(པར་ངོས14པར་མཐུད་པ།)རིན་ཁོས་ཁོ་མཐོང་རྗེས“རེམ། མལ་ཁང་གི་སྒོ་ཆེན་རྒྱག་ལ་ཉེ། ཁྱོད་རང་དེ་འདྲ་ཞིག་འགོར་དུ་བཅུག་ནས་ཅི་བྱ། ལྷ་མཚོའི་ཐོག་ན་དེ་འདྲ་མི་ལོན་རྒྱུ་ཞིག་ཡོད་དམ། རེམ། རེམ”ཟེར།

    “མ་རེད། དགོང་མོ་རྒྱུན་དུ་འདི་ལྟར་བྲོས་ནས……

    “ཁྱོད་མལ་ཁང་ནས་འདུག་རྒྱུ་ཡིན་ནམ”ཚེ་འབུམ་གྱིས་ཚེ་རིང་གི་ཚིག་མཚམས་བཅད་ནས་དེ་ལྟར་དྲིས།

    “འོ་ལེ། ཁྱོད་ཀྱིས་མལ་ཁང་ནས་བསྒུགས་ནས་འདུག་རྒྱུ་ཡིན་ནམ”རིན་ཁོས་ཀྱང་དེ་ལྟར་དྲིས།

    “མིན། ང་ཡང་ཁྱོད་གཉིས་ལ་འགྲོགས་ནས་འགྲོ་རྒྱུ་ཡིན།”

    “དེས་ན་རེམ་མ་འགྲོ། དེ་མིན་མལ་ཁང་གི་སྒོ་བརྒྱག་རྒྱུ་རེད།”

    དེ་དུས་མཚན་མོའི་དུས་ཚོད་བཅུ་དང་ཕྱེད་ཀར་སླེབས་ལ་ཉེ། ཁོ་གསུམ་པོ་མལ་ཁང་གི་སྒོར་འབུད་དུས། ཏག་ཏག་སྒོ་སྲུང་གིས་སྒོ་ཆེན་ལ་ཟྭ་བརྒྱབ་ནས་ཁ་ཕྱིར་འཁོར་བ་དང་འཕྲད།

    ཚེ་རིང་གིས་མྱུར་དུ་སྒོ་སྲུང་ལ“ཨ་ཁུ་སྒོ་སྲུང་ལོ་ལོ། ཁྱོད་ཀྱིས་སྒོ་ཕྱེས་དང་། ང་ཚོ་སྒོར་འགྲོ་དགོས”ཞེས་བཤད།

    སྒོ་སྲུང་གིས་ཁོ་ཚོར་ལྟ་ཡག་ཅིག་བྱས་རྗེས་གསར་ཞུགས་སློབ་མ་སྟེ་ལོ་རིམ་དང་པོའི་སློབ་མ་ཡིན་པ་ཤེས་ནས“སྒོར་ཟྭ་བརྒྱབ་ཟིན། ཕྱིར་མལ་ཁང་དུ་སོང་ནས་གཉིད”ཟེར་བཞིན། གམ་དུ་ཡོད་པའི་མལ་ཁང་དོ་དམ་ཁང་དུ་ལོག

    “ཨ་ཁུ་སྒོ་སྲུང་ལོ་ལོ། ང་ཚོའི་སློབ་གྲོགས་ཤིག་ལ་དོན་དག་བྱུང་ནས་སྨན་ཁང་དུ་ཕྱིན་སོང་། ང་ཚོ་ཁོ་བསྲུང་དུ་འགྲོ་དགོས”རིན་ཁོས་མྱུར་དུ་དོ་དམ་ཁང་གི་སྒོ་ཕྱེས་ནས་སྒོ་སྲུང་ལ་ཞུ་བ་བྱས།

    “རྫུན་མ་བཤད། ངོ་མ་ཡིན་ན་ཁྱོད་ཚོའི་འཛིན་བདག་ལ་ཁ་པར་བཏང་ནས་ཁོ་འདིར་ཡོང་དུ་ཆུགས་དང་། ངས་ཁྱོད་ཚོ་འགྲོ་རུ་འཇུག”ཟེར།

    སྒོ་སྲུང་དེ་ནི་རྒད་པོ་ཨུ་ཚུགས་ཅན་ཞིག་རེད།

    སྐབས་དེར། མལ་ཁང་ཐོག་བརྩེགས་ནང་གི་བར་ཁྱམས་དང་སྤྱོད་ཁང་། ཁྲུས་ཁང་བཅས་ཀྱི་གློག་དེ་དག་མ་གཏོགས། མལ་ཁང་སོ་སོའི་གློག་གཟིམས་ནས་མཐོང་ལམ་ཀུན་དེ་མ་ཐག་མག་མོག་ཅིག་ཏུ་གྱུར།

    ཁོ་གསུམ་པོས་མུ་མཐུད་དུ་སྒོ་སྲུང་ལ་ཞུ་བ་ཡང་ཡང་བྱས་ཀྱང་། ཁོས་ཕྱི་རུ་སོང་ན་བདེ་འཇགས་མིན་ཚུལ་བཤད་ནས་སྒོ་མ་ཕྱེས།

    “ནང་ནས་བསྡད་ན་ལྷག་ཏུ་བདེ་འཇགས་མ་རེད་ཡ།”

    “ཁྱོད་ཀྱི་ལག་ལ་འདིའི་ཡན་གྱི་དབང་ཞིག་ཡོད་ཉན་རྒྱུ་མ་རེད།”

    མཇུག་མཐར་ཁོ་ཚོས་དེ་ལྟར་ཚིག་ལན་སྤྲོད་ཀྱིན་ཐབས་ཟད་ནས་ཕྱིར་མལ་ཁང་དུ་ལོག

    ཁོ་ཚོ་ཕྱིར་མལ་ཁང་དུ་སླེབས་པ་དང་། མྱུར་དུ་རང་རང་ས་ནས་མལ་ཐུལ་གྱི་ཁུད་དུ་འཛུལ་ནས་གཉིད་དུ་ཞུགས།

    ཡིན་ན་ཡང་། ཚེ་རིང་གཉིད་མ་ཁུགས།

    རིན་ཁོ་དང་ཚེ་འབུམ་གཉིས་ཀྱང་གཉིད་ཁུག་གིན་མེད་པ་འདྲ་ཡང་། དབུགས་རྨེག་གེར་སྡོད་པ་ལས། ཕན་ཚུན་ལ་ཚིག་གཅིག་ཀྱང་བཤད་མ་བྱུང་།

    ཕལ་ཆེར་དུས་ཚོད་བཅུ་གཅིག་པར་སླེབས་ཙམ་ལ། ཁོ་ཚོས་སྔོན་དཔག་བྱས་པ་ནང་བཞིན། མལ་ཁང་གི་བར་ཁྱམས་ནས་ཆང་འཐུང་འགའི་སྐད་གྲགས་བྱུང་།

    “ཨ་བ་ཨ་མ། ངར་ཁོག་ལ་མི་ཆུད་ནི་ཡོད་ན་སྒོར་ཤོག”

    “ཕ་རོ་ཟོ། ངའི་རལ་གྲི་དེ་སུས་ཁྱེར་སོང་།”

    “སློབ་གྲོགས་ཚོ། དེ་རིང་སྔར་བཞིན་སློབ་གྲོགས་གསར་བ་བསུ་བའི་དགོང་ཚོགས་ཀྱི་རྒྱུན་བསྐྱང་རྒྱུ་ཡིན། ང་ལ་སྒུགས་དང་། དེ་རིང་ངས་སློབ་གྲོགས་འགའ་ལ་བསུ་མ་རྒྱ་ཆེན……”

    ཚེ་རིང་གིས་རྣ་བ་བླགས་ནས་མཉན་པ་ན། མི་སེམས་མཚོ་མོའི་རླབས་བཞིན་སྐྱོམ་པར་བྱེད་པའི་སྐད་སྒྲ་དེ་དང་མཉམ་དུ། སྒོ་ཕྱེས་པའམ་གཏན་པའི་ཁྲོག་སྒྲ་ཞིག་ཀྱང་གྲགས་ཡོང་།

    “སྒོ་གཅིག སྒོ་གཉིས། སྒོ་གསུམ”ཚེ་རིང་གིས་ཁྲོག་སྒྲར་གཞིགས་ནས་སྒོ་རེ་རེ་བཞིན་བརྩི་དུས། སེམས་སུ་འདི་ལྟར་སྙམ། “སྒོའི་ཁྲོག་སྒྲ་ལ་ཉན་ན་ཤར་མཐའི་མལ་ཁང་དེ་ཡིན་པ་འདྲ། དེས་ན་རང་ཉིད་ཀྱི་མལ་ཁང་ནི་ནུབ་མཐའི་མལ་ཁང་གཉིས་པ་ཡིན་པས། ད་རུང་ཐག་ཅུང་ཙམ་རིང་། སུམ་ཐོག་འདི་རུ་ལོ་རིམ་དང་པོའི་མལ་ཁང་བཅུ་ཐམ་པ་ཡོད། དེ་དག་ནི་སྲིབ་ངོས་སུ་ལོ་རིམ་གཉིས་པའི་མལ་ཁང་འགས་བར་བཅད་ཡོད་པ་མ་གཏོགས། བསྟར་མར་ཡོད། ཡིན་ཡང་ད་ནི…… སྒོ་བཞི། སྒོ་ལྔ། ཐོན་ཐལ། དོ་ནུབ་ནམ་རྒྱུན་ལས་ཀྱང་མགྱོགས་པ་འདི་ཅི་ཡིན་ནམ། ཚང་མ་བྲོས་སོང་བ་ཡིན་ནམ། ད་ནི་མ་འགྲིག དོ་ནུབ་ཀྱང་རང་མགོར་ལྷུང་རྒྱུ་རེད། ཐེངས་སྔོན་མར་རྐང་བཅག་འགའ་ལས་ཆེན་པོ་ཞིག་མ་བྱས་ཀྱང་། དོ་ནུབ། གཟའ་འཁོར་སྔོན་མའི་གཟའ་སྤེན་པའི་མཚན་མོར་འཛིན་གྲྭ་དང་པོའི་སློབ་གྲོགས་ཤིག་ལ་གཅར་ནས་སྨན་ཁང་དུ་བསྐྱལ་སོང་ཟེར་བ་མིན་ནམ། དེའི་སྔོན་མའི་གཟའ་སྤེན་པར་མལ་ཁང་ཞིག་གི་སློབ་གྲོགས་ཚོས་སྒོ་མ་ཕྱེས་པར་མི་དྲེད་རྒྱལ་པོ་སོགས་ཀྱིས་སྒོར་རྡོག་ཐོས་དང་ཤང་ལང་། མགོ་སྐོར། ལྕག་དབྱུག་སོགས་ཀྱིས་བརྒྱབ་སྟེ་སྒོ་ངོས་ཀྱི་ཤིང་ལེབ་གཉིས་ཀ་བཅགས་ནས་ནང་ལ་འཕང་སོང་བར་མ་ཟད། མལ་ཁང་དེའི་ནང་དུ་སློབ་གྲོགས་ལྔ་ཡོད་པ་རྣམས་ལ་ཡུན་རིང་གཅར་རྡུང་བྱས་ནས་གཅིག་གི་མིག་ཀོང་སྔོ་ནག་ཏུ་བཏང་སྟེ་ད་ལྟ་ད་རུང་མིག་ཤེལ་ནག་པོ་ཞིག་གྱོན་འདུག གཞན་ཞིག་གིས་ཚིག་ལན་ཞིག་བཏབ་པས་མི་དྲེད་རྒྱལ་པོས་སློབ་གྲོགས་དེ་མལ་ཁྲིའི་སྟེང་མ་ནས་མར་དྲུད་དེ་ཐང་ལ་བརྒྱབ་ཅིང་རྡོག་ཐོས་གཞུས་ནས་ལུས་ཡོངས་རྨ་ཁས་གང་བར་བྱས་འདུག་ཟེར། དེར་མ་ཟད། སྒོ་དྲུག་པ། ད་མ་འགྲིག་ཐལ། ཐོན་དང་ཐལ། མལ་ཁྲིའི་འོག་ཏུ་འཛུལ་དགོས་པ་མིན་ནམ། ཡང་ན་སྒོའི་ལྟག་གར། སྒོའི་ལྟག་གར་འཛུལ་ན་ཤེས་རྒྱུ་རེད། མལ་ཁྲིའི་འོག་ཏུ་འཛུལ་ན་ངོ་རེ་ཚ། ད་ནི་ཅི་བྱུང་ན་བྱུང་། གཉོམ་ཆུང་འདུག་ཤེས་ན། བཙན་པོས་བསྒུལ་མི་ཐུབ། མགོ་ལག་པས་སྐྱོར་ན་རྒྱག་ནི་མེད་ཟེར་བ་མིན་ནམ། ཡིན་ན་ཡང་། གཏམ་དཔེ་དེ་གཉིས་ནི་དངོས་ནས…… ཧུ་ཧུ། སྲིད་པའི་གཏམ་དཔེ་ལ་ཡང་མི་བདེན་པ་ཡོད་འདུག ཤུ་རེ་ཁོ། གོ་ཐོས་ལ་སློབ་གྲོགས་གསར་བ་བསུ་བའི་དགོང་ཚོགས་ཟེར་བ་འདི་ལོ་རིམ་གཉིས་པར་འབུད་རག་བར་དུ་མགོར་ཡོང་དགོས་ཟེར། གཞུག་མའི་སློབ་གྲོགས་གསར་བ་སླེབས་རག་བར་དུ་ད་རུང་སློབ་སྐབས་གཅིག་དང་ཕྱེད་ཀ་ཡོད་པས། ད་ནི་ཅི་ཞིག་བྱ་ཨང་། སློབ་གྲྭ་མ་གྲོལ་བར་ཡུལ་ལ་ལོག་ན་དངོས་ནས་ཕངས་སེམས་ཆེ། ཤུ…… ང་འདི་སྙིང་ཆུང་བ་ལ། སློབ་གྲྭ་མ་གྲོལ་ན་ཕ་མའི་རེ་བ་ཆུད་ཟོས་སུ་བཏང་བ་མིན་ནམ། དོ་ནུབ་ལྷ་མཚོས་རང་ལ་ཁས་ལེན་བྱས་ཡོད་རྒྱུ་ན་མགོར་འདི་ཡོང་མི་དགོས་པ་རེད། ཡང་སྒོ་ཞིག་བརྒྱབ་ཐལ། སྒོ་དུ་བ་ཡིན་ནམ། དྲུག་པ་རེད། མལ་ཁང་ཞིག་ནས་དོན་དག་བྱུང་དང་རྒྱུ་ན་ཅི་མ་རུང་། དཀོན་མཆོག་གསུམ་པོས་མཁྱེན། ཨ་མྱེས་ལྷ་རིས་མཁྱེན། ཡུལ་ལྷ་གཞི་བདག་གིས་མཁྱེན། དཔལ་ལྡན་ལྷ་མོས་མཁྱེན། དོ་ནུབ་ང་ཚོའི་མལ་ཁང་དུ་མི་ཡོང་བའི་སྨོན་ལམ། མལ་ཁང་དྲུག་པའི་སྒོ་ཡང་བརྒྱབ་དང་ཐལ། གནའ་ཤི་བོ། འོ། མ་རེད། རྡུང་རེས་བརྒྱབ་དང་ཐལ། ཨ…… ཧ་ཧ། ད་འགྲིག་ཐལ། དཔའ་རྒོད་ཀན་སུ་ཡིན་ནམ…… མལ་ཁང་དྲུག་པའི་ནང་དུ་སུ་ཡོད་དམ། ཨ་སུ་ཡིན་ན་ཡིན། དོ་ནུབ་རང་ཉིད་ཐར་སོང་ནི་རེད……”

    “ཤུ་རེ་བྱས་ནས་རྡུང་རེས་རྒྱོབས། མི་དྲེད་རྒྱལ་པོ་སོད་ལ་ཐོངས། ཆར་རླུང་དྲག་པོ་སྔར་ལས་ཀྱང་ཤུགས་ཀྱིས་གཡུག་རོགས།”

    སྐབས་དེར་ཚེ་རིང་གིས་རིན་ཁོས་སྐད་དམའ་མོས་དེ་ལྟར་བཤད་པ་ཐོས།

    “ཁྱོད་ཀྱང་གཉིད་མེད་དམ”ཚེ་རིང་གིས་མྱུར་དུ་དེ་ལྟར་དྲིས།

    “སུ་ཞིག་གཉིད་ཐུབ” རིན་ཁོས་དེ་ལྟར་ལན་བཏབ།

    “སློབ་གྲོགས་ལས་ངན་ཀན་སུ་ཡིན་ནམ།”

    “སུ་ཡིན་ན་ཡིན། སྟབས་ལེགས་ནས་དོ་ནུབ་བསུ་མ་བྱ་མ་དགོས་ནི་རེད། ཤུ…… ད་གཉིད། གཟའ་འཁོར་རྗེས་མར་སྔ་མོ་ནས་འབྲོ་དགོས་རྒྱུ་རེད”

    “……”

    ཁོ་གཉིས་ཀྱིས་ཁ་བརྡ་བྱེད་དུས། ཚེ་འབུམ་གྱིས་ཚིག་གཅིག་ཀྱང་མ་བཤད། ཡིན་ན་ཡང་། ཚེ་རིང་གིས་ཡར་སྔོན་རྣ་བ་བླགས་ཏེ་ཉན་དུས་ཁོའི་སྔུར་སྒྲ་ཐོས་མ་བྱུང་། ཚེ་འབུམ་གྱི་སྔུར་སྒྲ་ནི་མིང་དུ་གྲགས་ཡོད་པ་ཞིག་ཡིན། ནམ་རྒྱུན་ཡིན་ན་མལ་ཁང་གཅིག་པའི་སློབ་གྲོགས་རྣམས་ཀྱིས་ཚེ་འབུམ་གྱི་སྔུར་སྒྲ་གྲགས་ན་གཉིད་མི་ཁུགས་པར། ཁོ་ཆེས་རྗེས་མ་བྱས་ནས་གཉིད་དུ་འཇུག་ཅིང་། ཁོ་སྔོན་ལ་གཉིད་ན་དཔེ་དེབ་དང་སྔས་མགོ་སོགས་ཀྱིས་བརྒྱབ་ནས་གཉིད་ལས་སློང་གིན་ཡོད། ཡིན་ན་ཡང་། ཚེ་འབུམ་གྱིས་ཚིག་གཅིག་ཀྱང་མ་བཤད།(མུ་འགོད།)

    མཚོ་སྔོན་བོད་ཡིག་གསར་འགྱུར།པར་ངོས15པ།2015·08·14།

རྩོམ་སྒྲིག་པ། རིག་འཛིན།
རྩོམ་སྒྲིག་འགན་འཁུར་བ། རིག་འཛིན།


འབྲེལ་ཡོད་རྩོམ་ཡིག

རྟ་ནག་སྒྲོག་འགྲོས། སྨད་ཆ།