—T R Jལ་རྗེས་དྲན་དུ།
གཅིག
མཚན་མོ་འདིར།
ཟླ་འོད་འོག་ཏུ།
དགུན་དུས་ཀྱི་མང་ཆུ།
ཁུ་སིམ་མེར་ཁད་ཀྱིས་བཞུར།
མིག་ཆུའི་རྗེས་ཤུལ་ཡལ་བའི་དཀའ་སྡུག་ཁྲོད་ཤར་མར་འབབ།
ཁྱོད་ཀྱི་སྙིང་གི་འཕར་སྒྲ་ཐོས་པ་ནང་བཞིན།
མཚན་མོ་འདིར།
གློག་སྒྲོན་འོག་ཏུ།
དགུན་དུས་ཀྱི་མང་ཆུ།
དྭངས་ཤིང་གསལ་ལ་མཐིལ་ཞབས་མཐོང་།
དྭངས་གསལ་ནི་ཁྱོད་ཀྱི་གཞོན་དུས་ཀྱི་མིག་མདངས་ཇི་བཞིན།
ཁྱོད་ཀྱི་ལོ་ཟླའི་རྒས་ཉམས་ཇི་བཞིན་མཐོང་ཐུབ།
ཁྱོད་རང་སྐྱེས་ས་མང་ཆུའི་འགྲམ།
ལང་ཚོ་རྒྱས་ས་མང་ཆུའི་འགྲམ།
འཚོ་བའི་བསྟི་གནས་མང་ཆུའི་འགྲམ།
ཁྱིམ་གཞིས་ཆགས་ས་མང་ཆུའི་འགྲམ།
ཁྱོད་ཀྱི་ཤ་ཉེ་རིང་། ཁྱོད་ཀྱི་བུ་དང་བུ་མོ།
ཁྱོད་ཀྱི་གྲོགས་པོ། ཁྱོད་ཀྱི་ཡོད་ཚད་ཀྱི་ཡོད་ཚད།
མང་ཆུའི་འགྲམ་ན་ཡོད།
མང་ཆུའི་འགྲམ་ན་ལུས།
ཁྱོད་རང་བཞུད་པའི་མཐའ་མཇུག་གི་དུས་དེར།
ང་ཚོས་མང་ཆུའི་འགྲམ་དུ་ཁྱོད་ལ་སྐྱེལ་མ་ཞུས།
ཁྱོད་ལ་སྐྱེལ་མ་ཞུས། བདག་གི... ...
གཉིས།
ཡོད་ཚད་གདོད་མ་ནས་ཅི་ཡང་མ་བྱུང་།
བདག་རང་ད་དུང་རྒྱང་རིང་ནས་ཕ་ཡུལ་དུ་ལྡོག
ང་ཚོ་མཉམ་གཅིག་ཏུ་འཚར་ལོངས་བྱུང་བའི་ཕ་ཡུལ་དུ་འཛོམས།
ཁྱུང་ཐོད་རི་བོའི་འདབས་སུ། མང་ཆུའི་འགྲམ་དུ།
རུ་སྡེ་ཁྲ་མོ་དེ། ངེད་ཚང་གི་རྒྱབ་ན་ཁྱོད་ཚང་གི་སྒོ་ཆེན་ཡོད།
ཉེ་ལོགས་སུ་རྒྱ་ལོ་ཚང་ཆགས།
ད་དུང་སྔར་བཞིན།
ཁྱོད་གཉིས་ཀྱིས་ངེད་ཚང་གི་སྒོ་དྲུང་དུ་འཛུམ་དམུལ་ལེར་བདག་རང་ཕྱིར་ལོག་པར་བསུ་མ་བྱེད།
གསུམ།
མཚན་མོ་འདིར།
སྐྱོ་སྡུག་གི་མ་ཎིའི་དབྱངས་རྟ་དག
ཁྱོད་ཚང་གི་ར་སྐོར་ནས།
ཆོས་ཀྱི་འཁོར་ལོའི་སྒྲ་དང་ལྷན་ཅིག་ཏུ།
རུ་སྡེ་ཡོངས་ལ་ལྡིང་སྐོར་རྒྱག ཕ་ཡུལ་གྱི་མཁའ་དབྱིངས་སུ་ལྡིང་སྐོར་རྒྱག
དེ་དུས ཕ་ཡུལ་གྱི་མཚན་མོའི་མཁའ་དབྱིངས་ནི་ཇི་འདྲའི་སྐྱོ་ཨང་།
དེ་དུས ཕ་ཡུལ་གྱི་ཟླ་བ་ནི་ཇི་འདྲའི་ཁེར་རྐྱང་ཞིག་རེད་ཨང་།
བསྐྱར་ཟློས་དང་བསྐྱར་ཟློས་ཀྱི་ཀློང་ལ་བསྐྱོན་པའི་མ་ཎིའི་དབྱངས་རྟ་དག
བདག་གི་སྙིང་ཁར་སྡུག་གི་འཁུན་སྒྲར་རྟོག
ཇི་འདྲའི་ཞེ་སྐྱོ་བ་ལ་ཨང་།
བཞི།
བྱིས་པའི་དུས། སློབ་ཆུང་འགྲིམ་པའི་སྐབས་དེར།
ཕལ་ཆེར་ནམ་རྒྱུན་བདག་རང་ཆེས་སྔ་མོར་ཞོགས་པ་ནས་མལ་ལས་ལྡང་བར་རྩོམ།
ནམ་རྒྱུན་གྱི་ཞོགས་པ་ཁྱོད་གཉིས་བོས་ནས་སློབ་གྲྭ་འགྲིམ།
སྐབས་འགར་རྒྱ་ལོའི་དལ་ལྷོད་ལྷོད་ཀྱི་ཚུགས་ཀར་བཟོད་ཐབས་བྲལ།
སློབ་འབྲིང་འགྲིམ་མགོ་ཚུགས་རྗེས།
ངེད་གསུམ་པོས་ཕལ་ཆེར།
ང་ཚོའི་ཁྱིམ་ཚང་གསུམ་འཕྲོག་རེས་བྱེད་པ་དང་འདྲ།
སུ་ཚང་གི་གསར་དུ་འགྲུབ་པའི་ཁང་པ་ཡག་པོའི་ནང་དུ།
ང་ཚོ་ཚང་མ་ཚ་ཐབ་སྟེང་འཚང་ག་རྒྱག
དྲན་ཨེ་བྱུང་། ཆུང་དུས་ཀྱི་ལོ་ཟླ།
ཁྱོད་གཉིས་དང་ལོ་གཉིས་ཀྱིས་ན་ཕྲ་བའི་སྐེམ་རིད་གཟུགས་ཆུང་གི་བདག
མཚན་རེར་ཉལ་ཐུལ་འཕྲོག་ནས་རྒྱལ་ཁ་ཞིག་བླངས་མ་མྱོང་།
ཕྱིས་སུ་ངས་ནམ་རྒྱུན་འདི་ལྟར་ལབ་སྟེ། སྐབས་དེར་གཉིད་ལོག་སྐབས།
ཁྱོད་གཉིས་རྒྱ་སྟག་ཅིག་དང་འདྲ་བར་ཁ་སྦུབ་ཏུ་ལྷོད་ཀྱིས་ཉལ།
ཡིན་ནའང་བདག་ནི་ཁྱི་ཞིག་དང་འདྲ་བར་ཟུར་གྱིས་ཉལ།
རེད་ལགས།
ང་ཚོས་མཉམ་དུ་དཔེ་ཆ་བཀླགས།
ང་ཚོས་མཉམ་དུ་ནོར་ལུག་འཚོས།
ང་ཚོས་མཉམ་དུ་འགྱིག་མདའ་རྩེས།
ང་ཚོས་མཉམ་དུ་ཨ་རྡོ་རྩེས།
རེད་ལགས།
ང་ཚོ་མཉམ་དུ་ག་ལེར་འཚར་ལོངས་བྱུང་།
ང་ཚོས་མཉམ་དུ།
དུ་བ་ལྐོག་འཐེན་བྱས་ནས་མི་རྒན་གྱི་བཟོ་ལྟ་བསྟན་པ་དྲན་ཨེ་བྱུང་།
ང་ཚོས་མཉམ་དུ།
ཨ་རག་ལྐོག་འཐུང་བྱས་ནས་བུད་མེད་གླེངས་པ་དྲན་ཨེ་བྱུང་།
རེད་ལགས།
ང་ཚོས་མཉམ་དུ་དེ་དུས་ཀྱི་ཉིན་མཚན་ཀུན་མུ་ནས་མུ་ལ་བསྐྱལ།
ང་ཚོ་མཉམ་དུ་འབྲིང་རྒྱུགས་ལ་ཞུགས་ཏེ་སོ་སོའི་བགྲོད་ལམ་ལ་བསྙེགས།
ང་ཚོས་མཉམ་དུ་ལས་ཀ་སྒྲུབ་མ་ཐུབ།
ང་ཚོས་མཉམ་དུ་གཉེན་སྒྲིག་བྱེད་མ་ནུས།
ང་ཚོས་་་་་་
ལྔ།
མཚན་མོ་འདིར།
ངའི་ལག་པ་འདར་ཐེངས་དང་བོའམ་ཆེས་མཐའ་མཇུག་གིས།
འཁྱག་རེངས་སུ་གྱུར་བའི་ཁྱོད་ཀྱི་ལུས་པོར་རེག
ངག་ནས་གསོལ་བ་དྲག་ཏུ་བཏབ།
མཚན་མོ་འདིར།
ངས་མགོ་བོ་ཡར་དགྱེ་ནས།
ཕ་ཡུལ་གྱི་མཚན་མོའི་མཁའ་དབྱིངས་ཁྲོད།
སྐད་ཅིག་ལ་འཁྱུག་པའི་རྒྱུ་སྐར་དེར་འཚོལ་ཞིབ་བྱས།
མཚན་མོ་འདིར།
ངས་སོར་མོ་སྙིང་གར་སྦྱར་ནས་ཕྱག་འཚལ།
ཕ་ཡུལ་གྱི་ས་གཞི་སྟེང་།
ཉམས་པ་མེད་པའི་དག་ཞིང་འཚོལ་ཞིབ་བྱས།
མཚན་མོ་འདིར།
བདག་རང་ཚེ་སྲོག་རེ་རེ་བསྐྱེད་པའི་བདེ་སྐྱིད་ལ་སོམ་ཉི་སྐྱེས་བྱུང་།
མཚན་མོ་འདིར།
བདག་གིས་རྣམ་ཤེས་ཀྱི་ཀློང་ལ་འཐིམ་པའི་དད་མོས་ལ་དོགས་འདྲི་བཏང་ཡོད།
མཚན་མོ་འདིར།
འདི་ལྟ་བུའི་མཚན་མོ་འདི་ལ།
བདག་རང་ཁྱོད་ཀྱི་དར་མའི་གཟི་དཔལ་གྱིས་བརྟས་པའི་ངོ་གདོང་དང་འབྲལ་མི་སྤོབས།
དྲུག
བདག་རང་ཕ་ཡུལ་གྱི་ཁྱུང་ཐོད་རི་བོར་འགྲེངས་ཏེ་བལྟས་པ་ན།
རིའི་རྒྱབ་ལོགས་ཀྱི་བྱེ་ཐང་ནི།
དགུན་གྱི་གྲང་རླུང་ཁྲོད་དེ་བས་མཐའ་མི་མངོན་ལ།
ང་ཚོ་ཆུང་དུས་སུ་རྩེད་འཇོར་གཡེང་བའི་རྐང་རྗེས་དག་དེ་ཡིས་ཡོངས་སུ་སྦས་སོང་།
ང་རང་ཕ་ཡུལ་གྱི་ཁྱུང་ཐོད་རི་བོར་འགྲེངས་ཏེ་བལྟས་པ་ན།
རི་འདབ་ཀྱི་མང་ཆུ་ནི།
དགུན་གྱི་ཉི་འོད་བཙན་པོའི་འོག་ཏུ་སྔར་བས་ཐོགས་པ་མེད་པར་བགྲོད་ཅིང་།
ང་ཚོ་ཆུང་དུས་སུ་ཆུ་རྩེད་བྱས་པའི་གཟུགས་བརྙན་དག་གསལ་བོར་མཐོང་ཡོང་།
བདག་རང་ཕ་ཡུལ་གྱི་ཁྱུང་ཐོད་རི་བོར་འགྲེངས་ཏེ།
བདག་གློ་བུར་ཅི་བྱ་གཏོལ་བྲལ་དུ་གྱར།
བདག་གིས་ཅི་ཞིག་བསྒྲུབ་ནུས།
བདག་གིས་ཅི་ཞིག་བསྒྲུབ་དགོས།
བདག་གིས་ཕ་ཡུལ་གྱི་བྱེ་ཐང་དུ།
ཕ་ཡུལ་གྱི་མིང་བྱང་རེ་བྲིས་མོད།
དེ་ཡང་“དྲི་རྟགས་”འགོད་དགོས་སམ་ཡང་ན་“འབོད་རྟགས་”འགོད་དགོས་པ་གཞི་ནས་རྟོགས་མ་བྱུང་།
བདུན།
བདག་རང་ཡང་བསྐྱར་ཕ་ཡུལ་དང་གྱེས་བྲལ་བྱེད་དགོས་བྱུང་།
ཁྱོད་ཚོར་བྲལ་ནས། རྒྱང་དུ་བཞུད་འགྲོ།
བདག་གི་སྤུན་གྲོགས།
བདག་ལ་སྐྱེལ་མ་གནང་རོགས། དུས་རྒྱུན་ནང་བཞིན་བདག་ལ་སྐྱེལ་མ་གནང་རོགས།
ཁྱོད་ཀྱིས བདག་ལ་སྐྱེལ་མ་གནང་རོགས།
བདག་གིས་ཕ་ཡུལ་གྱི་དགུན་ཁ།
ཇི་བཞིན་བསྐྱུར་འདོད།
སྐྱོ་སྣང་དང་གྲང་ངར།
རྒྱང་རིང་གི་རྒྱང་རིང་དུ་འཁྲིད་འགྲོ།
བདག་གི་སྤུན་གྲོགས།
བདག་ལ་སྐྱེལ་མ་གནང་རོགས།
དུས་རྒྱུན་ནང་བཞིན་བདག་ལ་སྐྱེལ་མ་གནང་རོགས།
ཁྱོད་ཀྱིས བདག་ལ་སྐྱེལ་མ་གནང་རོགས།
འུར་གྱིས་ལྡང་བའི་ཕ་ཡུལ་གྱི་རླུང་བུས།
ཁྱོད་ཀྱི་སྡུག་བསྔལ་དང་སྐྱོ་གདུང་ཡོད་ཚད།
དྲན་པ་དང་ཞེན་ཆགས་ཡོད་ཚད་ཁྱེར་ནས།
དག་པའི་ཞིང་དུ་སྐྱེ་བར་སྨོན།
བདེ་ལྡན་ཞིང་དུ་སྐྱེ་བར་སྨོན།
2018ལོའི་ཟླ་12པའི་ཚེས་12ཉིན་མང་རྫོང་མང་ཆུའི་འགྲམ་དུ་འབྲི་མགོ་ཚུགས།
2019ལོའི་ཟླ་3པའི་ཚེས་12ཉིན་གྱི་ཕྱི་དྲོར་སེམས་ཀྱི་ཉི་ཟླར་ཡོངས་སུ་གྲུབ།
༢༠༡༩ལོའི་༼གངས་རྒྱན་མེ་ཏོག་༽དེབ་གཉིས་པར་འཁོད་ཡོད།