ཀྲུང་གོ་བོད་ཀྱི་དྲ་བ།

འཕན་ཡུལ་བྱམས་པ་སྤུན་གསུམ།

    སྤེལ་དུས། : 2016-07-18
ཡིག་གཟུགས། :ཆུང་། འབྲིང་། ཆེ།

         འཕན་ཡུལ་ཏེ་ད་ལྟའི་ལྷུན་གྲུབ་རྫོང་གི་ཁོངས་སུ་གནས་བསྐོར་དང་། སྤྲོ་སེང་བྱ་ཡུལ་གནའ་ཤུལ་དང་དགོན་སྡེ་མང་པོ་ཡོད་པ་ལས་དམངས་ཁྲོད་དུ་གྲགས་ཆེ་ལ་གནས་བསྐོར་བ་ཅུང་མང་ཙམ་ཡོང་མཁན་ཡོད་པ་འཕན་ཡུལ་བྱམས་པ་སྤུན་གསུམ་ཞེས་པའི་སྐོར་ཅུང་ཟད་བརྗོད་ན། དམངས་ཁྲོད་ཀྱི་ཤོད་རྒྱུན་དུ་བྱམས་པ་སྤུན་གསུམ་དེ་ཉིན་གཅིག་ལ་མཇལ་ན་མི་མཐུན་རྐྱེན་ངན་བཟློག་ཅིང་། སྡིག་སྒྲིབ་བྱང་བ་སོགས་བྱིན་རླབས་ཤིན་ཏུ་ཆེ་བ་ཡིན་པའི་ཤོད་རྒྱུན་ཡོད། བྱམས་པ་སྤུན་གསུམ་ཟེར་བ་ནི་གད་པོ་ཤང་གི་ཁོངས་སུ་ཡོད་པའི་རག་མ་བྱམས་པ་དང་། མཚོ་སྟོད་ཤང་གི་ཁོངས་སུ་ཡོད་པའི་རྒྱལ་ལྷ་ཁང་བྱམས་པ། ཤང་དེའི་ཁོངས་ཀློ་པ་སྟོད་ཀྱི་བྱམས་པ་བཅས་ཡིན། བྱམས་པའི་སྐུ་དེ་གསུམ་ནི་སྤྱི་ལོའི་དུས་རབས་བཅུ་གཅིག་པའི་ནང་ཞང་སྣ་རྣམ་རྡོ་རྗེ་དབང་ཕྱུག་གིས་བཞེངས་ཤིང་། ཧ་ལམ་ལོ་དགུ་བརྒྱ་ཙམ་གྱི་ལོ་རྒྱུས་ལྡན་ཡོད།།

རག་མའི་བྱམས་ཁང་།

        བྱམས་ཁང་ཆག་ཡུལ་ནི་བྲག་རི་རྔམ་བརྗིད་ལྡན་པ་ཞིག་རག་མའི་རིག་འགྲམ་དུ་ཆགས་པ་དེའི་རི་གཤམ་བར་རླངས་འཁོར་འགྲོ་ས་ཡོད། རི་ངོས་སུ་ཆུ་ཚོད་ཕྱེད་ཀ་ལྷག་ཙམ་འཛེག་ན་བྱམས་པའི་ལྷ་ཁང་དུ་སླེབས། དབེན་གནས་དེའི་རྒྱབ་རི་བྲག་དཀར་པོ་གཏོར་མ་སླངས་པ་འདྲ་བའི་ངོས་སུ་མཐོང་སྣང་འདྲ་མིན་གྱི་རི་མོ་སྣ་ཚོགས་དང་། བྲག་ཕུག་ཆེ་ཆུང་མང་པོ། བྲག་རྩེར་རྒོད་དང་གོ་བོའི་ཚང་། བྲག་རྩའི་རི་བོའི་ངོས་སུ་སེ་བ་དང་ཚར་པ་སོགས་ཤིང་ལྡུམ་བུ་མང་པོ། དབྱར་དུས་སུ་སེ་བའི་དྲི་ཞིམ་ཀུན་ཏུ་ཁྱབ་པ་དང་སྨིན་ལེགས་སེ་འབྲུམ་གྱི་རོ་མངར་བ། འདབ་ཆགས་སྣ་ཚོགས་ཀྱི་གྲེ་འགྱུར་རྣ་བར་འཇེབས་པ། ས་ཆ་གཙང་ཞིང་མཁའ་རླུང་ལེགས་པ། ཡུལ་དེའི་ཕུ་ཆུ་ནུབ་ནས་ཤར་དུ་དགོན་པ་ཆགས་སའི་རི་གཤམ་བརྒྱུད་ལྷུང་ལྷུང་གི་སྒྲ་སྙན་པར་སྒྲོག་བཞིན་རྒྱུག་པ། མདུན་གྱི་སྤང་རི་གཡུ་ཡི་མཎྜལ་འདྲ་བའི་ངོས་སུ་གནག་ཕྱུགས་རྣམས་ངུར་སྒྲ་འདོན་བཞིན་ཆུར་རོལ་བ། ལུག་ཁྱུ་མུ་ཏིག་གི་ཚོམ་བུ་བཀོད་པ་འདྲ་བ། ཞིང་གྲོང་རྣམས་སུ་ལོ་ཏོག་མགོ་ལྕོག་ལྡེམ་ཞིང་། པད་ཁའི་མེ་ཏོག་རབ་ཏུ་བཞད་པ་སོགས་དབང་པོ་དྲུག་ལ་ཚིམས་པའི་བདེ་བ་སྟེར་བའི་ཡུལ་ལྗོངས་བལྟ་བས་ཆོག་མི་ཤེས་པ་ཞིག་འདུག སྐུ་རྒྱུ་འཇིམ་ལས་གྲུབ་པའི་རྗེ་བཙུན་བྱམས་པའི་སྐུ་བརྙན་ཐོག་བརྩེགས་གཉིས་ལྡན་དེ་བྲག་ཕུག་ཞིག་གི་ནང་བཞེངས་པའི་མདུན་དུ་ཁང་པ་ཐོག་ས་གཉིས་ལྡན་དེའི་སྟེང་ཁང་བྱམས་པའི་ཞལ་རས་ལྷ་ཁང་ཡིན་པ་དེའི་ནང་མཆོད་པའི་ཡོ་ཆས་དང་། སྐུ་བརྙན་ཆུང་གྲས་འགའ་ཤས་གཤམས་འདུག བྱམས་ཁང་གི་ཞལ་རས་ལྷ་ཁང་ཡོད་སའི་ཤར་ངོས་བྲག་གསེབ་ནང་ཆུ་མིག་ཁྲོན་པ་འདྲ་བ་ཞིག་འདུག་པ་ཆུ་མིག་དེར་འགྲོ་སྐབས་ཐོག་ཅག་ཞིག་གི་སྟེང་ནས་འགྲོ་དགོས་པས་ཐོག་ཅག་དེ་ནི་རུང་ཁང་གི་ཐོག་ཁ་ཡིན་པས་རུང་ཁང་﹙ཐང་ཚང་﹚ཤོད་དང་། ཁྲོན་པ་སྟེང་དུ་ཡོད་པ་ལྟ་བུའི་སྣང་བ་ཡོང་གི་འདུག རི་གཤམ་དུ་རྒྱུག་པའི་ཕུ་ཆུ་དེར་རྡོ་རིལ་ཁོ་ན་རྩིག་སྟེ་ཟམ་སྟེག་བཟོས་པའི་ཤིང་ཟམ་ཞིག་འདུག་པ་དེར་ཡང་ལོ་སུམ་བརྒྱ་སྐོར་གྱི་ལོ་རྒྱུས་ཡོད་སྐད། བྱམས་པའི་སྐུ་ཡོད་སའི་ལྷ་ཁང་དེ་དེ་སྔ་རྒྱལ་སྟོད་དགོན་ནས་བདག་གཉེར་གྱིས་དཀོན་གཉེར་མི་གཅིག་གཏོང་སྲོལ་ཡོད་འདུག་ཀྱང་། དེང་སྐབས་རྐུན་སྲུང་སོགས་ཀྱི་རྐྱེན་པས་གྲྭ་པ་ཁ་ཤས་ཡོད་པ་རྣམས་ནས་རྒྱུན་ལྡན་མཆོད་འབུལ་སོགས་ཆོས་ལུགས་ཀྱི་བྱེད་སྒོ་སྤེལ་བཞིན་མཆིས། བྱམས་ཁང་དང་། རི་ཁྲོད་པའི་སྤྱིལ་བུ་རྣམས་རིག་གནས་གསར་བརྗེའི་སྐབས་གཏོར་ནས་རྗེས་ཤུལ་ཙམ་དུ་སོང་ཡང་༡༩༨༥ལོ་ཆོག་མཆན་ཐོབ་པ་ལྟར་ཉམས་གསོ་བྱ་ཤིང་། དེང་སྐབས་བྱམས་ཁང་དང་། གྲྭ་ཤག མཆོད་རྟེན་སོགས་སྔར་ཤུལ་ཕལ་ཆེར་སྐྱར་གསོ་བྱུང་ཐོག་དད་མཇལ་བ་ཡང་ཡོང་མཁན་འདུག།

ལྷ་ཁང་བྱམས་པ།     

              མཚོ་སྟོད་ཤང་ཁོངས་རྒྱལ་ལུག་ལྷས་ལྷ་ཁང་དུ་རྗེ་བཙུན་བྱམས་མགོན་གྱི་འཇིམ་བརྙན་ཉིས་ཐོག་ཅན་ཞིག་ཡོད་པ་དེའི་ལྷ་ཁང་ཕྱི་ནང་གི་འཛིན་བདག་རྒྱལ་སྟོད་དགོན་ནས་གནང་གི་ཡོད་འདུག བྱམས་སྐུ་དེ་དུས་རབས་བཅུ་གསུམ་པའི་ནང་སོག་པོ་དོར་རྟ་ནག་པོས་རྒྱལ་དུ་དགེ་འདུན་ལྔ་བརྒྱ་སྐོར་འདུ་ཁང་ནང་བཅུག་སྟེ་མེར་སྲེག་ནས་བཀྲོངས་སྐབས་བྱམས་ཁང་དེར་མེ་མ་འཁྱུད་པས་བྱམས་པ་མེ་ཐུབ་མར་གྲགས་སྐད། སྔོན་མའི་བྱམས་ཁང་དེའི་ཕྱི་ནང་ཚང་མ་རིག་གནས་གསར་བརྗེའི་སྐབས་གཏོར་ཞིང་། དེང་སང་རྒྱལ་སྨད་གྲྭ་ཚང་གི་འདུ་ཁང་ནང་བྱམས་པའི་འཇིམ་སྐུ་ཐོག་རྩེག་གཉིས་ལྡན་ཞིག་བཞེངས་པ་དེར་ལྷ་ཁང་བྱམས་པའི་མཚན་གསོལ་འདུག དེ་སྔའི་བྱམས་གི་གྱང་རོལ་ཟུར་ཞིག་ཏུ་ལྷ་ཁང་ཆུང་ཆུང་ཞིག་གི་ནང་རྡོ་བརྐོས་བྱམས་སྐུ་བཞེངས་སྟབས་ཅན་སྤྱི་ཁྲེ་གང་ལྷག་ཙམ་བརྐོས་བཀྲོལ་བཟོ་བཀོད་བྱོན་ལེགས་ཤིག་འདུག་པ་དེ་སྔའི་བྱམས་ཁང་གཏོར་ཤུལ་གྱི་ས་འོག་ནས་དོན་སྐད། རྒྱལ་ལྷ་ཁང་གི་བྱམས་སྐུ་ཕུད། ད་དུང་དེ་གར་རྒྱལ་སྟོད་གྲྭ་ཚང་ཞེས་དོན་བདག་འབྲས་སྤུངས་རྒྱས་པ་མཁན་པོས་བྱེད་པའི་དགེ་ལུགས་གྲྭ་ཚང་གཅིག་དང་། རྒྱལ་སྨད་གྲྭ་ཚང་ཞེས་ས་ལུགས་གྲྭ་ཚང་གཅིག་ཡོད། ད་ལྟ་ཚང་མ་རྒྱལ་སྟོད་དུ་ཚོགས་པ་ལས་རྒྱལ་སྨད་བྱམས་ཁང་དང་སྒྲིལ། དེ་གའི་བྱམས་ཁང་དང་། རྒྱལ་སྟོན་དགོན། ཞང་རྣམ་སྣང་རྡོ་རྗེ་དབང་ཕྱུག་གི་སྒྲུབ་ཁང་། ལུག་ལྷས་མཆོད་རྟེན་སོགས་མཇལ་རྒྱུ་ཡོད་པ་དང་། དགོན་པའི་ནང་རླངས་འཁོར་འགྲོ་ས་ཡོད། དེ་སྔ་རྒྱལ་ལྷ་ཁང་སྟེ་བྱམས་ཁང་གི་མདུན་དུ་རྡོ་རིང་ཞིག་ཡོད་པ་རིག་གསར་སྐབས་གཏོར་སྐྱོན་བཏང་བའི་དུམ་བུ་རྣམས་ལྷུ་སྒྲིག་སྟེ་དེང་སང་རྒྱལ་སྟོད་དགོན་པའི་རྡོ་གཅལ་ནས་བཙུག་པ་དེའི་ངོས་སུ་ཡིག་ཕྲེང་བཅུ་བཞི་ཡོད་པའི་ནང་དོན་ནི་དཀོན་མཆོག་སྐྱབས་སུ་འཛིན་པ་དང་། ངན་སེམས་འགོག་དགོས་པ་སོགས་དོན་ཚན་བཅུ་འཁོད་པ་དེ་སོག་པོའི་དམག་དཔོན་དོར་རྟ་ནག་པོས་བཙུག་པ་རེད་ཟེར་སྲོལ་ཡོད་སྐད།།

ཀློ་པ་སྟོད་བྱམས་ཁང་།

            མཚོ་སྟོད་ཤང་ཁོངས་ཀློ་པ་སྟོད་﹙ཀླུ་མཁར་སྟོད་ཟེར་སྐད་ཡོད་འདུག་ཀྱང་ཁ་རྒྱུན་དུ་ཀློ་པ་སྟོད་ཅེས་འབོད་﹚གྲོང་ཚོའི་དཀྱིལ་དུ་ཆགས་པའི་བྱམས་ཁང་དེ་ཐོག་བརྩེགས་གསུམ་ཙམ་ཡོད་པ་དང་། འོག་ཁང་ནི་རྡོ་ཆེན་རིལ་བུ་ཤ་སྟག་རྩིག་ནས་སྐྲུན་འདུག ལྷ་ཁང་སྒོ་ཤར་ལྟ་འོག་ཁང་དུ་སྐོར་ལམ་ལྕམ་གང་མའི་ས་དང་། ལྷ་ཁང་ལ་ཀ་བ་བཞི། སྟེང་དུ་ཞལ་རས་ལྷ་ཁང་བཅས་ཡོད་པ་དེའི་རྟེན་གཙོ་བྱམས་པའི་སྐུ་བརྙན་སྤྲུལ་སྐུའི་ཆ་བྱད་ཅན་འཇིམ་ལས་བཞེངས་པ་ཐོག་ཚད་གསུམ་ཙམ་ཞིག་དང་། དེ་སྔ་དེའི་གཡས་གཡོན་དུ་ཉེ་སྲས་བརྒྱད་འཇིམ་བརྙན་ཉིས་ཐོག་ཙམ་རེ་ཡོད་སྐད། ད་ལྟ་བྱམས་སྐུ་ཆེ་ཆུང་དང་ཆ་བྱད་བཞུགས་སྟངས་སོགས་སྔོན་མ་ལྟར་ཉམས་གསོ་ཞུས་འདུག ལྷ་ཁང་དེ་ཡང་རྒྱལ་སྟོད་དགོན་པས་བདག་སྐྱོང་གནང་ལམ་བཞིན་དཀོན་གཉེར་མི་གཅིག་འདུག ལྷ་ཁང་གནས་ཡུལ་གྲོང་ཚོའི་འགྲམ་བར་རླངས་འཁོར་འགྲོ་ས་འདུག གོང་གསལ་བྱམས་པ་གསུམ་པོ་དེ་མཇལ་བར་འགྲོ་སྐབས་བོད་རྙིང་པའི་དུས་སུ་འགྲིམ་འགྲུམ་མི་བདེ་བར་བརྟེན་དད་མཇལ་བ་ཚོས་རག་མ་བྱམས་ཁང་དུ་ཞག་སྡོད་ཀྱིས་ཕྱི་ཉིན་སྔ་པོ་ནས་རག་མ་བྱམས་པ་མཇལ་ཏེ་ལ་རྒྱབ་ནས་རྒྱལ་དུ་བྱམས་པ་མཇལ་བ་དང་གུང་ཟས་བཟང་རྗེས་ཕྱི་དྲོ་ཀློ་པ་སྟོད་ཀྱི་བྱམས་པ་མཇལ་ནས་དེ་གར་ཞག་སྡོད་བྱེད་དགོས་ཀྱི་ཡོད། དེང་སྐབས་རླངས་འཁོར་ནང་བསྡད་དེ་ཕྱིན་ན་བྱམས་པ་གསུམ་མཇལ་ཐུབ་པ་མ་ཟད་པ་ཚབ་མཆོད་རྟེན་ལ་བསྐོར་བ་བསགས་པ་དང་འབྲེལ་དེ་གའི་བཙུན་དགོན་དང་། སྣ་མོ་དགོན་སོགས་ཀྱང་མཇལ་ཐུབ་ཀྱི་འདུག།

        རག་མ་བྱམས་ཁང་ནི་ལྷུན་གྲུབ་རྫོང་གི་ལྷོ་ནུབ་ཏུ་ཡོད་པ་དེ་ནས་ལྷོ་ངོས་སུ་ལ་རྒྱབ་ནས་ཕྱིན་ན་སྟོད་ལུང་ནང་དང་། ལྷ་སའི་ཉང་བྲན་ཕུར་སླེབས། ཀློ་པ་སྟོད་ནི་ནུབ་ཀྱི་མཐའ་ཡིན་པས་དེ་ནས་ནུབ་ཏུ་ལ་རྒྱབ་ནས་ཕྱིན་ན་སྟོད་ལུང་ཆུ་ཚན་དུ་འགྲོ་ས་ཡོད་ཀྱང་ལ་ཁ་དེ་ཚོར་འཕྲུལ་འགུལ་འཁོར་ལོ་འགྲོ་ས་མེད།།


རྩོམ་སྒྲིག་པ། : རིག་འཛིན་ཚེ་རིང་།