གྱོད་དཔེ།
ལོ་ངོ་དུ་མའི་རིང་ལ་ངའི་ཨ་ཅེ་དང་ཁོ་མོའི་སྐྱེས་པའི་བར་ལ་གཅིག་མཐུན་གྱི་སྐད་ཆ་ཅི་ཡང་བཤད་རྒྱུ་མེད་པ་མ་ཟད་ཕན་ཚུན་ལ་བཟའ་འདང་ཡང་མེད་པར་གྱུར། ཉིས་སྟོང་ལོའི་ཟླ་བཞི་བར་ངའི་ཨ་ཅེ་དང་ཁོ་མོའི་སྐྱེས་པའི་བར་ལ་ཁ་རྩོད་ཆུང་ངུ་ཞིག་བྱུང་རྗེས། ཁོ་མོའི་སྐྱེས་པ་རང་ཁྱིམ་དང་ཁ་བྲལ་ནས་ད་ལྟའི་བར་དུ་གར་སོང་ཆ་མེད་དུ་གྱུར། ཉེ་སྔོན་བདག་གི་ཨ་ཅེ་ཡིས་མི་དམངས་ཁྲིམས་ཁང་ལ་བཟའ་འཐོར་གྱི་ཞུ་གཏུག་ཡི་གེ་བྱིན་ཟིན་མོད། མི་དམངས་ཁྲིམས་ཁང་གིས་གྱོད་དོན་འདི་ལྟ་བུའི་རིགས་དང་ལེན་བྱེད་དམ།
གྱོད་བཤད།
ཁྱོ་ཤུག་ཕྱོགས་གཅིག་གར་སོང་ཆ་མེད་དུ་གྱུར་ནས་ཕྱོགས་གཅིག་གིས་བཟའ་འཐོར་ཞུ་གཏུག་བྱེད་པའི་གནད་དོན་ཐད་ལ་ཆེས་མཐོ་མི་དམངས་ཁྲིམས་ཁང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་གཏུག་བཤེར་བཅའ་ཁྲིམས》བཀོལ་སྤྱོད་བྱེད་པའི་སྐོར་གྱི་གནད་དོན་འགའི་བསམ་འཆར་ཞེས་པའི་དོན་ཚན་ང་བདུན་པར་གཏན་ཁེལ་བྱས་ཡོད་དེ། ཁྱོ་ཤུག་ཟུང་གི་ཕྱོགས་གཅིག་གར་སོང་ཆ་མེད་དུ་གྱུར་ནས་ཕྱོགས་གཞན་གཅིག་གིས་མི་དམངས་ཁྲིམས་ཁང་ལ་གཏུག་ནས་བཟའ་འཐོར་བྱེད་རྒྱུའི་རེ་བ་བཏོན་པ་དང་། ཁྱོ་ཤུག་ཕྱོགས་གཅིག་གར་སོང་ཆ་མེད་དུ་གྱུར་པའམ་ཡང་ན་ཤི་སོང་བ་ཁྱབ་བསྒྲགས་བྱེད་པའི་རེ་བ་མི་ཞུ་བའི་གྱོད་གཞི་ལ་མི་དམངས་ཁྲིམས་ཁང་གིས་བདག་སྤྲོད་བྱེད་དགོས་པ་མ་ཟད། གར་སོང་ཆ་མེད་དུ་གྱུར་པའི་མི་ལ་གཏུག་བཤེར་ཡི་གེ་སྤྱི་བསྒྲགས་དང་བསྐྱལ་སྤྲོད་བྱེད་དུ་འཇུག་དགོས་ཞེས་གཏན་ཁེལ་བྱས་ཡོད།
གཏན་ཁེལ་འདི་ལ་ནང་དོན་གསུམ་འདུས་ཏེ། གཅིག ཁྱོ་ཤུག་ཕྱོགས་གཅིག་གར་སོང་ཆ་མེད་དུ་གྱུར་ནས་ཕྱོགས་གཞན་གཅིག་གིས་བཟའ་འཐོར་རེ་བ་བཏོན་ཚེ་དེ་ལ་ཁྲིམས་ཁང་གིས་བདག་སྤྲོད་བྱེད་དགོས། གཉིས། མི་དམངས་ཁྲིམས་ཁང་གིས་བདག་སྤྲོད་བྱས་རྗེས་དམངས་དོན་གཏུག་བཤེར་བཅའ་ཁྲིམས་ཀྱི་གཏན་ཁེལ་བྱས་པ་བརྒྱུད་སྤྱིར་བཏང་གི་འགྲོ་རིམ་ལྟར་འདྲི་གཅོད་བྱེད་དགོས་པ་ལས་དམིགས་བསལ་གྱི་འགྲོ་རིམ་བསྒྲུབ་མི་ཆོག གསུམ། གར་སོང་མི་ཤེས་པའི་མི་ལ་གཏུག་བཤེར་ཡི་གེ་འཕྲོད་ཅི་ཐུབ་བྱེད་དགོས།
གོང་དུ་བརྗོད་པའི་ཁྲིམས་ལུགས་འགྲེལ་བཤད་དེ་གཞིར་འཛིན་དགོས་ཤིང་། ཁྱོད་ཀྱི་ཨ་ཅེ་ཡི་སྐྱེས་པ་གར་སོང་ཆ་མེད་དུ་གྱུར་པ་དོན་དངོས་ཡིན་ཚེ། ས་གནས་མི་དམངས་ཁྲིམས་ཁང་ལ་བཟའ་འཐོར་ཞུ་གཏུག་བྱོས་དང་མི་དམངས་ཁྲིམས་ཁང་གིས་གྱོན་དོན་དེ་བདག་སྤྲོད་བྱེད་ངེས་ཡིན། །