ཀྲུང་གོ་བོད་ཀྱི་དྲ་བ།

ཡིད་ལྷུང་ལྷ་མཚོ།

ཡོང་ཁུངས། : མཚོ་སྔོན་བོད་ཡིག་གསར་འགྱུར།   རྩོམ་པ་པོ། : གཅན་ཚང་རིན་ཆེན་རྒྱལ།   སྤེལ་དུས། : 2019-04-15
ཡིག་གཟུགས། :ཆུང་། འབྲིང་། ཆེ།

ལོ་ཟླ་ནི་བྱ་ཆེན་གྱི་གྲིབ་མ་བཞིན་དུ་ཡལ་ཟིན་ཡང་།

ངག་རྒྱུན་དེ་སེར་ཐིག་ལྷུང་བའི་སྡོང་ལོ་ཐོར་བ་དང་མི་འདྲ།

དུས་དབྱར་ཁ་ཡིན་རུང་གཡུ་ཡི་མེ་ལོང་ཞིག་དང་མི་འདྲ་ལ།

རང་བྱུང་གི་བཞུར་བ་དེ་ཨུ་ཚུགས་ཀྱིས་བསྡེབས་པའི་རོལ་དབྱངས་ཤིག་ཀྱང་མིན།

གོ་ཐོས་ལྟར་ན། ཁྱོད་ལ་དྭངས་ཤ་མེད་དེ།

གླིང་གི་རྟ་དམག་ཤི་གསོན་ལ་ཐུག་པའི་ཉིན་མོ་དེར།

དམག་རྟ་ཁྲི་ཕྲག་གི་ལྕགས་ཀྱི་སྙིང་རྩ་དེ་ཁྱོད་ཡིན་ཟེར།

ཞིབ་ཀྱིས་བལྟས་ན།ཁྱོད་ལ་ན་ཟུག་ཀྱང་མེད་དེ།

གླིང་འབྲུག་མོ་ཁེར་ཧྲེང་ཡིན་པའི་མཚན་མོ་དེར།

ཁྱོད་ནི་སྐྱོ་བ་བསལ་བའི་མེ་ཏོག་ཅིག་ཡིན་ཟེར།

ནམ་རྒྱུན།  རྫ་རིའི་ཤོད་ན་ཁེར་རྐྱང་གི་ཚུལ་དུ།

འདབ་ཆགས་དང་རི་དྭགས་བག་ཡངས་ངང་རྒྱུ་བ་མེད་ཀྱང་།

རྟུལ་ཕོད་ཀྱི་ངར་དྲི་མ་ཡལ་བའི་འཇིགས་ཉམས་དེ།

ལོ་རྒྱུས་ཀྱི་གྲིབ་མ་ཙམ་མ་ཡིན་པའི་ལྷོད་ཤ་དེ།

ལྗོངས་རྒྱུ་བ་གང་མང་སླེབས་ཐེངས་རེ་ལ།

ལྷག་ལུས་མེད་པར་ར་མ་སྤྲད་པའི་དུས་ཤིག་ནམ་ཡང་མེད།

མདང་ནུབ། ང་རྒྱུ་མཚན་ཅི་ཡང་མེད་པར།

རྨི་ལམ་ཞིག་ལས་སྔངས་སད་བརྒྱབ་བྱུང་།

ངས་ཚོད་ཚོད་ལ་བསམ་གཞིག་མང་པོ་བྱས་མཐར།

གལ་ཏེ། ཁྱོད་རང་གླུ་ཞིག་ཡིན་ཆོག་ན།

རྟ་རྒྱབ་ཀྱི་དཔའ་བོའི་ངར་སྐད་དེ་ཇི་ལྟར་ལེན་འོས།

གལ་ཏེ། ཁྱོད་རང་མེ་ཏོག་ཅིག་ཡིན་ན།

ངའི་བརྩེ་དུང་གི་རྣམ་ཤེས་དེར་ཁ་དོག་གང་ཞིག་འབྱུག

ཡིད་ལྷུང་ལྷ་མཚོ། མདོར་ན།

ཁྱོད་ནི་དབྱར་དྲུག་པའི་ནམ་མཁའ་ལས་ཤོར་སོང་བ་ཞིག་མིན་ཞིང་།

བསྐྱུར་མི་ཕོད་པ་དག་གིས་བསྐྱུར་སོང་བའི་མིག་ཆུའང་མིན་ཏེ།

ཁྱོད་ནི་དུས་གཏན་དུ་འགག་མི་སྲིད་པའི་ལོ་རྒྱུས་ཀྱི་ང་རྒྱལ་ཡིན།

བྲོ་བ་ཡལ་མ་མྱོང་བའི་དུས་ཚིགས་ཀྱི་མཛེས་པ་ཡིན།

དེ་བས། ཟླ་བ་མེད་པའི་མཚན་མོ་རེ་རེར།

ང་ཁུ་སིམ་པོར་འདུག་དུས་སུ།

སྨྲ་བསམ་བརྗོད་འདས་ཀྱི་སྡུག་བསྔལ་ཞིག་ཡོད་རྐྱེན།

འུ་གཉིས་འཕྲད་པའི་གོ་སྐབས་མ་བྱུང་ཡང་།

གཙང་མ་གཙང་དག་གིས་ང་ཡི་སེམས་སུ་བཞུར་ཤོག

ཁྱོད་ཁོ་ན་ང་ལ་མེད་མི་ཆོག་པའི་རྨི་ལམ་གྱི་རྣམ་ཤེས་དེ་ཡིན།

རྩོམ་སྒྲིག་པ། : མཁའ་མཚོ་སྐྱིད།