཀའི་གཏེར་ཁ་དེ་ཕྱེས་འདྲ༎

    ཕྱི་བལྟས་ནང་བལྟས་གང་ནས་རིན་ཐང་རེ་ཆེ་བས༎

    ཉེས་ལྟུང་རྙོག་ཆུ་རྡོལ་བའི་ཆུ་མགོ་ཞིག་ཡིན་ན༎

    ནམ་ཞིག་དྭངས་པའི་ཡིད་ཆེས་རྩ་བ་ནས་འགྱིངས་འོང་༎

    ཕྱི་ཕྱིར་འཆང་བའི་ཉམ་ཐག་ཡི་མུག་གིས་སྦངས་ཏེ༎

    ཐར་བ་འདོད་ན་རང་ཉིད་སངས་རྒྱས་སུ་འདོད་ཀྱང་༎

    ཟང་ཟིང་རྒྱུ་མའི་གྲོང་གི་ཆོ་འཕྲུལ་གྱིས་བསླུས་ཚེ༎

    ཅི་བྱས་འཁོར་ལ་སྲེད་ན་སྐྱོ་གར་རེ་འཁྲབ་འོང་༎

    མིག་རྩ་འཁོར་གྱིས་དཀྲོགས་པའི་རྨི་ལམ་གྱི་ཞིང་ན༎

    རང་ཉིད་ཆོག་ཤེས་བསམ་པའི་མི་ལུས་ཀྱི་འདུ་ཤེས༎

    འདི་ཕྱི་གང་དུ་འགྲོ་བའི་དཀའ་ཚེགས་རེ་ཆེ་བས༎

    ཕན་མེད་ཁྱི་སྡུག་བྱུང་ན་རྣམ་སྨིན་རེ་འཁོར་འོང་༎

    དད་པའི་རྒྱུ་ནོར་མཛོད་ཀྱི་ཁང་ཆེན་དུ་བརྫངས་ཤིང་༎

    ཚེ་འདིར་འཇའ་ཚོན་ལས་ཀྱང་མཛེས་པ་ཞིག་ངོམ་མོད༎

    དམ་ཆོས་གང་དགོས་རང་གི་བློ་ཡུལ་དུ་བབས་ཀྱང་༎

    འཆི་ཚེ་ཅམ་གྱིས་བསྐྱུར་ན་སྐྱོ་བ་རང་སྐྱེས་འོང་༎

    བསྟན་པའི་དགོན་ཆེན་ནང་ན་ཉིན་ཞག་དེ་བརྗེ་རུང་༎

    ཆོས་ཀྱི་ཀློག་འདོན་དགོས་འདོད་ཆར་ཆུ་ལྟར་འཇོ་རུང་༎

    ལྟ་ལོག་ངན་པས་ཕུ་དཀྲུགས་མདའ་དཀྲུགས་ལ་གོམས་ཕྱིར༎

    ཆགས་སྡང་རུ་མར་གྱུར་ན་སྙིང་རླུང་ཞིག་ལྡང་འོང་༎

    རྒྱ་ཆེན་གཞུང་ལ་ལྟ་བའི་མིག་ཟུང་དེ་བགྲད་ཚེ༎

    འགྲིག་འདོད་ཆོས་བཤད་རྒྱག་པའི་རྣམ་འགྱུར་རེ་མཐོང་ན༎

    གཡོ་དང་རྫུན་གྱི་ངང་ཚུལ་ཅིག་ཅར་དུ་འཆར་ཡང་༎

    མཆོག་གསུམ་ཐུགས་ཁྲེལ་བྱུང་ན་མིག་ཆུ་རེ་ལྷུང་འོང་༎

    སྙིང་རྗེའི་རང་ཚུགས་འབད་མེད་གང་བསམ་གྱིས་འགྲུབ་ལ༎

    དགེ་སྦྱོར་ཚུགས་ཀས་སྐད་འཇམ་འདོན་པ་དེ་ཚོར་ན༎

    རང་མཁོ་ཕུགས་སུ་བཅུག་པའི་ཧམ་སེམས་ཀྱི་རྣམ་ཤེས༎

    འབྲི་ཆུའི་གཞུང་ལ་བཏབ་པའི་གཟི་ཉམས་རེ་འཆར་འོང་༎

    མི་ཚེ་ཆོས་ལ་བསྐྱལ་བའི་མལ་ས་དེ་བདེ་ཞིང་༎

    སྒྲུབ་པ་ཐུགས་སུ་གཞོལ་བའི་ཉམས་ལེན་ཡང་འཛོམས་མོད༎

    ད་ལྟ་སོས་བདེར་བསྡད་པའི་མི་ཚོགས་ཀྱི་ཁྲོད་ན༎

    འཆི་ཁར་སྡུག་སྨྲེ་ཤོར་ན་ཡི་མུག་རེ་སྐྱེས་འོང་༎

    རྒྱལ་བའི་བཀའ་དང་དམ་པའི་གསུང་རབ་ལ་མཇལ་ན༎

    འཁྲུལ་མེད་རྣམ་དག་ལམ་བཟང་མིག་མདུན་ན་མངོན་ཞིང་༎

    འཁོར་བའི་སྐྱོན་ཡོན་རང་སྒོའི་ཐེམ་པ་ལས་མཐོ་བས༎

    རང་སེམས་རང་ལ་བལྟས་ན་སྐྱུག་མེར་ཅིག་ལང་འོང་༎

    བཅོས་མའི་མེ་ཏོག་འདྲ་ཡང་རང་མཉམ་གྱི་མཆོག་ལ༎

    རང་མགོ་ཐོན་རུང་ལ་ཁའི་ཉི་འོད་བཞིན་འཚེར་ཞིང་༎

    རང་ལ་ལྟ་བའི་མེ་ལོང་གཙང་མ་རུ་ཕྱིས་ཏེ༎

    རང་སྐྱོན་དོར་ནས་མི་ཆོས་རྩ་བ་ལ་འཇུས་ཤིག།

    མཚོ་སྔོན་བོད་ཡིག་གསར་འགྱུར།པར་ངོས18པ།2015·05·15།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།


འབྲེལ་ཡོད་རྩོམ་ཡིག