ཟླ7པའི་ཚེས9ཉིན། རྒྱལ་ཁབ་ཀྱི་ཀྲུའུ་ཞི་གཞོན་པ་ཝང་ཆི་ཧྲན་གྱིས་ཕེ་ཅིན་ཀྲུང་ནན་ཧའེ་ནས་མ་ལེ་ཞི་ཡའི་ཙུང་ལི་གཞོན་པ་ཝང·ཨ་ཙི་ཧྲ་དང་མཇལ་འཕྲད་གནང་།
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ7པའི་ཚེས9ཉིན། རྒྱལ་ཁབ་ཀྱི་ཀྲུའུ་ཞི་གཞོན་པ་ཝང་ཆི་ཧྲན་གྱིས་ཀྲུང་ནན་ཧའེ་ནས་མ་ལེ་ཞི་ཡའི་ཙུང་ལི་གཞོན་པ་ཝང·ཨ་ཙི་ཧྲ་དང་མཇལ་འཕྲད་གནང་།
ཝང་ཆི་ཧྲན་གྱིས་བསྟན་དོན། ཀྲུང་གོ་དང་མ་ལེ་ཞི་ཡའི་མཛའ་མཐུན་གྱི་འགྲོ་འོང་རྒྱུན་རིང་ལ་དམངས་སེམས་གཅིག་མཐུན་གྱི་རྨང་གཞི་ཟབ་མོ་ཡོད། མིག་སྔར། ཀྲུང་གོས་ཧུར་ཐག་གིས“ལོ་བརྒྱ་ཅན་གཉིས”ཀྱི་འབད་འཐབ་དམིགས་ཚད་མངོན་འགྱུར་བྱེད་བཞིན་ཡོད་པ་དང་། མ་ལེ་ཞི་ཡས་ཀྱང“2030ལོའི་ཕུགས་འདུན”ལེགས་སྒྲུབ་བྱ་རྒྱུའི་དམ་བཅའ་བཞག་ཡོད་པས། རྒྱལ་ཁབ་གཉིས་ཀྱི་འགོ་ཁྲིད་མི་སྣས་ཐུན་མོང་གིས་ཀྲུང་གོ་དང་མ་ལེ་ཞི་ཡའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་གཏན་འཁེལ་བྱས་ནས། ཀྲུང་གོ་དང་མ་ལེ་ཞི་ཡའི་འབྲེལ་བ་ལ་ཁ་ཕྱོགས་གསལ་སྟོན་བྱས་ཡོད། ཕྱོགས་གཉིས་ཀྱིས་ཕྱི་འབྲེལ་བཙུགས་ནས་ལོ45འཁོར་བའི་གོ་སྐབས་དམ་འཛིན་བྱས་ཏེ་ཁྱབ་ཁོངས་ཁག་དང་རིམ་པ་ཁག་གི་འགྲོ་འོང་ཇེ་ཟབ་ཏུ་གཏོང་བ་དང་། “རྒྱུད་གཅིག་ལམ་གཅིག”སོགས་ཁྱབ་ཁོངས་ཀྱི་གཉིས་ཕན་མཉམ་ལས་མཉམ་སྐྲུན་ཇེ་ཟབ་ཏུ་བཏང་སྟེ། མི་ཆོས་སྤེལ་རེས་དང་སྤྱི་ཚོགས་བཅོས་སྐྱོང་གི་ཉམས་མྱོང་ཕན་ཚུན་ལ་སློབ་སྦྱོང་བྱ་རྒྱུར་ཤུགས་སྣོན་རྒྱག་པ་དང་། ཕྱོགས་གཉིས་ཀའི་ཁེ་ཕན་གྱི་འབྲེལ་ཐག་རྒྱུན་ཆད་མེད་པར་དམ་དུ་གཏོང་བ་དང་། ཀྲུང་གོ་དང་མ་ལེ་ཞི་ཡའི་མཛའ་མཐུན་རྒྱུན་འཛིན་བྱས་ནས་རྒྱལ་ཁབ་གཉིས་ཀྱི་མི་དམངས་ལ་བདེ་སྐྱིད་བསྐྲུན་དགོས།
ཝང·ཨ་ཙི་ཧྲ་ཡིས་བསྟན་དོན། མ་ལེ་ཞི་ཡ་ཕྱོགས་ཀྱིས་ཀྲུང་གོའི་འབྲེལ་བར་ཚད་མཐོའི་མཐོང་ཆེན་བྱེད་ཀྱིན་ཡོད། ཀྲུང་གོ་ཕྱོགས་དང་མཉམ་དུ་མ་ལེ་ཞི་ཡ་དང་ཀྲུང་གོའི་སྲོལ་རྒྱུན་མཛའ་གྲོགས་རྒྱུན་འཛིན་དང་འཕེལ་རྒྱས་གཏོང་བ་དང་། ཁྱབ་ཁོངས་ཁག་གི་མཉམ་ལས་སྤེལ་རེས་ཇེ་ཟབ་ཏུ་གཏོང་བ། “རྒྱུད་གཅིག་ལམ་གཅིག”དང་འབྲེལ་བའི་མ་ལེ་ཞི་ཡ་དང་ཨེ་ཤ་ཡ་ཤར་ལྷོའི་མནའ་འབྲེལ་རྒྱལ་ཁབ་བར་གྱི་མཉམ་ལས་བྱེད་པའི་སྦས་ཤུགས་སྔོག་འདོན་བཅས་བྱས་ནས། མ་ལེ་ཞི་ཡ་དང་ཀྲུང་གོ་བར་གྱི་འཐབ་ཇུས་ཀྱི་ནང་དོན་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་འདོད་ཡོད་ཅེས་གསུངས་པ་རེད། །