མདུན་ཤོག- གནས་སྐོར།- གནས་སྐོར་ཞབས་ཕྱི།

རི་ཆུ།

  ཡོང་ཁུངས། མཚོ་སྔོན་ཞིང་ཆེན་སྲིད་གཞུང་དྲ་བ།  2014-07-30 11:28

མདོ་དབུས་མཐོ་སྒང་གི་རི་རྒྱུད་གཙོ་ཆེ་བ་ཤར་ནུབ་འཁོར་ཕྱོགས་དང་ལྷོ་བྱང་འཁོར་ཕྱོགས་ཏེ་ཚན་པ་གཉིས་ཡོད། ཤར་ནུབ་འཁོར་ཕྱོགས་ཀྱི་རི་རྒྱུད་ནི་ཕ་སྨིར་མཐོ་སྒང་ནས་ཤར་དུ་འགྱེད་འཕྲོ་རྣམ་པའི་འཕྲེལ་བསྣོལ་བྱས་ཏེ་བསྲིངས་ཡོད་པའི་མཐོ་སྒང་སྟེ། བྱང་ནས་ལྷོ་ལ་རིམ་བཞིན་ཆགས་པའི་རི་རྒྱུད་དྲུག་ཡོད།

1. ཨར་ཅག་རི་བོ་དང་མདོ་ལ།

དེ་ནི་མཐོ་སྒང་གི་བྱང་སྣེར་ཆགས་ཏེ། མདངས་ཅན་ཉག་ག་ནི་རི་གཉིས་ཀྱི་དབྱེ་མཚམས་ཀྱི་ཐིག་ལེ་ཡིན།

2. ཁུན་ནུ་རི་བོའི་ནུབ་ནས་བརྩམས་པའི་ཕ་སྨིར་མཐོ་སྒང་།

ཤར་དུ་བསྲིངས་པའི་སི་ཁྲོན་ཞིང་ཆེན་གྱི་ནུབ་བྱང་གི་རི་རྒྱུད་དེ། རིང་ཚད་སྤྱི་ལེ25100ཡོད་ལ། མཐོ་ཚད་ཆུ་མཚམས5000ནས6000ཡིན།

3. ཁ་ལ་ཁུ་ནུ་ལ་དང་གདང་ལ་རི་རྒྱུད།

ཁ་ལ་ཁུ་ནུ་ལ་དེ་ཕལ་ཆེ་བ་ཤིན་ཅང་དང་ཀ་ཤི་སྨིར་འབྲེལ་མཚམས་སུ་ཆགས་ཤིང་། བོད་ཁོངས་སུ་རི་དེ་ཤར་རྒྱུད་ཀྱི་ཆ་ཤས་ཙམ་ལས་མེད། གདང་ལ་རི་རྒྱུད་ནི་བོད་ལྗོངས་དང་མཚོ་སྔོན་གྱི་ས་མཚམས་དབྱེ་ཐིག་ལྟ་བུ་ཡིན།

4. གངས་ཏི་སེའདང་གཉན་ཆེན་ཐང་ལྷའི་རི་རྒྱུད།

དེའི་ཤར་ནུབ་རིང་ཚད་ཧ་ལམ་སྤྱི་ལེ1400དང་ལྷོ་བྱང་གི་ཞེང་ཚད་སྤྱི་ལེ80ཡོད་ལ། མཐོ་ཚད་ཆུ་མཚམས5800ནས6000དང་སྨི6000བརྒལ་བའི་རི་རྩེ25སྣང་།

5. ཧི་མ་ལ་ཡའི་རི་རྒྱུད།

དེ་ནི་མཐོ་དབུས་མཐོ་སྒང་གི་ལྷོ་མཐའི་རྒྱུད་དུ་ཆགས་ཤིང་བོད་ཀྱི་གཞུང་རྒྱུག་རི་རྒྱུད་ཆེ་ཤོས་རེད། རི་རྒྱུད་དེའི་རིང་ཚད་ལ་སྤྱི་ལེ༢༤༠༠དང་ཞེང་ལ་སྤྱི་ལེ༢༠༠ནས༣༠༠བར་ཡོད་ལ། རི་རྒྱུད་དའི་སྣེ་གཉིས་ནང་དུ་གུག་ཅིང་དཀྱིལ་རྒྱུད་ལྷོ་ཕྱོགས་སུ་འབུར་བས་དབྱིབས་གཞུ་དང་མཚུངས་ཤིང་རི་བོ་མཐོ་ཞིང་གཟར་ལ། ཆ་སྙོམས་མཐོ་ཚད་ཆུ་མཚམས་སྨིས6000ཡན་ཤིན་གྱི་ཡོད། སྨི7000བརྒལ་བའི་རི་རྩེ40ལྷག་དང་སྨི8000ལ་སླེབས་པའི10ལྷག་ཙམ་ཡོད། འཛམ་གླིང་གི་རི་བོ་མཐོ་ཤོས་ཇོ་མོ་གླང་མ་དེ་ཡང་རི་རྒྱུད་དེའི་དཀྱིལ་རྒྱུད་རང་རྒྱལ་དང་བལ་བོའི་ས་མཚམས་སུ་ཆགས་ཤིང་མཐོ་ཚད་ཆུ་མཚམས8848.13ཡོད།

6. ལྷོ་བྱང་འཁོར་ཕྱོགས་ཀྱི་རི་རྒྱུད།

དེ་ནི་གཙོ་ཆེར་མཐོ་སྒང་གི་ཤར་ལྷོའི་རྒྱུད་ཀྱི་བོད་ལྗོངས་ཤར་ཕྱོགས་དང་སི་ཁྲོན་གྱི་ནུབ་ཕྱོགས་སུ་ཆགས་ཤིང་། ལྷོ་བྱང་ཕྱོགས་སུ་མཉམ་གཤིབ་ཏུ་སྟར་ཆགས་པར་བསྒྲིགས་པའི་རི་ཆེན་དང་ལུང་གཞུང་དུ་མ་ལས་གྲུབ་སྟེ། དེ་ལ་འཕྲེད་ཆོད་རི་རྒྱུད་དུ་བྱ།

རི་བོ་གྲགས་ཅན་གཉིས་ཏེ།

1.རི་བོ་ཉི་ཟླ།

མཚོ་སྔོན་ཞིང་ཆེན་གྱི་མཚོ་སྔོན་པོའི་ཤར་ཕྱོགས་ཀྱི་སྤྱི་ལེ་བཞི་བཅུའི་མཚམས་ན་ཡོད་ཅིང་། ད་ལྟ་སྣང་བའི་ཉི་ཟླའི་ལྷ་ཁང་གཉིས་ནི་ལོ་རབས་བརྒྱད་ཅུ་པའི་དུས་མགོར་བཞེངས་པ་ཡིན།བོད་མིའི་ངག་རྒྱུན་དུ། རྒྱ་ནག་ནས་སྲོང་བཙན་ལ་བཙུན་མོ་བསུ་དུས། མགར་སྟོང་བཙན་གྱིས་ཀོང་ཇོས་ཡུལ་དང་ཡབ་ཡུམ་མི་དྲན་པའི་ཐབས་སུ་རྫོང་སྐལ་རྡོ་ལ་གསེར་ཚོས་བྱུགས་པའི་ཉི་ཟླ་རྫུན་མ་ཞིག་ཁྱེར་ནས་གནས་འདིའི་ཉག་ཁར་ཐོན་འཕྲལ་སྤྱན་གཟིགས་ཞུས། དེར་བརྟེན་ནས་ཀོང་ཇོ་ཡབ་ཡུམ་ལ་ཁོ་ཆད་དེ་བློ་རྩེ་གཅིག་གིས་བོད་དུ་ཕེབས་པའི་སྐོར་མང་དུ་བཤད་རྒྱུ་ཡོད། འཆད་ཚུལ་འདི་བོད་རིགས་དམངས་ཁྲོད་ཀྱི་ངག་རྒྱུན་དང་སྒོ་བསྟུན་ནས་བཀོད་པ་ལས། ངེས་པར་བདེན་དགོས་པ་མ་ཡིན་ཏེ། རྒྱ་ནག་གི་ཡིག་ཚང་སྔ་ཤོས་སུ་གྲགས་པ«རི་ཆུའི་བསྟན་བཅོས»ལས་རི་བོ་ཉི་ཟླ་ཞེས་པའི་མཚན་འདི་གསལ་བར་འབྱུང་བས། དེ་ཞ་དབྱི་ཞེས་པའི་སྐྱེས་བུ་དེས་བརྩམས་པའི་དབང་དུ་བཏང་ན་མི་ལོ་སྟོང་ཕྲག་ཁ་ཤས་ཀྱི་སྔོན་ནས་རི་འདི་ལ་མིང་དེ་ལྟར་ཐོགས་པར་གསལ། གཞན་ཡང་ཡུལ་འདི་གནའ་དེང་གང་གི་སྐབས་སུའང་རྒྱ་བོད་ཀྱི་ཚོང་འགྲུལ་རྒྱུ་ལམ་དུ་གྱུར་པའི་ཕྱིར་ཉི་ཟླ་དཔང་དུ་བཞག་སྟེ་རྒྱ་བོད་ཞི་མཐུན་གྱི་རྡོ་རིང་བཞེངས་མྱོང་བའི་སྔོན་བྱུང་གི་ལོ་རྒྱུས་ཤིག་ལས་མིང་དེ་ལྟར་ཐོགས་པ་ཡིན་པར་ཡང་སྲིད།

2.ཨ་མྱེས་དར་རྒྱལ།

ཨ་མྱེས་དར་རྒྱལ་དུ་འབོད་པའི་རི་བོ་འདི་ནི། མདོ་སྨད་ཡུལ་དུ་ཆེས་མཐོ་ཤོས་སུ་བརྩི་བའི་རི་རྒྱུད་ཅིག་ཡིན་ཞིང་། གཞི་བདག་ཆེ་གཉན་ཅན་ཨ་མྱེས་དར་རྒྱལ་གནས་པའི་རི་ཡིན་པས་ན་རི་མིང་ཡང་དེ་ལྟར་ཐོགས་པར་བཤད། རི་དེ་ནི་ད་ལྟའི་མཚོ་སྔོན་ཞིང་ཆེན་ཞུན་ཧྭ་རྫོང་རྡོ་སྦིས་ལུང་བའི་མགོ་དང་། ཀན་སུའུ་ཡི་ཀ་ཆུ་གྲོང་ཁྱེར་གྱི་ལྷོ་ནུབ་ཀྱི་ཚོང་ལམ་ཕྱོགས་ན་ཡོད། རི་བོ་དེ་དར་རྒྱལ་དུ་གྲགས་ལ། དོན་དུ་ད་རྒྱལ་ཡིན་ཚོད་དུ་སྣང་།དེ་ཡང་མིང་ཇི་ལྟར་ཐོགས་ལུགས་ནི་ཏུན་ཧོང་གཏེར་ཡིག་ལས། གླང་གི་ལོ(སྤྱི་ལོ653)ལ་བབ་སྟེ་བཙན་པོ་ཉེན་ཀེར་ན་བཞུགས་ཤིང་། བློན་ཆེ་སྟོང་བཙན་གྱིས། གཡུག་ཏུ་གནག་ལིངས་བཏབ། ད་རྒྱལ་མང་པོ་རྗེས་ཞིང་གི་འཕྱིང་རིལ་བགྱིས། མདོ་སྨད་དུ་ཀམ་ཁྲི་བཟང་བྱེ་འདའ་ཐོང་མྱིས་བཀུམ་སྟེ་ཤ་གཉེརད་ཕར་ལོ་གཆིག་ཅེས་བཀོད་པར་དཔྱད་ན། ད་རྒྱལ་མང་པོ་རྗེ་ནི་བོད་རྒྱལ་སྲོང་བཙན་སྒམ་པོའི་བློན་ཆེན་གྱི་གྲས་ལས་གཅིག་ཡིན་ཞིང་། སྤྱི་ལོ653ལོ་ནས་བློན་ཆེན་སྟོང་བཙན་དང་མཉམ་དུ་བཙན་པོའི་རྒྱལ་ཁབ་སྐྱོང་བའི་སྲིད་ཀྱི་འགན་ཆེན་པོ་ཕྲག་ཏུ་བཞེས་ཏེ་ཞིང་ལས་ཀྱི་ཁྲལ་བསྡུས་ཤིང་། ལོ་དེར་མདོ་སྨད་དུ་བྱུང་བའི་ཀམ་ཁྲི་བཟང་བྱེ་འདའ་ཞེས་པའི་དགྲ་ངན་དེ་བློ་རིག་པས་ཚར་གཅོད་བྱས་པར་གསལ། དེ་ནས་ལོ་དྲུག་འགོར་བའི་རྗེས་ཀྱི་གནས་ཚུལ་དེ་ཏུན་ཧོང་གཏེར་ཡིག་ལས། ལུག་གི་ལོ(སྤྱི་ལོ659)ལ་བབ་སྟེ་བཙན་པོ་སྤྲགས་ཀྱི་ཤ་ར་ན་བཞུགས་ཤིང་བློན་ཆེན་སྟོང་བཙན་འ་ཞ་ཡུལ་ན་མཆི་སྟེ།ད་རྒྱལ་མང་པོ་རྗེས། མཚོ་ནག་སྟོང་རུར།རྒྱ་སེའུ་དེན་པང་དང་། ནོལ་ཐབས་བགྱིས་ཏེ། ད་རྒྱལ་གྱང་གུམ་ཤིང་བརྒྱད་ཁྲི་སྟོང་ལ་རྡུགས་ཕར་ལོ་གཆིག་ཅེས་བཀོད་པ་དེ་ལས། ད་ལྟའི་དུང་རི་མཚོ་བྱ་བར་བློན་ད་རྒྱལ་མང་པོ་རྗེས་གདོང་དམར་བོད་ཀྱི་དམག་དཔུང་ཆིག་སྟོང་ལྷག་གི་རུ་འདྲེན་བྱས་ཏེ། རྒྱ་དམག་ཁྲི་ཕྲག་བརྒྱད་ཙམ་ལ་རྒོལ་རྡུང་བཏང་སྟེ། གཡུལ་ལས་རྒྱལ་བའི་རྒྱལ་ཁ་ཆེན་པོ་བླངས་མཐར། རང་ཉིད་ཀྱང་ཐེངས་དེའི་དམག་འཁྲུག་གི་ཁྲོད་དུ་སྟབས་མ་ལེགས་པར་གཅེས་སྲོག་བློས་བཏང་མཛད་པ་གསལ། བློན་ཆེན་ཁོང་གཤེགས་རྗེས། རྗེས་འབྲངས་དམག་མི་རྣམས་ཀྱིས་ཁོང་གི་རླབས་ཆེན་གྱི་གཟུགས་བརྙན་དེ་ནམ་ཡང་མི་བརྗེད་པར་བྱེད་ཆེད། སྐབས་དེའི་ལུགས་སྲོལ་བཞིན་ད་ལྟའི་རི་ཆེན་འདིའི་སྟེང་དུ་རྡོའི་བང་སོ་བཏབ། རྗེས་སུ་སྐྱུང་ཚ་དམག་དཔོན་དང་ཁྲོ་ཚ་དམག་དཔོན་གཉིས་ཀྱིས་དར་རྒྱལ་རྡོ་མཁར་ནས་རྒྱ་དམག་ནག་རི་སྒང་བར་དེད་ཅེས་པའི་ལོ་རྒྱུས་ཡོད། ཕྱིས་སུ་ཨ་མྱེས་དར་རྒྱལ་ཞེས་གཞི་བདག་ཏུ་བཀུར་སྲོལ་བྱུང་སྟེ་ཆེས་གཉན་ཅན་གྱི་ཡུལ་ལྷར་གྱུར་པ་རེད།

ཨ་མདོ་མཚོ་སྔོན་ལ་མཚོན་ན། མཚོ་སྔོན་མཐོ་སྒང་ནི་འཛམ་གླིང་གི་ཡང་རྩེ་སྟེ། མདོ་དབུས་མཐོ་སྒང་གི་བྱང་ཤར་དུ་གནས་ཤིང་། ས་དབྱིབས་མཐོ་ཞིང་གནམ་དུ་ཟུག་པས་སྐད་གྲགས་འཛམ་གླིང་དུ་ཆེ།ཆུ་མཚམས་དམའ་ཤོས་ནི་ཤར་ཁུལ་མིན་ཧོ་རྫོང་གི་ལུང་ཞོལ་མདོ་སྟེ། ཆུ་མཚམས1600ཡིན་ལ།མཐོ་ཤོས་ནི་ཤིན་ཅང་དང་འབྲེལ་མཚམས་ཀྱི་ཨར་ཀི་རི་བོའི་མོ་ནོ་མ་ཝ་རི་རྩེ་སྟེ་ཆུ་མཚམས་སྨི7720ཡོད།རྨ་ཆུ་དང་ཙོང་ཆུའི་གཞུང་ལུང་དང་ཚ་འདམ་གཞོང་སར་སྨི2000ནས3000ཡོད་པ་མ་གཏོགས། ས་ཆ་མང་ཆེ་ཤོས3000ནས4500སླེབས་ཡོད། འཕར་ཆག་སྙོམས་ཤིང་རྒྱ་ཆེ་བའི་མཚོ་སྔོན་མཐོ་སྒང་དུ་འབོད་དོ། ས་རྒྱུས་དང་གནམ་གཤིས། གཤིན་ས། རྩི་ཤུན་སོགས་མི་འདྲ་བས། ས་དབྱིབས་ཀྱི་ཁྱད་ཆོས་མངོན་སུམ་ཡིན་ཞིང་ས་དབྱིབས་ཁག་གསུམ་དུ་ཕྱེས་པ་སྟེ། མདོ་ལ་ས་ཁུལ་དང་ཚ་འདམ་གཞོང་ས་ཁུལ། མཚོ་སྔོན་ལྷོ་རྒྱུད་མཐོ་སྒང་ས་ཁུལ་བཅས་སོ།།

ཆུ་ཀླུང་།

མཚོ་སྔོན་ནི་ཆུ་ཀླུང་མང་པོའི་འབྱུང་ཁུངས་ཡིན་ཞིང་གཙོ་ཆེ་བ་རྨ་ཆུ་དང་འབྲི་ཆུ། ཟླ་ཆུ། ཉག་ཆུ། རྒྱལ་མོ་རྔུལ་ཆུ་སོགས་ཡོད། གྲགས་ཆེ་བ་འགའ་བརྗོད་ན།

1.འབྲི་ཆུ།

འབྲི་ཆུ་ནི་རང་རྒྱལ་གྱི་ཆུ་ཆེན་འབྲི་ཆུའི་སྟོད་རྒྱུད་ཀྱི་གཙང་བོའི་ཨ་མ་ལྟ་ཞིག་ཡིན་ཞིང་། དེ་ནི་གདང་ལའི་རི་རྒྱུད་རྒྱ་ལ་རྩེ་ཟླུམ་གྱི་ལྷོ་ནུབ་ཕྱོགས་ནས་བབས་ཏེ། མཚོ་སྔོན་གྱི་ཡུལ་ཤུལ་དང་། བོད་ལྗོངས། དཀར་མཛེས་དང་བདེ་ཆེན་བཅས་ཀྱི་བོད་རིགས་ས་ཁུལ་གྱི་རྫོང14ལ་བཞུར་ཞིང་།བོད་ཡུལ་གྱི་བཞུར་རྒྱུན་རིང་ཚད་སྤྱི་ལེ2806དང་། སྤྱིའི་རིང་ཚད་ནི་སྤྱི་ལེ6300ཡིན་ལ།གངས་ལྗོངས་ཀྱི་འབབ་ཡུལ་གྱི་རྒྱ་ཁྱོན་སྤྱི་ལེ་གྲུ་བཞི་མ3494ཡོད།

2.རྨ་ཆུ།

རྨ་ཆུ་ནི་མཚོ་སྔོན་ཞིང་ཆེན་དཀྱིལ་གྱི་ཕྲལ་རིང་རིང་མོའི་ལྷོ་རྒྱུད་ནས་བབས་ཏེ། མཚོ་སྔོན། སི་ཁྲོན། ཀན་སུའུ། ཉིང་ཞ། ནང་སོག ཧྲན་ཞི། ཧྲའན་ཞི། ཧོ་ནན་ཏེ་ཞིང་ཆེན་དགུ་དང་རང་སྐྱོང་ལྗོངས་གཅིག་བཅས་བརྒྱུད་ནས་པོ་ཧེ་རྒྱ་མཚོར་ཞུགས། བོད་ཡུལ་དུ་རྨ་ཆུར་གཙང་ལག་གྲགས་ཆེ་བ་ནི་དར་ལག་ཆུ། རྩེ་ཆུ། གསེར་ཆེན་ཆུ། ཆུ་སྔོན། འབའ་ཆུ། དགུ་ཆུ། ཙོང་ཆུ། ཀླུ་ཆུ། བསང་ཆུ། འཇུ་ལག་ཆུ་སོགས་ཡོད།གངས་ལྗོངས་སུ་བཞུར་རྒྱུན་རིང་ཚད་སྤྱི་ལེ1693.8དང་། སྤྱིའི་རིང་ཚད་སྤྱི་ལེ5464ཡོད།

3.ཟླ་ཆུ།

ཟླ་ཆུར་གཙང་ལག་རྫ་ཆུ་དང་ངོམ་ཆུ་གཉིས་ཡོད་པ་ལས། རྫ་ཆུ་ནི་མཚོ་སྔོན་རྫ་སྟོད་རྫོང་ཁོངས་རི་བོ་ཤྭ་ར་སྐྱ་ནས་འབབ། ངོམ་ཆུ་ནི་བོད་ལྗོངས་ཧོར་སྦྲ་ཆེན་རྫོང་ཁོངས་ཝ་མོའི་ལའི་རྒྱུད་ནས་བབས་ཏེ། ཆབ་མདོ་གྲོང་བརྡལ་དུ་རྫ་ཆུ་དང་འདྲེས་ནས་སྨར་ཁམས་རྫོང་བརྒྱུད་ཡུན་ནན་དུ་བཞུར་རྗེས་མེ་ཀོང་གཙང་བོ་ཟེར། དེ་ནས་འབར་མ། ལོ་སི། ཐེ་ལན། ཁམ་ཕུ་ཁྲེ ཝེ་ཐེ་ནམ་སོགས་བརྒྱུད་མཐར་ཀྲུང་གོའི་རྒྱ་མཚོ་ལྷོ་མར་ཞུགས། བོད་ཡུལ་གྱི་བཞུར་རྒྱུན་རིང་ཚད་སྤྱི་ལེ760ལྷག་དང་། འབབ་ཡུལ་རྒྱ་ཁྱོན་སྤྱི་ལེ་གྲུ་བཞི་མ45080ཡོད།

4.ཉག་ཆུ།

དེ་ནི་མཚོ་སྔོན་ཡུལ་ཤུལ་ཁྲི་འདུ་རྫོང་ནས་འབབ་ཅིང་། ཡུལ་ཤུལ་དང་དཀར་མཛེས་བཅས་བོད་ཁུལ་གྱི་རྫོང་བརྒྱད་བརྒྱུད་པ་དང་། བོད་ཡུལ་གྱི་ཆུ་རྒྱུན་དེའི་རིང་ཚད་སྤྱི་ལེ༨༥༠སྣང་།

5.རྒྱལ་རོང་རྒྱལ་མོ་རྔུལ་ཆུ། དེ་ནི་ཨ་མདོ་མགོ་ལོག་ནས་ཐོན་ཏེ། རྔ་བའི་འཛམ་ཐང་ཆུ་ཆེན་ལ་འདྲེས་ནས། དཀར་མཛེས་བཅས་བརྒྱུད་ནས་བཞུར་གྱི་ཡོད་ལ་བོད་ཡུལ་གྱི་བཞུར་རྒྱུན་རིང་ཚད་སྤྱི་ལེ800ལྷག་དང་འབབ་ཡུལ་སྤྱི་ལེ་གྲུ་བཞི་མ3000ཡོད་དོ།  །

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག