མདུན་ཤོག- གནས་སྐོར།- མཚར་སྡུག་ཡུལ་སྲོལ།

བོད་མིའི་སྦྲ་གུར་དང་སྦྲ་ཁྱིམ་གྱི་ངོ་སྤྲོད་མདོར་བསྡུས།

  ཡོང་ཁུངས། མཚོ་སྔོན་པོ་དྲ་བ།  2014-08-21 16:22

དང་པོ། སྦྲ་གུར་ངོ་སྤྲོད་རགས་བསྡུས།

འབྲོག་ཁུལ་དུ་ཁྱབ་ཆེ་བ་ནི་སྦྲ་གུར་ཡིན། སྦྲ་ནི་ཁུང་རྩིང་འཁེལ་འཐག་བྱས་པ་ལས་བཟོས་བའི་རུས་སྦལ་གྱི་དབྱིབས་ཅན། རུས་སྦལ་གྱི་དབྱིབས་དེས་ས་དགྲ་ཁོག་པས་སྦྲ་མིག་གང་དུ་ཕུབ་ཀྱང་ས་དཔྱད་མི་དགོས་ཞེས་གྲགས་ཏེ། ནང་ཀ་བ་བཞིའམ་དྲུག་ཅན། ཕྱིར་ཆོད་ཐག་མང་པོ་དང་ལྡན་པ་ཞིག་སྟེ། བོད་ཀྱི་འབྲོག་ཁུལ་ཀུན་ལ་ཁྱབ་པ་རྒྱ་ཆེ་བའོ།།

ནག་ཚང་ནི་རྒྱུ་གོང་དང་འདྲ་བར་ཁྱོན་གོང་གི་སྦྲ་ལས་ཆུང་ཞིང་དབྱིབས་གྲུ་བཞི། ནང་དུ་མི་ལྔ་དྲུག་རེ་ཤོང་བའི་སྦྲ་ཁྱེར་བདེ་བ་ཞིག་ཡིན། གུར་འགོ་ནག་ནི་སྟེང་ཁེབས་རེ་ནག་གི་མཐོངས་ཅན་འདབ་ར་རས་དཀར་གྱིས་བཟོས་པའི་ནང་དུ་མེ་བུས་ཀྱང་མི་གནོན་པས་ཐབ་ཚང་དུ་སྤྱོད་པའི་སྦྲ་མ་གུར་ཞིག་ཡིན། བསིལ་གཡོལ་ནི་སྟེང་ཁེབས་ཙམ་ལས་འདབ་ར་མེད་པ་ཆར་པ་དང་ཉི་འོད་ཁོག་ཙམ་གྱི་རས་གུར་ཁྱེར་བདེ་ཞིག་ཡིན། གུར་མོ་ཆེ་ནི་རྒྱུ་རས་དཀར་གྱིས་བཟོས་ཤིང་སྟེང་དུ་རས་ནག་གི་མཐའ་ཤན་དང་པ་ཏྲ་སྣ་ཚོགས། སྒོའི་སྟེང་དུ་དུང་ཕྲེང་དང་རས་དམར་མཐིང་སེར་གསུམ་གྱི་འཇའ་འཕུར་ཅན་ཆེས་ཆེ་བའི་ནང་མི་སྟོང་ཚོ་རེ་ཤོང་བ་ཡོད་དོ། གཟིམ་གུར་ནི། སྟེང་དུ་རྣམ་བཅུ་དབང་ལྡན། པ་ཏྲ་འཇའ་འཕུར་སོགས་ཀྱིས་ མཛེས་པར་བརྒྱན་པའི་རས་དཀར་གྱི་གུར་ཆུང་མི་བཞི་ལྔ་ཙམ་རེ་ཉལ་ཆོག་པ་ཞིག་ཡིན། ཚོགས་གུར་ནི་དགོན་པའི་དབྱར་ཐོག་ཏུ་སྒྲུབ་མཆོས་རིགས་འཚོགས་པར་སྤྱོད་པའི་གུར་ཞིག་སྟེ། ཕལ་ཆེར་བར་སྟེང་དུ་ཟངས་གསེར་གྱི་གཉྫི་ར་དང་ཆུ་སྲིན་སོགས་ཀྱིས་བརྒྱན་པ། ཆར་ཁེབས་དང་གུར་གྱི་སྟེང་ཁེབས་གོང་འོག་གཉིས་ཡོད་པའི་ཐོག་རི་དྭགས་ཆོས་འཁོར་དང་པ་ཏྲའི་སྤྲས་ཀ་ཅན། ཆོད་ཐག་རྩིད་པ་དཀར་ནག་གཉིས་ཀྱིས་བསླས་པ་དང་ཡང་ན་བསྒྲིལ་བར་རྩིད་འཕན་དམར་པོ་འདོགས་པ། ནང་ཆར་རླན་གྱིས་ཚོས་མི་ལོག་པའི་རས་ཁྲ་སྤུས་ལེགས་ཀྱི་མང་ཤ་ཅན་ཞིག་གོ། ཕྱིང་གུར་ནི། ཕྱིང་བ་ཕྱི་ནང་རིམ་པ་གསུམ་ཅན་ཕྱི་རས་དཀར་མཐུག་པོས་གཡོགས་པ། དབྱིབས་ཟེའུ་དང་འདྲ་བར་སྟེང་ཁེབས་དང་འདབ་ར་སོ་སོར་དབྱེ་ཆོག་པ། ནང་དུ་ཤིང་གི་རྩིབས་མས་དྲ་བ་ལྟར་བྱས་པས་ཆོན་ཐག་མི་དགོས་པ། དགུན་པ་ཤིན་ཏུ་དྲོད་པོ་ཞིག་སྟེ། སོག་པོའི་ཡུལ་ནས་དར་ཡོང་བ་ཞིག་ཡིན་པས་སོག་གུར་ཞེས་ཀྱང་བརྗོད། གུར་ཟུར་བརྒྱད་པ་ནི། སྟེང་ཁེབས་ཀྱང་འདབ་ར་དང་འདྲ་བའི་ཟུར་བརྒྱད་ཅན་ལ་པ་ཏྲ་དང་འཇའ་འཕུར་ཅན། འདབ་ར་ངོས་བརྒྱད་ལ་རྟགས་བརྒྱད་དང་རྫས་བརྒྱད་ཀྱི་རི་མོས་མཛེས་ཤིང་། རས་ནག་པོ་ལྕགས་རི་ཅན་ཞིག་གོ། སྟག་ལྤགས་ཀྱི་གུར་ནི་མཐོང་དཀོན་པ་ཞིག་སྟེ། ཁམས་ལི་ཐང་གི་གཡོན་རུ་དཔོན་པོས་སྟག་ལྤགས་བརྒྱ་ལྷག་གིས་བཟོས་པའི་གུར་དབྱིངས་སོག་གུར་དང་མཚུངས་པ་ཞིག་ཡོད་པ་དེ་ད་ལྟ་དཀར་མཛེས་ཁུལ་བོད་ཀྱི་རིག་དངོས་བང་མཛོད་ཁང་དུ་ཉར་ཡོད།།

གཉིས་པ། འབྲོག་པའི་འཚོ་བ་དང་སྦྲ་ཁྱིམ།

འབྲོག་མི་དག་གི་རྒྱུན་གྱི་སྡོད་གནས་ནི་རྩིད་རེས་བཟོས་པའི་སྦྲ་ཆེ་ཆུང་དག་ཡིན། དེའི་རྒྱུ་མཚན་ནི་གཅིག་ནས་འབྲོག་ཡུལ་དུ་ཤིང་ཆའི་རིགས་ཧ་ཅང་དཀོན་ཞིང་། དགོས་ངེས་པའི་སྦྲའི་ཀ་བ་སོགས་ཀྱང་ཧ་ཅང་ས་ཐག་རིང་ཞིང་འགྲུལ་བཞུད་བྱེད་དཀའ་བའི་ཡུལ་ཁག་ནས་འཐོན་དགོས་ཀྱི་ཡོད་པ་དང་། གཉིསནས་འབྲོག་དམངས་ཀྱི་འཚོ་རྟེན་གཙོ་བོ་ནི་དེ་དག་ལ་གང་ཡོད་པའི་སྒོ་ཕྱུགས་དག་ཡིན་ཞིང་། སྒོ་ཕྱུགས་ནི་རྟག་པར་རྩྭ་ཆུ་བཟང་མིན་ལ་བརྟེན་དགོས་པ་ལྟར། དབྱར་དགུན་སྟོན་དཔྱིད་ཀྱི་དུས་སོ་སོར་སྡོད་ཡུལ་སྤོ་དགོས་པས་སྤྱིར་ཁང་ཁྱིམ་གྱིས་ཕན་ཐོགས་མེད་ཅིང་སྦྲ་ཁྱིམ་དེ་མེད་དུ་མེད་རུང་བའི་སྡོད་གནས་གཅིག་པུ་དེ་ཡིན།

འབྲོག་པའི་སྦྲ་ཕལ་ཆེ་བ་ནི་ཧ་ཅང་ཆེ་ཞིང་སྤུས་དག་པོ་ཤ་སྟག་ཡོད་འདུག་ཅིང་། དེ་དག་ནི་འབྲོག་མི་རང་ཉིད་ཀྱི་ལག་ཤེས་ལ་བརྟེན་ནས་འཁལ་འཐག་བྱས་པའི་རྩིད་རེ་ནག་པོ་འབའ་ཞིག་གིས་བཟོས་པ་རེད། སྦྲ་ཆེན་པོ་འགའ་ཤས་ཀྱི་ནང་དུ་ཀ་བ་བཅུ་གཉིས་དང་། ཡང་ན་བཅུ་དྲུག་ཙམ་ཡོད་འདུག་པ་དང་། སྦྲའི་ཕྱི་ལོགས་སུ་ཆོན་ཐག་རིང་ཐུང་ཧ་ཅང་མང་པོ་ཞིག་ཡོད་པ་རེད། འབྲོག་པའི་གཞོན་ནུ་དག་གིས་ཁེད་རྩོད་པའི་ཚེ། གཡག་ཡུ་བརྒྱ་ལ་སྣ་ཐག་གཅིགཅེས་པའི་དོན་གང་རེད་ཅེས་དྲིས་པའི་ལན་དུ། དེ་ནི་ཕྲེང་བ་རེད་ཅེས་དང་། ཡང་གཡག་ཡུ་གཅིག་ལ་སྣ་ཐག་བརྒྱ་ཅེས་པའི་དོན་གང་རེད་ཅེས་དྲིས་པའི་ལན་དུ། དེ་ནི་སྦྲ་ཆེན་རེད་ཅེས་ཤོད་སྲོལ་ཡོད་འདུག་པ་དེ་བདེན་པ་འདྲ་ཞིག་སྣང་།

སྤྱིར་བཏང་སྦྲ་ཕུག་ནས་སྒོར་ཁ་བལྟས་པའི་གཡས་ཕྱོགས་ཀྱི་མིང་ལ་མོ་སྦྲ་ཞེས་བ་སྟེ། དེའི་ནང་དུ་རྟག་པར་བུད་མེད་ཀྱི་རིགས་རྣམས་སྡོད་ཅིང་། ཞོ་མར་ལ་སོགས་པ་དཀར་ལས་ཀྱི་རིགས་གཙོ་ཆེ་བའང་དེའི་ནང་དུ་བྱེད་ཅིང་། སྦྲ་ཆེན་འགའ་ཤས་ལ་མོ་སྦྲའི་ནང་དུ་གཉེར་ཁང་ཟུར་ཆོད་བཟོས་པའང་སྣང་ངོ་། གཡོན་ཕྱོགས་ལ་ཕོ་སྦྲ་ཞེས་བ་སྟེ། རྟག་པར་ཕོའི་རིགས་དེར་གནས་ཤིང་། འགྲུལ་པའི་སྡོད་གནས་ཀྱང་དེར་བྱེད་པ་དང་། ཤ་སོགས་དམར་ལས་གང་བྱེད་དགོས་པའང་དེར་བྱེད་ཆོག་གི་ཡོད་པ་རེད། སྦྲ་ཆེན་ཕལ་ཆེ་བའི་ཕོ་སྦྲའི་ནང་དུ་མཆོད་ཁང་ཆུང་ངུ་རེ་ཟུར་ཆོད་བཟོས་འདུག་པ་དེ་དག་ཏུ་རྒྱུན་གྱི་མཆོད་གནས་འབྲེལ་ཆེ་བ་དག་བཞུགས་སྲོལ་ཡོད་པ་རེད། འབྲོག་མི་དག་གིས་མོ་སྦྲའི་ནང་དུ་ཤ་དམར་རྗེན་གཏན་ནས་ཁྱེར་སྲོལ་མེད་ཅིང་། གལ་ཏེ་ཁྱེར་བ་ཡིན་ན་གུང་ལྷ་འཁྲུགས་ནས་མི་ཕྱུགས་ལ་གོད་ཁ་འབྱུང་བར་བཤད་དོ། དེ་ཡང་མོ་སྦྲའི་ནང་དུ་གུང་ལྷ་ཞེས་བྱ་བའི་ལྷ་རྟེན་སོགས་ཕོ་སྦྲ་ལས་ཐ་དད་པ་ནི་གང་ཡང་མི་སྣང་ཞིང་། གུང་ཞེས་པའི་མིང་འདོགས་ཡུལ་དངོས་ནི་སྦྲའི་ཀླད་ཁུང་སྟེ། དེས་མཚོན་བྱེད་དུ་བྱས་པའི་མཚོན་བྱའི་ལྷ་ཞིག་ལ་ཡིད་བརྟན་བྱས་པའམ་ཡང་ན་གནའ་དུས་ཀྱི་ལོ་རྒྱུས་འགའ་ཞིག་ལ་ལྟོས་པ་གང་ཡིན་མ་ངེས་ཤིང་། ཡང་ཡ་མཚན་འོས་པ་ཞིག་ལ། འབྲོག་མི་དག་གིས་ཁ་ཆར་ཧ་ཅང་དྲག་པོ་འབབ་པའི་དུས་སུ་མ་གཏོགས་ཉིན་མཚན་གང་གི་དུས་ཡིན་ཡང་རུང་སྦྲའི་གུང་ཡོངས་རྫོགས་བསུམ་སྲོལ་མི་འདུག སྐབས་འགར་གཞོན་ནུ་དག་གིས་གུང་ཐག་འཐེན་ཆེས་པས་ཡོངས་རྫོགས་བསུམས་པའི་ཚེ་ཕ་མ་དག་ན་རེ། གུང་ནག་མ་བྱེད། དམུ་གབ་ཡོང་དོག་གི་ཅེས་ཟེར་ཞིང་གུང་ཅུང་ཟད་ཕྱེ་ནས་འཇོག་སྲོལ་འདུག

འབྲོག་མི་ཕྱུག་པོ་དག་གི་སྦྲ་ཆེན་གྱི་གཡས་གཡོན་དུ་ནག་ཚང་ཞེས་བྱ་བ་སྦྲའི་བཟོ་དབྱིབས་ཐ་དད་པ་ཆུང་ངུའི་གྲས་འགའ་རེའང་ཡོད་འདུག་པ་དེ་དག་ནི་ནང་གི་ཕ་མའི་སྡོད་ཁང་ངམ། བླ་མཆོད་ཀྱི་ཆེད་དམ། འགྲིམ་པའི་ཆེད་དམ། ལག་བཟོ་བ་སོགས་དགོས་པ་མི་འདྲ་བ་དག་གི་ཆེད་དུ་ཡིན་འདུག་པ་དང་། ཡང་གུར་ར་ཞེས་བྱ་བ་ཆུང་ངུ་དག་ཕྱུགས་ལྷས་ཀྱི་མཐའ་བསྐོར་རྣམས་སུ་ཡོད་འདུག་པ་དེ་དགེ་ནི་ཕྱུགས་སྲུང་བ་དག་གི་ཆེད་དུ་ཡིན་པ་རེད།

གཞན་ཡང་གཡབ་ཅེས་པ་ཚོང་འགྲུལ་པའི་ཆེད་དང་། རས་ཀྱིས་བཟོས་པའི་གུར་དང་། ཁྲ་གུར། ཅོག་གུར་སོགས་བཟོ་དབྱིབས་མི་འདྲ་བ་མང་དག་སྣང་བ་དེ་དག་ཀྱང་གནས་དུས་ཀྱི་དགོས་པ་མི་འདྲ་བ་དག་ལ་བརྟེན་ནས་བཟོས་པ་སྟེ། མདོར་ན་རོང་ཡུལ་གྱི་གྲོང་དང་གྲོང་གསེབ་ན་གནས་པའི་མི་དག་གི་མཁར་ཁང་ཆེ་ཆུང་སྣ་ཚོགས་པ་དག་དང་འདྲ་བ་ཡིན་ནོ། །

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག