རྟེན་ཅིང་འབྲེལ་བའི་བྱ་བ་རིགས་གསུམ་གྱི་ཁྱད་པར་དཔྱིས་ཕྱིན་པར་བསྟན་ཡོད། བདག་དང་འབྲེལ་བའི་བྱ་བ་སྟེ་བྱེད་པའི་རྩོལ་བ་ལ། དུས་གསུམ་སྐུལ་ཚིག་དང་བཅས་པའི་རྣམ་བཞག་ཡོད། དཔེར་ན། ཁྱབ་གདལ་དུ་བཏང་བའི་བཀྲམ་པ་ལ། དགྲམ་བྱ་འགྲེམ་བྱེད་ཁྲོམས་ཤིག་བཀྲམ། ལྟ་བུ་དང་། གཞན་དང་འབྲེལ་བའི་བྱ་བ་སྟེ་ལས་ཀྱི་འགྱུར་བ་ལ། དུས་གསུམ་གྱི་རྣམ་བཞག་མེད། ཁྱབ་གདལ་དུ་ཁེབས་པའི་ཁྲེམས་པ་ལ། ཁྲེམས་པ་ཞེས་པའི་བརྡ་ཙམ་ལས་ལྡོག་པ་གཞན་མེད། བདག་གཞན་དང་མ་འབྲེལ་བའི་བྱ་བ་སྟེ་ངང་གིས་བྱུང་བ་ལ། དུས་གསུམ་གྱི་རྣམ་བཞག་ཉུང་ཞིང་། གང་ཟག་ལ་འཇུག་རུང་བ་མ་གཏོགས་སྐུལ་ཚིག་མེད། ཁྱབ་གདལ་དུ་གྱུར་པའི་འགྲམས་པ་ལ། དགྲམ་བྱ་འགྲམ་བྱེད་འགྲམས་ཟིན། ལྟ་བུ་སྐུལ་ཚིག་མེད། མི་ལ་འཇུག་རུང་བ། བབ་བྱ་འབབ་བྱེད་བོབ་ཅིག་བབས། ལྟ་བུར་སྐུལ་ཚིག་ཡོད་པའོ། །
《བོད་ཡིག་ཀུན་ཁྱབ་མིང་མཛོད་ཀྱི་སྒྲིག་ཚུལ་དང་ཁྱད་ཆོས》ལས་བཏུས།
རིན་པོ་ཆེ་དེ་བསྲེགས་བཅད་བརྡར་བ་གནད་དུ་དེ་འདྲ་མ་ཐིངས་པས། མིང་དང་འགྲེལ་ལས། མིང་གཅིག་ལ་ཡིག་གཟུགས་མི་འདྲ་བ་གཉིས་རེ་དང་། མཐའ་ན་གསུམ་རེ་ཡང་བྲིས་སྣང་། རགས་བརྩིས་ལྟར་ན། ཉིས་བརྒྱ་ཉེ་བ་ཞིག་ཡོད་པ་ལས། གདམ་ང་དང་། སྡེབ་སྦྱོར་དུ་ཧ་ལམ་བཞི་ཆ་གཅིག་འགྲིག་པར་སྣང་ཡང་། སྒྲའི་ཞིབ་ཆ་མི་གཅིག་པའི་དབྱེ་བ་མ་ཕྱེས་པར་ཉ་ཉུང་མཉམ་བསྲེས་སུ་གྱུར་པའི་མ་དག་པ་བཞི་ཆ་གསུམ་སྣང་། དེ་རྣམས་ལས་ཉེར་མཁོ་ཆེ་ཞིང་། བྲི་ལ་ནོར་སླ་བའི་ཐ་སྙད་སྐོར་ཞིག་དག་པ་སྔ་མ་དང་། མ་དག་པ་ཕྱི་མར་བཀོད་ཅིང་། ནོར་སོ་གཙོ་བོ་བརྒྱད་དུ་དྲིལ་ནས་དཔེ་དྲངས་ན།
མིང་གཞི་ནོར་བ།
མིང་གཞིའི་སྒྲ་དེ་གནས་གང་ལས་འབྱུང་ཞིང་།བྱེད་པ་གང་གིས་བསྐྱེད་པ། རྩོལ་བ་དྲག་ཞན་བར་མ་ཅི་འདྲ་ཡིན་པ་མ་བརྟགས་པར། སྒྲ་སྤྱི་འདྲ་བ་ཙམ་ལ་བརྟེན་ནས། དེ་དག་གི་ཞིབ་ཆ་མི་གཅིག་སའི་དབྱེ་བ་མ་ཕྱེས་པར། དག་མ་དག་གཉིས་གསུམ་རེ་བྲིས་བྱུང་བ་རེད། དཔེར་ན། ཁང་བའི་ལྕམ་ཤིང་ལ་ཕྱམ་དང་། ཁྱམ་གཉིས་བྲིས་པ། སྔ་མ་འགྲིག་ལ་ཕྱི་མ་འཕྱུགས་སྣང་། འདི་གཉིས་ཀའི་སྒྲ་སྤྱི་མཆུ་བཙུམས་པ་འདྲ་སྟེ། རྗེས་འཇུག་མ་ཡིག་ཡིན་པའི་ཕྱིར། ཞིབ་ཆ་མི་གཅིག་སྟེ། སྔ་མ་མཆུ་དང་། ཕྱི་མ་མགྲིན་པ་ལས་བྱུང་བ་ཡིན་ནོ། ། དེ་བཞིན་དུ། མཐའ་ཡས་པ་ལ་འབྱམས་ཀླས་པ་དང་འཇམ་ཀླས་པ། དུས་རེ་ཞིག་བཟའ་བཏུང་མི་སྤྱོད་པའི་ཆོས་ཀྱིས་དཀའ་ཐུབ་ལ་བསྙུང་གནས་དང་སྨྱུང་གནས་དང་བསྙེན་གནས། སྤྱང་བོ་ལ་གྲུང་བོ་དང་དྲུང་བོ། ལམ་རྒྱགས་ལ་བྲོ་དང་དྲོ། བཟོ་བྱེད་མཐུ་ལྡན་ལ་འཕྲུལ་འཁོར་དང་འཁྲུལ་འཁོར། འགལ་བ་འདུམ་པར་བྱེད་པ་ལ་སྡུམ་པ་དང་ཟླུམ་པ། ནོར་བ་ལ་འཕྱུགས་པ་དང་འཆུགས་པ། དབང་འབྱོར་བ་ལ་ཀློང་དུ་གྱུར་པ་དང་རློང་དུ་གྱུར་པ། ཡི་གེ་འབྲི་བྱེད་ལ་སྨྱུ་གུ་དང་སྙུ་གུ་ལྟ་བུ་སོགས་ལས་སྔ་མ་དག་པ་དང་། ཕྱི་མ་མ་དག་པའོ། །
མགོ་ཅན་དང་མགོ་ཅན་ཡིན་མིན་ནོར་བ།
མགོ་ཅན་གསུམ་ལས། ར་མགོ་ལྕེ་རྩེ་འདར་བ་དང་། ། ལ་མགོ་ལྕེ་སླད་རྒྱ་ཡངས་བསྐྱེད། ། ས་མགོ་སོ་ཡི་བར་ནས་དབྱུང་། །ཞེས་པའི་གནད་མ་ཟིན་པ་དང་། མགོ་ཅན་གྱི་སྒྲ་ལྕི་བ་དང་།མགོ་མེད་ཀྱི་སྒྲ་ཡང་བའི་ཁྱད་པར་མ་ཕྱེས་པར། དག་མ་དག་གཉིས་བྲིས་བྱུང་བ་རེད། དཔེར་ན། སྨྲ་བ་ལ་སྨེད་པ་དང་རྨེད་པ་གཉིས་བྲིས་སྣང་། སྔ་མ་འགྲིག་ལ་ཕྱི་མ་མི་འགྲིག་སྟེ། སྒྲ་སོ་སྲུབས་ལས་རླུང་ཕུད་པ་དང་། ལྕེ་རྩེ་འདར་བ་ལས་བྱུང་བའི་ཁྱད་མ་ཕྱེས་པའི་ལན་ཡིན། ལས་རོགས་ལ་ལག་པོད་དང་ལག་སྤོད་གཉིས་བྲིས་པ་ལས། སྔ་མ་འགྲིག་ལ་ཕྱི་མ་མི་འགྲིག་སྟེ། པོད་སྒྲ་དྲག་པ་ཙམ་ལས་ལྕི་ཆ་མེད་པ་དང་། སྤོད་སྒྲ་ལྕི་ཞིང་དྲག་པའི་ཁྱད་པར་མ་ཕྱེས་པའི་ལན་ཡིན། དེ་བཞིན། སྟ་གོན་ལ་ལག་སྡོག་དང་ལག་རྡོག དབྱིབས་ཟླུམ་པོ་ལེབ་མོ་ལ་ཀོར་ཀོར་དང་སྐོར་སྐོར། འོད་འཁྱིམས་ལ་འོད་ཀོར་དང་འོད་སྐོར། སྤྲང་པོ་ལ་མུ་ཏོ་བ་དང་མུ་ལྟོ་བ། ཕྲུ་སློག་པ་ལ་རྨོ་རྨོད་པ་དང་རྨོ་མོད་པ་ལྟ་བུ་སོགས་ཀྱི་སྔ་མ་དག་པ་དང་། ཕྱི་མ་མ་དག་པའོ། །
སྔོན་འཇུག་ད་དང་མགོ་འཇོག་ནོར་བ།
སྔོན་འཇུག་ད་ལྕེ་རྩེའི་བྱེད་པས་བསྐྱེད་ཅིང་། མིང་གཞི་དང་སྦྱར་ནས་མྱུར་དུ་ཀློག་ཚེ།རླུང་གིས་བསྐྱོད་པ་ལས་ལྕེ་རྩེ་ཅུང་ཟད་འདར་བར་གྱུར་པས། ར་མགོའི་སྒྲ་དང་ཆེས་མཚུངས་པའི་དབང་གིས། སྒྲ་འདི་གཉིས་ཕན་ཚུན་ནོར་སླ་ཞིང་། ལ་མགོ་དང་ས་མགོ་ཡང་སྒྲ་ལྕེ་རྩེ་དང་། ལྕེ་རྩེ་དང་ཉེ་བའི་ཆ་དང་ལྡན་པས་ན། སྔོན་འཇུག་ད་དང་ནོར་སླ། དེའི་ཕྱིར་འདི་རིགས་ལས་གདམ་ང་ཅན་དུ་འཁྲུལ་བ་མང་ངོ་། ། དགའ་དྲགས་པ་ལ་དགོད་པ་དང་རྒོད་པ་གང་རུང་བྲིས་པ། སྔ་མའི་དས་འཕུལ་དང་།ཕྱི་མའི་ར་མགོའི་གྲགས་ཚུལ་འདྲ་བར་གྱུར་ནས་གདམ་ངའི་ཚུལ་དུ་གྱུར་ཀྱང་། གདམ་ང་མ་ཡིན་ཏེ། དུས་ཀྱི་རྣམ་བཞག་ལས། དགོད་ནི་ད་ལྟ་བ་དང་སྐུལ་ཚིག་ཡིན་པ་དང་།མ་འོངས་པ་ལ་དགད་དང་། འདས་པ་ལ་བགད་ཡིན་པ་ལས། ར་མགོ་མེད་པས་གསལ། དེ་བཞིན། བཟའ་ཟླའི་ལྕམ་སྲིང་ལ་སྙིད་མོ་དང་གཉིད་མོ།བོངས་དང་ལྗིད་ཆེ་བ་ལ་རྡོས་བཅས་དང་གདོས་བཅས། རིག་པ་གསལ་པོ་མ་ཡིན་པ་ལ་དམུན་པ་དང་རྨུན་པ་དང་སྨུན་པ། རིགས་ངན་ལ་དམེ་ཤ་ཅན་དང་རྨེ་ཤ་ཅན་དང་སྨེ་ཤ་ཅན། ནམ་མཁར་འགྲོ་བའི་ཕྱག་ཐག་ལ་རྨུ་ཐག་དང་དམུ་ཐག གལ་བོ་ཆེ་ལ་གཙིགས་ཆེ་བ་དང་རྩིགས་ཆེ་བ། མ་བསྲེགས་ཐལ་བ་ལ་ཕ་བ་ལྒོ་ལྒོ་དང་ཕ་བ་དགོ་དགོ་དང་ཕ་བ་རྒོ་རྒོ། ར་མ་འདྲ་བའི་རི་དྭགས་ཤིག་ལ་རྒོ་བ་དང་དགོ་བ། ཟས་སོགས་བལྡད་པ་ལ་དམུར་བ་དང་རྨུར་བ་ལྟ་བུ་སོགས་ཀྱི་སྔ་མ་དག་ལ་ཕྱི་མ་མ་དག་པའོ། །
སྔོན་འཇུག་ཡོད་མེད་ནོར་བ།
བས་འཕུལ་སོ་མཆུ་རེག་པ་ལས། ། གས་འཕུལ་གྲེ་བའི་ཕུགས་ནས་དབྱུང་། ། དས་འཕུལ་ལྕེ་རྩེ་སློད་པ་ལས། ། བ་ཕྱེ་མ་བཙུམས་གཉིས་ཀ་སྣ། ། འཕུལ་ཟུར་ཆག་ན་འཕུལ་མེད་འདྲའོ། ། བྲི་བྱའི་མིང་དེར་འཕུལ་སྒྲ་ཡོད་མེད་དང་། ཡོད་ན་གང་ཡིན་པ་མ་བརྟགས་ན། ནོར་འཁྲུལ་འབྱུང་སླ། དཔེར་ན། ཉམ་ཐག་པ་ལ་ཀོས་ཐག་པ་དང་། དཀོས་ཐག་པ་གཉིས་བྲིས་སྣང་། བརྗོད་ངག་ཏུ་ཀོས་ཞེས་སྒྲ་དྲག་པ་ཙམ་ལས། ཐོག་མར་ལྕེ་རྩེ་སློད་པའི་སྒྲ་ཟུར་འབྱུང་རྒྱུ་མེད་པས་གསལ། དེ་བཞིན། དཔེ་ཆ་མང་པོའི་མཚན་བྱང་ཅིག་ཅར་འཁོད་པའི་མིང་ལ་དཀར་ཆག་དང་ཀར་ཆག ལོག་བཤད་ལྟ་བུ་ལ་ཀྱོག་བཤད་དང་བཀྱོག་བཤད། སླད་མར་ལ་རྗེས་སོར་དང་རྗེས་གསོར། མིའི་གཟུགས་ལྟ་བུར་བཀོད་པའི་སྲུང་བྱེད་ལ་ཐོ་ཡོར་དང་མཐོ་ཡོར།དཔྱིད་ཀྱི་ཕོ་ཉ་ལ་ཁུ་བྱུག་དང་ཁུ་དབྱུག བྲེལ་བ་མེད་པ་ལ་སོས་དལ་དང་སོས་གདལ། ལུགས་རྙིང་གི་ཚེས་པ་སུམ་ཅུ་ལ་ནམ་གང་དང་གནམ་གང་། ཉན་རྣ་ལ་འོན་སངས་དང་འོན་གསེང་། བཟོད་པའམ་བསམ་པ་ལ་བརྣགས་པ་དང་མནགས་པ་ལྟ་བུ་སོགས་ཀྱི་ཕྱི་མ་ནོར་རོ། །
《དཔའ་རིས་སངས་རྒྱས་ཀྱི་དཔྱད་རྩོམ》ལས་བདམས།