སྒྲུང་གཏམ《འུར་ཆོམ་དང་འཁྲུག་ཟིང》ཞེས་པ་ཀློག་འགྲེལ།དང་པོ།

དང་པོ། རྩོམ་པ་པོ་ངོ་སྤྲོད། 
    ཧྥུའུ་ཁུ་ནཱ(福克纳)ནི་སྤྱི་ལོ1897ལོ་ནས1962ལོའི་བར་གྱི་མི་ཡིན་ལ། ཨ་རིའི་མིས་ཞི་ཞི་པེ་ཀྲོའུ(密西西比州)ལྷོ་ཕྱོགས་ཀྱི་ཉམས་རྒུད་དུ་འགྲོ་བཞིན་པའི་ཁྱིམ་རྒྱུད་ཆེན་པོ་ཞིག་ནས་སྐྱེས། ཁྱིམ་རྒྱུད་དེའི་ཁྲོད་ཧྥུའུ་ཁུ་ནཱ་ལ་བག་ཆགས་ཆེས་ཟབ་པ་ནི་སྐབས་དེར་སྙན་གྲགས་ཕྱོགས་བཅུར་ཁྱབ་པའི་སྤོ་བོ་ལགས་རེད། ཁོས་རང་གི་སྤོ་བོའི་གམ་ནས་ཁྱིམ་རྒྱུད་ཀྱི་གཟི་བརྗིད་ཉམས་སུ་མྱངས་ལ། ཞོར་ནས་སྤོ་བོའི་རྩོམ་རིག་གི་དགའ་ཕྱོགས་ཀྱང་རྒྱུན་འཛིན་བྱས། ཆུང་ངུའི་དུས་ནས་བཟུང་ཁོང་གི་ཕུགས་བསམ་ནི་སྤོ་བོ་ནང་བཞིན་རྩོམ་པ་པོ་ཞིག་ཨེ་འཁྱོངས་བལྟ་རྒྱུ་དེ་རེད། སྤྱི་ལོ1924ལོར་ཁོང་གི་སྙན་ངག་ཕྱོགས་བསྒྲིགས《རྡོ་ཀ་མ་རུའི་འཕགས་མ》ཞེས་པ་པར་སྐྲུན་འགྲེམ་སྤེལ་བྱས་ཀྱང་། ཁོས་རང་ཉིད་ཀྱིས་ལོ་ངོ་དུ་མར་སྙན་ངག་ཕྱོགས་སུ་ཚོད་ལྟ་བྱས་པ་ལམ་ལྷོངས་མ་བྱུང་བར་ངོས་ཟིན་རྙེད་དེ། རང་ཉིད་ནི་སྡུག་གྱོང་རེག་མཁན་གྱི་སྙན་ངག་པ་ཞིག་ཏུ་བལྟས། ཨན་ཏི་སིན(舍伍德·安德森)གྱི་བློ་འབྱེད་འོག་ཏུ། གཞི་ནས་ཁོས་སྒྲུང་གཏམ་གསར་རྩོམ་བྱས་ཤིང་། 1929ལོར་ཁོང་གི་ཆེས་ཐོག་མའི་རྨད་བྱུང་བརྩམས་སྒྲུང《འུར་ཆོམ་དང་འཁྲུག་ཟིང》ཞེས་པ་འགྲེམ་སྤེལ་བྱས་ལ། བརྩམས་ཆོས་དེ་ནི་བརྗོད་གཞི་གདམ་གསེས་དང་ལྷུག་བརྗོད་སྤྲོས་སྟངས་ཀྱི་སྒྲིག་གཞིའི་བཀོད་པ། རྟོག་པ་འོག་འགྱུའི་སེམས་ཁམས་ཞིབ་འབྲི་བྱེད་ཐབས་སོགས་སྒྱུ་རྩལ་རྩོམ་རིག་གསར་རྩོམ་གྱི་ཟུར་གང་ནས་གླེང་རུང་། རྩོམ་འབྲིའི་ཆུ་ཚད་ཡང་རྩེར་སོན་ཡོད་པའི་རྨད་བྱུང་བརྩམས་ཆོས་ཤིག་ཏུ་གྱུར། དེ་ནས་བཟུང་། ཁོང་གིས་སྒྲུང་གཏམ་གསར་རྩོམ་གྱི་ཕྱོགས་ལ་འབད་འབུངས་ཧུར་བསྐྱེད་བྱས་ཏེ། དུས་རབས20པའི་ལོ་རབས30ཡི་ནང་སྔ་གཞུག་ཏུ《འཆི་ཁ་མའི་དུས་ཀྱི་རང་ཉིད》དང་། 《ཟླ་བརྒྱད་པའི་འོད་སྣང》གཉིས་གཙོས་སྒྲུང་གཏམ་འབོར་ཆེན་བརྩམས་གྲུབ་བྱུང་། བརྩམས་ཆོས་འདི་དག་ཚང་མའི་བརྗོད་བྱ་ཨ་རིའི་ལྷོ་ཕྱོགས་ས་ཁུལ་དང་དམ་པོར་འབྲེལ་ཡོད་ཅིང་། རྟོག་པ་འོག་འགྱུའི་སེམས་ཁམས་མངོན་མཚོན་གྱི་ཐབས་རྩལ་བཀོལ་བ་བྱང་ཆ་དོད་ཅིང་གནད་ལ་ཁེལ་བས། ཁོ་རང་རྩོམ་མཁན་གྲགས་ཅན་དུ་འགྱུར་བར་ཕར་བ་གྲུ་འདེགས་ཀྱི་བྱེད་ནུས་ཐོན། ལོ་རབས50པའི་ནང་དུ། ཁོས་སྔ་གཞུག་ཏུ《ལོག་ཅིག མའོ་ཞིས》དང《སྡེ་གྲོང》 《གྲོང་རྡལ་ཆུང་ངུ》 《གཞིས་ཀ》སོགས་ཀྱི་བརྩམས་ཆོས་རིམ་པར་སྤེལ། 
    ཁོང་གིས་དུས་རབས་དེའི་ལོ་རབས་སུམ་ཅུ་པ་དང་བཞི་བཅུ་པའི་ནང་དུ་སྒྲུང་གཏམ་ཁ་གྲངས་ལོངས་པ་བྲིས་ནས་གྲུབ་ནའང་། ཁོང་ལ་རང་ཆས་སུ་ཡོད་པའི་བརྩམས་སྒྲུང་འབྲི་རྩལ་སྐོར་གྱི་ཐུན་མིན་འཇོན་ཐང་ལ་དཔྱད་བརྗོད་པའི་སྡེ་ཡིས་ཡིད་འཇོག་ཆེན་པོ་མ་བྱས། གཉེན་སྒྲིག་བྱས་རྗེས་འཚོ་བ་བག་མེད་རྒྱས་སྤྲོས་རོལ་བར་བརྟེན། རྩོམ་མཁན་ཁོང་དཔལ་འབྱོར་ཕྱོགས་ནས་ཉམས་ཉེས་ལ་འཕྲད་དེ། འཚོ་ཚིས་དང་མེད་མུག་གི་བརྡབ་གསིག་མ་བཟོད་པར་ཧོ་ལེ་བོའུ་ཀུང་ཟིར་གློག་བརྙན་འཁྲབ་གཞུང་བྲིས་ནས་རང་ཁ་སོས་ཙམ་བྱུང་། 1946ལོར་མིང་དུ་གྲགས་པའི་རྩོམ་རིག་མཐའ་དཔྱོད་མཁན་མཱ་ཨར་ཁུ་མོ་ཁོ་ལིས་ཡིས་ཁོང་གི་བརྩམས་སྒྲུང་གཅེས་བཏུས་དེབ་ཅེས་པ་འདེམ་སྒྲིག་བྱས་ཏེ་པར་དུ་བསྐྲུན་ལ། མཐའ་དཔྱོད་པ་དེས་རྩོམ་མཁན་ཁོང་ལ་གདེང་འཇོག་ཚད་མཐོན་པོ་གནང་བས། དེ་དང་བསྟུན་ནས་དཔེ་དེབ་དེར་ཀློག་པ་པོའི་སྡེ་ནས་དགའ་བསུ་བླ་མེད་ཐོབ། 1949ལོར་ཁོང་ལ་ནོ་པེར་རྩོམ་རིག་བྱ་དགའ་ཐོབ་པ་དང་། 1950ལོར་ལོ་དེའི་ནོ་པེར་རྩོམ་རིག་བྱ་དགའ་ཐོབ་མཁན་ལོ་སུའུ(罗素)དང་མཉམ་དུ་དགའ་རྟགས་བླངས། དེ་ནས་བཟུང་། ཁོང་གི་རྩོམ་རིག་གི་གོ་ས་བརྟན་འཇགས་སུ་གྱུར། 
    ལག་ཆགས་སའི་ཁྱིམ་ཚང་གི་རྒྱབ་ལྗོངས་དང་ས་བབ་ཁོར་ཡུག་གི་དབང་གིས། རྩོམ་པ་པོའི་གསར་རྩོམ་གྱི་བརྗོད་སྙིང་ཕོན་ཆེ་བ་ཨ་རིའི་ལྷོ་ཕྱོགས་དང་འབྲེལ་བ་ཟབ་མོ་ཡོད། ཁོང་ལ་གསར་རྩོམ་གྱི་གོ་རིམ་ཁྲོད་དུ་ངང་ངམ་ཤུགས་ཀྱིས་ངེས་ཤེས་ཟབ་མོ་སྐྱེས་པ་ནི། སྒྲུང་གཏམ་གསར་རྩོམ་གྱི་རྒྱུ་ཆར་རུང་བའི་གསེར་གྱི་གཏེར་རྡོ་དེའོ།། ཆུང་དུས་རང་ཉིད་ཀྱིས་རྐང་རྗེས་གང་སར་དཔར་སའི་ཕ་ཡུལ་གྱི་ས་གཞིའི་འོག་སྦས་སྐུང་བྱས་ཡོད་པ་ཚོར་ཞིང་། ཁྱིམ་རྒྱུད་དང་སྤྱི་ཚོགས། ལོ་རྒྱུས་བཅས་གསུམ་གའི་བར་གྱི་འབྲེལ་བས་ཁོང་གི་གསར་རྩོམ་ལ་ཡུལ་དུས་ངེས་མེད་ཀྱི་སྒོ་ནས་ཤུགས་རྐྱེན་གཏོང་གིན་པའང་གཞི་ནས་རྟོགས། 
    རྩོམ་མཁན་ཁོང་ནི་ཨ་རིའི་ལྷོ་ཕྱོགས་རྩོམ་རིག་གི་ནམ་མཁའ་སྔར་ལས་ཆེར་བསྐྱེད་གནང་མཁན་དང་། འགྲོ་བ་མིའི་ནང་སེམས་རྒྱུད་ཀྱི་བག་ལ་ཞ་བའི་དགའ་སྐྱོ་ཆགས་སྡང་ཇི་སྙེད་གསལ་རྗེན་སྔོག་འདོན། སྒྱུ་རྩལ་མཚོན་ཐབས་གསར་བར་ཚོད་ལྟ་དང་གསར་གཏོད་བཅས་ཀྱི་ཐད། ཨ་རི་ཕར་ཟད་ནུབ་གླིང་རྩོམ་འབྱུང་ལོ་རྒྱུས་སྟེང་གི་དཀྱོག་མཚམས་ན་ཀྲོང་ངེར་བསླངས་པའི་རྡོ་རིང་ལྟ་བུར་བརྩིས་ཆོག་ཆོག་ཡིན། 
    ལོ་རབས་དྲུག་ཅུ་པའི་ནང་ནས་བཟུང་། རྩོམ་མཁན་ཁོང་གིས་ཨ་རག་བག་མེད་དུ་བསྟེན་ནས། མི་འདོད་ནད་ཀྱིས་འབྱུང་གཞི་ཟིན་ནས་ལུས་ཕུང་ཉམས་ཞན་དུ་སོང་མཐར། 1962ལོའི་ཟླ7པའི་ནང་དུ་སྙིང་ནད་དྲག་པོ་འཕར་ནས་ཚེ་ཡི་འཕེན་པ་རྫོགས།(འཕྲོ་མ་པར་ངོས15པར་གཟིགས) 
   མཚོ་སྔོན་བོད་ཡིག་གསར་འགྱུར།2015·01·02།པར་ངོས14པ།

རྩོམ་སྒྲིག་པ། རིག་འཛིན་ཚེ་རིང་།

དཔྱད་མཆན 0 ཡོད།